1 Reyes 14 - Dupade Uruode

Israélgosode ore eduguéjna cuchábi Jeroboam chucuepı́si dasocáringome abi uje ejnarétaguipı́se

¹ Enga dirode udore u nanique uje Jeroboam abi ejnarétaque nanique uje uté i tu Abı́as.

² Enga jé u nanique uje ore eduguéjnai Jeroboam catecã́ri dacoté nanique. Ga chojningame uaté: –Bo ga apógu báringa yacoté jne ga ejñu baguidé ueradedie jne, ga acája baguidé gajnarénguenie jne. Ga ca ore chiraja ua jne aja bajesui. Ga acáji ore idai jne uje i tu Sílo, uje Dupade uruode atatasṍri déji uté gu, uje uté i tu Ahı́as. Ga uté u uje chatata yúringai israélgosode ore eduguéjna ome yu ica.

³ Ga ajnoque arurégode jne ga bajnutı́go chejna yijmanáyone jne ga asi ome Dupade uruode atatasṍri uté jne. Ga átaja tórtade to ome uté, jé aja cutẽre otadode to. Ujetiga e asi ome beranone udore ome uté ga ango yocabi tome jne uje ejnarétaguipı́se. Ga a uté chingo yocabi isocáringome ua jne jeta jé eca jeoga toi jne.–

⁴ Enga Jeroboam acoté dopı́si dabai uruode nanique. Ga jé u uje uaté niji ga e jnome Dupade júsõri Ahı́as idai Sílo yui. Enga chise ore idai Sílo nanique, ga e chicáji Dupade uruode atatasṍri iguı́jnai uje uté i tu Ahı́as. Enga Ahı́as uté que nunapóji dajirigode to nanique rĩ uje choquı́jna nanique.

Dupade uruode atatasṍri Ahı́as uté chatata cucha dacate gajnaréngone ujnomei ome Jeroboam uté uje a chise jne

⁵ Mu uaté cáma chise Ahı́as nanique, mu e Dupade chingome diringai ome Ahı́as iji iquei ga chojningame: –Eduguéjnai Jeroboam acoté a di jne. Ejnarétaque ore abi gu ga pota jeta catecã́ri ua ome uté.– Ga Dupade chingopı́sa Ahı́as uru quigode ome bajaque iji iquei. Ga chopósi tome rı̃: –A uaté cho chequé unejangue iji re jeta di jne.–

⁶ Mu uje uaté e chise Ahı́as iguı́jnai piagoi ga uté chudute guichai iji quedéjnai ga tibidi ga chojninga: –Jeroboam acoté á, aca ajei. ¿Mu cuchárique u gu a, uje bo chequé unejangue iji ua? Dupade e chutṍri yu ujetiga yajnerame uruode ome ua, enga bajneque pujnomé gajnaréngone udojo.

⁷ Ajni babai Jeroboam gai ga angopı́sa Pangarádejnai uruode udojo ome uté jne. Ga chósi te, israélgosode ore angureni Dupade uruode ome uté: "Uyu upúsu uje yipésu báringai pijóguiji barasade ore ujade nanique, enga yichajapite ua aja bayaridi uté ome báringai yurasade israélgose ore eduguéjna uté.

⁸ Uje yijna David casicaite ape disi ejode ore úringai eduguéjna iji ore gari ga yicha ua aja ore jogadi. Mu que opise yiro casicaite David ome adode. Uje uté susı́pise yuru iyiejájnane guio. Enga chejnápise dáyipie aja yu ome yadode úringane pajnacho iji jnumone nanique, uje gaidi tu gu ujetiga chedu pésu cucha ujñapetade iji yedominone gatuaque.

⁹ Mu ua ga bate gajnaréngone suépise peduguéjna cuchábode jnese gáyode iji barasade udore ore ujade uje bajaque ore ome ua. Uje babé ga bapésu bangurenone dupa quedéjna udore oredie, uje pipesudei oredie udire ome óro. Enga qui tu uje barãte uyu aja baquigade. E bajnimipise yajei dotáningane, ga gose badode udore.

¹⁰ Jecute adójnangapı́sa yuruode udojo, Jeroboam á: A yijnime cucha dacate gajnaréngone ome bajogasúode ore, ga a yejna bape disi diyoquı́ode, jé aja jnanione ore jnese ¡pógopógo! jne iji baniri Israel tudé. Ujetiga ducañerájma gosi, jeoga pañeraque gosi, mu a jé ca uñeque chapı́diji dı́nique jne. Enga a yariguéta erámi ome babode jne ga yacãra yuja gosi uje chacã́ri puchatique iji ñane ga tṍra aja sañeque ¡bu! Ga a ı́jnoque erámi jne ome ore.

