1 Reyes 3 - Dupade Uruode

Salomón pota egı́ptogosode ore eduguéjna cuchábi uro ujetiga chóji gari

¹ Enga Salomón uté, jé aja egı́ptogosode ore eduguéjna cuchábi Faraón uté doi peduguéjna cuchábode udore isocabei ome ñane ujetiga ore cho dacáya iji ñane. Jecute Salomón cho dacotéji Faraón uro uaté, ga chijna uaté aja pidai uje i tu David Idai Jerusalén uté jé aja ujetiga chimate dagóchocoijná aja guesi iji uté, jé aja Pangarádejnai gajnei cochocoidaté, jé aja ujuyaquéode udore iji Jerusalén gai. Uje uté irógode qué déji dasagode gáyode iji udore uje Salomón di uaté údi.

² Mu iji deréjnane udore nanique ga gusu israélgosode ore chicha dẽrapáitigo cucha aja ore aseradéjnane jogadébeode iji cucarãte umarone, orónenie iji ore uniri uté. U gu uje cáma poraque guiguı́jnarique to ujetiga ore chedurase Pangarádejnai uté i ome doratique udore uñeque.

Dupade chisı́ome Salomón utaidode cucha ome

³ Ga Salomón uté chijnóra Pangarádejnai uté enga que áyipieraque chamurase dai casica David áyipie quigode ome re. E mu gusu uje Salomón jé isocabeque uje chibore dẽrapáitigo cuchiso ome Pangarádejnai uté iji jogate umarone udore, jé aja uje chãru cucha ai unérone nanique uje i tu inciénso gotórigui iji udore to.

⁴ Enga eduguéjnai uté chicáji ore gajmitique uje i tu Gabaón to ujetiga chipotame cuchade iji uté nanique. Ga ibijoi tu Gabaón uté iji pijogate umarone udore ore ujade jnese uje jogadébegome ore nanique gu. Enga Salomón chicha dẽrapáitigo cucha aja nanique uje chise 1.000 iji ore aseradéjnai uté gai.

⁵ Enga iji Gabaón uté ga Pangarádejnai chiqueta raja Salomón nanique iji dejai ga Dupade catecã́ri uté iji urigode, ga chojninga: –Ujetiga bajegaitique cucha déji yu, ga atáji yu.–

⁶ Ga Salomón chojningame uté: –Bango bosõraquédatéi ome baroi David nanique, uje yai u uté. Chamáñaje uté dopı́si bojningane cucha udore, ga susı́pise dadode guio iji baquei gatuaque ome dáringai ũré, ga aregue uté áyipie ome ua. Ga bajnera uté gajnéone bosongaquédatéo údi ome to, uje bası́ome uté abi ome jetiga chácariji uté charipi cuchábi uté gai. Enga cuchade udore tocade iji de diri.

⁷ Urénga, Pangarádejnai Dupade á, bapésu baroi uyu ga e yugúsiji yai David ucácasicá jogadi ome yúringai eduguéjna, uje qué jnacare uyu mu. Ga que yiraja yisocáringome yúringárique pangarate gotique.

⁸ Uje baroi tuyu, yugúsiji barasade udore ore ajãrójna iji de, uje bajegaite ore nanique. Uje ayoré uásejna udore ore ga que pisecarãte ore jeta pirajaque ore eruénique.

⁹ Jecute be ga apésu yúringárique áyipierãque ome baroi tuyu, jeta serẽrája yáyipie ome ua. Yigaidi u gu ujetiga jé ũrepise yu ujetiga yajmita cuchade udore aja quedéjnane iji yurasade udore ujade, jeta yiraja cucha arégode quigode, jeoga cucha noñatígo isocade ore iji ñane. ¿Uje a gosi urásu jeta chimécãre dáringáraque pasuté ome barása uatigájnane unojo jeta timı́ninga cuchade aja quedéjnane iji ore ujade a?–

¹⁰ Ga jé u uje Pangarádejnai nı́na re iji daquei ome Salomón uté uru quigode udore.

¹¹ Enga Dupade chojningame uté: –¡Chimo jóroque re! uje que bataidode u ujetiga umarejna bacuecaringuérique iji erámi udé, jeoga bajnetı́go cucha uásejna, jé aja uje que atṍri yu ome bamajosórone jeta pejnaque udore ore, mu batṍri yu ome pirajatigade ujetiga ajmita cuchade udore aja quedéjnane iji barasade udore ujade, jeta ũrepise ua ome udore quigode.

¹² Cajire to uje e yichajnai baru quigode udore iji de. Ga jé u uje yisı́ome báyipie irajaté ome ua ujetiga cuchade udore chácari udore paque ome báringai áyipierãque. Uje que pimo bajnúrique ica iji yoquiquigade. Enga a jé ca uñeque déji jne jeta jé cho basocade udore iji yoquiquéode to.

