1 Reyes 21 - Dupade Uruode

Israélgosode ore eduguéjna cuchábi Acab uté jnari jezreélgosi Nabot uté acadie úvai jogadi ome re, jecute Acab acoté Jezabel uaté chucué dasocáringome Nabot uté úringárique chuque yui

¹ Iji cucha dacadode udore quigade nanique ga udojo tocade: Samáriagosode ore eduguéjnai Acab uté pota jezreélgosi acadie úvai jogadi uje chujé raja iguı́jna cuchábi ejoi nanique gu. Ga gajnesṍri uté i tu Nabot nanique.

² Ga Acab tibágui Nabot ujetiga chimesẽre áyipiedie ga juéga dajnei jnupe ome uté. Ga chojningame uté: –Ası́ome bacadie úvai jogadi ome uyu. Ga a jé yope yajnenguı́ji uté jne ome yacadie verdúras. Bamo arı̃a uje idógosipı́siji yiguı́jna cuchábi gu. Ujetiga amesẽre ga yipéco cámbio, ga a yisı́ome úvadie jogadi uñeque ome ua jne uje sué yiguı́jnai ejominóri gai. Jeoga bajéode urásu, ga a yo boré ome yiplátadie ujetiga etaque cámbio, enga a jé ueradépisei oredie jne.–

³ Mu Nabot chajnai Acab uruode ga chojningame: –Puyaguipise ome Pangarádejnai uté ujetiga yẽra yáqui gatéode gajnepı́di jnupe ome ua, Yeduguéjná. Uje yajnepite, ga a yájnape gatérigo ore cho dajnéngu jnumi udé to jne iji yiquigáningo.–

⁴ Udojo quigade ga Acab uté chajnı́ja daguı́jna cuchábi, mu edodie chı́sajame ga ájningarángaja dajesui. Chetaque jezreélgosi Nabot uruode udore quigode gu, uje chojninga: –A jé ca yẽra yai bajade ore gajnepı́di jnupe ome ua.– Uje Acab uté chise daguı́jnai nanique, enga chijnare raja damochápi ga terẽtáji gai. Enga chorei dedodie iji quedéjnai, enga cusu rome chagúi to nanique rı̃.

⁵ Enga a pijógome acoté Jezabel uaté uje áyuguhebátaque Acab ome cuchárique, jecute acoté tibágui iji mochádi, ga chojningame uté: –¿Ama báyuguhebátigade jé garãtı́gome ua ya? ¿Jé cuchárique u gu a uje que agu babotique to?–

⁶ Ga Acab chajnai dacoté uruode ga chojninga: –Yicatecã́ri jórogui jezreélgosi Nabot uté que ome acadie úvai jogadi. Ga yojningame uté: "Ẽra bacadie úvai jogadi ome yu, ga a yimate ua ome yiplátadie jne, jeoga apota ga a yi oré tome jogate uñeque jne iji siñeque jeta o bajnéngu yigaitique." Mu uté chósi tome yu: "A jé ca yẽra yacadie úvai jogadi ome ua jne."–

⁷ Ga acoté Jezabel chajnai dabai uruode ga chojninga: –¿Ama cuchárique u gu a uje eduguéjna cuchape ua iji barasade israélgose ore ujade, mu que be bajéode ome cuchade udojo? Ãriji ga agu babosode to, enga ca o báyugu ua ome cuchade. Uje a uyu u jne ujetiga yiji jezreélgosi Nabot uté acadie úvai jogadi ome ua.–

⁸ Ga jé u uje Acab acoté jı̃raque pésu darusarane iji dabai jogadi ome daringaquéode, ga chaguhéta darusarane dabai gai, uje chiese urusãracho. Ga chimate darusarane ga doi ga chajo odobe taja, uje ore chojningame udore "sello," uje abai gajneque to. Quigade enga uaté chiroque darusarane aja ore dai bajade jé aja pangarate ibijógode uje ore cho dedáji Nabot uté idai Jezreel to.

⁹ Ga Jezabel uaté urusarane quigode chósi te: –Angome barasade jetiga ore cho dayágome re jnese iji diri tudé. Enga apéso uacague, ga beyoi uacarásai uje i tu Nabot ga ajnáño aja uacague ga acha uté aja uacaquei jne.

