1 Reyes 12 - Dupade Uruode

Salomón ujnacari Roboam uté chise dáringai eduguéjna nanique, mu que suse dadode guio gotique

¹ Enga chise diri nanique uje Salomón ujnacari Roboam chicáji ore idai Siquem. Uje israélgosode ore chimáta ñane jnese iji ore idai Siquem uté gu, enga ore gaidi tu jeta ore cho deduguéjnai iji Roboam uté nanique.

² Enga Nabat ujnacari Jeroboam uté qué déji dapari punire to uje qué chaparu ore uniri Egı́pto uje chayome Salomón to ica gu. Mu uje Jeroboam uté quene chudute Roboam ujnomei uté, ga jı̃raque chajnı́ja daniri casica.

³ Enga jé u uje piroque israélgosode uñane aja Jeroboam uté yui ujetiga ore tibidi uté. Enga Jeroboam chise ore ga cháta raja israélgosode udore ore uáguedie udire uje chejna yijmanáyone. Ga jnani ibijógode jnese iji ore ujade nóna Jeroboam uté, ga ore jnome Roboam yui to ujetiga ore catecã́ri uté. Ga ore chise Roboam ga ore chojningame uté:

⁴ –Bai casica josipı́erãque ome yoque ica, uje bayé cho buéyode iji yoque ga cho jetiga chadı́ja pidode aja yoquetabı́dode. Jecute be ga ejñu bayé adı́jade picho iji yoquetabı́dode to, ga a jé u jeta yocopise yoqueduguéjna cuchábi iji ua jne.–

⁵ Uje Roboam chudute ore uruode ome re, mu que chajnai ore mı́raque gotique. Mu chojningame ore: –Boyope, enga ácayobı́ji siñeque. Enga arı́ñopó iji yu dirome rı̃ jeta dejade gadioque. A yucué yáyipieraque jne, enga a quene yichajnai uacaruode to jne.– Enga jé u uje ore jnoji uté ejode nanique.

⁶ Uje e ore jno, enga jé u uje Roboam tibidi dai casica irabade choquı́jna. Uje udore u uje ore gajnepı́di u ujetiga ore cho Salomón uté quique uje qué eca nanique. Ga Roboam chósi tome ore: –Beyoi ga oyope yiquique to. ¿Jé yo ringome yibaguiésṍri casodé ore jne jeta ore chisápo yu rı̃?–

⁷ Ga jé u uje dayé irabade choquı́jna cho Roboam quique enga ore chojningame: –Be iji diri tudé gajiné ga o piróguiji ua iji barasade udore ore jmainie, ga anejé udore ore údode. Enga ası́ome ore ajei jochaquéode udore cucha ome ore. Ujetiga uerate baruode ome barasade udore ga a jecucha ore dopı́si baru quigode gatuaque jne iji báringai ore eduguéjna cuchape.–

⁸ Uje choquı́jnane udore e cho Roboam quique, mu uté cho cucha bisidéguiji udore o quigode udore. Uté tṍra ore acajnaquéode aja ti yui enga tibidi dojode jnacare uje jorámeque ore nanique iji ore úringane disi ga jé chuságaja ore úringane jnacare to. Ga udore ore u uje e ore doi Roboam uté iroquéode ome dáringane uté iróquegatéo.

⁹ Ga Roboam uté ucuegode upúsu darabade udore áyipie quigode ome re, jecute chojningame ore: –Oyope yiquique to uje que yiraja yuru quitique ome yurasade ore uje ore chósi tome yu: "Be ga ejñu bayé adı́jade picho iji yoquetabı́dode jne."–

¹⁰ Ga Roboam irabade jnacáño ore cho uté quique uje ore chojninga: –Bacatecãraisṍri casodé ore chojningame ua dirı́ca: "Bai casica cho buéyode iji yoque ga cho jetiga chadı́ja pidode aja yoquetabı́dode, mu be ga ejñu bayé adı́jade picho iji yoquetabı́dode." Mu baruode a chósi tome ore jne: "Cho ujetiga yijmané garamia querújna ome yai casica etarúdode jnese gu uje a yujnuépise uté gai ome yúringai josipı́erãque ome uaque jne.

