1 Reyes 19 - Dupade Uruode

Elı́as uté dosóñime eduguejẽ́ Jezabel ijmongaquéode ome re nanique ga chayo ga chijna dagajñua taja cucarani Horeb uté iji erãpetarei

¹ Uje israélgosode ore eduguéjnai Acab chise daguı́jnai nanique ga uté chatata Elı́as ipesudi casodé cucha jnese ome dacoté Jezabel uaté. Enga chingopı́sa uaté to uje Elı́as doi ore angurenone irógode proféta jnese ga guejnaque ore ome queséode jnese.

² Uje Jezabel uaté chudute dabai ojñane udore, enga jı̃raque cho dáñiejame Elı́as uté yui, enga jé u uje chiroque daroi aja uté yui ujetiga uté chajnerame uruode ome. Ga Jezabel ijmongaquéode udore ome Elı́as chósi te: –Elı́as, bajé yangurenone dupa irógode, mu a jnutague yu jne ome bejnane yangureni Baal irócho ore. ¡Uje a chise guedé batigai tudé dirome ga a jé orase begode udore jnese ome báringárique chuque! Mu jeta ca yuruode udojo tocade ome ua dirome, ga omitigai turásu ujetiga yangurenone dupa ore chopise dajuñame uyu, ga datéringa jne.–

³ Uje Elı́as chudute Jezabel uaté uru iyiejnane nanique uje jmongarája, ga a chajuque aguté. Enga chague jmame ome dáringai bayaque, ga iroguipı́si nóna aja dajesui to. Ga ore jno ga ore quı́tequigája pidai idájai uté iji judágosode ore uniri eruépisi uje i tu Beerséba. Mu uje e ore chise oridai uté nanique, enga jé u uje Elı́as noñome daroi iji uté.

⁴ Jé basa ga Elı́as uté qué jnome daquei gaté ga chicáji erãpetarei uté ga chejna dire chojmarai ome dáringai urugu iji erãpetarei údode. Enga chisósi porataque nanique uje i tu retáma, ga chácariji porabia suaté uburúdabi. Ga Elı́as pota nanique jeta toi ¡paque! bisideque, uje cutame cucha dacadode gu. Ga ajei jochaquéode qui jé u ome Pangarádejnai, uje chojninga: –Pangarádejná, e gome yajnenie pujurei uje chise yu, ga be ga ajnime yucuecaringuei iji yu, ga yajna yáquiode ore to. Uje que yitiógara ujetiga yujnué ore gai ome yucuecaringuérique jeta umarejna iji erámi tudé.–

⁵ Uje Elı́as cha dacatecãraitigade ome Dupade nanique ga terẽtáji porabia údi ga mopı́siji jnumi. Mu chuniname eti Pangarádejnai iroi gaté unirı́sõre chiringare. Ga chojningame: –Elı́as, ãriji ga agu babosode to.–

⁶ Ga Elı́as niji ga chimo uje pan quedéjnai déji pioi gueguerade gai iji datẽrasui, ga chimopo co tiji ejoi te rı̃ uje yodi déji ajei to. Ga jé u uje tagu pan quedéjnai uté, ga chójiapo yodi te rı̃. Ga udojo quigade uje Elı́as taque nanique ga jé tagápo dugudie gaté rı̃.

⁷ Ga jé isoca Pangarádejnai iroque gaté unirı́sõre, uje diapo rı̃ ga chiringare Elı́as iji damoi gaté enga chojningame uté: –Elı́as, ãrijíapo rı̃, ga agápo babotı́so rı̃. Uje idájapise baqui gu, enga a sué babai jeta ca agu babosode udore to.–

⁸ Ga jé u uje Elı́as nijiápo rı̃ enga e tagápo dabosode rı̃, ga chójiapo yodi te rı̃. Enga atigai uté chisı́ome uajatiguei ome Elı́as uté, enga jé u uje jnome cucarani yui uje i tu Horeb, uje i uñai cuse to uje i tu Dupade Gajnenguipı́si Cucarãte. Ga Elı́as guejnane dire chise 40 nanique iji daqui uté yui ome dariguı́tigai, mu que tagápo dabotique rı̃, uje que chaguhénique chejna Elı́as iji cucarani uté yui ga uajádaja dajesúode nanique.

