1 Reyes 22 - Dupade Uruode

Israélgosode ore eduguéjna cuchábi Acab uté áyipie e dépoji dajocaningárique ome sı́riagosode udore rı̃

¹ Israélgosode, sı́riagosode e ore guejnanie siqueré gadioque uje que ore dopoi dajocaningárique ome ñane nanique rı̃.

² Mu iji siqueré gadióguei uaté nanique ga judágosode ore eduguéjna cuchábi Josafat uté doi paseade iji israélgosode ore eduguéjnai Acab uté.

³ Enga deréjnane udore u uje Acab uté catecã́ri deminórone eduguéjna uje iroguipı́so udore, enga chósi tome ore: –¡Chimo jóroque re, uje yagutúgo yógome ujetiga yijnángopó yoquidai casica Ramot-Galaad iji sı́riagosode ore gari rı̃! ¡Uacamóño uje yocajneque uté arı̃a!–

⁴ Quigade enga Acab catecã́ri daquirai dojo eduguéjna Josafat to nanique ga chojningame: –¿Ama ajı́na yu to aja yoquijocaningárique ome sı́riagosode ujetiga yucugujnángoji ore iji Ramot-Galaad uté jne a?– Ga judágosode ore eduguéjnai Josafat chajnai Acab uruode ga chojninga: –Yoco ñane arı̃a, ga a yi báyipieragome jne. Cho jetiga yurasade upúsu barasade, ga jé chopo rı̃ ujetiga yachidode burica upúsu bachidode burica. Ga a yátago yógaja uaque ome bagaidi pocaninga yui jne.–

⁵ Josafat uruode udojo quigade, ga chopósi tome Acab rı̃: –Mu cucha chojmarai déji enga u jeta acuebi Pangarádejnai uté áyipiedie to ome ua bajaque, ome pocaningai yui jetiga yicoi jne.–

⁶ Enga jé u nanique uje israélgosode ore eduguéjna cuchábi Acab chamáta darógode proféta tácho ore aja ñane, uje ore batigai a jé chorase 400 uñeque nanique. Ga udore ore eduguéjnai Acab chojningame ore: –¿Ama ueradi tu ujetiga yucugujnángoji yoquida casica Ramot-Galaad uje déji sı́riagosode ore gari, jeoga jé dóji yoquijocaningai ome ore a?– Ga ore chajnai deduguéjnai uruode ga ore chojninga: –Be, uje a Dupa Pujnuéngaisṍri chicha ore idai aja bajmainie jne, Yoqueduguéjná.–

⁷ Mu judágosode ore eduguéjna cuchábi Josafat chojninga: –¿Ama jé ca Pangarádejnai iroi proféta qué déji de, jeta yicatecãcobi uté ome to a?–

⁸ Enga israélgosode ore eduguéjnai Acab chojninga: –Uñai qué déji arı̃a, jetiga yicatecãcobi ga chingome Pangarádejnai áyipiedie ome yoque jne. Ga uté i tu Micaı́as, ga Imla ujnacari tu uté. Mu yetaque uté yui, uje ı́jnoque ujetiga uerate uruode ome yajnéone cucha dacate ujetiga chisı́rase uyu. Uté chedu chatata cucha dacate gajnarétigo ujetiga chise yu jne.– Mu eduguéjnai Josafat chaquı̃́ra dojoi eduguéjna ome uruode udore uje chojninga: –A jé ca baruode urásu udore, Eduguéjná.–

⁹ Ga jé u uje israélgosode ore eduguéjnai Acab tibidi daróquegatéode uñai enga chojningame: –Aguitóyo ga jı̃raque ajnáño Imla uté ujnacari Micaı́as aja de.–

¹⁰ Iji deréjnai tuté enga israélgosode ore eduguéjnai Acab, jé aja judágosode ore eduguéjnai Josafat ore déji ñane gari iji ore pı́pidebei uté aja ore idai Samária ajei. Enga ore déji guesáringai uté uje jnumi tiroque iji dayaridi uté, ga ore chácariji dajnéone dayaripi ueracho udore gáyode. Enga ore chacája daguidé ueradedie, uje ore úringane eduguéjna pijogútodie u. Ga Acab irógode proféta tácho ucode déji ore gari to, uje udore jnese chatata cucha tocachuque piqueminórone iji ore eduguéjnane edominone.