¹¹ Uje uacojnicho ome yai adı́jade picho ome uaquetabı́dode: '¡Iménujna!' Mu a qué yajnerame yai adı́jade imenuringuei aja uaquetabı́dode gáyode ome uaque jne. Jé u to uje yai casica chaquesu uacádode ome paójnane nanique, mu uyu ga a yicha ojnaque noñatígo aja uaquerásonique paójna eruéode to jne, enga a uacayórigo súringara yipı́tigo jne ome uaque."–

¹² Uje e ore chejna dire gadiógode ga jé u uje Jeroboam, jõra casodé jnese ore tibágapoi Roboam gaté rı̃. Uje eduguéjna cuchábi uté ojningai jé u gu ome ore dirı́ca uje chojningame ore: –Arı́ñopó iji yu dirome rı̃ jeta dejade gadioque.–

¹³ Enga e ore chise eduguéjna cuchábi Roboam uté, mu uruode dosópisaja udore ore. Uje e cho cucha bisidéguiji dai casica irabade choquı́jna acajnaquéode ome re gu.

¹⁴ Enga irasigode u dojode jnacare o quigode ome re uje irabade udore chajo úringai josipı́erángaja. Ga uruode chósi tome darasade udore: –Uacojnicho ome yai adı́jade picho ome uaquetabı́dode: "¡Iménujna!" Mu a qué yajnerame yai adı́jade imenuringuei aja uaquetabı́dode gáyode ome uaque jne. Jé u to uje yai casica chaquesu uacádode ome paójnane nanique, mu uyu ga a yicha ojnaque noñatígo aja uaquerásonique paójna eruéode to jne, enga a uacayórigo súringara yipı́tigo jne ome uaque.–

¹⁵ Enga eduguéjna Roboam isocai jé u uté uje que timı́ninga israélgose dipeséode ore ajei jochaquéode udore ome re gotique. Mu cucha dacadode udore ijocayasṍri tupúsu Pangarádejnai uté, uje gaidi tu gu ujetiga ichagájade darúo tocade ome Nabat ujnacari Jeroboam uté. Enga Pangarádejnai uruode udore u uje sı́logosi Ahı́as chajnerame ome Jeroboam uté nanique.

Israélgosode ore uáguedie uje chejna yijmanáyone ore cha Roboam uté ome úringai ore eduguéjna nanique

¹⁶ Uje israélgose dipeséode udore jnese chidójnanga uje ore eduguéjnai Roboam uté que dopı́si ore ajei jochaquéode quigode udore, enga jé u uje ayorébujnane udore uruode dosója uté to. Enga ore pijnacaraichi uje ore chojninga: –¿Ama David casicaite ájnape disi ejo uyoque to a? ¡Úngare, unejángome uyoque! ¡Ga que yocajnepı́tique cuse ome uté arı̃a, uje que yagutı́yangome Isaı́ ujnacari David gotique to! ¡Israélgosode uaque é, boyope to ga yajnésacoja yoquiguı́jnane jne! ¡Jé basa ga bajnepı́di jé upúsu, David á, ujetiga añuru bape disi ejode ore guio!– Enga jé u uje israélgosode udore chajnı́ja daguı́jnane, uje e ore chı̃́care piyai ome Roboam úringai ore eduguéjna.

¹⁷ Mu gague chojmara qué déji nanique iji israélgosode uague uñanie jnese ujade uje que ore cha Roboam uté unerai. Enga judágosode u udore, ga pidáyode jnese idaisórone iji Judá uté údode cho deduguéjna iji Roboam uté.

¹⁸ Mu Roboam a qué changureta jóroque re ome dáringárique eduguéjna yui ome israélgosode udore jnese. Jecute chiroque daróquegatéode uñai uje i tu Adoram aja israélgosode uague uñanie udire yúode ujetiga catecã́ri ore. Enga Adoram uté u uje gajnepı́di u nanique jeta chajire pirógode udore aja quedéjnane uje piroque ore aja cucha pisaque bisidégode ome eduguéjna cuchábi uté nanique. Mu iroi chise ore ga israélgosode udore jnese chimitingare uté ome cucaranenie enga ore chujépise. Uje Roboam chiraja uje ore chujé iroi uté, enga jé u uje quejname dachidi guebéquedaté yui jeta choru ga chijna dagajñua taja dedai Jerusalén.

