1 Reyes 11 - Dupade Uruode

Salomón acotedie jiépisi nanique ga ore chorei uté áyipie iji quedéjnane ome Dupapı́si uté

¹ Uje eduguéjna cuchábi Salomón cho dacotéji egı́ptogosode ore eduguéjna cuchábi Faraón uro nanique, mu que chedu uaté ome úringa pijõra gotique. Uje jiépisi acotedie uñanie uje tṍraji purása quedéjnane ore unirone to iji israélgosode ore dosadode. Enga udire uñanie u moábgotodie, jé basa ga amóngotodie u uñanie. Enga cháta edómgotodie aja udire to, jé aja sidóniogotodie, hitı́tagotodie ore, uje chóji ore gari jnese.

² Ga udire garanone punı́ño upúsu uje Pangarádejnai Dupade e chaquı̃́ra israélgosode ome nanique jeta jé ca ore chóji uniritodie, unirisórone ore gari. Uje chojninga: –A ójiyoi purása quedéjnane ore urodie gari jne, ga a ore chorei uacáyipiedie iji quedéjnane ome uyu uje a ore pésu dangurenone dupa quedéjna unéningai ome uaque jne.– Mu Salomón chajo raja purása quedéjnanie udire úringanie pacotei.

³ Enga Salomón acotépisedie ore batigai chise 700 uje eduguéjna cuchape ore dayode to, jé basa ga acotedie uñanie batigai chise 300 nanique. Enga acotémujnanie pésu dangurenone dupa quedéjna unéningai ome dabai uté to.

⁴ Uje Salomón e choquı́jna nanique ga acotedie udire chorei uté áyipie iji dupa quedéjnane udore ore úringane pangurecho. Uje dai casicaite David chedu Pangarádejnai iji dáyipie, mu Salomón que chiradája jmapié ujñapeté uaté, jecute que chajo raja dangureni Dupapı́si adode go.

⁵ Ga eduguéjna cuchábi Salomón cho dadupáji sidóniogosode ore angurenepise uje i tu Astarté, jé aja amóngosode ore angureni ayoré gajnu noñanguipise uje i tu Milcom.

⁶ Enga Salomón pésu cucha gajnaréngone iji Pangarádejnai uté edominone, ga que chirate dai casicaite David aja isoca ueradode to uje chajna Pangarádejnai iji jnumone nanique.

⁷ Iji dirode udore nanique ga Salomón uté pésu dupa quedéjnane ore gajnéone gaserãte iji guedé garani yui to iji cucarãte oroné ójo iji ore idai Jerusalén guesi. Ga pésu gaserãte uñai ome ayoré gajnui Quémos uté, uje moábgosode ore angurete noñai tu. Jé basa ga gaserãte uñai u amóngosode ore angurete noñanguipı́si gajneque, uje i tu Moloc.

⁸ Mu que gusu Salomón ipesudode gaserãte udore. Enga isocai uté jé chuságaja dacotedie purása quedéjnai jnese angurenone udore, uje Salomón pésu ore gajnéone gaserãte. Gaidi tu gu jeta acotedie chãru cucha ai unérone ome dangurenone dupa quedéjna ore, ga ore tẽrápo dẽrapáidode cucha ome ore rı̃.

⁹ Enga jé u uje Pangarádejnai ájningaránguipı́se ome Salomón nanique uje e áyipie chicai quedéjnane ome Pangarádejnai uté, israélgosode ore angureni Dupa uté. Ga cuchiyi tupúsu uje Dupade chiqueta raja Salomón ga gare to, enga chududipise dajnéone Dupade urúo iji uté pijnani to.

¹⁰ Ga Pangarádejnai e chingopı́sa Salomón nanique jeta jé ca pota chajna dupa quedéjnaringo. Mu Salomón que suse dajnéone Pangarádejnai uru quicho guio go.

¹¹ Jecute Pangarádejnai uruode chise Salomón, ga chósi te uruode udore: –E bamate ua aja basoca gajnaréngone udore, enga que ajuse yuru iyiejnane guio jé aja yaréngone estatutos ore uje yutṍri ua ome ujetiga be udore quigode. Jé ũrepise yu uje a o baba udore jne, uje a yijna báringai eduguéjna iji bari jne, enga a yisi ome bajnepı́di uté ome barógode uñai.

¹² Mu uje qué baqueca ga a cáma tocade cucha dacadode udore. Enga gose yosongaquei ome bai casicaite David uté. E mu a yijna israélgosode ore uáguedie iji bajnacari gari jne iji batoringai quigade.

¹³ Que qui tu go ujetiga yijnápisa israélgosode uáguedie jnese iji uacari. Mu a qué yijı́ome gague chojmara iji bajnacari uté gari jne ujetiga chajire yui. Enga gose yosongaquei ome yiro casicaite David uté, jé aja pidai Jerusalén to, uje e yajegaite pidai uté nanique gu ujetiga yo yiyaridı́ji uté. Jecute que yijnápisa bape disi ejode, uacáringane eduguéjna iji uacari to ¡saque!–

Salomón umajosórone uñane e chiringare raja gaté ome uté, ga gose Dupade uje utocaite ore

¹⁴ Ga jé u nanique uje Dupade chiroque jnani aja Salomón yui jeta pésupúsu ujuredie. Ga edómgose jnani uté nanique ga i tu Hadad. Enga edómgosode ore eduguéjna cuchábi ape disi ejo uté to.

