1 Reyes 16 - Dupade Uruode

Pangarádejnai Dupade urugaite israélgosode ore eduguéjnai Baasa uté ome isoca noñángone jnese

¹ Enga dirode udore jé u nanique uje Pangarádejnai Dupade chutṍri daruode júsõri Jehú nanique ome daroquéode nanique. Ga iroquéode u ujetiga Hananí ujnacari Jehú uté chajnerame eduguéjna Baasa uté gajnéone Dupade ujuyaquéo ome. Ga Baasa uté gajnéone Pangarádejnai urúo chósi te:

² –Baasa, yo ayorédaté iji ua ica uje que agúsiji cuchárique mu. Ga yichajapite ua aja yurasade israélgose ore iquei ujetiga ore cho deduguéjna iji ua. Mu barate israélgosode ore eduguéjnai Jeroboam aja isoca gajnaréngone to. Enga banejéna yurasade israélgose aja basoca gajnaréngone udore to. Enga bajnime yájningadatéi ga gose bate gajnaréngone udore.

³ Jecute yósi tome ua, Baasa: a yı̃ro ua, jé aja bajogasúode uaque jnese jne, ga a ı́jnoque erámi ome uaque jne. Ga yisocade ome ua jé péroji yisoca casicaite ome Nabat ujnacari Jeroboam uté nanique.

⁴ Uje yurugaite Jeroboam nanique ga yuruode chósi tome uté: "A jé ca pijóchõre baguiosode udore uñeque jne. Ujetiga uñeque toji guidai ajei, mu a tamocode gajneque jne jeta tagu gosi. Jeoga baguiosode uñeque toji garánique, mu chugúpẽre chagúode ore gajneque jne jetiga ore tagu uté gosi."– Enga udore u Baasa uté gajnéone Pangarádejnai ujuyaquéo.

⁵ Enga cucha dacate amirone jnese iji Baasa uté úringai eduguéjna, jé aja ipesudode cucha jnese, jé aja etotiguei, ga purusãracho jnese iji darujna aode uñane nanique uje ore churúsãre israélgosode ore eduguéjnane adode iji udore.

⁶ Uje ore eduguéjnai Baasa toi nanique ga ore chijóchame iji ore idai uté uje i tu Tirsa. Ga Baasa uté ujnacari uje i tu Ela basája dayé uté charidi ome dáringai israélgosode ore eduguéjna iji quigade.

⁷ Pangarádejnai uté urugaite Baasa uté ome isoca noñángone udore jnese uje uté pésu gatuaque iji Pangarádejnai uté edominone. Uje Baasa uté chijnimipise Pangarádejnai uté ájningai ome dadode udore. Enga Hananí ujnacari Jehú tu proféta uté nanique uje Pangarádejnai chirógaja Baasa yui jeta chajnerame uruode ome. Uje Baasa uté, jé aja jogasúode ore jnese ore chorase dajnéngu dajnéone pujuyaquéo to nanique rı̃. Enga Baasa bade uñai u uje uté ajnai tupúsu Jeroboam casicaite isoca gajnaréngone iji jnumi. Mu datéringa uje Baasa uté doi dáringai ayoré ome Jeroboam jogasúode udore to enga chejnápise ore, uje que gajnepı́di u mu. Enga Pangarádejnai cho Baasa uté báji cuchade udore jnese.

Israélgosode ore eduguéjnai Ela uté isocade u udojo uje chise dagachodi nanique

⁸ Judágosode ore eduguéjnai Asa guejnanie siquerei ome dáringai eduguéjna e chise 26 años nanique, uje israélgosode ore eduguéjnai Ela quene basája dayé Baasa uté charidi nanique. Ga uté chácariji dedai Tirsa nanique, enga guejnanie siquerei gare ome dáringai eduguéjna nanique iji uté.