¹¹ Enga Quenaana ujnacari Sedequı́as u proféta tágode udore uñai. Enga uté e pésu aquirájna ue gajnunie ica ome re iji guebei. Ga uté tibite, ga chósi te ome Acab ore: –¡Pangarádejnai uruode u udojo ome uaque é: "Beyoi sı́riagosode ga yacãra uacõráchatı́go aja ue gajnunie udire ome ore ga a ore úringane dequejnaque jogadi u jne!"–

¹² Ga jé u uje uté ujode proféta tácho jnese ore chirate uté aja uruode quigode to. Ga ore chojninga: –Be sı́riagosode ore iji yoquidai casica Ramot-Galaad uté enga a ejnápise ore jne, uje Pangarádejnai uté a chicha yoquidai casica aja bajmainie jne.–

¹³ Uje Acab uté irógode proféta tácho qué ore déji dáringane dara gai, mu Acab utocaidi casé e chise Dupade uruode júsõri Micaı́as uté ujetiga di údi, ga cho quique urúringome ore eduguéjnai yui ujetiga Micaı́as uté chirate Acab irógode proféta tácho udore aja ore uruode. Ga chojningame: –Yoqueduguéjnai tibidi ua que uje pota gu jeta chiraja Pangarádejnai áyipiedie jne ome pocaningai yui. Cajirape to uje proféta udore uñane jnese uru qui chojmara ome yoqueduguéjnai uje ore chatata cucha dacate piqueminórone ome uté, ga ueradı́piso ore uruode. Ga yijócha bajei údi jeta baruode jé cho ore uruode, ga ueracho to.–

¹⁴ Ga Micaı́as uté chajnai uruode ga chojninga: –Yisi ome yuru iyiejnane ome ua iji Pangarádejna Uecai iquei uje gusu yedu Pangarádejnai uté uru quigode jnese ome eduguéjnai uté ujetiga yicatecã́ri uté jne.–

Pangarádejnai iroi proféta Micaı́as chatata uje israélgosode ore eduguéjna cuchábi Acab a chise dagachodi jne

¹⁵ Uje Micaı́as e basája eduguéjnai Acab uté iquei, ga Acab uté catecã́ri ga chojningame: –Micaı́as, ¿ama ueradéjnarase ujetiga yipéco yoquijocaningai ome sı́riagosode ore jne a, ga yatiregópo yoquidai casica yoquibai to rı̃ uje i tu Ramot-Galaad? ¿Jeoga jé dóji yoquijocaningai ome ore a?– Ga Micaı́as chajnai uruode, mu chujñieta iji taningai, ga chojninga: –Ejẽ́, be ga acugujnáñoji ore, uje a ejnáño ore jne arı̃a. Uje a Pangarádejnai chichapo yoquidai casica aja bajmainie jne.–

¹⁶ Mu Acab chiraja uje cachi Micaı́as urúo daruode, jecute chósi tome: –Jecucha yiroque ua aja ujetiga edu baru uréone ome yu, uje bagúome Pangarádejnai i ome baru iyiejnane udore. Ga jé ca amera baringaquéringaja to.–

¹⁷ Ga jé u uje Micaı́as narare ga chósi tome daruode: –Yenominone dirı́ca ga cho jetiga pisidique israélgosode aja quedéjnane dirı́ca iji cucaranone dosadode. Ga ore gajnaminie su áyasabidie dirı́ca ga cho jetiga ca ore irodisónique ayoré cuse dirı́ca. Ga Pangarádejnai chojninga: "Israélgosode udore que ore eduguéjnarique cusipise. E ore eduguéjnai topı́si gu. ¡Yipésupú ga ore chajnı́rasaja daguı́jnane jne, uje yigaidi tu ujetiga pajesereringai déji ore!"–

