1 Reyes 20 - Dupade Uruode

Sı́riagosode ore cho dajosipié ome israélgosode udore ore nanique

¹ Enga chise diri nanique uje sı́riagosode ore eduguéjnai Ben-adad chamáta darógode soldácho aja ñane jnese ome dajocaningai yui nanique ome israélgosode udore. Mu que gusu Ben-adad, isoldádode ore, mu Ben-adad uté ujode eduguéjna nóna uté aja dajocaningai to nanique rı̃, uje udore gajnepı́di tu ujetiga ore doi uté iroquéode, ga ore batigai chise 32. Ga eduguéjnane udore nóna darógode soldácho to nanique ga uñane choru buricade, jé basa ga uñane choru guebéquedatéode to. Enga ore qui u ore idai ibijoi tuté Samária nanique, uje israélgosode ore eduguéjnane charidi tu. Ga ore chaparu ore idáidatéi uté gai enga ore cugujnáji ore to nanique.

² Enga Ben-adad uté chiroque datocaidode aja israélgosode ore eduguéjnai uje i tu Acab uté iji ore idáidatéi uté ajei. Enga Ben-adad irógode datocaicho udore chacája Acab gari ga ore chajnerame deduguéjnai uruode ome israélgosode ore eduguéjnai uté.

³ Ga ore chojninga: –Ben-adad chósi tome ua: "A yo yajnéngu bajnenie óro jnese, jé aja pláta guebéode jnese uje déji ua. Que gusu bagúcha orerane udore jnese, mu a jé yo yajnéngu bacotedie to, babode ore to rı̃. Mu gusu bape omone jeta yo yajnéngu ore jne, jé aja bacotedie ore ga gusu ueradedie jeta yo yajnéngu ore to."–

⁴ Enga israélgosode ore eduguéjnai Acab chajnai uruode ga chojningame: –Ajnerame yuruode udojo aja uté jne: "Jé ũré ua, Yangaráni, Yeduguéjná. Bajneque uyu, jé aja yarı́jogosórone cucha jnese."– Enga jé u uje Ben-adad utocaidode udore ore jnoji Acab gari, ujetiga ore chajnerame uruode ome deduguéjnai uté.

⁵ Iji udojo quigade uje Ben-adad e chudute Acab uru quigode udore ome re, ga chorepoi datocaidode udore iji Acab uté gaté rı̃, ga ore chojninga: –Ben-adad uruode chopósi tome ua rı̃: "Acab á, e yiroque yuruode aja ua que, jeta ası́ome bagúcha orerane, órodie, pláta guebéode ome uyu, jé aja bacotedie, babode ore.

⁶ E mu yuru ejode cusapo rı̃. Uje a guedé jé jogadi u dabatigai tudé dirome ujetiga yiroque yiróquegatéode ore aja bei, ga a ore chacája baguı́jna cuchábi dirome, jé aja baróquegatéode ore iguı́jnane to. Ga a yirógode udore chajnose uaque jne ome uacagúcha orerane jnese dirome, ga a jé ore jno údi jne.–

⁷ Uje Ben-adad utocaidode udore chajnerame deduguéjnai uru ejode ome israélgosode ore eduguéjna cuchábi Acab nanique, enga Acab tibidi pangaránone jnani bajácho ore jnese iji daniri ujetiga ore tibágui uté. E pijoque gu uje Ben-adad ucuei tupúsu israélgosode ore uniri uté úringárique pajnoñaque. Uje pangaránone ore e déji Acab gari, enga Acab uté chojningame pangaránone udore: –¡Adójnachopı́sa jnani josipı́erãi uté isocai uté uje ucuei tu pujuredie! Uje chı̃́care yacotedie, yabode ore jeta yisı́ome uté, jé aja yugúcha orerane, órodie, pláta guebéode udore, ga que yãrángome gotique.–

⁸ Enga israélgosode angaránone jnani bajácho jnese, jé aja urasade jnese iji gari, ore chajnai uté uruode ga ore chojninga: –Jé ca angári. Enga jé ca amesẽre áyipiedie quigode ome ua.–

⁹ Jecute Acab chósi tome Ben-adad utocaidode nanique: –Ajnerame yuruode udojo ome yangaráni, uaqueduguéjnai uté: "Baroi tuyu, ga a yisı́ome bataite bajade jnese ome ua jne, mu que toc ujetiga yi baru ejode quigode jne."– Enga jé u uje Ben-adad utocaidode udore jno, ga ore chicai deduguéjnai yui ujetiga ore chingo Acab uruode aja.