⁹ Enga Ela uté iróquegatéi uje i tu Zimri, jé aja jorane ore, ore pésu dáyipiedie ome uraque deduguéjnai Ela uté úringárique chuque nanique. Ga Zimri uté gajnepı́di tu nanique jeta chañuru deduguéjnai uté gachidode guebéquedatéo uéchai guio, uje pocaningai gajnecho udore nanique. Enga chise diri nanique uje Ela tibágui daroguipı́si iguı́jnai nanique iji ore idai Tirsa uté. Uje iroguipı́si uté i tu Arsa, enga uté gajnepı́di tu nanique ujetiga chajire deduguéjnai iguı́jna cuchábi yúode iji ore idai Tirsa uté. Enga Ela uté e chójipise dajodé iji Arsa iguı́jnai uté, enga ujuya, ga jé u uje ũrusópise.

¹⁰ Enga quene Zimri uté chacája ajei ga cugujnáji Ela iji úringai ũruso nanique ga chujépise nanique. Ga jé u nanique uje Zimri uté jé chácariji dei charidi ga urasade israélgose ore cho deduguéjna iji uté. Ga cuchade udore tocade nanique uje judágosode ore eduguéjnai Asa guejnanie siquerei e déji 27 años nanique ome dáringai eduguéjna.

¹¹ Uje quene Zimri uté chácariji dayaripi ueradi uté ome dáringai eduguéjna nanique, enga que chajirape cuchárique mu jı̃raque doi pocaningai ome Baasa casicaite jogasúode ore jnese. Enga chejnápise ore jnese nanique. Ga chátapó iguiosode uñane aja to, jé aja jorane ore jnese ga chejnápise ore ¡jaripe! Que diyoquı́ode jeoga jnanione udore uñeque chapite nanique iji dı́nique.

¹² Enga Zimri isocai jé u uté, uje chejnápise Baasa uté jogasúode udore ¡jaripe! nanique. Enga Baasa uté gajnéone pujuyaquéo udore jé péroji Pangarádejnai Dupade uru cásodicáite uje uruode atatasṍri Jehú e chatatame Baasa uté nanique.

¹³ Ga gose Baasa uté ate gajnaréngone jnese, jé aja ujnacari Ela uté isijnaringuéone udore. Chamáñaje ore cho dadupáji dangurenone cucha bisidécho udore, enga ore chiroque darasade israélgoso ore aja udore úringane pangurete to. Enga jé u uje ore chijnimipise Pangarádejnai uté ájningadatéi, uje israélgosode ore Dupade u uté.

¹⁴ Enga cucha dacate amirone jnese iji Ela uté úringai eduguéjna, jé aja ipesudode cucha jnese, ga purusãracho jnese iji darujna aode uñane nanique uje ore churúsãre israélgosode ore eduguéjnane adode iji udore.

Zimri uté chácariji dáringai israélgosode ore eduguéjna, mu garósipise guejnane dire ome dáringai eduguéjnaráse

¹⁵ Uje e chise 27 años uje judágosode ore eduguéjnai Asa uté qué déji dáringai eduguéjna nanique, mu Zimri uté basája dáringai israélgosode ore eduguéjna nanique. Enga Zimri chácariji Tirsa nanique ome dáringai eduguéjna, mu gusu guejnane dire siete nanique ome dáringai eduguéjnaráse. Iji dirode udore nanique ga israélgosode ore déji darengúi iji filistéogosode ore idai Gibetón ejoi nanique, ga dimane ore ome dajocaningai ome gibetóngosode nanique.

¹⁶ Mu Zimri ujnomei chise soldádode udore ore iji darengúi uté nanique uje Zimri pógu dáyipiedie ga toria chujé israélgosode ore eduguéjnai Ela uté ga e chigócai chácariji dei charidi uté. Ga ore chetaguipise Zimri adode udore nanique. Ga jı̃raque soldádode jé aja ore eduguéjnane jnese ore pésu deduguéjna ichárique jé iji diri tuté. Ga ore cho israélgosode ore eduguéjna ichai iji soldádode ore eduguéjnapisi nanique uje uté i tu Omri.