¹⁸ Uje Acab chudute Micaı́as uté uruode ga catecãrápoi dojoi eduguéjna Josafat rı̃, ga chojningame: –¿Ama ca yingome ua que a uté jmapié ome uyu? Gusu chijna daru gajnaréngone quigode aja yu gatuaque. Enga érãtique chimera cucha arétigaja daru quitique uje chatata cucha dacate piqueminóningo ome yu.–

¹⁹ Mu Micaı́as uté cáma chejna Acab gajnéone Pangarádejnai urúo aja guesi ome uté, jecute qué jnopo údi gaté rı̃, enga chósi tome: –Angári yuruode udojo to uje tṍraji Pangarádejnai uté: Uje yimo yedominone to dirı́ca ga yimo Pangarádejnai iji gaté uje chácariji dayaripi ueradéjnai gai, ga uté iroque soldate dipeséode iji gaté jnese cháguena ejode, ga yimo uñane iji ãrachua qui, yimopo uñane iji arasé qui te rı̃.

²⁰ Ga yudúdapo Pangarádejnai uruode dirı́ca rı̃ uje catecã́ri darógode iji dejode ga chósi tome daruode ome ore: "¿Gosi iji uaque jne a, ujetiga angurase Acab áyipie jne enga apésu pocaningai unéningárique ome uté? Uje yigaidi tu gu ujetiga uté cugujnáji ore idai Ramot-Galaad uté, enga chise dagachodi iji dagaidi pocaninga uté." Ga yimopo iji yedominone rı̃ uje Pangarádejnai irógode gaté unirı́soño udore chucué dáyipierigui ga ore uruode chaca ñane ome pisocárique ujetiga uñeque chãra Acab uté.

²¹ Enga qué ore déji dáringane dara gai, mu pujopiéraque quene basája Pangarádejnai iquei ga chojningame: "A uyu u jne ujetiga yipésu unéningai ome Acab enga cho dajocaningame sı́riagosode udore ore." Ga Pangarádejnai chojningame: "¿O ringome Acab jne a?"

²² Ga pujopié uaté chajnai Pangarádejnai uruode ga chojningame: "A yiji jne ga a yijnare yu aja Acab irógode proféta tácho ore jnese, ga a yo pujopié aringaquéraque jne iji udore ore pijnanone. Ga a purupatáringa ore uruode quigode jne ome deduguéjnai Acab uté, mu uté a cho ũréji ore." Ga Pangarádejnai chajnai pujopié uaté uruode, enga chósi tome: "Ejẽ́, be ga ãra Acab uté, enga ajnué gai. Boco, apésu baruode udore aja quigode."–

²³ Uje Micaı́as quene chatata denominone udore ome Acab uté, enga jé u uje chopósi tome gaté rı̃: –Adójnangapı́sa yuruode, Yeduguéjná. Uje Pangarádejnai e chicha pujopié paringaquéraque aja barógode proféta tácho udojo pijnanone jnese. Uje Pangarádejnai jé upúsu uje chı̃́care cucha dacate gajnaréngone úringane tocachuque ome ua.–

²⁴ Uje Acab irógode proféta táiso uñai chudute Micaı́as uruode udore ga sose uté yui ga chinguı́ra dajmanai aja uré ¡pac! ome dajosipiedie. Enga uté u Quenaana ujnacari uje i tu Sedequı́as nanique. Ga uté chinguı́ra dabijnani aja Micaı́as uté uje chojninga: –¿Mu bojninga Pangarádejnai ujopié uaté isocárique que a, uje chiese jnoji yari ujetiga catecã́ri ua?–

