1 Reyes 2 - Dupade Uruode

David cho quique dajnacari Salomón uje e déji erui pijnanai gu

¹ Uje e idógosi deréjnai uté ujetiga David toi ga jé u uje chisı́ome daroquei ome dajnacari Salomón. Enga chósi tome:

² –Baraja uje erámi unirisórone yocajneque pitoringai jnese. Ga e yugúsi yajnei eruque pijnanai to. Jecute yósi tome ua, uje e bajnepı́di u ujetiga o jnanı́ji ua ga adota ua aja ome cuchade.

³ Enga ajuse Pangarádejnai uté uru quigode guio ome ua, uje Badupade u uté, jeta be uté adode jnese. Ga jé ca amurase Dupade áyipie quigode iji bajénique, uje estatutos u. Ga jé chopome uté iroqué gajnéone cucha rı̃, jé aja uté pijogúsorone darúo, jé aja ajiritigade cucha udore uje purusãracho udore ore jnese iji Moisés uté urusarane Dupade uru pirosobácho, jeta jé ca ayó udore uñeque gánique. Enga a jé u jne ujetiga bapesudode cucha tocade ga ueracho jnese jé iji bajesúode erámio.

⁴ Jeta be udore, enga jé u jne ujetiga yajnéone Pangarádejnai uté uru iyiejnane udore jnese tocade ome uyu, uje chósi tome uyu nanique: "Yuru quigode u ome bape disi ejórigo ore jeta ore susı́pise dadode guio ome uyu, ga ca ore chimoque doi yojningane cucha iji yiquei gatuaque ome dáringáringo ũréo. Ujetiga ore chejna dáyipiedie, dáringane ayoré jnese aja uyu, enga a yipésu jne ga a jé ca chimoque bayaripi cuchábi udé charipiésonique jne iji bape disi ejórigo ore ujade gatuaque jne, ome dáringáringo eduguéjna iji israélgosode udore ore ujade."–

⁵ Ga David qué jnopo daruode údi rı̃ ome dajnacari uje chojninga: –Qué déji yuru quigode ome ua, yabi á. Barajapise Sárvia ujnacari Joab uté isoca gajnaréngone jnese ome uyu, jé aja uté adode ome israélgosode ore isoldádode eduguéjna gárode udore ore uje chujé ore. Ga yugode udore uñai u Abner uté, uje uté dayé i tu Ner. Jé basa ga jõrai tu Amása, ga uté dayé i tu Jeter. Joab uté chojne ome ore iyode uje que pocaningárique jogadi urásu mu. Uje ajéquesé udore ore mu uté chichagu ore ome danejequéode, ga ore cho pocaningárique yutı́go.

⁶ Jecute jé tiógararása ujetiga chuque Joab uté to, uje máraque gu, ga a jé chorase daba jne. Jé ca ajuéga ujetiga uté chisı́na re. Uje áyipierãque ua ga a araja basocáringome Joab uté úringárique chuque jne.

⁷ Mu jé ca ajuseque galaádgosi Barzilai ujnacarode udore ore, enga átaja ore aja udore ore uje jecucha ore chacásãra ua iji bagapié mésa gai gatuaque. U gu uje ore chatapı́saja yu uje yugúsi yúringai bayaque ome bayai Absalón uté.–

⁸ Ga David qué jno daru quigode údi ome Salomón, uje chojninga: –Adójnangapı́sa yichietabáisõri Simei uté uje déji bejode to, uje uté dayé i tu Géra. Ga uté urasade u benjamı́ngosode udore ore, ga uté cho dedáji Bajurim. Uje Simei uté dojnóngaja yu ome daru iyiejnane iji diri tuté uje yicáji ore idai Mahanaim uté iji yúringai bayaque. Mu uje e yugúsi yúringai aroraque iji cucha dacadode udore quigade, ga jé u uje Simei uté chachai uyu iji yarani nanique iji tié Jordán edógai. Ga uté chijócha yajei údi jeta yamurase uté uru gajnaréngone ome uyu. Enga jé u uje yisı́ome yuru iyiejnane ome uté iji Pangarádejnai iquei, uje yojninga: "A ca yujé ua ome queségodotı́que jne." Jecute que togome uyu ujetiga yujé uté.

⁹ Mu ome ua ga ca acadı́gui uté úringai máraque to jne. Jnani áyipierãque ua, enga a araja basocáringome uté, uje uté chorase daba dasoca gajnaréngone udore ome dayoi úringárique pijnimique jne.– Ga David utoquéode u udojo ome dajnacari Salomón nanique.

