1 Reyes 15 - Dupade Uruode

Roboam ujnacari Abiam uté basája dáringai judágosode ore eduguéjna nanique

¹ Uje Abiam uté quene basája dáringai eduguéjna nanique iji judágosode ore uniri, mu israélgosode ore eduguéjnai qué déji dáringai eduguéjna to nanique uje uté i tu Jeroboam. Ga jnani bajai Nabat ujnacari Jeroboam uté nanique. Ga Jeroboam uté guejnanie siquerei e 18 nanique ome dáringai eduguéjna nanique uje Abiam uté quene basája dáringai judágosode ore eduguéjna.

² Ga Abiam uté guejnanie siquerei gadioque nanique ome dáringai eduguéjna iji dayaridi Jerusalén uté. Ga uté daté i tu Maaca, ga Abisalom uro uaté nanique.

Gajnareque eduguéjnai Abiam uté adode, mu Pangarádejnai uté chijna dáqui casicaite David gajnei osongaqué aja Abiam uté

³ Abiam dai casica Roboam uté pésupúsu pisijnaringuéone nanique, enga ujnacari uté chajnápise uté quigade ome dasoca gajnaréngone udore jnese to. Enga que uté áyipie chejna raja Pangarádejnai uté, uje angureni Dupade jé u mu. Jecute que cho dáqui casicaite David ome áyipie arétigai, uje David uté chedu Pangarádejnai iji dáyipie nanique.

⁴ Abiam uté jé ca tiógararása Pangarádejnai osongaquei ome re go, uje gajnareque adode gu ome dangureni Dupade uté. Mu Pangarádejnai chijna David gajnei osongaqué aja ájnape gatei Abiam uté, enga chı̃́care ujetiga abi chácariji charidi iji quigade, ome Jerusalén úringai pañeraque.

⁵ Enga Dupade chingongara dasongaquei aja Abiam uté gu dáqui gatei David isocade. Uje David uté pésu cucha arégode iji Pangarádejnai edominone gatuaque iji dacuecaringuei údode jnese, enga que cho cutúgome Dupade uté iroquéode uñeque. Mu ate gajnarei chojmara nanique uje David cho dayoguéji, enga uté adode ome hitı́tagosi Urı́as uté jé u nanique.

^6-7 Iji Abiam uté ucuecaringuei jnese ga chimo uje dayé Roboam, jé aja israélgosode ore eduguéjnai Jeroboam uté doi pocaningane ome ñane. Enga ore jocaningai uté jé chuságaja Abiam to, uje jecucha pocaningai dépoji Jeroboam, Abiam ore ome ñane to nanique rı̃. Enga cucha dacate amirone iji Abiam úringai judágosode ore eduguéjna, jé aja ipesudode cucha udore, ga purusãracho jnese iji darujna aode uñane nanique uje ore churúsãre judágosode ore eduguéjnane adode jnese iji udore.

⁸ Uje Abiam toi nanique enga ore chijóchame uté iji dai bajade ore ódedie jogadi to iji dáqui casicaite David idai Jerusalén uté to. Enga Abiam ujnacari uje i tu Asa basája dai charidi nanique ome dáringai judágosode ore eduguéjna iji uté quigade.

Asa uté chedu Pangarádejnai iji dáyipie nanique iji dáringai judágosode ore eduguéjna

⁹ Uje Abiam ujnacari Asa uté quene basája dáringai judágosode ore eduguéjna, enga Jeroboam uté úringai eduguéjna ome israélgosode ore e chise 20 años nanique.

¹⁰ Ga Asa uté úringai eduguéjna ome judágosode jé chuságaja 41 años uje uté chácariji dáringai eduguéjna nanique iji Jerusalén. Ga uté dacode i tu Maaca nanique uje Abisalom uro uaté nanique.

¹¹ Enga eduguéjnai Asa uté pésu cucha arégode iji Pangarádejnai edominone, ga chijnime dáqui gatei David átegoningáne ¡janipe! nanique.