¹⁰ Enga ájningarãque Ben-adad uté ome Acab uruode udore, ga chirógapo daru uajádode aja Acab gaté rı̃, uje chósi te: –Yujode eduguéjna a ore nóna yu aja uaquedai dirome, ga yoquisoldate dipeséjnane a ore pésu jeta uaquedai Samária urúji jnumi jne. A ore jnese potárasa ujetiga ore charo urui dirome ome dajmanáyone, mu a chona yoquisoldádode ore jmanai ajã́ronie jnese jne. Chamáñaje a yajnangaráco uaquedai aja yoquejode gu. ¡Mu jeta jé ca yuruode udojo tocade jne, ga omitigai turásu ujetiga yangurenone dupa ore chopise dajuñame yu, ga datéringa jne!–

¹¹ Uje israélgosode ore eduguéjnai Acab chudute Ben-adad ingojnaquéode ome raque nanique, enga chiradája ájningai to ga chósi tome Ben-adad utocaidode udore: –Ojningame uté: "Jé ca angójnape yoquibai uje cáma pijoque dequejnangóningo iji yoque arı̃a."–

¹² Uje Ben-adad, jorane eduguéjna, qué ore déji darengúrique nanique ome dáringane yote pioi yusóño iji ñane gari, enga jé u uje Ben-adad irógode chatata Acab uruode ome uté. Enga Ben-adad cho júruru ome Acab uruode nanique, enga jı̃raque chojningame darógode soldácho ore: –¡Ayágueyo jmame, ga apéso uágome pocaningai yui jé iji de!– Enga jı̃raque dimane ore ujetiga ore cugujnáji ore idai Samária uté.

Israélgosode ore eduguéjnai Acab yuchome sı́riagosode ore eduguéjnai Ben-adad uté, enga gose Pangarádejnai uté osongaquei uje chátaja uté

¹³ Uje a e dimane páyipie ujetiga sı́riagosode cugujnáji ore, mu Dupade uruode júsonique chise israélgosode ore eduguéjnai Acab, enga chósi tome uté: –Pangarádejnai uruode u udojo ome ua: "¿Amo jõcarataque dipeséode ore iji bejode, sı́riagosode ore a? Cajire to, uje a yicha udore aja bajmana ajã́ro jne jé iji diri tudé gajiné. Yigaidi u gu ujetiga araja uyu, uje Pangarádejna Ugurui tu yu."–

¹⁴ Enga Acab chojninga: –¿Ama quitique? ¿Gosi chátaja uyoque ujetiga tocachucho baruode udore a?– Enga Dupade uruode júsõri uté chajnai uruode ga chojninga: –Pangarádejnai chósi tome ua: "Bátajasórone a u jnacarode udore jne uje ore cháta cuchade aja baquigaminórone eduguéjna iji dajnepı́dode pidáyo iji baniri tudé údode jnese."– Enga Acab pésapo dapregúnta ome uté gaté rı̃, uje chósi te: –¿Mu jõcarataque bajátigo iji yoque jne a? ujetiga purása quedéjnane u, jeoga uyoque u.– Mu Dupade uruode júsõri chajnai Acab uruode ga chojninga: –Uaque upúsu jõcarataque bajade jne.–

¹⁵ Enga jé u uje Acab tibidi jnacarı́so udore uje jecucha ore cháta deduguéjnane udore isagode aja ore iji dajnepı́dode pidáyo, ga jnacare gatoidie ore batigai chise 232 nanique. Quigade enga Acab tibidápoi dasoldádode israélgose jnese to rı̃ iji uraque dayaridi Samária uté. Enga Acab pijnángaidóde soldádipı́so udore batigai chise 7.000 nanique.