²⁵ Ga Micaı́as chajnai Sedequı́as uté uruode enga chojninga: –Adójnangapı́sa yuruode udojo: A chise dı́nique jne enga a écãri jóroque bacoyapı́tigo aja quedéjnane iji guijnatajéode, enga a quene pijoguipise yuruode úringane ũréo ome ua iji diri tuté jne.–

²⁶ Uje ore eduguéjna cuchábi Acab chejnáreque Micaı́as uruode udore, enga jı̃raque chiroque darógode aja yui jeta ore chisa ga ore jno údi. Enga chósi tome ore: –Beyoi ga asayo uté, ga atire uté aja yoquidai udé Samária ajirisṍri uté uje i tu Amón, jé aja yujnacari uje i tu Joás.

²⁷ Ga ósi tome ore jne: "Yoqueduguéjnai Acab uruode chósi te ome uaque: 'Ajucho jnani udé gai iji ore jurúgayode jogadi. Ga gusu ası́ñome arurégabode ome, jé aja yodábode ome garósi, garósi jne. Enga uacasocai uté a jé chuságaja dı́nique jne ujetiga yı̃riápo yúringárique ayoré pórecajna údi iji yoquigaidi pocaninga uté.'"–

²⁸ Mu uje cáma ore jno Micaı́as údi enga qué nararápo gaté rı̃ ga chojningame Acab uté: –Ujetiga ãriapóji bagaidi pocaninga jne rı̃ ome báringai ayoré pórecajna enga a obiréjnapise jne uje que Pangarádejnai utocaidi tu yu ome uruode uje yatatame uaque que. ¡Adójnachopı́sa yuruode udojo é, uaque jnese uje uacagúsoi yirosadode é!–

Acab uté pésu jórogu dajocaningai ome sı́riagosode ore ga chise dagachodi iji uté nanique

²⁹ Ga jé u nanique uje israélgosode, judágosode ore eduguéjnane cháta raja ñane nanique, ga ore jnome dagaidi pocaninga yui ga ore quı́tequigája ore idai casicaite uje i tu Ramot-Galaad.

³⁰ Uje e ore chise daqui uté nanique ga Acab catecã́ri dojoi eduguéjna nanique uje uté i tu Josafat ga chojningame uté: –Josafat, acája báringai eduguéjna gajnenie baguidei jne. Jé basa ga a yacája soldate poritade iguidedie gajnunie jne.– Ga jé u uje israélgosode ore eduguéjnai Acab chacája soldate poritade iguidedie gajnunie nanique ujetiga ca pijoque úringai eduguéjna. Enga jé u uje quene doi pocaningai.

³¹ Mu sı́riagosode ore eduguéjna cuchábi e chisı́ome daroquéode ome dasoldádode ore eduguéjnane bajaque ome ore yui. Ga icatecãrainone eduguéjna udore u uje ore batigai u 32 enga ore choru uté gachidode guebéquedatéo uje pocaningane gajnecho. Ga sı́riagosode eduguéjna cuchábi uru quigode chósi tome ore: –Jé ca beyoi pocaningai ome soldate poritátique, jeoga soldádode ore eduguéjnarique uñeque gotique. Mu acueyopı́si israélgosode ore eduguéjna cuchábi ga ajéyo jne, enga eduyo uté ome úringai chuque.–

³² Ga jé u uje sı́riagosode ore gachidode guebéquedatéo orusórone ucode e ore jnome israélgosode yui ujetiga ore chujé ore eduguéjnai. Enga ore chimo judágosode ore eduguéjnai Josafat uté uje chacája dáringai eduguéjna gajnenie iguidei, enga ore chojningame ñane: –Que potigayaquérique déji yoque jõ uje israélgosode ore eduguéjna cuchábi tu uté.– Enga jı̃raque ore cugujnárasiji ujetiga ore chujé. Mu Josafat uté tibidi dejode.

³³ Ga quene ore chiraja uje que israélgosode ore eduguéjnai Acab u ga ore cha chucajningárome uté.