¹³ Ga yisı́omeone cucha u udojo jnese to ome ua uje que atai yu ome mu. Uje uñai u báringárique ataque, jeta bagúcharigo nanganata iji bejode; jé basa ga jõrai u báringárique pisı́gai uté. Enga a jé ca toc eti uñeque cho ua jne ome basocade udore iji peduguéjna cuchátigo ore ujade jnese iji erámi tudé, jé aja bacuecaringuei uté eruénique.–

¹⁴ Enga Pangarádejnai qué jno daruode údi ome Salomón uje chojninga: –Ajna yisocade aja quedéjnane, jetiga ajuse yáyipie quigode guio uje estatutos u, jé aja yiroqué gajnéone cucha udore, uje bai casicaite David jé adi u uté uje chajna udore. Ujetiga arate uté aja isocade udore, enga a uyu u ujetiga yajnerame dirode ome bacuecaringuei jne.–

¹⁵ Enga Salomón cho cuyuque nanique, mu ¡urénga, a uricho udore! Ga jnoji uté ga di iji Jerusalén enga doi Pangarádejnai uruode pi cajo uté iquei ujeta chibore dẽrapáidode cuchiso ome Pangarádejnai iji jogadi uté. Enga tẽrápo dẽrapáidode cucha uñane ome to rı̃ uje pajesereringai gajnecho udore, uje gaidi u gu ujetiga pajesereringai déji Dupade, ore ome ñane. Cucha dacadode unojo quigade ga jé u uje Salomón pésu daninaquédatéi ome daróquegatéode ore jnese, jeta ore taguı́ji ñane gari.

Pijoque Salomón irajatı́gadatéi ome urasade udore nanique

¹⁶ Enga jé u nanique uje chequé dibéchoquı́ gáredie ore tibágui eduguéjna cuchábi Salomón uté. Enga ore cháguena iquei ujetiga uté chucué ũré tiji ore ome ore ibotaqué gajnéone cucha ome ñane.

¹⁷ Ga chequedı́e udire uña chojningame uté nanique: –Yeduguéjná, chequé udaque yoquiguı́jnai jé chojmara, ga uaté déji guijnatajei to uje yababi basosi dirı́ca.

¹⁸ Uje yica base bajaque, ga e guejnane dire gadióguiji yababi suté batigai yui to, ga jé u uje quene uaté ica base to. Enga yugúcoi ajei jnese. Que uñeque déji yocari iji guijnatajei uté, gusupúsu uje gare uyoque iji uté.

¹⁹ Ga dejaque uñai ga uaté ababi tosi uje uaté a moji dababi gai gu ga chajo ujñari aja jnumi.

²⁰ Enga uaté niji iji dejnı́nga gatócoro ga toria chisa yababi iji yirosadi, ga jnosi údi aja darúdi. Mu barogué uyu ga que yunı́na uaté gotique, uje moi chujépise yu. Enga jé u uje uaté chicha dape togábi suté aja yurúdi.

²¹ Uje yı̃riji iji durasé, ga a e yacucã́rirase yababi to, mu ¡chimo jóroque re! uje togape. Mu yidójnangapı́sa uté edodie uje e diripise, enga jı̃raque yiraja uje que yape basugábi u uté gotique.–

²² Mu chequé uña chotigase uruode ga chojninga: –Úngare. Yababi su disi uecábi, jé basa ga disi togábi suté ga jé babi u.– Enga jé u uje dara bajé iji ore chajnai jõra uruode, ga chojninga: –Úngare. Bécãre quigode, uje bababi su togábi suté, jé basa ga uecábi su yababi.– Enga ore adi jé u uté uje ore botare ñane iji eduguéjna cuchábi uté iquei.

²³ Ga jé u uje eduguéjna cuchábi Salomón uté narare enga chojninga: –Cachi uacası́yo uacabáyode jnese ome disi udé. Uje uacuña chojninga: "Uecábi sudé ga yape, jé basa ga bababi e tosi." Enga jõra chotigase, ga chojninga: "Úngare. Bababi e tosi, jé basa ga disi uecábi sudé ga yabape."–

²⁴ Enga eduguéjna cuchábi tibidi gosi iji dejoi ga chojninga: –¡Ajna queségodogóde uñéngaja de!– Ga jé u uje gosi di queségodogóde uñeque údi aja Salomón uté.

²⁵ Ga jé u uje eduguéjna cuchábi uté chósi tome daruode: –Be ga ajugósi disi uecábi sudé iji gatócoro, ga ası́ome peque uñéngome chequé uña jne, jé basa ga ası́ome peque uñai ome ujo chequé uaté.–

²⁶ Enga disi uecábi suté datépise chosõripise dababi yui, jecute narare enga chósi tome deduguéjna cuchábi uté: –Yeduguéjná, bebi ga ası́ome disi uecábi suté ome ipotigato uaté, mu yijócha bajé údi ujetiga jé ca ası́ome pitoringárique ome suté.– Mu chequé uña uaté chojninga: –Be ga ajuguı́ji gatócoro. Enga a tosi, ga que bape, ga que yape to.–

²⁷ Enga eduguéjna cuchábi Salomón uté chajnai uaté uruode enga chojninga: –Be ga ası́ome disi uecábi ome dara bajé uaté, enga jé ca ajé gotique to, uje datépise jé u.–

²⁸ Enga jé u nanique uje israélgosode ore jnese chudute ore eduguéjna cuchábi Salomón uté ujnomei ome isocai uté uje ũrepise ome ajiritigade cucha udore quigode. Ga urasade udore tija uté ome irajatı́gadatéi. Ore chiraja gu uje Dupade jé guẽrate úringai áyipierãque ome jeta chiraja cucha uréone, cucha tágode ore iji ñane.