¹⁷ Ga jé u nanique uje soldádode eduguéjnane udore ore cha dajocaningai ome filistéogosode ore nanique iji ore idai Gibetón uté, ga ore nóna dasoldádode enga ore quı́tequigája Zimri idai nanique uje uté i tu Tirsa, ga ore cugujnáji tírsagosode ore idai uté nanique.

¹⁸ Uje Zimri uté e chiraja nanique uje soldádode eduguéjnane udore ore sué tírsagosode ore gai enga uté todo soldádode yui nanique enga choru daguı́jna cuchábi ajé gatei iji ójo nanique. Enga chisa pioi nanique ga chãru daguı́jna cuchábi gai, ga pioi tagu uté gai to ga toi nanique.

¹⁹ Ga cucha gajnaréngone udore tocade ome Zimri uté nanique gu uje isocade gajnarénguipı́so nanique. Ga uté cho dabáji dapesudode cucha noñácho iji Pangarádejnai edominone nanique. Uje Zimri uté chajnápise Jeroboam casicaite uté isocade iji jnumi, jé aja isijnaringuéone uje chacate darasade israélgose ore ome pisoca gajnaréngone nanique.

²⁰ Enga cucha dacate amirone iji Zimri uté úringai eduguéjna, jé aja isocai uje chujé israélgosode ore eduguéjnai Ela to nanique ome dáyipie dapoguiédedie, ga purusãracho udore iji darujna aode uñane uje ore churúsãre israélgosode ore eduguéjnane ore adode iji udore nanique.

Omri uté isocade u udojo nanique uje chise dáringai israélgosode ore eduguéjna nanique

²¹ Iji Zimri uté quigade nanique ga israélgosode ore chajuque re iji gatócoro ome ñane. Enga ore péode uñai chirota Guinat ujnacari uje i tu Tibni, ujetiga ore cho deduguéjna iji uté. Jé basa ga ore peque jõrai uté irotai tu soldádode ore eduguéjnai uje i tu Omri ujetiga ore cho deduguéjna iji uté.

²² Jecute que ore eduguéjnapisi qué pijoque mı́raque. Mu chise diri nanique uje eduguéjnai Omri uté irotasórone suépise uté ujoi eduguéjna Tibni uté irotasórone udore ore gáyode. Enga jé u uje Omri acháidi Tibni uté toi, ga quene jogadi tupúsu uje Omri uté basája dáringai israélgosode ore eduguéjnapise nanique.

²³ Enga judágosode ore eduguéjna cuchábi Asa uté guejnanie siquerei ome dáringai eduguéjna chise 31 años nanique uje Omri uté e pijoque ome dáringai israélgosode ore eduguéjna. Enga israélgosode ore eduguéjnai Omri uté guejnanie siquerei chise 12 ome dáringai eduguéjna jnese nanique. Nanique iji taningai ga chácariji ore idai Tirsa uté, ga guejnanie siquerei 6 uje déji dedai uté ome dáringai eduguéjna.

²⁴ Mu iji siqueredie 6 udire quigade enga quene Omri uté chécãre dayaridi uté. Ga uté doi cucarãte oróneraque oredie nanique ujetiga pésu dedáidaté ichárique iji uté gai nanique. Ga cucarãte oroné uaté i tu Samária. Ga eduguéjnai Omri uté chimate cucarãte oroné uaté gajnesṍri uje i tu Semer uté ome daplátadie. Enga jiei oredie nanique, enga oredie batigai u pláta guebéode nanique uje ikı́lode chise 66. Enga Omri uté cho gajnesõre bajai Semer uté unuchúji dedai ichai uté nanique, jecute idai i jé u Samária nanique.

²⁵ Mu israélgosode ore eduguéjnai Omri uté pésupúsu pisijnaringuéone iji Pangarádejnai uté edominone gatuaque. Enga uté sué israélgosode ore eduguéjna bajade jnese gáyode ome dajmapié noñánguepı́sedie.