¹⁹ Enga isocai jé u uté nanique uje israélgosode uáguedie uje ore chejna yijmanáyone ore tagúja David casicaite iguiosode judágose ore. Ga jé chuságaja deréjnane udojo to uje ore chajuque re iji ñane.

Jeroboam uté chise dáringai israélgosode ore eduguéjna uje ore uáguedie chejna yijmanáyone nanique

²⁰ Enga chise diri nanique uje Nabat ujnacari Jeroboam uté ujnomei quene chise israélgosode ore uniri údode jnese uje e di iji Egı́pto ica. Cáma ore chudute jnese iji taningai, mu uje ore chudute enga jé u uje ore chimáta ñane ome dáguedaté yui, ga ore tibidi Jeroboam uté ujetiga chicáji ore pijnane to. Enga jé u uje israélgosode ore uáguedie uñanie uje ore batigai chejna yijmanáyone ore pésu uté úringai eduguéjna cuchape ome raque. Que puáguedie udire uñáraque chirota David casicaite ape disi ejórique jeta ore cho deduguéjna iji uté. Mu gusúpusu judágosode ore uague uaté uje qué ore chajna David casicaite ape disi ejode quigade.

²¹ Mu Salomón ujnacari Roboam uté potapı́sa ujetiga israélgosode cho deduguéjnai iji uté jnese. Jecute chise Jerusalén ga chimáta pocaningane gaisṍreméone ore iji judágosode, benjamı́ngosode ore ujade ome dajnimi pocaninga yui. Ga chisecãru dabijnángaidóde ore ga ore batigai chise 180.000. Enga ore chorase dajocaningame israélgosode uague uñanie uje ore chejna yijmanáyone jeta udore ore chopo deduguéjna iji Salomón casica ujnacari Roboam uté rı̃.

^22-24 Uje qué ore déji dáyipiedie gai ome dajocaningai yui, mu Dupade chiroque daruode atatasṍri Semaı́as aja ore yui ujetiga chaquı̃́ra ore ome ore jocaningai uté. Ga Pangarádejnai Dupade uruode chósi tome Semaı́as uté: –Ajnerame yuruode udojo ome Salomón casica ujnacari Roboam uté, uje judágosode ore eduguéjna cuchábi tu uté. Mu a que gusu uté, mu yuruode gajnengórone upo judágosode, benjamı́ngosode, jé aja ore urasade uñane jnese iji ore ujade rı̃. Enga ósi tome ore jne: "Yuruode udojo garani tu Pangarádejnai, uje chojninga: 'Ayáyo uacapotigádode pocaninga ome uacarasade israélgose ore. Enga ajnı́ño to aja uaquedáyode, ayoré chojmara, chojmarane uaque jnese. Uje jé yajéode u cucha tocachugode udore gu jeta uacáguedie cho jmı́ti, jmı́ti ome ñane. Yojningane u israélgosode ore uáguedie uje chejna yijmanáyone, jé aja judágosode uaque.'"– Uje Roboam, pijnángaidóde jnanı́o ore chudute Pangarádejnai uruode udore, ga ore dopı́si quigode, enga ore chajnésaru aja daranone.

Jeroboam uté chiro aquirájna ape ucatógode ome darasade ore ujetiga ore cho dadupáji udore

²⁵ Ga israélgosode ore eduguéjna ichai uté uje i tu Jeroboam pésapo ore idai Siquem ujuyaquéode aja gaté nanique rı̃ iji ore uniri Efraı́n uté uje déji cucaranone ujade. Gaidi tu gu ujetiga ore chajmita dejode ome cuchade yúode. Quigade enga quene Jeroboam cho dedáji Siquem uté nanique. Mu chisápo diri nanique rı̃ uje Jeroboam jnoji dedai uté ga chicáji ore idai Penuel ga dopoi dasocai uté rı̃. Enga pésapo Penuel uté ujuyaquéode aja gaté rı̃ jeta ore chajmitapo dejode rı̃ ome cuchade yúode nanique.