¹¹ Mu a jé ca pijóchõre udore uñeque jne. A baguiosode uñéngo torásiji guidai ajei mu a tamocode tagu udore gosode jne. Mu baguiosode uñane eti ore toji guesode, mu a chugúpẽre chagúode a pose ore jne. Uje Pangarádejnai uyu upúsu uje yı̃́care cuchade udojo úringane tocachucho gu."–

¹² Uje e Dupade uruode atatasṍri uté chejna Jeroboam gajnéone Pangarádejnai urúo aja guesi ome acoté nanique, enga jé u uje chósi tome uaté: –Ãriji ga ajnı́ja baguı́jnai. Mu a ese uaquedai eruépisi jne enga achiéjna uaquedai eruei ¡tac! mu a jı̃raque babi toi jne.

¹³ Enga israélgosode a ore yuare ejode jnese jne enga a ore chijóchame jne. Ga gusu uté iji Jeroboam jogasúode jnese ujade ujetiga chise dáringárique pijóchõre jne. Gusu uté gu iji Jeroboam abode ore uje Pangarádejnai chise cucha arétiguiji adode ome israélgosode yocangureni Dupa uté.–

¹⁴ Enga Dupade uruode atatasṍri Ahı́as uté qué jnopo daruode údi ome Jeroboam acoté uaté, uje chojninga: –Que gusu cucha dacadode udore, mu a Pangarádejnai uté upúsu jne uje chiringare jnanı́rique aja gaté ome dáringárique israélgosode ore eduguéjna. Ga a uté u ujetiga chejna Jeroboam jogasúode ¡jaripe! jne, jé iji diri tuté uje chácariji dayaridi uté. E dimane cucha dacadode udore iji yúode, ga ¡que toc eti ca tocade jne!

¹⁵ Ga a Pangarádejnai uté chinguı́ra Israel aja jnumi jne. Enga a Pangarádejnai uté gajnui tu yote bayátique uje cho ¡uo! ¡uo! aja dajesui ome ore. Jé basa ga israélgosode ore gajnui tu jnacaratı́go uje chijocase re iji gatéode iji yote bayai uté jmainie. Enga a uté chijnime ore ¡janipe! iji punire ueradéjnai udé uje uté gueranome ore dayode nanique, ga a chisite ore aja purása quedéjnane ujade jne iji yote quedéjnai Éufrates uté uécha uñai iji toniñeque. Uje ore pésu dangurené Asera uaté oredie iji pore pajéode nanique ujetiga ore doi dupa quedéjna uaté adode, ga ore chijnimipise Pangarádejnai uté ájningamı́e.

¹⁶ Ga a uté tẽra israélgosode udore ome damajosórone jne, ga gose Jeroboam uté isijnaringuéone udore. Mu que gusu uje uté pésu pisijnaringuéone, mu jé chuságaja urasade israélgose udore ore, uje chiroque ore aja cucha noñángone úringane pipesucho to.–

¹⁷ Uje Dupade uruode atatasṍri cha catecã́ri Jeroboam acoté uaté nanique, enga jé u uje uaté niji ga jnome dedai yui uje i tu Tirsa. Enga e chise ga e chacárasaja daguı́jnai ajei, mu jé u uje abi quene toi.

¹⁸ Ga jé upúsu Pangarádejnai uru casodé udore uje iroi proféta uje i tu Ahı́as chajnerame ore. Enga jé u uje ore chijóchame Jeroboam abi uté, ga israélgose dipeséode iji Israel údode jnese yuare gu dajnusiétigai ome uté itoringai.

Jeroboam uté isocade u udojo uje chise deruei to nanique

¹⁹ Adójnacho uje Jeroboam isoca amirone purusãracho jnese iji darujna aode uñane uje ore churúsãre israélgosode ore eduguéjnane adode iji udore nanique. Ga chatata uté jocaningane adode to, jé aja jmapiedie iji úringai eduguéjna nanique.

²⁰ Enga 22 años u nanique uje Jeroboam uté déji dáringai israélgosode ore eduguéjna. Uje uté e toi nanique ga ujnacarode uñai chácariji charidi ome úringai eduguéjna. Ga ujnacari uté i tu Nadab nanique.

Eduguéjna cuchábi Roboam uté qué jno dasijnaringuéone údi gaté nanique iji daniri Judá uté

²¹ Enga Salomón ujnacari Roboam uté qué déji dáringai eduguéjna nanique iji judágosode ore uniri uté nanique. Enga uté guejnanie siquerei 41 años nanique uje uté quene basája dáringai eduguéjna nanique iji taningai. Ga uté guejnanie siquerei 17 uje chácariji Jerusalén uté ome dáringai eduguéjna. Ga Jerusalén uté u pidai uje Pangarádejnai ajegaite iji israélgosode ore uáguedie jnese ujade jeta cho dayaridı́ji uté ome uté i úringárique pisı́gai. Enga Roboam uté daté i tu Naama, ga purása quedéjna uaté nanique, ga uniri i tu Amón.