Eduguéjna cuchábi David topı́si nanique, enga Salomón chácariji charidi iji quigade

^10-11 David uté guejnanie siquerei chise 40 años ome dáringai eduguéjna jnese. Iji ore idai uñeque uje i tu Hebrón nanique ga uté guejnanie siquerei 7 iji uté uje chácariji nanique. Jé basa ga guejnanie siquerei 33 iji Jerusalén uté uje a uté chácariji nanique ome dáringai eduguéjna cuchape. Iji udojo quigade enga David uté topı́si, ga ore chijóchame uté iji David idai Jerusalén uté.

¹² Ga jé u nanique uje ujnacari Salomón chácariji dayé uté charidi uté. Pangaranipise Salomón uté, ga jé uajádiji dayaridi uté, dayé charipi cuchábi nanique.

Salomón chejna dai umajosórone udore ore aja jnumone jnese nanique ga quene úringai eduguéjna cuchape jogadi upúsu

¹³ Enga jé u uje Haguit ujnacari Adonı́as uté tibágui Salomón daté uje uaté i tu Betsabé. Ga uaté chojningame Adonı́as uté: –¿Ajéquesé ua ya?– Enga Adonı́as chajnai uruode, ga chojninga: –Yise ua uje ajéquesé yu.–

¹⁴ Ga uté qué jno daruode údi, ga chojninga: –Yuru qui déji jeta jé yingo ua.– Jé u uje uaté chojninga: –Be ga ango gotı́go aja yu.–

¹⁵ Ga uté chojninga: –Bamo uje israélgosode ore chirote gadoi jeta eduguéjnai tu yu ome ore jnese. Mu cuchade udore chécãre re ga basája yesai, uje yajnepı́dirase mu. Mu a jé Pangarádejnai ajéquichóme gu yesai Salomón uje chácariji dáringai eduguéjna.

¹⁶ Mu a qué yutai cucha dacatique chojmara iji ua iji de, enga jé ca aratáyime yu jne.– Enga Betsabé chojningame Adonı́as uté: –Be, atata gotic.–

¹⁷ Enga Adonı́as chojninga: –Yijócha bajei údi ujetiga atai eduguéjnai Salomón uté jne ujetiga chisı́ome sunémgoto uaté ome yu uje i tu Abisag, ga yo yacotéji. Obiréjna ome uyu gu uje a jé ca uté charatáyime bajegaitique cucha ome ua.–

¹⁸ Ga Betsabé chajnai uté uruode ga chojninga: –Jé areque. A yingo jne.–

¹⁹ Enga jé u uje Betsabé uaté tibágui eduguéjna cuchábi Salomón uté ome Adonı́as uté utoquei to. Ga Salomón chácariji dayaripi cuchábi gai, mu chague uje chimo daté iji garani, ga chichaga dacuruté aja jnumi iji uaté iquei. Uje uté e chácarapóji dayaripi cuchábi gai rı̃, enga pésu ga dimane piyaripi cuchábi uñeque ome daté yui ujetiga uaté chácariji gai iji uté ãrachua.

²⁰ Ga uaté e chojninga: –A qué yutṍri ua ome cucha ajámatique jne. Jé ca etaque.– Ga eduguéjna cuchábi Salomón uté chojninga: –Ité á, be ga ango yu. A jé ca yucusu yu ome batoquérique jne.–

²¹ Ga uaté chojninga: –Ajuéga sunémgoto uaté ome bayai Adonı́as uté, uje uaté i tu Abisag. Ga bayai uté cho dacotéji.–

²² Ga eduguéjna cuchábi Salomón chajnai daté uruode ga chósi tome: –¿Cuchárique u gu a uje batai sunémgoto Abisag uaté ome Adonı́as? Uje a atápoi yiyaripi cuchábi to jne ome uté rı̃, chamáñaje yurẽjai u uté arı̃a. Que gusu uté, mu atai ome uté irotasórone ore to uje ore tangáripı́si uté ome úringai eduguéjna ica. Ga sacerdote Abiatar u uñai, jé basa ga jõrai tu Sárvia ujnacari Joab uté.–

²³ Enga jé u uje Salomón tagúome Pangarádejnai uté i uje chósi tome daru iyiejnane udore: –Adonı́as gajnenguı́rase pitoringai ome daruode udore. Jeta jé ca yiji yuru quigode udojo ome Adonı́as jeta chuque uté, enga jé tiógararása ujetiga Dupade cho yiba ga chujé yu to.

