1 Reyes 17 - Dupade Uruode

Pangarádejnai angúromei proféta Elı́as chingome eduguéjna cuchábi Acab nanique uje Dupade a suru gaté yui ome guéode

¹ Chise diri nanique uje proféta uñai uje i tu Elı́as tibágui israélgosode ore eduguéjnai Acab uté jeta chatatame uté uje a ca begapo jne rı̃ iji ore uniri uté. Enga Elı́as uté idai upúsu ore idai Tisbe nanique, uje déji ore uniri Galaad uté. Enga Elı́as cho dáñiejname Acab uté yui, uje chósi te: –Pangarádejna Uecai uté irógode uñai uyu, uje israélgosode Yocudupade jé upúsu uté. Enga yingome ua uje a jé ca begapo jne rı̃ iji puniri udé, enga que gusu ujetiga guéode ca chisápo erámi rı̃, mu pocadi a jé ca chisápo jnacarade to rı̃. Enga Pangarádejnai ujuyaquéode udojo a jé chuságaja siqueré uñanie iji yoquiquéode jne. Mu a quene guéode chisápo erámi rı̃ ome yuruode, ujetiga yutṍrapoi Pangarádejnai ome rı̃.–

^2-3 Ga cucha dacadode udojo quigade nanique ga Pangarádejnai chiroque Elı́as aja doi iji uté, ga chósi tome uté: –Boji udé, ga écãre baqui ga acáji guedé garani yui. Enga apógu ua iji tié jmané uaté dosadi uje i tu Querit. Uje tié jmanámia suaté déji yote quedéjnai Jordán uécha uñai to iji guedé garani yui.

⁴ Enga a óji yodi iji tié jmané uaté jetiga ca acajnóriji to jne. Mu ome babotı́go udore cucha ga e yiroque chugúpẽre utatadie aja ujetiga ore di babosode údi iji bayaridi uté.–

⁵ Ga jé u uje Elı́as jno ga chicası́ji tié jmanámia iji yote quedéjnai Jordán uécha uñai ga chácariji tié jmanámia suaté ejode to. Uje Pangarádejnai utoquéode jé upúsu ome uté gu.

⁶ Ga chugúpẽre utatadie udire di uté posode údi iji durasedie jnese nanique. Mu que gusu durasedie, mu guedéjnoringáne jé upo nanique rı̃, uje ore chṹra Elı́as uté. Enga ore iringuı́one u arurégode jé aja cucha arione nanique. Enga jecucha ga uté chóji yodi iji tié jmanámia suaté to.

Pangarádejnai chiroque Elı́as aja ore idai Sarépta nanique, enga chungurase chequé abai togué áyipie iji uté ujetiga chosõre uté

⁷ Mu e chise dı́nique nanique iji cucha dacadode udore quigade enga tié jmanámia suaté ı́jnongosi. Ga gose arenie uje e chise ore uniri gu uje ı́jnoque guéode.

⁸ Enga jé u uje Pangarádejnai uruode chisápo Elı́as rı̃ jeta cho quique ome pisocade yui.

⁹ Enga chojningame uté: –Elı́as, ayague ga bo enga acáji sidóniogosode ore idai Sarépta uté ujetiga o bayaridı́ji uté. Adójnanga uje e yingo chequé eca iji ore idai uté ujetiga chosõre ua jne.–

¹⁰ Enga jé u uje Elı́as chague, ga jnome ore idai Sarépta yui. Enga quene chise ore idai ujuyaquei piagoi uté ga chimo chequé abai togué uje doi derogode iji ore idai ujuyaquei ejode. Ga Elı́as tibite uaté gai ga chojninga: –¡Ãre chejna yu é! ¡Osõrape yu ome baduátique é!–

¹¹ Enga uaté e jnorase ome yodi yui, mu Elı́as qué tibidápoi gai gaté rı̃ ga chojningame: –¡Átaja arurétique jé yé!–

¹² Enga uaté chajnai Elı́as uruode ga chósi tome uté: –Íjnonguipı́se arurégode iji yu, que yãra ua. Enga yuru uréone udojo gajnesṍri tu Pangarádejna Uecai, uje bangureni Dupade u uté. Uté chiraja uje garósosi harı́nami irábia iji pi ajei enga a jé chorase yijmanai ajébi. Ga garósiapo asébi iji pi ajei te rı̃. Uje bese uyu iji de ga e yijı́rasi yeroque garósiode jeta yiji údi aja yiguı́jnai ome yoquibotique yúrique. Uje yigaidi tu ujetiga yipésu pioi ga yarósirase dotı́yai ome yabi, uyoque jne. Enga a yajórasu iji de gajiné, mu a jé yitogórasi jne ome yoquiyaguhei uté jne iji quigade.–

¹³ Mu Elı́as chajnai chequé abai togué uruode ga chojningame uaté: –Ca atodo chaguhei yui to. Enga bo ga apésu bojningai dotı́ya iji baguı́jnai uté. Mu o bajágu yajnetique bajaque enga ãri údi iji uyu. Ga quigade ga quene apésu babi, uacajnetı́go to.