^16-17 Enga chise guedé gatócoro iji deréjnai uté uje ore jnome dajocaningai yui nanique. Mu jnacare gatódeisi ore uje ore átapiode u deduguéjnane ome pisagode iji dedáyode ica, bajaque ore aja dajocaningai uté. Mu sı́riagosode eduguéjnai Ben-adad uté, jé aja átajasórone eduguéjna uje 32 ore, qué ore déji dajodé gai nanique iji darengúi uté ome dáringane ũruso, uje israélgosode udore quene chicárasiji ore yui. Enga Ben-adad irógode dajetácho ore chajmita israélgosode udore isocade. Enga jı̃raque irógode udore chatata damone cucha ome Ben-adad iji dayaridi uté, enga ore chojninga: "¡Yimóngo jnacarode ga ore tṍraji Samária yui ome yoque é!"

¹⁸ Ga Ben-adad iroquéode u udojo ome darógode udore: –¡Asayo ore!– uté chojninga. –¡Ca ajéyo ore, mu ajnáño ore aja de ome ore úringane pórecajna! Ujetiga ajéquesé ore, ajnáño ore aja de; jeoga jõcarataque ore marı́nga, ajnáño ore aja de.–

¹⁹ Enga bajaque jnacare gatódeisi uje ore doi guesi iji dedai Samária ome dáringane jõcaratácho, enga Acab isoldádipı́sode déji udore ore quigade.

²⁰ Ga jõcaratade udore chise Ben-adad irógode soldácho ga jı̃raque ore cugujnáji ore ga ore yugode ga chojmára, chojmára iji dacháidode udore ore jnese. Ga pijoque uje sı́riagosode que bisitique cusome israélgosode ore, ga ore chayo ga israélgosode ore chucajningárome ore. Mu israélgosode ore juseque sı́riagosode ore eduguéjnai Ben-adad uté, jé aja uté isoldádode uñane uje chirate uté aja úringai bayaque. Enga ore choru dachidode burica jnese aja dajesui.

²¹ Enga jé u nanique uje israélgosode ore eduguéjna cuchábi Acab uté, irógode soldácho ore cugujnáji soldate amirone iji sı́riagosode udore, buricade orusórone, jé aja udore uje ore pı́ode u guebéquedatéode udore. Ga Acab, irógode soldate sué ore gáyode jnese. Enga jiépisi ore yugode iji sı́riagosode ore isoldádode nanique.

²² Iji udojo quigade, enga proféta uqué, Dupade uruode júsõri, e tibágapoi Acab nanique rı̃, ujetiga cho quigome cucha dacadode uje a chise ore jne. Enga chojningame uté: –Jé ca o bajñare jne, mu apésu jeta dimane ua ome cuchade yui jne iji uacaquei. Apésu uacajuyaquéode iji uaquedáyode ujetiga uajate, ga õre basoldádode jnenga a jiei uaque jne. Uje a sı́riagosode ore eduguéjna cuchábi Ben-adad uté a chopo dajocaningame uaque ujetiga chise esoi eruei iji siqueré ejo jne. Jecute acuépisi basocáringome uaque bajaque.–

²³ Uje Dupade uruode júsõri cho Acab ore quique ome cucha dacadode yúode, mu iji sı́riagosode ore uniri uté, ga Ben-adad uté iróquegatéode cho quique to uje qué ore jõre, ga ore chósi tome: –Bamo arı̃a uje israélgosode ore angurenone dupa jogadode u cucaranone udore, jecute ore angurenone chátaja ore ga ore sué yoquibáyode dirı́ca. Mu iji ejórique ga a yicórasi yoquijocaningai iji garáijnane jne, enga a jé ca toguı́rase ujetiga ca yujnuéngo ore gáyode.–

²⁴ Ga Ben-adad iróquegatéode udore chopósi tome uté rı̃: –Be ga basocai a jé chorase udé, yoqueduguéjná: Ajnime bajorane eduguéjna purása quedéjna 32 ucode chojmara, chojmarane ore iji ore charidode jne. Ga be basoldádode asutedie iji yocurasade ore ga a ore chácariji eduguéjnane udore ore jogadode jne ome pocaningai yui.

