1 Reyes 13 - Dupade Uruode

Dupade angúromei proféta tṍraji daniri Judá uté jeta cho darúja ore aseradéjnai iji ore idai Betel nanique

¹ Enga qué Jeroboam déji daquetade cucha ai unéño gai uje cháguena gaté iji angurenone dupa gajnei aseradéjna iquei. Mu Dupade uruode atatasórone uñai tṍraji daniri Judá ome dajnéone Pangarádejnai iroquéo. Enga di iji ore idai Betel enga e chise Jeroboam uté iji iborigode cucha ai unéño udore gai.

² Enga Pangarádejnai utoquéode upúsu ujetiga Dupade uruode atatasṍri uté cho darúja ore aseradéjnai uté. Jecute doi datocaisṍri uruode ga chinguı́ra dabijnani aja ore aseradéjnai uté uje catecã́ripı́si, enga uruode chósi te: –Gaseradéjna é, Gaseradéjna é, Pangarádejnai uruode déji ome ua yé, uje chósi te: "E aquirájna ape ucatógode irógode sacerdóteo udore ore chãru cucha ai unérone iji daseradéjnai babai. Mu adójnangapı́sa yuruode unojo, uje a chise dı́nique jne jeta eduguéjna cuchábi David casica ape disi ejórique base jne, enga a ore chı̃́care Josı́as aja uté jne. A uté doi sacerdote tágode udore jne uje ore gajnepı́dode cuse iji cucarãte orónenie ójodie. Enga a chibore ore iji ore aseradéjnai babai to jne. "¡Enga ayoréode ajnoquéode u jne ujetiga piboricho iji babai!"–

³ Ga Dupade angúromei proféta uté qué jno datatagode údi iji diri uté uje chatata cucha pingongóningai ome ore. Enga uruode chósi te: –Cucha pingongóningai udé garani upúsu Pangarádejnai uté, enga chutṍri yu ujetiga yajnerame uruode ome uaque: Uje uacaserani udé gaserãte a chajuque dabai jne, ga arı́menguiji jnumi jne. Ga puchucurúode iji gai uje tṍraji uaquẽrapáidode cucha udore a pojnéngaja jnumi jne.–

⁴ Uje ore eduguéjnai Jeroboam uté chudute Dupade angúromei proféta uruode ga ajei dotãripı́some uje cho darúja ore aseradéjnai iji ore idai Betel uté. Ga jé u uje ore eduguéjnai Jeroboam uté chãrai dajmanecai iji proféta uté yui iji dayaridi gaserani ejoi, ga chojningame darógode ore: –Beyoi ga asayo uté ga ajóyo aja ñane.– Mu jmanecai uje chusẽre Dupade uruode atatasṍri ome ga jé noñaji ajesui enga que chipocásu dajmanecai te rı̃, ga jé etóguiji usẽrai qui.

⁵ Que gusu cucha dacadi uté, mu jı̃raque ore aseradéjnai uté cṍra ¡ju! ga urúpisiji jnumi to. Ga puchucurúode udore iji ore aseradéjnai gai uje tṍraji ore apósode cucha udore pojnéngaja jnumi. Ga cucha dacadode udore tocachúringai ajnai tupúsu Dupade angúromei proféta uruode udore uje quene chatata cucha pingongóningai uté ome ore enga uruode garani tupúsu Pangarádejnai uté.

⁶ Ga jé u uje eduguéjnai chutai Dupade iroi uté ga chojninga: –Bebi ga acatecã́ri Pangarádejnai ome uyu, uje bangureni Dupade u uté. Ga ajócha ajei údi ujetiga pésapo yijmanecai jne rı̃, yijmanai ore.– Ga jé u uje Dupade iroi catecã́ri Pangarádejnai uté ome eduguéjnai jmanecai ga e omapo jmanecai te rı̃ ga e chipocásapo to rı̃, jé aja jmanai to, uje Pangarádejnai uté pésu gu.