¹² Enga Asa uté isocai u to uje doi nanique ga tṍra jnanione aja guesode nanique iji daniri uje ore gaidode u ayoré gajnúone adode, ga ore gaidode upo punganinga quedéjnane adode ome ñane to nanique rı̃. Ga uté dopoi dayode eduguéjna bajácho ore angurenone dupa quedéjna oredie uje ore pésu nanique enga chinoningase ore nanique.

¹³ Que gusu uté isocade udore, mu Asa uté chijnapo dacode Maaca uaté úringa eduguejẽ́ iji gari to nanique rı̃, ga gose uaté isoca gajnaréngone udore. Uje uaté e pésu ayoré gajnu noñánguipı́si ome dangurené dupa quedéjna uaté uje i tu Asera. Enga eduguéjnai Asa uté doi dacode ipesudi ayoré gajnu nanique ga jno údi aja turéjnai nanique uje i tu Cedrón. Ga jé u uje tṍraja turéjnai ajei ga chãru gai ¡jaripe! nanique.

¹⁴ Mu cucha gajnareque chojmarai déji Asa uté, enga u uje que chejnápise ore aseradéjnane jogadébeode jnese gotique iji cucarãte umarone, orónenie iji daniri uté. Mu Asa uté chedu Pangarádejnai úringai pangurete iji dáyipie gatuaque nanique iji dajnéone dire jnese iji erámi tudé.

¹⁵ Enga Asa uté doi dañerane cucha oreránguipı́so ome Pangarádejnai uté, ga nája Dupade iguı́jna cuchábi ajei jnese nanique, uje e cho cucha puyáchoji udore. Enga cucha ponáyone udore pipesucho iji óro, jé aja guebeque ueque uje i tu pláta nanique. Enga cucha pagapı́ode déji, jé aja ore jopidode to. Ga cháta dai casicaite añerane cucha oreránguipı́so aja to ga nája Dupade iguı́jna cuchábi ajei to, uje dai uté e chı̃́care nanique jeta Pangarádejnai gajnecho udore.

Uje israélgosode ore eduguéjnai Baasa pésu dajocaningai ome Asa uté uniri Judá uté, ga Asa chutṍri sı́riagosode ore eduguéjnai ujetiga chátaja judágosode ore

¹⁶ Enga jecucha pocaningane déji judágosode ore eduguéjnai Asa, jé aja israélgosode ore eduguéjnai Baasa uté, ore ome ñane gatuaque iji ore úringane eduguéjna jnese.

¹⁷ Enga chise diri nanique ga israélgosode ore eduguéjnai Baasa uté cugujnáji judágosode ore idai uñai uje i tu Ramá, ga cho dajnéngu ore idai uté nanique. Enga pésu ujuyaquéode iji gai ujetiga suru eduguéjnai Asa uniri Judá uté yui ome quisórone ujetiga ca uñeque chise Asa uté, jé aja ujetiga ca uñeque jnopóji ore uniri Judá uté nanique rı̃.

^18-19 Uje eduguéjna cuchábi Asa chudute Baasa ujnomei uté, enga Asa uté chucué dasocárique ujetiga chijnime re iji Baasa uté josipiedie jmainie. Enga jé u uje chijna órodie, jé aja pláta guebéode jnese iji dañerane cucha orerã́cho uje qué déji Dupade iguı́jna cuchábi ajei. Mu que chedu udore, mu chátapo órodie, pláta guebéode jnese rı̃ iji dañerane cucha orerã́cho iji daguı́jna cuchábi uté to. Enga Asa uté chimate dajnimingone udore aja deminórone eduguéjna jmainie ujetiga ore jno udore údi aja sı́riagosode ore eduguéjna cuchábi Ben-adad uté uje déji dedai Damásco uté. Uje Ben-adad uté dai i tu Tabrimón, ga dáqui i tu Hezión. Ga jé u uje Asa chiroque darusarane aja uté ga chósi tome darusarane: –Bamo uje yai casicaite jé aja bai casicaite ore uru iyiejnane cuse ome ñane nanique. Enga jecucha ore chátaja ñane ujetiga pocaningane chise udore uñeque. Bebi, ga yipéco yocuru iyiejájnane ome ñane to, ujetiga yátagoja ñane. Adójnangapı́sa uje e yiroque yeranone cucha ome ua, uje óro u, jé aja pláta guebéode. Uje yigaidi u ujetiga amesẽre yáyipiedie udaji. Enga be ga aquesu baru iyiejnane ome israélgosode ore eduguéjna cuchábi Baasa uté, ujetiga uté jnoji yejode.–