¹⁰ Mu be jnani gáningo uje cucha bisideque ore enga acha ore aja Nabot uté tiógarei ujetiga ore chijnime darade ome uté. Ga a ore urupatáringane a jé chorase udé ome uté: "Nabot, badojnóngaja Dupade, jé aja yoqueduguéjna cuchábi Acab uté." Ga a jé u jne ujetiga cucha dacadode udore tocade, enga boyo Nabot uté údi aja guidai eruei jne. Ga amitingácho ome cucaranenie jne ga ajéyopise jne. E gusu yurusarane ome uaque.–

¹¹ Enga jé u uje jezreélgosode ore dai bajade, pangarate ibijógode ore jnese iji Nabot, uraque dedai ore doi Jezabel utoquéode quigode iji cárta uje chirógaja ore. Ga ore chajnapise udore quigode iji jnumi.

¹² Ga jı̃raque ore chiroque darasade aja ujetiga ore cho dayágome re jnese iji dire puyai uté uje ore pésu. Ga jé u uje ore di Nabot údi ga ore chicháji ore uague iquei jnese.

¹³ Ga jnani cucha bisideque gárode jı̃raque ore di uje chiese uté adode pijogúsorone u udore, ga ore chácariji uté tiógarei. Ga ore chósi tome uté iji gague dipesé iquei: –Yudúco Nabot uruode dirı́ca uje dojnóngaja Dupade, jé aja yoqueduguéjna cuchábi Acab uté.– Ga jé u uje Nabot urasade udore ore chijna uté aja ore idai eruei ga ore chimitingare údode ome cucaranenie, enga ore chujépise.

¹⁴ Uje e ore chimánaja jnumi, ga jı̃raque pangaránone iji oridai Jezreel uté chiroque daruode aja Jezabel uje chósi te: –E yimitingáco Nabot údode ome cucaranenie, ga e uté topı́si que.–

¹⁵ Uje Acab acoté Jezabel uaté chudute Nabot ujnomei enga jé u uje chijnare raja dabai ga chósi tome: –Ãriji, ga abágui jezreélgosi Nabot garengué casé daca úvai jogadi, ga o bajnéngu jne. Uje uté chetaque baplátadie dirı́ca jeta be oré, mu que dépoji uecade ujade iji erámi tudé, uje e topı́si.–

Pangarádejnai ujuyagaite Acab uté ome isoca gajnaréngone udore, ga chiroque proféta Elı́as aja Acab uté yui ujetiga chingo nanique

¹⁶ Uje quene Acab chudute uje Nabot e topı́si ga jé u uje jı̃raque niji ga tibágui acadie úvai jogadi. Uje gaidi tu jeta chopise dajnéngu jogadi uté.

¹⁷ Ga jé u nanique uje Pangarádejnai catecã́ri dangúromei proféta, tı́sbegosi uté uje i tu Elı́as.

¹⁸ Ga Pangarádejnai chósi tome uté: –Elı́as, ãriji ga abágui israélgosode ore eduguéjna cuchábi Acab uté uje cho dedáji ore idáidatéi Samária uté. Adójnanga uje qué déji Nabot acadie úvai jogadi jé iji de ga a esı́ji jne. Uje e cho dajnéngu Nabot uté acadie úvai jogadi gu.

¹⁹ Ga ajnerame yuruode ome uté, ga ojninga: "Pangarádejnai urúo udojo ome ua, ga chósi tome ua: 'Que gusu uje bajépise bojórique ayoré, mu bopo bajnéngu uté gajnei jnupe rı̃.'"– –Ga opósi tome Acab gaté rı̃: "Pangarádejnai chojninga: 'Uje tamocode ore chipese Nabot casé iyojna, mu ome ua ga tamocode a ore chipese bayojna tiji babai to jne iji Nabot uté cachodi casé.'"–

²⁰ Uje Elı́as chise Acab uté, ga Acab chojningame: –¡Urénga, yumajósõri á! ¿Ese yu iji dé á?– Enga Elías chajnai uruode ga chojninga: –E yise ua iji de, arı̃a. E bẽra ua ome cucha gajnaréngone iji Pangarádejnai edominone.