³⁴ Mu sı́riagosode ore iroi soldate poritátique chicho israélgosode udore ore gai, ga ojo que chijñaque Acab uté iguidode guebeque edátaque. Ga Acab uté qui tu dáringai toque yui uje cõráchaque pose uté gu. Ga jé u uje Acab uté chojningame daroi: –Amuchase bangurañai guebéquedaté ga yijı́ongome pocaningai iji dé uje ore ajnangoque yu.–

³⁵ Enga sı́riagosode, israélgosode ore chõre dajocaningai uté ome ñane ga que ore cho daja ome dáringane jõcaratácho iji deréjnai uté. Uje qué ore déji dajocaningai gai, mu Acab uté chipotingare re iji guebéquedatéi uté ajei, enga chajire sı́riagosode ore isoldádode iji datiógarei. Mu Acab uté iyoi iji ore yupı́di tamutapise ga yóreja jnumi iji guebéquedatéi uté chaquipie jé iji deréjnai uté. Enga quene chise guedéjnoringámi, enga jé u uje Acab topı́si.

³⁶ Uje guedé cási chaca nanique ga jé u uje israélgosode isoldádode ore chudute pibijnane uje chósi te: –¡Acayóji uaquedáningo, uacanı́ningo ore, jnani chojmara, chojmarane uaque jnese é!– Ga jé u uje ore básome dajocaningai nanique, uje ore eduguéjna cuchábi toi gu.

³⁷ Ga Acab urasade chijnoque deduguéjna casé aja ore idai Samária iji úringai toque údi, ga ore chicha ode aja dedai to.

³⁸ Udojo quigade enga ore jno Acab gachidi guebéquedaté údi aja dibéchoquı́die ore esãrapı́debéi yote iji ore idai Samária uté eruei ujetiga ore churu iyojna tiji ajei. Ga ore churu guebéquedatéi aja jnumi, mu dibéchoquı́die ore chẽ́sariji yodi uté to, jé aja uje tamocode chipese Acab iyoi tiji jnumi. Ga Pangarádejnai uruode quigode tocade ome Acab uté iji diri tuté nanique.

³⁹ Enga cucha dacate amirone jnese iji Acab uté úringai eduguéjna, jé aja ipesudode cucha jnese, ga purusãracho jnese iji darujna aode uñane nanique uje ore churúsãre israélgosode ore eduguéjnane adode iji udore. Ga ore urusarane udore chatata Acab iguı́jna cuchábi adode uje pésu nanique ome elefante ue gajnunie uje i tu marfil, ga ueradéjnapise nanique. Enga chatatapo Acab uté ipesudode pidáyo jnese to nanique rı̃.

⁴⁰ Uje Acab uté toi nanique ga ujnacari uje i tu Ocozı́as basája dayé uté charidi nanique ome dáringai israélgosode ore eduguéjna.

Eduguéjna cuchábi Asa uté ujnacari Josafat isocade u udojo iji dáringai judágosode ore eduguéjna nanique

⁴¹ Uje Acab uté guejnanie siquerei e gagájni nanique ome dáringai israélgosode ore eduguéjna, mu Josafat quene basája dai Asa casica charidi ome dáringai judágosode ore eduguéjna nanique.

⁴² Enga Josafat uté guejnanie siquerei chise 35 años nanique uje quene basája dáringai eduguéjna to, ga chácariji dáringai judágosode ore eduguéjna 25 años nanique iji dedai Jerusalén uté. Ga Josafat uté daté i tu Azuba ga Silhi uro uaté nanique.

⁴³ Ga Josafat uté chajnapise dai casica Asa ate ueradode iji jnumone nanique enga que cho cutúgome, uje pésu cucha arégode iji Pangarádejnai uté edominone gatuaque. Mu cucha gajnareque chojmarai déji uté, enga u uje que chejnápise ore aseradéjnane jogadébeode jnese gotique iji cucarãte umarone, orónenie iji daniri uté. Enga urasade jecucha ijo ore aseranone udore ome dẽrapáidode cucha, jé aja uje ore chãru cucha ai unérone iji to, uje que ore isocade urásu mu.