²⁶ Chamáñaje Omri uté chajnápise jnani bajai Nabat ujnacari Jeroboam uté jmapiedie iji jnumone, jé aja adode uje chiroque darasade israélgose aja pisijnaringuéone úringane pipesucho. Uje ore cho dadupáji dangurenone cucha bisidécho udore, enga jé u uje ore chijnimipise Pangarádejnai uté ájningadatéi, uje israélgosode ore Dupade u uté.

²⁷ Enga Omri uté isoca amirone jnese iji uté úringai eduguéjna, jé aja etotiguei uje choqui guesi ome ore, enga purusãracho jnese iji darujna aode uñane nanique uje ore churúsãre israélgosode ore eduguéjnane adode iji udore.

²⁸ Uje ore eduguéjnai uté toi nanique uje i tu Omri ga ore chijóchame uté iji dedai Samária uté. Enga uté ujnacari uje i tu Acab basája dayé uté charidi nanique ome dáringai israélgosode ore eduguéjna.

Omri ujnacari Acab uté pésupúsu dupa quedéjnane unéningai ome darasade israélgose ore nanique

²⁹ Uje judágosode ore eduguéjnai Asa uté guejnanie siquerei ome dáringai eduguéjna e chise 38 años nanique, enga quene Acab déji dáringai eduguéjna to nanique iji darasade israélgose ore ujade. Ga Omri ujnacari Acab uté guejnanie siquerei ome dáringai israélgosode ore eduguéjna nanique chise 22 años iji dedai Samária uté.

³⁰ Enga Omri ujnacari Acab uté isocade gajnarénguipı́so iji Pangarádejnai edominone gatuaque nanique, enga sué israélgosode ore eduguéjna bajade jnese gáyode ome dadode úringane noñánguipı́so.

³¹ Ga Acab uté chajnápise Nabat ujnacari Jeroboam casicaite ate noñángone udore iji jnumone. Mu Acab uté cachi cho cucha atı̃́atiguiji dadode udore, uje gajnarécho mu. Jecute doi datéringai ga cho dacotéji purása quedéjna uaté nanique uje i tu Jezabel. Enga sidóniogosode ore eduguéjnai uje i tu Et-baal uro uaté nanique. Enga jé u uje Acab quene doi dupa quedéjna uñai adode to uje i tu Baal. Ga doi ga chichaga dagataidie aja jnumi iji Baal uté iquei ome úringai pisı́gai nanique.

³² Ga jé u nanique uje Acab uté pésu dangureni icha Baal uté iguı́jna cuchábi nanique iji ore idai uje i tu Samária. Enga pésu jórogu Baal uté gajnei gaserãte cuchape iji Baal gajnei guiguı́jna ajei to.

³³ Enga que gusu uté, mu Acab pésapo dupa quedéjna uña oré iji pore pajénique to nanique rı̃ uje uaté i tu Asera. Enga Acab uté chiroguipise Pangarádejnai uté aja dáringai ájningaránguipı́se nanique, uje israélgosode ore angureni Dupade u uté. Enga Acab uté suépise israélgosode eduguéjna bajade udore jnese gáyode ome date noñánguipı́sode udore.

³⁴ Iji deréjnane udore uje Acab uté qué déji dáringai israélgosode ore eduguéjna nanique, ga betélgosi uje uté i tu Hiel e pésapo ore ujuyaquei iji pidai uté gai uje i tu Jericó rı̃. Mu Hiel uté cho dadode udore oré nanique. Uje quene chijócha ujuyaquei qui nanique, mu ape urẽjai cachodi jé u nanique uje toi. Enga abi uté i tu Abiram. Mu Hiel uté qué jnopo ore ujuyaquei údi nanique rı̃ ome úringai pipesute. Ga chimánaja gaté ga e chicha jorı́dedie aja piagoi uté, mu ape ungarómi cachodi jé u to nanique, ga topoi nanique rı̃. Ga abi uté i tu Segub. Enga cucha dacadode udore jé péroji jnani bajai Nun ujnacari Josué uru iyiejna cásodicáite uje tṍraji Pangarádejnai uté ome gosi ujetiga pésapo Jericó ujuyaquéode udore aja gaté rı̃.