^26-27 Mu ore eduguéjnai Jeroboam charatáyime darasade israélgose ome Roboam jeta ore chopo deduguéjnai iji uté rı̃. Uje urasade ore edópeseque Jerusalén gai ome dẽrapáidode cuchiso uje ore tẽrája Pangarádejnai iji iguı́jna cuchábi uté. Ga jé u uje Jeroboam catecã́ri re iji dajei to ga chojningame re iji dajei: –A chise dı́nique jne enga ore irasigápo detei casica eduguéjna Roboam to jne. Uje ore ijo idai gatuaque gu ome dẽrapáidode cucha to iji Pangarádejnai iguı́jna cuchábi. Ga jé u jeta ore irasigápo uté rı̃ enga a ore chujé yu jne enga a ore chopo deduguéjna iji judágosode ore eduguéjnai Roboam uté jne rı̃.–

²⁸ Enga jé u uje Jeroboam chucué daquigaminórone eduguéjna áyipieragome isocárique to jeta urasade israélgose udore cha Jerusalén unerai ga ca ore chicapóji rı̃. Enga Jeroboam oquisórone ore cho quique, ga quigade ga uté chiro aquirájna ape ucatoque gárode ome óro nanique. Uje chimate udore ga jé u uje chimáta darasade ore aja dari, ga chósi tome ore: –Cachi jiei trabajádi ome uaque uje uaquejo pidai idájai Jerusalén uté ome uaquẽrapáidode cucha udore. Enga e gome jeta acayóji uté. ¡Cajichope to, israélgosode uaque á, de dojo uacangurenone dupa! Uje udojo u uje ore ijnimique uáguiji Egı́pto nanique.–

²⁹ Ga Jeroboam doi dapesute uñai ga chicháji ore idáyode uñai to uje uté i tu Betel. Jé basa ga doi dapesute uñai to ga jno údi aja ore idai uñai to uje uté i tu Dan.

³⁰ Enga Jeroboam isocai uté chiborátaja israélgosode udore ore isijnaringuédatéode. Uje ore doi ga ore ijópise ore idáyode udore ujetiga ore tẽra dẽrapáidode cucha iji dangurenone udore aquirájna ape ucatócho orei iquei. Idájapise ore idai Dan uté ome israélgosode udore uñane, mu jé ore chise nanique.

³¹ Que gusu uje Jeroboam chiro aquirájna ape ucatoque gárode udore ore, mu pésapo dangurenone udore iguı́jnane jogadode rı̃ iji cucarãte orónenie ójodie. Ga Jeroboam uté chapuse darasade aja ome dáringane sacerdote bisidécho to nanique rı̃. Chiese sacerdote ore mu unejaque ore ome levı́gosode uje ore isai tu cucha pẽrapáidode ome Pangarádejnai Dupade nanique.

³² Enga Jeroboam uté e chı̃́care ome darasade israélgose ore jeta ore pésu daninaquédatéi gajnetique dire jeta jecucha ore jnusina iji siqueredie jnese. Enga féchai uté dérasi ore isecaranone guedosı́o uje 8 u, mu ore chisecãru dirode iji guedosi uté to, ga ore dorási daninaquédatéi ujetiga dirode e chise 15 iji ojningai guedosi uté. Enga Jeroboam ojningai fécha uté chiradi jóroque judágosode ore jnusinamáni dire uté to uje judágosode ore tẽra dẽrapáidode cuchiso ome Pangarádejnai iji Jerusalén uté. Jé basa ga Jeroboam ojninga fiéstadaté jogadi tu ore idai Betel uté. Enga Jeroboam uté chibore dẽrapáidode cuchiso ome dapesudode aquirájna ape ucatócho iji ore gajnei gaserãte gai. Enga que gusu adode udore, mu Jeroboam uté doi ga pésu dajegaidode jnanı́o ore úringane sacerdóteo jeta ore chácariji dajnepı́di uté iji dangurenone dupa quedéjna iguı́jnane udore iji cucarãte orónenie.

³³ Mu ome cucha tocachugode udore jnese ga Jeroboam chedu dáyipie ayoré quigode ome re. Enga e chise Jeroboam uté ojningai fécha uté, ga jé u uje chimáta darasade israélgose aja ñane iji ore idai Betel ome daninaquédatéi yui. Enga jé u uje Jeroboam uté choru ore uchiejnane aja dangurenone dupa quedéjna gajnei gaseradéjna uté yui. Uje gaidi tu gu ujetiga tẽra dẽrapáidode cucha iji dapesudi gaserãte uté.