⁷ Ga jé u uje eduguéjnai Jeroboam uté dejéna Dupade uruode atatasṍri aja daguı́jnai ga chojningame uté: –Be ga ajı́na yu aja yiguı́jnai jne ga agu cucha pibotique to jne. Enga a yisiapome prémio gotique ome ua to jne rı̃.–

⁸ Mu Dupade uruode atatasṍri uté chajnai eduguéjnai uruode ga chojninga: –A ajuguı́rase bagúcha dipeséode iji gatócoro ujetiga ası́ome médio ome yu, mu que yijı́narása ua aja baguı́jnai. Ga a jé ca yagúrasu arurétique iji jogadi udé, jeoga cucha pijotátique u, mu a jé ca yójirase to.

⁹ U gu uje Pangarádejnai jé urúo ome yu que uje chojninga: "Ca agu cucha pibotique iji ore idai uté jne, jé aja yodi to rı̃, ca ójiapo to rı̃. Ga ca ajnápo bãrapi casé dajeque jne rı̃. Angara bajnatique dajeque jne jeta ajni to."–

¹⁰ Uje Dupade uruode atatasṍri uté chejna daruode udore aja guesi ome Jeroboam uté, enga jé u uje jno nanique. Enga cãra dajnai dajeque ome dãrapi tuqué dajeque uje uté chajna aja ore idai Betel dirı́ca.

Dupade angúromei uruode júsõre uté e basája Dupade garéngone cucha udore ome re

¹¹ Iji dirode udore nanique ga Dupade uruode atatasórone uñai cho dedáji ore idai Betel uté enga e choquı́jnapise uté. Enga uté ujnacarode cuse to uje ore chiraja cucha dacadode uje tocade iji ore idai Betel iji diri tuté. Ga ore chise daguı́jnai ga ore chatata Dupade angúromei proféta ipesudode cucha jnese ome dai uté. Ga ore chatatápo uté uru quigode ome uraque deduguéjnai uje uté i tu Jeroboam.

¹² Ga udore ore dai, proféta choquı́jnami uté, chijnime dapregúnta ome dajnacarode ore ga chósi te: –¿Ama ajnatique dajeque déji rique que a?– Ga ujnacarode ore chimópise Dupade angúromei proféta uté ajnai dajeque, uje chajnı́rasaja daniri Judá uté. Enga ore chusẽre ajnai dajeque ga ore chojninga: –Ajnai tu tã uje chicai ta.–

¹³ Ga jé u uje Dupade uruode atatasṍri uté chojningame dajnacarode: –Beyoi yachidi burica quedéjna ga ajé charipı́ode aja gai uje a yoru jne.– Enga ore chujé charipı́ode aja gachidi burica quedéjna gai ga ore dayé e choru enga jno.

¹⁴ Uje chajna dojoi Dupade uruode atatasõre uté ga chisı́ji poredaté uburúdi uje i tu encı́na, ga qué chácariji. Enga proféta choquı́jnami uté chojningame uté: –¿Ama Dupade uruode atatasṍri tu ua ya, uje bṍraji baniri Judá que?– Ga uté chajnai uruode ga chojninga: –Uyu u arı̃a.–

¹⁵ Jecute Dupade uruode atatasṍri uje e choquı́jna uté doi ga dejéna dojoi Dupade uruode atatasõre aja daguı́jnai ga chojninga: –Be ga ajı́na yu aja yiguı́jnai ga a yajo yoquibotı́go jne iji yiguı́jnai.–

¹⁶ Mu Dupade angúromei proféta uté chajnai uté uruode ga chojninga: –Úngare. Que pujuegádome uyu jeta yijı́na ua aja bedai jne. Jé aja uje que toc ujetiga yacája baguı́jnai ajei to. Ga a jé ca yagu cucha pibotique iji pijogadi udé, ga jé chuságaja yodi, uje a ca yóji yodi iji bari gotique to.