¹⁴ Uje Pangarádejnai, israélgosode yocangureni Dupa uté uruode chósi te: "Harı́nai pi uté ga a jé ca ı́jnoque ajei jne ome harı́nai uté; ga a jé chome aceite pi uté to, uje a jecucha aceite déji ajei jne gatuaque. Enga pisocade udore a jé chuságaja Pangarádejnai uyu, yojningai dire ujetiga yirógapo guéode aja erámi rı̃."–

¹⁵ Ga chequé abai togué jno ga dopı́si Elı́as uruode quigode udore, ga charore Elı́as gajnei bajaque. Ga que chimoque nanique uje cucha pibosode déji Elı́as, jé aja chequé uaté, jé aja uaté jogasúode jnese gatuaque.

¹⁶ Ga cucha dacadode udore jé péroji Pangarádejnai uté ichagájade darúo ome Elı́as uje chajnerame ome chequé abai togué uaté. Uje que ı́jnoque harı́nai gotique iji pi ajei gatuaque, ga jé chopome aceite pi uté rı̃, uje que ı́jnoque ajei ome aceite uté to.

Pangarádejnai angúromei proféta Elı́as uté chiringare chequé abai togué abi iji itóringai nanique

¹⁷ Enga cucha dacadode udojo quigade nanique u uje iguı́jnató uaté abi ejnarétaque, chequé abai togábia suaté. Enga abi ejnarei uté jno dádi, jno dádi jé aja ujetiga ujñari que dépoji rı̃, enga uté quene topı́si.

¹⁸ Enga jé u uje chequé uaté chaguhéta Elı́as gai ome abi itoringai uté, ga uru dosógode udore chósi tome uté: –¿Yibárique cucha ome ua yá, Dupade iroi chá? ¡A ese de que gu jeta ayóji yisijnaringuéone yui ome uyu jõ, ga jé upo rı̃ ujetiga equésãre yabi uté!–

¹⁹ Mu Elı́as chajnai uaté uruode, ga chojninga: –Asi ome babi ome yu.– Ga jé u uje Elı́as chijna disi uté iji daté urúdi, ga jno údi aja dapari uté ajé uñai iji guiguı́jnai uté ójo yui. Enga chujé disi uté aja damochápi gai iji uté.

²⁰ Quigade ga Elı́as chejnapúsu daruode ome dacatecãraitigade ome Pangarádejnai uté, ga chojninga: –¡Urénga! Pangarádejná, yangureni Dupade á, ¿Cuchárique u gu a uje bãri bajuyaquei udé údi ome chequé abai togué osõratébia suaté? Bamo arı̃a uje uaté juéga daguı́jnai ome uyu ujetiga yaparu ajé uñai to, enga gose icaniratiguéode. ¿Mu gotique chimo jóroque re uje bapésu ujetiga abi uté toi?–

²¹ Ga Elı́as dosi abi ga terẽtási ababi gai ga chejnapúsu daruode ome Pangarádejnai, ga ajei jochaquéode ome uté chósi te: –¡Pangarádejná, yangureni Dupade á, bebi ga atirépo disi udé ucuecaringuei gai te rı̃!– Ga gadioque uje Elı́as isocai jé u uté uje terẽtási disi togábi gai ga catecã́ri Pangarádejnai ome uté.

²² Ga Pangarádejnai tangaripı́si Elı́as icatecãraitigade udore ga chatirépo disabi ucuecaringuei gai te rı̃, enga quene eca.

²³ Ga Elı́as chimo uje ecásiapo rı̃ ga chisa ¡saque! jeta chijna aja daté to. Uje Elı́as mochádi déji ajé uñai iji ore gai, ga chijnási disabi aja jnumi yui enga chisı́ome daté. Ga chósi tome chequé uaté: –¡Cajirósi to! Babi e ecásiapo rı̃.–

²⁴ Enga chequé uaté chajnai Elı́as uté uruode enga chojninga: –Quene báringai Dupade iroque pijóguipı́some uyu. Ga que potigayaquérique déji yu ome baruode úringane ũréo, uje udore garani tupúsu Pangarádejnai uté.–