²¹ Jecute Pangarádejnai uté chósi tome ua: "Adójnangapı́sa yuruode ome ua, Acab, uje e dimane yeranone bajnecho cucha dacate gajnarécho iji baquei. Uje a yejna ua, mu que gusu ua jne. Uje a yejnapo bape disi diyoquı́ode ¡jaripe! jne, bajogasúode jnanı́o ore jnese rı̃ iji baniri Israel tudé údode. Ujetiga ducañerájma gosi, jeoga pañeraque gosi, mu a jé ca uñeque chapı́diji dı́nique jne.

²² Ga a yipésu jne ga bajogasúode ore gajnéone cucha dacate a jé chopise israélgosode ore eduguéjna casicaite Jeroboam gajnéone yujuyaquéo, uje jnani bajai Nabat ujnacari tu. Enga a jé chopome uté quigaminóri eduguéjna rı̃ uje i tu Baasa, ga Ahı́as ujnacare uté nanique. Ga a yacãra ua aja ore gu uje e bajnime yájningai ¡janipe! ga baroque israélgosode ore aja pisijnaringuéone úringane pipesucho."–

²³ Ga jé u nanique uje Elı́as qué jno daruode údi ome Acab uté nanique, ga chojningame: –Mu que gusu Pangarádejnai uruode udore ome ua, mu urugaidé upo bacoté uaté to rı̃, ga uruode chósi tome uaté: "Tamocode a ore cho darosipétiguiji Jezabel uaté arione jne iji ore idai Jezreel ujuyaquei ejoi uté."

²⁴ Ga Pangarádejnai a chapuse bajogasúode ore aja jnese to, Acab á. A baguiosode uñéngo torásiji guidai ajei mu a tamocode tagu udore gosode jne. Mu baguiosode uñane jetiga ore toji guesode, mu a chugúpẽre chagúode a pose ore jne. Mu a jé ca pijóchõre udore uñeque jne.–

²⁵ Enga jé ũrepise uje Acab uté jé cãraque re ga que ayorérique uñeque isocai cho uté isocai, uje tẽrapı́sa re ome cucha gajnaréngone uje pésu iji Pangarádejnai edominone. Ga uté bai tupúsu uje acoté Jezabel chiringare pisijnaringuéone iji ajei ga pésu unéningai ome.

²⁶ Enga noñánguipı́so Acab uté isocade uje chajnapise dupa quedéjnane iji jnumone. Ga uté iradigode upúsu amorréogosode udore aja ore angurenone dupa úringane pisı́gai. ¡Chimo jóroque re! Uje Pangarádejnai e jocãraque bajade upúsu amorréogosode iji israélgosode ore uniri nanique, ga gose ore ate gajnarénguipı́sode udore. Mu Acab uté qué chajo raja ore adode.

Eduguéjna Cuchábi Acab chosi riji jnumi iji Pangarádejnai iquei, ga Pangarádejnai chosõre uté nanique

²⁷ Uje Acab chudute dajnéone Pangarádejnai urúo nanique ome re uje proféta Elı́as chajnerame uté, enga jé u uje chajnangarase daguidedie iji darobé gai nanique ¡jóra! ¡jóra! ome dáyuguhebátigai uté. Ga jé u uje chejñu daguidedie uje úringai eduguéjna gajnenie u, ga chacája daguidé pujnusiétigade imoto, uje chichagu gai ¡tec, teque! ga que Acab chejñu iji dejade gotique. E cho dayágome re, ga que chajirape gaté rı̃ mu chajire jnumi aja dajesui uje chosi riji jnumi gu.

²⁸ Enga jé u uje Pangarádejnai uté catecãrápoi tı́sbegosi Elı́as nanique rı̃.

²⁹ Ga chojninga: –Elías, ¿Jé ca amo eduguéjnai Acab isocai uté to a? Uje e cho ayoré poritáguiji re iji yiquei. Enga a yosṍrape uté to jne, uje e chosi riji jnumi. Enga cáma yijnime yojningáiso cucha dacate gajnareque uje uté qué eca. Mu a yuruode tocade jne ome jogasúode iji ujnacari uté úringai eduguéjna iji uté quigáningo.–