¹⁷ U gu uje Pangarádejnai aquı̃raquéode ome yu chósi te: "Ca agu cucha pibotı́guiji ore idai uté jne, jé aja yodi to rı̃, ca ójiapo to rı̃. Ga ca ajnápo bãrapi casé dajeque jne rı̃. Angara bajnatique dajeque jne jeta ajni to."–

¹⁸ Mu choquı́jnai uté chajnai uruode ga chojningame uté: –Jé yo ua arı̃a uje Dupade uruode atatasṍri yu to. Enga Pangarádejnai chiroque daroi gaté unirı́sõre aja yu que ga chojninga: "Atire uté ga tagu babosode to jne iji baguı́jnai, ga chójiapo yodi te rı̃ iji baguı́jnai."– Mu choquı́jnai uté chopise darupatáringa ome uté.

¹⁹ Enga jé u uje Dupade uruode atatasṍri uté cho ũréji uruode ga chajni to ga nóna aja iguı́jnai ga taguı́ji iguı́jnai to, ga chójiapo yodi iji iguı́jnai rı̃.

Dupade angúromei proféta uté cho daba dangoninguite paritigade ome datocaisṍri Dupade uté

²⁰ Uje qué ore déji datigai gai iji mésa ejoi mu Pangarádejnai uruode chiqueta raja proféta choquı́jnai uté áyipie uje e di dojoi proféta údi aja daguı́jnai.

^21-22 Enga jé u uje choquı́jnai uté chejnapúsu daruode uje catecã́ri Dupade uruode atatasṍri uté uje judágose, enga chósi te: –Pangarádejnai uté uruode u udojo uje chósi tome ua: "Angoninguite pariguipise ua ome Pangarádejnai uruode que. Ga que ajuse bajnéone Pangarádejnai iroquéo uje bangureni Dupa uté chutṍri ua ome. Jecute a o baba jne. Chamáñaje bajni gu aja pijogadi udé, enga bagu babosode iji de, enga e bójiapo yodi te rı̃, uje Pangarádejnai charanguipise ome ua mu. Uje chojninga: 'Jé ca agu cuchárique iji uté, enga jé ca óji yotique to.' A atoi jne, mu a ca ore chijóchame ua jne iji bayode ore uniri uje ore ódedie déji uté."–

²³ Enga Dupade uruode atatasṍri uje judágose uté e tagu dabosode ga chóji yodi, ga quene básome chagúi. Enga cucha dacadode udojo quigade u uje proféta choquı́jnami uté e pésu darı́ringui proféta uté gachidi burica quedéjna ome coringai yui. Ga Dupade uruode atatasṍri uté choru dachidi ga jno.

²⁴ Uje e proféta uté déji dáringai aroraque aja daniri Judá uté, mu caraté chachai uté iji ajesui enga chujé uté. Enga parãte proféta uté aoi aja dajei uté. Ga gachidi burica quedéjna jé aja yuto caraté ore jnese cháguena ejoi iji uté.

²⁵ Enga jnanione uñane chajna proféta uté ajnai dajeque to, ga ore chise cachodi uté. Mu ¡urénga! parãte uté aoi aja dajei, ga yuto caraté uaté cháguena ejoi, mu que chijocase gotique. Jecute ipañasórone udore ore jno uté ujnomei údi aja proféta choquı́jnai uté idai uté.

Dupade angúromei proféta uté chise dagachodi, ga ujoi proféta uté uje choquı́jna e doi aoi ga na uté aja dajné cucarã́tedó

²⁶ Uje proféta choquı́jnai uté chudute ore ojñane udore ome irı́ringui casé proféta uté uje inejéramáite aja daguı́jnai dirı́ca, ga narare ga chojninga: –Yiraja uté arı̃a. Yujoi Dupade uruode atatasõre u uté uje angoninguite parique ome Pangarádejnai iroquei que. Jecute Pangarádejnai guẽrate uté ome caraté uaté jeta chajnangarase jnani uté aja dejode. Uje Pangarádejnai uruode qui jé upúsu ome uté dirı́ca, enga e tocade.–

²⁷ Enga jé u uje Dupade uruode atatasõre choquı́jnai uté chojningame dajnacarode: –Beyoi yachidi burica quedéjna ga ajéyo charipi aja gai jeta yoruápo rı̃.– Enga ujnacarode udore doi uruode.