²⁴ Jecute yuru iyiejnane udojo gajnesṍri tu Pangarádejna Uecai uté uje pésu yúringai uajádiji yiyaridi udé, ga ichajapite yu aja yai casicaite David charipi cuchábi udé. Ga qui a jé u to jne ome yape disi ejode ore to jeta ore basája ñane quigade ome dáringáringo eduguéjna ome Pangarádejnai ichagájade darúo nanique. Ga Pangarádejnai uté chiraja yuru iyiejnane udojo úringane ũréo, uje Adonı́as a chise dáringárique chuque gajiné iji deréjnai udé.–

²⁵ Ga jé u uje Salomón chutṍri Joiada ujnacari Benaı́a ome Adonı́as uté úringárique chuque, ga Benaı́a cugujnáji Adonı́as jeta chichagu uté, ga jé u uje cachodi u uté.

²⁶ Enga eduguéjna cuchábi Salomón uté chojningame sacerdote Abiatar uté: –Bo, ga acáji bedai Anatot uté, aja bajnéone garáyo udore. Jé tiógararása ujetiga chuque ua to iji diri tudé, mu que yujé ua to gu uje bajnuque Pangarádejnai Dupade Uruode pi cajo nanique iji yai casicaite David iquéode, jé aja uje cuchade chise yai nanique ga bejnáreque ua ome cuchade udore to uje chise uté.–

²⁷ Enga adi jé u nanique uje Salomón uté chijna Abiatar uté úringai sacerdote iji gari, uje Pangarádejnai jé utocaite Abiatar uté to nanique. Ga jé u uje Pangarádejnai uté uruode úringane tocachuque jogadi u ome Abiatar dáqui gaté Elí uté nanique uje Pangarádejnai uté e chı̃́care udore ome Elí nanique iji idai Sílo uté uje cho darúja uté ape disi ejode udore ore jnese.

²⁸ Uje pujnomei chise Joab uté ome cucha dacadode udore, ga jı̃raque chayóji Pangarádejnai iguı́jnai cárpa yui. Ga uté chijnare raja ore aseradéjnai uté arangué gajnunie, ga chisa udire aja re. Todo gu uje chiraja uje irotai u Adonı́as uté ica, uje que chirota Absalón gotique to nanique mu.

²⁹ Enga ore uñane chojningame eduguéjna cuchábi Salomón uté: –Joab uté e chayome ua, ga chayója gaseradéjnai uté iji Pangarádejnai iguı́jnai cárpa ajei, ga chácariji ejode.– Enga jé u uje Salomón chutṍri Joiada ujnacari Benaı́a ome Joab uté úringárique chuque, uje chojninga: –Be, ga ajé uté.–

³⁰ Enga jé u uje Benaı́a chacája Pangarádejnai iguı́jnai cárpa uté ajei to, ga chósi tome Joab uté: –Yoqueduguéjna cuchábi uté chiroque ua aja guesi iji de.– Mu Joab chajnai uruode ga chojninga: –Úngare. A jé yicha yigachotı́gaja de jne.– Ga jé u uje Benaı́a uté tibágapoi ore eduguéjna cuchábi rı̃ ga chatata Joab uté uru quigode ga chojninga: –Uté chósi tome yu que.–

³¹ Enga eduguéjna cuchábi Salomón chajnai Benaı́a uté uruode enga chojninga: –Bo, ga jé be uté uru quigode ome re ga ajé uté, ga ajóchame jne. Uje yigaidi u gu ujetiga jé ca Pangarádejnai cho máranguiji uyu to, jé aja yai casicaite ape disi ejórigo uyoque jnese ome Joab uté ijnimingone piyo quedéjna bisidécho. Enga a jé ca yocajneque jeta yoco yoquiba udore to.

³² Pangarádejnai uté a pésu jne ga Joab uté ijnimingone piyo chajni uté gai. Uje uté cugujnáji jnani gárode udore ore ica, ga chinguíra udore ore aja queségodogóde. Udore ore sué uté gai ome dáringane arécho, parácho ore jnese, mu jé yuque ore. Ga yugode uñai u Ner uté ujnacari Abner, uje israélgosode ore isoldádode ore asutépise to iji dachamini uté. Jé basa ga yugode jõrai u judágosode ore isoldádode asutépise Amása uje uté dai i tu Jeter nanique. Mu yai casica David que chiraja cuchárique ome cucha dacadode udore.