⁴⁴ Enga judágosode ore eduguéjnai Josafat uté adode uñai u uje chisi ome daru iyiejnane ome israélgosode ore eduguéjnai nanique ujetiga pajesereringai déji ore ome ñane.

⁴⁵ Enga cucha dacate amirone iji Josafat úringai judágosode ore eduguéjna, jé aja etotiguei uje choqui guesi ome ore, jé aja uté jocaningane adode, enga purusãracho jnese iji darujna aode uñane nanique uje ore churúsãre judágosode ore eduguéjnane adode iji udore.

⁴⁶ Josafat dai casicaite Asa uté isocai tu uje doi nanique ga tṍra jnanione aja guesode nanique iji daniri uje ore gaidode u ayoré gajnúone adode, ga ore gaidode upo punganinga quedéjnane adode ome ñane to nanique rı̃. Mu jnanione udore uñane qué déji ore uniri ujade to nanique. Ga dai jocãraque amirone u uje ujnacari Josafat chijócãre ore nanique iji daniri.

⁴⁷ Iji deréjnane udore nanique ga edómgosode udore ı́jnoque ore eduguéjna cuchátique nanique iji ore uniri, gusu eduguéjna poritátique déji uje ore chı̃́care intendente aja uté.

⁴⁸ Enga dirode udore u to nanique uje judágosode ore eduguéjna cuchábi Josafat chiroque darógode aja cucodatéode úringane pipesucho nanique. Ga ore ipesudode udore chopise társisgosode ore ipesudode cucodatéo nanique. Enga Josafat uté chiroguirase cucodatéode udore aja punire idájai Ofir nanique, ujeta ore dorási órodie oredie iji uté. Mu jı̃raque cucodatéode udore péropise iji edómgosode ore idai Esión-guéber uté, enga que ore pésupúsu viaje gotique.

⁴⁹ Enga cucha dacadode udojo quigade u uje israélgosode ore eduguéjnai Ocozı́as, uje Acab ujnacare uté, chósi tome Josafat uté: –Ajuéga ga yirógode cucode irajasóño ore cháta rágaja barógode cucode irajasóño, ga a ore nónarása ñane jne aja cuchade oredie jogadode udore.– Mu judágosode ore eduguéjnai Josafat chetaque uté áyipiedie nanique, ga que juéga gotique.

⁵⁰ Ga chise diri nanique uje judágosode ore eduguéjnai Josafat toi, ga ore chicha ode taja dai bajade jogadi iji dáqui casicaite David idai Jerusalén uté. Enga Josafat ujnacari basája charidi nanique uje i tu Joram.

Acab ujnacari Ocozı́as isocade u udojo nanique ome dáringai israélgosode ore eduguéjna

⁵¹ Uje siqueredie e chise 17 años uje Josafat uté chácariji dáringai judágosode ore eduguéjna, enga quene Acab ujnacari Ocozı́as uté basája dayé charidi nanique ome dáringai israélgosode ore eduguéjna. Enga Ocozı́as uté guejnanie siquerei gare uje uté chácariji dáringai israélgosode ore eduguéjna iji dedai Samária uté.

⁵² Mu Ocozı́as uté adode gajnarénguipı́so iji Pangarádejnai edominone nanique, uje chirate dayé, daté ore aja ore jmapié gajnarénguenie udire. Enga uté ajnai tupo Nabat casicaite ujnacari Jeroboam nanique rı̃, uje chiroque darasade israélgose aja pisijnaringuéone úringane pipesucho to.

⁵³ Uje Ocozı́as uté dopı́si dupa quedéjna Baal adode nanique, ga chichaga dagataidie aja jnumi iji Baal uté iquei ome úringai pisı́gai. Enga uté ijnimique Pangarádejnai, israélgosode ore angureni Dupade, ájningai ¡janipe! nanique, ga jé péropı́siji dai casica adode.