²² Enga judágosode ore dopı́si pisijnaringuéone iji Pangarádejnai edominone. Enga ore isoca noñángone udore chiborátaja Pangarádejnai ájningadatéi, uje sué ájningai ome ore dayode jnani bajácho gáyode jnese. Chamáñaje Pangarádejnai uté gajnui tu jnani ocácachoquı́rique uje tocãra dacoté ome adode. Enga Pangarádejnai jé isocai u to uje tocãra darasade ome ore irasitigade ome dangurenone dupa quedéjna, uje ore gajnepı́di tu ujetiga ore chedu uté mu.

²³ Enga ore chiro dangurenone dupa quedéjna iguı́jnane to iji cucarãte orónenie gáyode jnese ome dangurenone udore úringáringo pisı́gai. Ga ore chicha cucarãte uejaque puyade aja orónenie udire gáyode to uje pipotingarãcho nanique, jé aja ore angurené dupa quedéjna Asera oredie uje pipesudei udire iji pore pajéode. Ga ore angurenone gajnéone cucha puyácho dépoji pore uburutedie údode jnese rı̃.

²⁴ Que gusu judágosode ore isocade udore, mu jnanione déji ore uniri uté to uje chiese ore gajnepı́di tu ome ore angurenone dupa quedéjna ujetiga ore tungarája dojode jnanı́o. Enga ore isoca noñángone udore jnese jé péro daniri uté unirı́sõre bajade gáyode uje Pangarádejnai chijócãre bajade ore nanique gu dasocade udore, enga ichajapite israélgosode aja udore uniri uté.

Egı́ptogosode ore eduguéjna cuchábi Sisac uté chajnosipise Roboam uté nanique

²⁵ Uje ore isecaranenie siquerei chise 5 nanique ome Roboam úringai eduguéjna, enga egı́ptogosode ore eduguéjnai uje uté i tu Sisac doi pocaningai ome judágosode ore idai Jerusalén nanique.

²⁶ Enga Sisac uté yuque ome ore, ga jno Dupade iguı́jna cuchábi jogonórone cucha oreránguejna údi aja daniri. Ga chátapó cucha oreránguejnane aja rı̃ iji ore eduguéjna cuchábi iguı́jnai to nanique. Enga chajnosipise uté ome cuchade udore jnese. Enga jé chuságaja Salomón ipesudi cásodicáite guebeque uejájna uje óro uécho uje pocaningai gajnecho nanique ome ore uje ore chicháji daróbedie yúode. Jnopo udore jnese údi rı̃.

²⁷ Cucha dacadode udore quigade, enga judágosode ore eduguéjnai uté uje i tu Roboam pésapo guebeque uejájna uñane gaté rı̃. Mu cãra dasocáringome ejode nanique. Que pésu iji óro to nanique, mu pésu iji bronce. Enga eduguéjnai Roboam uté chisi ome dapesudode guebeque uejájna ome darodisórone soldate ore eduguéjnane jeta ore suse guio. Uje soldádode udore gajnepı́di u nanique ujetiga jecucha ore chirote eduguéjna cuchábi iguı́jnai piagode nanique ga ore chijna guebeque uejájnane udore ome dasai uté.

²⁸ Que gusu uté, mu ujetiga ore eduguéjna cuchábi tibágui Pangarádejnai Dupade iguı́jna cuchábi nanique ga irógode jecucha ore nóna aja dajei ga dimane guebeque uejájnane iji ore jmanáyone to. Ga ore chirote deduguéjnai ejode uje chajnı́ja daguı́jnai to, ga quigade ore chicha guebeque uejájnane aja ajé uñai, uje eduguéjna cuchábi irodisórone ore charidi tu uté.

Judágosode ore eduguéjna cuchábi Roboam uté adode uñane udojo nanique, jé aja itoringai isocai uté

²⁹ Qué cucha uñane déji to uje ore eduguéjnai Roboam uté ipesucho udore, jé aja uté gajnéone cucha dacacho jnese, mu purusãracho udore iji ore darujna aode uñane uje ore churúsãre judágosode ore eduguéjnane adode iji udore jnese.

³⁰ Enga jecucha pocaningane déji judágosode ore eduguéjnai Roboam, israélgosode ore eduguéjnai Jeroboam udore ore ome ñane gatuaque nanique iji ore úringane eduguéjna.

³¹ Ga chise diri nanique uje judágosode ore eduguéjnai Roboam toi nanique, uje uté daté u amóngoto uaté uje i tu Naama. Ga ore chijóchame uté iji David casicaite idai Jerusalén nanique, uje Roboam uté dayé, dáquiode ore ódedie déji uté to nanique. Enga ujnacari uje i tu Abiam basája dayé charidi nanique ome dáringai eduguéjna.