²⁰ Uje sı́riagosode ore eduguéjnai Ben-adad uté chudute Asa áyipiedie udire enga chimesẽre. Enga jé u uje Ben-adad uté chajni Baasa urasade israélgoso ore gai ome dajocaningai ga chiroque dasoldádode ore asutedie aja Baasa ore uniri Israel uté. Ga Ben-adad uté isoldádode udore ore cugujnáji israélgosode ore idáyode uñane, ga ore sué udore gáyode jnese. Enga pidáyode udore ı́ode u udojo: Ijón, jé aja Dan uté, jé aja Abel-bet-maaca. Mu que gusu udore, mu ore cugujnáji israélgosode ore idáyode uñane jnese iji cinéretgosode, neftalı́gosode ore achaminone to, ome udore ore úringane pejnacho.

²¹ Uje israélgosode ore eduguéjnai Baasa chudute sı́riagosode ore eduguéjnai Ben-adad ujnomei uté, enga jé u uje uté básome dasagode uté uje pésu judágosode ore idai Ramá uté ujuyaquéode iji gai. Enga jno, ga chácariji dedáipisi uje i tu Tirsa.

²² Iji udojo quigade nanique, ga Asa tibidi judágosode ore jnese ujetiga ore chicai ore idai Ramá ujetiga ca chimoque uñeque jeta ca chicáji. Enga Asa uté chutṍri darasade udore ore ujetiga ore chajnangarase Baasa uté orade pujuyaquéo iji Ramá gai jnese. Enga ore jno dajnangarañane cucarãte uejácho udore údi, jé aja cutádedie udire rı̃, aja Asa uté ojningane pidáyo. Enga Asa uté tagúome Baasa ujuyaqué casodé cucarãte uejade jé aja cutádedie rı̃, ujetiga chiro ujuyaquéode iji udore gai. Ga pidáyode udore uñai i tu Guéba uje déji benjamı́ngosode ore uniri ajei. Jé basa ga pidáyode udore jõrai tu Mízpa.

Uje judágosode ore eduguéjnai Asa toi nanique, ga ujnacari Josafat basája charidi nanique

²³ Enga cucha dacate amirone jnese iji Asa úringai judágosode ore eduguéjna, jé aja etotiguei, jé aja ipesudode cucha udore, jé aja pidáyode udore uje uté chiro aja gaté, ga purusãracho jnese iji darujna aode uñane nanique uje ore churúsãre judágosode ore eduguéjnane adode iji udore. Mu uje e choquı́jnapise Asa uté nanique ga ejnarei chisa guı́dade nanique.

²⁴ Ga chise diri uje Asa toi nanique ga ore chijóchame uté iji dai bajade ore ódedie jogadi to iji dáqui casicaite David idai uje i tu Jerusalén. Ga jé u nanique uje Asa ujnacari uje i tu Josafat basája dayé charidi ome dáringai eduguéjna nanique.

Nadab uté isocade gajnarécho iji dáringai israélgosode ore eduguéjna nanique

²⁵ Uje judágosode ore eduguéjnai Asa uté guejnanie siquerei e gare nanique ome dáringai eduguéjna, enga israélgosode quene ore cho deduguéjnai iji Jeroboam ujnacari nanique uje uté i tu Nadab. Enga Nadab uté chácariji dáringai israélgosode ore eduguéjna 2 años nanique.