³³ Enga adi u jne ome Joab uté yugode dojo ayoré ore, ujetiga ore iyode chajni uté gai jne, ga uté ape disi ejórigo ore jnese cho daba dáqui uté ijnimingone piyo quedéjna jé aja deréjna pitárigo jnese. Mu ome David uté, jé aja ájnape disi ejórigo ore, jogasúrigo ore, jé aja úringai pangarate jnese, ga a jecucha pajesereringai déji udore gai gatuaque jne, uje garani u Pangarádejnai uté.–

³⁴ Udojo quigade ga jé u uje Benaı́a doi ga chichagu Joab uté. Enga jé pijóchõre uté iji daguı́jnai iji erãpetarei uté.

³⁵ Ga jé u nanique uje eduguéjna cuchábi Salomón chicha Joiada ujnacari Benaı́a uté aja Joab uté charidi ome úringárique pangarate cuchape ome soldádode ore jnese. Ga adi jé upome sacerdote Sadoc to nanique rı̃, uje ore eduguéjna cuchábi chicha uté aja Abiatar uté charidi.

³⁶ Quigade enga eduguéjna cuchábi uté chiroque dai casica ichietabáisõri uté uje i tu Simei aja dari ujetiga catecã́ri uté. Enga chojningame uté: –Be, enga apésu baguı́jnarique iji Jerusalén to jne enga jé aparu babai iji baguı́jnai uté ejode, ga ca acai ti iji uté jne.

³⁷ U gu uje a deréjnarique déji jeta aquesu tié uaté uje i tu Cedrón ga a jé bagachodi tu, ga a amo uje bayoi yore bataroi gai, uje que taque yu gu.–

³⁸ Ga jé u uje Simei uté chojningame ore eduguéjna cuchábi uté: –Yeduguéjna cuchábi á, baruode udore ueracho ome yu. Jetiga baru quigode u udore ome yu, ga a yi udore quigode uje baroi tu yu gu.– Enga orocoi dirode uje Simei uté chácariji Jerusalén ajei.

³⁹ Mu siqueré gadióguedie udire quigade nanique, ga Simei uté iroque gárode ore chayome uté ome dáringai bayaque. Ga ore chicáji gátgosode ore eduguéjna cuchábi Aquis yúode uje uté dai i tu Maaca. Ga jé u uje ore ujnomei chise Simei to uje uté iroque gárode udore déji ore idai Gat uté.

⁴⁰ Jı̃raque Simei uté niji ga doi dachidé burica quedéjna enga dopoi dayaripı́ode rı̃ ga chujé aja gai. Ga jé u uje Simei jnome gátgosode ore eduguéjnai Aquis yui uje ucuegode u daroque gárode udore ore gu. Uje e chise ore iji ore idai Gat uté, enga jé u uje diapo daroque gárode udore údi rı̃.

⁴¹ Ga pujnomei e chise Salomón uje e Simei uté jno ga chicáji pidai uje i tu Gat, enga e diapóji dedai Jerusalén rı̃.

⁴² Ga jé u uje eduguéjna cuchábi chiroque darógode aja Simei uté yui ujetiga ore chijnája iguı́jnai to. Enga chósi tome daruode ome uté: –¿Jé ca yiroquei cuse ome ua ica ya? Uje yaquı̃́ra ua ica, ga yojningame ua: "Aparu babai iji baguı́jnai uté ejode, ga ca acai ti iji uté jne. A acai siñéngome bajogadi udé iji dı́nique, ga jé bagachodi tu, enga que taque yu." Ga bajo ua aja baru iyiejnane ome yu iji Pangarádejnai iquei ujetiga be yuru quigode jnese ica. Enga bojninga: "Baruode udore ueracho ome baroi uyu."

⁴³ ¿Ga cuchárique u gu a? uje bamurase yuru iyiejna casodica iji báyipie, uje Pangarádejnai uté gajnecho udore. ¡Chimo jóroque re! Uje que be yiroquei uté uje yirógui jóroque ua aja mu.–

⁴⁴ Enga eduguéjna cuchábi Salomón uté qué jnopo daruode údi ome Simei uje chojninga: –Baraja cucha dacate noñánguipı́sode jnese iji yai casica David, uje bapesudode udore jnese déji báyipie, arı̃a. Enga Pangarádejnai a chatire bapesute gajnaréngone udore babai jnese jne.

⁴⁵ Mu eduguéjnai Salomón uyu, yúringai pisı́gai jogadi jé u jne, ga eduguéjna bajai David charipi cuchábi uté jé ate dadi iji Pangarádejnai iquei gatuaque.–

⁴⁶ Enga jé u uje eduguéjnai uté chutṍri Joiada ujnacari Benaı́a uté ome daroquei uté. Ga uté jno ga chichagu Simei uté, enga jé u uje cachodi tu. Ga jé u uje úringai eduguéjna picotaque jé jogate Salomón uté údi.