²⁵ Enga õre barógode soldácho ore gaté rı̃ ga a jé ore chopórase ore yu casodé barócho batigai jne rı̃. Mu que gusu basoldádode ore batigai ujetiga õre, mu õre bachidode burica batigai, jé aja bachidode guebéquedatéo to, enga ore batigai a jé chopı́sirase ore oidi casodé bachicho udore batigade to jne. Enga a quene yoco yoquijocaningai ome ore iji garáijnane jne. Enga a ca potigayaquérique déji yoque jne jeta yujnuéngo ore gáyode jne.– Ga jé u nanique uje ore eduguéjnapı́si Ben-adad chimesẽre deminórone áyipiedie udire, jecute dopı́si ore uru quigode udore.

Pangarádejnai chátaja israélgosode udore jeta ore suépo sı́riagosode ore gáyode gaté rı̃

²⁶ Uje e chise esoi eruei tiji siqueré ejo uaté, enga sı́riagosode ore eduguéjnai Ben-adad uté chamáta dasoldate dipeséode aja ñane ga ore jnome dajocaningai. Ga ore cáputaji ore idai uje i tu Afec ujetiga ore cho dajocaningame israélgosode udore ore.

²⁷ Enga israélgosode ore isocai jé upo rı̃ uje ore pésu rágome pocaningai yui to. Ga soldádi chojmara, chojmarane ore jnese chijna deduguéjnane gueranone cõrácha, jé aja ore gueranone cucha pibose ome ore jocaningai uté. Ga quene ore chicáji sı́riagosode ore isoldádode yui nanique. Uje israélgosode ore isoldádode chicáji ore yui nanique, ga ore gajnunie u áyasa quedéjna jochaque gárode iji sı́riagosode udore iquei uje ore dique ¡pac! ¡paque! iji ore iquei. Jé basa ga sı́riagosı́so ore jochaguéjna aja israélgosode ore yui nanique, ga ore chipédugu erámi ome dáringane dipeséo.

²⁸ Mu Dupade angúromei proféta sose israélgosode ore eduguéjnai yui nanique, ga chojningame uté: –Pangarádejnai uruode u udojo uje yajnerame ua. Ga chojninga: "Sı́riagosode ore chojninga ica ome daruode: 'Pangarádejnai, israélgosode ore angureni uté uniri tupúsu cucaranone, jé basa ga uté chirajaque garáijnane ore.'" Sı́riagosode ore uruode u udore ome Pangarádejnai uyu, jecute a yi gáguedaté uaté jne enga a yicha ore aja bajmainie jnese jne, Acab á. Ga a araja jne uje Pangarádejna Ugurui jé u yu.–

²⁹ Enga israélgosode, jé aja sı́riagosode ore chicha darengúone aja ñane tiógareode nanique, ga dirode gare iji ti uje cáma ore doi pocaningane ome ñane nanique. Mu e chise dire garitia nanique enga quene ore doi pocaningai ome ñane. Uje garósi israélgosode mu ore sué sı́riagosı́so ore gai. Iji deréjna chojmarai ga ore yugode chise 100.000 iji ore isoldate diguijnutı́ode ore nanique.

³⁰ Enga sı́riagosode amirone ore chayome israélgosode ore nanique ga ore chijnare raja ore idai uje i tu Afec. Enga sı́riagosode udore ore chise ore idai uté ajei nanique ome dagajñua, mu ore idai ujuyaquéode cṍra ore gáyode. Enga ujuyaquéode uje cṍra ore gai yugode chise 27.000 nanique. Ga sı́riagosode ore eduguéjnai Ben-adad chayome israélgosode to, ga chijnare raja ore idai uté ajei to ga chacose re iji ore iguı́jnane uñai ga chécãre dacoyapı́dode aja quedéjnane iji guiguı́jnai uté ajéode.