²⁶ Nadab uté isocai tu uje pésu cucha gajnaréngone iji Pangarádejnai edominone nanique. Ga chajnápise dai casé Jeroboam jmapiedie iji jnumone nanique. Enga uté isijnaringuéone jé chuságaja darasade israélgose udore ore to, uje nejéna ore aja cucha noñángone úringane pipesucho nanique.

Chise diri nanique ga israélgosode ore eduguéjnai Nadab chise dáringai chuque, ga yusṍri chácariji dei charidi uté nanique

^27-28 Enga chise diri nanique uje Nadab uté nóna darógode soldácho udore, uje ore tṍraji daniri Israel údode jnese nanique ome pocaningai yúode. Enga ore pésu dajocaningai ome filistéogosode ore iji pidai uté uje i tu Gibetón. Chamáñaje filistéogosode ore cho dajnenguı́ji Gibetón uté gu. Uje Nadab, isoldádode ore qué déji dajocaningai gai ome ore iji uté, mu Nadab urasade uñai uje i tu Baasa toria chujé deduguéjnai uté, enga jé u uje chácariji dei charidi nanique ome dáringai israélgosode ore eduguéjna. Uje Baasa jé aja jorane e ore cháta dáyipiedie aja ñane ome uraque deduguéjnai Nadab uté úringárique chuque ica gu. Enga Baasa uté dayé i tu Ahı́as, enga gãrapi u jnani bajai Ísacar uté iji israélgosode ore uáguedie ujade. Enga cucha dacadode udore tocade uje judágosode ore eduguéjnai Asa uté guejnanie siquerei e gadioque nanique ome dáringai eduguéjna.

²⁹ Ga jé u nanique uje Baasa quene déji dáringai eduguéjna enga doi ga chimate Jeroboam ucácasicáite iguiosode aja jnumi jnese nanique, ga que uñeque chapı́diji dı́nique, mu pejnacho ore jnese. Enga cucha dacadode udore péropı́siji Jeroboam gajnéone Pangarádejnai uru cásodicáite, uje sílogosi Ahı́as uté chajnerame ome ore nanique ome dáringai Dupade utocaite.

³⁰ Ga Dupade ujuyaquéode udore tocade ome Jeroboam, iguiosode ore jnese gu Jeroboam uté ate gajnaréngone udore nanique. Que gusu uje uté chimate raja dasocade udore, mu pésu pisoca gajnaréngone unéningai ome darasade israélgose udore ore to nanique. Enga Jeroboam uté adode udore ijnimique Pangarádejnai uté ájningai, uje israélgosode ore angureni tu Dupade uté.

³¹ Enga cucha dacate amirone iji Nadab uté úringai israélgosode ore eduguéjna, jé aja isocade jnese, ga purusãracho udore iji darujna aode uñane nanique uje ore churúsãre israélgosode ore eduguéjnane adode jnese iji udore.

³² Enga jecucha pocaningane déji judágosode ore eduguéjnai Asa, jé aja israélgosode ore eduguéjnai Baasa uté, ore ome ñane gatuaque iji ore úringane eduguéjna.

Israélgosode ore eduguéjna cuchábi Baasa uté chajna Jeroboam casica jmapié gajnarénguenie iji jnumone nanique

³³ Asa uté guejnanie siquerei e gadioque nanique ome dáringai judágosode ore eduguéjna, enga quene Baasa uté basája dáringai israélgosode ore eduguéjna to nanique. Ga Ahı́as ujnacari Baasa uté úringai eduguéjna ome israélgosode ore jnese chuságaja 24 años uje chácariji ore idai Tirsa uté.

³⁴ Enga eduguéjnai Baasa uté pésupúsu cucha gajnaréngone iji Pangarádejnai edominone gatuaque, enga chajna Jeroboam casica isocade iji jnumone nanique. Uje eduguéjna cuchábi Jeroboam uté nejéna darasade israélgose udore ore aja pisijnaringuéone úringane pipesucho. Enga Baasa uté chirate Jeroboam aja isijnaringuéone udore to.