⁹ Uje Elı́as chise cucarani Horeb uté ga jé u uje chácariji cucarã́tedó iji dejai uté údode. Enga Pangarádejnai uruode chise Elı́as iji uté, uje chósi te: –Elı́as, ¿ama bagaitı́guiji de a?–

Pangarádejnai chiqueta raja Elı́as iji cucarani uté uje i tu Horeb

¹⁰ Ga Elı́as chajnai Pangarádejnai uruode ga chojninga: –Yo yiba badode gu, Pangarádejna Dupa Pujnuéngaisṍri á. Enga yejna yiguesi ome baroquéode úringane pipesucho. Uje yurasade israélgose e ore noñome baru iyiejájnane iji te jmete, enga ore chajnangarase bajnéone gaserãcho, jé aja uje ore chujé barógode proféta udore ome daqueséode. Enga gusúpusu uecai tu yu ome yúringai baruode júsõre iji erámi tudé. ¡Mu e ore pota jeta ore chijna yucuecaringuei iji yari to!–

¹¹ Ga jé u uje Pangarádejnai chojningame Elı́as uté: –Be guesi tiji cucarã́tedó uaté enga ayáguena yiquei iji boruti cucarãte uté. Adójnanga to uje e dimane Pangarádejnai uyu ujetiga yiguiji baquei jne.– Uje Pangarádejnai chiramı́sara Elı́as iquei, mu jı̃raque úyujna cuchabé tocade iji Pangarádejnai uté iquei uje chucuase cucaranone udore. Ga cucaranenie cho pijnimenie aja dajesui to ga chinguı́ra rágaja ñane aja dajesui tóco, tóco, toc. Mu que Pangarádejnai pié u úyujna cuchabé gotique. Ga quigade ga jnupe tãrarachui dépoji rı̃. Mu Pangarádejnai que pi u jnupe tãrarachui gotique to.

¹² E mu que gusu jnupe tãrarachui uté, mu pioguéjnai dépoji uté quigade rı̃. Mu jé isoca uje que Pangarádejnai déji pioguéjnai uté ajei gotique to. Enga pioguéjnai uté quigade, ga quene Elı́as chudute cucha ajaramomı́nami uje cho jñararara aja dajesui.

¹³ Uje Elı́as chudute cucha ajaramomı́nami suté, enga chiraja uje Pangarádejnai jé u. Enga jé u uje chaco dedodie gai ome daguidé umare uaté, ga quene doi guesi ga cháguena cucarã́tedó pijnanámi. Enga Elı́as chudute darade uje chojningame: –Elı́as, ¿ama bagaitı́guiji de a?–

¹⁴ Ga Elı́as chajnai darade udore ga chojningápome Pangarádejnai gaté rı̃: –Yo yiba badode gu, Pangarádejna Dupa Pujnuéngaisṍri á. Uje yejna yiguesi ome baroquéode úringane pipesucho. Mu yurasade israélgose e ore noñome baru iyiejájnane iji te jmete, enga ore chajnangarase bajnéone gaserãte, jé aja uje ore chujé barógode proféta udore ome daqueséode. Enga gusúpusu uecai tu yu ome yúringai baruode júsõre iji erámi tudé. ¡Mu e ore pota jeta ore chijna yucuecaringuei iji yari to!–

¹⁵ Ga jé u uje Pangarádejnai chojningame Elı́as: –Bo ga ajniápo rı̃ aja baquigade, ga acapóji baqui casodé rı̃ iji erãpetarei uje i tu Damásco. Ga a ese sı́riagosi iji uté uje i tu Hazael, ga be jne enga ojne aseque puyai ójo gai ome úringai sı́riagosode ore eduguéjna jne.–