³¹ Enga uté quigaminórone eduguéjna catecã́ri uté iji acoyapı́di uté, ga ore chojninga: –Cajire to. E yudúco uje israélgosode ore eduguéjnane osõrataguipise. Jecute yicobi ga yijoco yóguiji jnumi, ga yibájoi israélgosode ore eduguéjnai jne ome yocúringane pajnotácho. Ga a yacágoja yoquiguidé pujnusiétigade imotodie, uje chichagu yoquibai ¡tec, teque! Enga yigaco yoquetabı́dode ome enuéjnane to jne, ga imoi tu jetiga eduguéjnarique e igarique yoque. Jeta yipéco cuchade udore ga ja seca chicha bacuecaringuei aja diri to jne, Yoqueduguéjná.–

³² Enga jé u nanique uje Ben-adad quigaminórone eduguéjna ore doi darúiso, ga ore chacája daguidedie uje chichagu ore gai ¡tec, teque! Enga ore chigarupo detabı́corodie to rı̃ ome enuéjnane, ga jé u uje ore tibágui israélgosode ore eduguéjnai jeta ore chijócha ajei údi ome deduguéjnai uté. Enga ore chojningame Acab uté: –Baroi, sı́riagosode yoqueduguéjna uje i tu Ben-adad, chósi tome ua: "Yijócha bajei údi ujetiga ca ajé yu ga yapite ome ua jne."– Enga israélgosode ore eduguéjnai Acab chajnai ore uruode nanique ga chojningame ore: –¿Ama yujoi eduguéjna qué eca ya? Cachi yoquiguiose ñane arı̃a.–

³³ Enga Ben-adad quigaminórone eduguéjna ore jnusi rángome Acab uté uruode udore, uje cho daguiosi iji ore eduguéjnai uté. Ga jı̃raque ore chirate Acab aja uruode to, ga ore chojninga: –¡Jé ũrepise ua! ¡Ben-adad, uacaguiose ñane iji jnumi arı̃a!– A ore gaidi tu gu ujetiga jé ca Acab chujé ore eduguéjnai uté ome ore inejequéode udore. Ga Acab chajnai ore uruode, ga chojninga: –Beyoi, ga ajnáño Ben-adad uté aja ne.– Enga jé u uje ore di údi, ga quene Ben-adad chingongara raja Acab. Enga jı̃raque Acab nejéna uté ujetiga chácariji ejoi iji doruti guebéquedaté ajei to.

³⁴ Enga Ben-adad chojningame Acab: –Yai casicaite chijna uaquedáyode uñane iji uacari nanique, mu a yatire babai jne. Enga e guesája yocuniri yui ome uaque to, ujetiga apéso uaquẽrapáidode cucha jogadode iji yoquidáidatéi Damásco to. Uje jé yai isocai tu uté nanique uje pésu dẽrapáidode cucha jogadode iji uaquedáidatéi Samária uté nanique.– Ga Acab chajnai uruode ga chojninga: –Yimesẽre baruode udore jõ, jecute a ca yo yisaguı́ji ua, mu a yujuéga doi tome ua. Mu a yisı́ome yuru iyiejájnane ome ua bajaque.– Ga jé u uje Acab chisi ome daru iyiejájnane ome Ben-adad uté nanique. Enga quigade enga juéga doi ome uté.