²⁸ Ga choquı́jnami uté jno ga chise dojoi Dupade uruode atatasõre cachodi, ga chimo aoi uje paranája dajei. Ga chimopo gachidi burica quedéjna, jé aja yuto caraté rı̃, enga qué ore cháguena jnani toque uté ejoi jnese. Mu proféta choquı́jnami uté chidójnanga uje que caraté uaté tagu damocherãi Dupade iroque, jé aja uje que chajnangarase burica quedéjnai gotique to.

²⁹ Ga Dupade uruode atatasõre choquı́jnai chisa dojo casé Dupade uruode atatasṍri casé, ga tṍraja gachidi casé burica quedéjna gai. Quigade, enga chatire ore aja dedai. Uje gaidi u gu ujetiga chijóchame dojoi Dupade uruode atatasõre jé aja ujetiga yuare iji ejode.

³⁰ Uje e ore chisápo choquı́jnai uté idai rı̃, ga jé u uje uté na dojoi Dupade uruode atatasõre casé aoi aja dajné cucarã́tedó ajei. Enga choquı́jnai uté gajné tupúsu cucarã́tedó uaté, uje e dimane ome itoringai yui, jeta ujnacarode ore nárasaja jne. Mu na dojoi Dupade uruode atatasõre aja dajné cucarã́tedó uaté. Ga choquı́jnai uté jé aja ujnacarode ore yuare iji ejode, ga uté naráraja dáringai ugo, enga uruode chósi te: –¡Isabi á, yopise yáyugu ome ua!–

Choquı́jnami uté chatata dáyipiedie ome dajnacarode ore, jeta nimane ore ome uté itoringárique yui iji siñeque jne

³¹ Uje e ore chimate Dupade angúromei proféta aja cucarã́tedó ajei, enga quigade u uje choquı́jnai catecã́ri dajnacarode ga chojningame ore: –Angáchobı́ yuruode á, yujnacarode uaque. Ujetiga yitoi dirome enga aráño uyu aja yujo casé Dupade uruode atatasõre pié uaté cucarã́tedó dirome ga achayo yajnoquéode aja uté ajnoquéode dosadi jne.

³² Chamáñaje ũrepise Pangarádejnai angúromei uté dirı́ca uje chejnapúsu daruode ga cho darúja dupa quedéjnane ore gajnei gaseradéjna iji yoquidai Betel udé. Ga jé urugaidode u to samáriagosode ore angurenone dupa quedéjna iguı́jnane jnese dirı́ca uje udore déji orónenie ójodie iji pidáyode uñane to iji yocachamini Samária údode. Que toc eti proféta uté ı̃carane cucha udore ca tocade jne, uje garani tu Pangarádejnai gu.–

Eduguéjna cuchábi Jeroboam uté chiraja uje Dupade urugaidode u dupa quedéjnane udore iguı́jnane, mu qué chajo raja dasoca noñángone

³³ Uje Jeroboam uté pañaji cucha dacadode udore jnese, mu qué chajo raja dasoca noñángone udore gaté. Enga qué chapuse darasade jnanı́o aja ome dáringane sacerdote bisidécho iji dupa quedéjnane iguı́jnane ajéode iji orónenie ójodie iji udore, udore. Ujetiga jnanı́rique uñeque potárasa dáringárique sacerdote bisideque, enga jı̃raque Jeroboam pésu uté gosi charidi.

³⁴ Ga israélgosode ore eduguéjnai Jeroboam jmapié uaté pésu jogasúode jnese iñoñaringuei ome Dupade, enga chiborátaja uté úringai eduguéjna eruei. Enga jé u uje pitoringai gajmaque uté ape disi ejode jnese to ome dáringane pejnacho, ga a e chicárasi yui ujetiga tita erámi ome ore jnese jne.