¹⁶ Ga Pangarádejnai uruode chósi tome Elı́as gaté rı̃: –Que gusu yiroquei uté, mu acué israélgosi Jehú to, uje Nı́msi ujnacare uté, ga ojne aseque puyai ójo gai to, ome dáringárique israélgosode ore eduguéjna yui jne. Que gusu uté, mu acáji ore idai uñai to rı̃ uje i tu Abel-meholá. Enga acué Safat ujnacari Eliséo iji uté, ga ojne aseque puyai ójo gai to ome úringai proféta, uje uté a u jne ujetiga chácariji bayaridi iji baquigade.–

¹⁷ Ga Pangarádejnai Dupade cho Elı́as quique gaté ome cucha dacate piqueminórone yúode, uje chósi te: –A yagúome yojningane jnanı́o udore ome yutoquéode jne, jeta yo yujuñame israélgosode ore. Uje a chise dı́nique jne, ga sı́riagosode ore eduguéjnai Hazael a doi pocaningai ome israélgosode ore jne, mu uñane a qué chapite iji udore ore ujade jne. Mu israélgosode ore eduguéjna ichai Jehú a guejnaque udore jne. A jé isocapo rı̃ ga uñane a qué ecápo rı̃ mu yuruode atatasṍri Eliséo a guejnaque amirone udore jne.–

¹⁸ Enga Pangarádejnai chopósi tome Elı́as gaté rı̃: –Mu jé ca ajos eti gusu ua uje bedu yadode, Elı́as yá. Uje yanguresõripı́sode qué déji israélgosode ore ujade, enga a yujuse ore guio jne. Ga ore batigai chise 7.000 uje que ore chucu purása quedéjnane ucupı́tiguiji ore angureni ayoré gajnu Baal to. Jé aja uje que udore uñeque chichaga dagataidie aja jnumi iji uté iquei ome úringárique pisı́gai.–

Elı́as ibaguiédi Eliséo uté e chise dáringai Dupade júsõre to nanique

¹⁹ Enga Elı́as jnoji cucarani uté, ga chise Pangarádejnai ojningai Eliséo uje Safat ujnacari tu. Enga Eliséo, jorane qué ore déji dasagode gai uje ore chı̃rase jnumi ome buéyode uje Elı́as chise Eliséo ore iji dajogadi uté. Ga Eliséo jorane udore chojmara, chojmara, chojmarane udore ore chijñaque buéyode uje pigaricho aja ñane, ga, ga gare buéyode udore aja ñane. Ga ore jochade 12 nanique uje ore chı̃rase jnumi tome. Ga Eliséo chı̃rase jnumi tiji dajorane quigade, uje chijñaque buey erueminore gárode udore uje pigarique ore aja ñane. Enga jé u uje Elı́as chijnare raja Eliséo, enga chaco daguidé umaré Eliséo gai. Mu quigade enga Elı́as qué jnome dajesui gaté.

²⁰ Mu ome Elı́as isocai uté ga e pijoque ome Eliséo uje a basája dáringai proféta ome Pangarádejnai jne. Ga jı̃raque noñome buéyode iji te jmete ga chayóna Elı́as quigade. Ga Eliséo chojningame Elı́as: –Yijócha bajei údi jeta ajuéga ga qué yucu ité, iapade ore uredie bajaque ga quigade ga a yijı́na ua jne, ga a jé ca yimoque baróraque quitique jne jeta ajnai baquitı́go.– Ga Elı́as chojninga: –Bo ga ajnı́ja ore. Que yetaque báyipiedie udire arı̃a.–

²¹ Ga jé u nanique uje Eliséo jnoji Elı́as gari iji uté, ga chajnı́ja daguı́jnai. Ga doi dachite gárode uje chı̃rase jnumi ome que. Enga doi ore adı́jade picho ga chejñu ore iji ga chajugája daquetai nanique jóra, jóra. Enga jé u uje uté chujé dachidode buey gáño udore ga chãrei udore arione uje pésu datigai uté nanique. Ga chisı́ome darasade, dajorane ore iji dejode ome dacoringai yui, ga ore taguı́ji uté gari jnese. Uje e ore básome chagúi nanique enga quene Eliséo jnome Elı́as quigade ga cháta cuchade aja uté ome dáringai Elı́as iroque.