Pangarádejnai urugaite Acab uté nanique, ga gose angoninguite paritigade ome Dupade uté

³⁵ Iji cucha dacadode udojo quigade ga proféta uñai iji Dupade uruode júsorone ujade chise dojoi proféta ome dajnéone Pangarádejnai iroquéo. Enga chósi tome dojoi proféta uté: –Be ga ajé yu ga a bajnongoque yu jne.– Mu uté jõrai chojninga: –Úngare, a ca yujé ua jne.–

³⁶ Ga jé u uje Dupade angúromei proféta cho darúja uté, ga chojninga: –Jeta bo iji yari iji de gajiné enga a jı̃raque caratéraque chujé ua jne, ga gose bangoninguı́teparitigáde ome Pangarádejnai uté uruode uje yajnerame ome ua que.– Ga Dupade angúromei proféta uté urugaidi jnani jno nanique. Mu jı̃raque caraté tuangóa uté ga jé cachodi tu uje caraté chachẽre uté ga chimochẽre ¡quégues!

³⁷ Quigade enga Dupade angúromei proféta uté chisápo jnani uñai te rı̃, enga chojningame: –Bebi ga ajé yu, ga a bajnongoque yu jne.– Enga ejoi tuté doi uruode ga chujé ¡jnaque! ga ajnongoque uté.

³⁸ Ga proféta uté jnoji uté ga cháguena gaté iji dajei dosadi uje chirote ore eduguéjna cuchábi Acab yui jeta diji uté. Ga doi borapei ga chaco dedodie gai iji yupı́di jogadi uté, uje gaidi tu gu ujetiga pógu dáringai proféta ome eduguéjnai uté.

³⁹ Enga jé u uje ore eduguéjnai Acab chise uté jogadi uté enga chajnárase dosadi, mu proféta uté tibite gai. Ga chacãra raja Acab uté isoldádode uñeque uje catecã́ri, ga ojñane ome deduguéjnai chósi te: –¡Yeduguéjná, angarami baroi tuyu é! Uje basoldádode jõrai uyu arı̃a, ga bacha yu aja sı́riagosode ore yui dirı́ca. Ga yoquijõrai soldate chisa sı́riagosode ore urásai soldate uñai dirı́ca uje yugúcoji yoquijocaningai gai, ga chojningame uyu: "Asape ga ajirape yui jne. Ujetiga bajuseque enga a o baba jne, ga a chuque ua jne iji uté charidi. Jeoga ca chuque ua mu a o boré jne, ga pláta guebéode batigai a chise 3.000 jne."

⁴⁰ Mu uje qué yisa yisagode uñane ome yúringai baroque, mu sı́riagosode ore soldádi uté jnoji yejoi ¡bu! Enga e que yiraja yisocáringome yu, Yeduguéjná.– Enga israélgosode ore eduguéjnai Acab narare, mu que posõraquérique déji ajénique gotique ome uté. Uje chajnai uruode ga chósi tome: –Ua upúsu uje bẽ́care báringai máraque que. Enga a jé ca toguı́rase ujetiga ca pujuyagaite ua jne.–

⁴¹ Mu uje eduguéjnai uté quene chejna daruode udore guesi ga jé u uje proféta uté chingongara raja. Uje jı̃raque chejñu borapei iji dedodie gai ¡bu! ga jı̃raque eduguéjnai Acab chiraja uje profétade uñai tu.

⁴² Ga jé u uje proféta uté chósi tome Acab uté: –Pangarádejnai uruode u udojo uje yajnerame ua. Enga chósi tome ua: "Bacha Ben-adad ucuecaringuei aja diri uje yı̃́care chui tome jnani uté dirı́ca mu. Jecute a yicha ua aja uté charidi ome báringai chuque jne uje bajuseque yurugaidi Ben-adad uté gu. Ga uté urasade sı́riagose ore gajnenguı́rase pitoringai dirı́ca, mu ore gajnéone yujuyaquéo a chajni barasade israélgose udore ore gai jne."–

⁴³ Uje israélgosode ore eduguéjnai Acab chudute Pangarádejnai uruode iji proféta uté pijnani, enga chajni to aja daguı́jna cuchábi iji dedai Samária uté. Ga enochai patı́ja, enga tagu dejode iji dayaridi uté, uje chetaque proféta uté uruode gu.