^15-16 Nanique uje qué eca eduguéjna cuchábi David uté, ga sué edómgosode ore gai to nanique ome dajocaningane. Enga David chutṍri soldádode ore eduguéjnai uje i tu Joab ujetiga chijóchame edómgosode ore yugode iji uraque darasade ujade to. Enga jé u uje Joab jnome Edom uté yui ujetiga chijóchame togode ore. Mu que Joab chedu chijóchame darása togode ore, mu pésapo dajocaningai ome edómgosode ore gaté rı̃. Enga qué Joab ore chácariji edómgosode uniri aja 6 meses, jé aja ujetiga ore chejna jnanione, jé aja diyoquı́ode jnese, iji ore uniri Edom uté údode jnese.

¹⁷ Mu Hadad jé aja dai iróquegatéode edómgose uñane ore chapı́dome Joab uté jocaningai uté nanique. Ga ore chapı́dome gu uje ore chijna dagajñua taja ore uniri Egı́pto nanique. Enga Hadad uté qué disape nanique uje udore tocade.

¹⁸ Enga Hadad dayé iróquegatéode udore ore nóna Hadad uté enga ore jnoji dedai Madián nanique. Quigade ga ore chise pidai uje i tu Parán, ga ore cháta jnanione uñane aja re iji parángosode udore gari. Ga ore jnopo rı̃, ga parángosode udore nóna ore aja ore ajesui to. Uje ore chise puniri uté uje i tu Egı́pto enga ore chijnare raja egı́ptogosode ore eduguéjna cuchábi Faraón uté. Enga eduguéjnai uté chosõre ore enga chisi ome Hadad iguı́jnai ome. Mu que gusu iguı́jnai uje chisı́ome, mu cháta jnumi aja to, jeta cho dajnéngu. Ga Faraón uté chisiapome deranone cucha pibose ome uté iji dirode jnese to nanique rı̃.

¹⁹ Enga egı́ptogosode ore eduguéjnai Faraón irasiguipise Hadad adode to nanique. Enga e chise dáringai jnacaripise nanique ga Faraón chisi ome dacoté uña ome Hadad uté ujetiga chóji gari, uje dacoté Réina Tahpenes nero tupúsu uaté.

²⁰ Ga Hadad, acoté ore abi base nanique ga diyocape suté ga ore chı̃́care Genubat aja uté. Enga Faraón acoté uje i tu Tahpenes irasiguipise nero, ore abi to nanique ga jnosi údi aja dagochocóya ajei to ga pésu ga chimánaja úringai jnacare. Enga cháta uté aja dabode nanique ga jé chorase ujetiga abi upúsu.

²¹ Mu chise diri nanique uje Hadad uté chudute damajósõri casica ujnomei iji egı́ptogosode ore uniri uté. Uje quene israélgosode ore eduguéjna cuchábi David e topı́si, jé aja soldádode ore eduguéjnapı́si Joab uté to. Enga jé u nanique uje Hadad catecã́ri ore eduguéjna cuchábi Faraón enga chojningame: –Ajuéga doi ome uyu á. Ga yajni to ga yicáji yuniri casica rı̃.–

²² Ga jé u nanique uje Faraón chajnai uruode ga chojningame: –¿Jé gotique gu a uje bapota arorai aja baniri? ¿Ama cuchárique chona ua iji yocuniri tudé a?– Enga Hadad chojningame Faraón uté: –Que cuchárique chona yu arı̃a. Mu yipota jeta ajuéga doi ome yu ga yajniapója yuniri to rı̃.– Ga jé u nanique uje Faraón juéga úringai aroraque ome Hadad aja daniri Edom uté, ga Hadad uté pésupúsu Salomón ujuredie.

²³ Mu que gusu Hadad uté uje pésu eduguéjna cuchábi Salomón ujuredie nanique. Uje Dupade chiringarápo jnani uñai aja gaté ome Salomón uté to, ga uté i tu Rezón. Ga Rezón uté dai i tu Eliáda nanique. Enga sóbagosode ore eduguéjnai Hadad-ezer irógode uñai u Rezón uté nanique. Mu chise diri nanique uje chayome darósõri ore eduguéjnai uté nanique.

²⁴ Enga cucha dacadode udore irabai tu uje eduguéjna cuchábi David casica chujé sóbagosode uje pésu dajocaningame Rezón irósõri Hadad-ezer uté. Mu Rezón uté e chayome darósõri ica, ga chamáta jnanione uñane aja re, ga ore pésu dajochade aja quedéjnane ome doriquéode. Ga oriechoquı́ode ore cho deduguéjna cuchábi iji Rezón uté nanique. Mu chise diri nanique uje Rezón, jorane oriechoquı́o udore ore cho dedáji pidai uté uje i tu Damásco. Enga udore ore chijna damenuringuei aja damáscogosode ore. Enga Rezón uté irotasórone oriechoquı́o ore pésu uté úringai eduguéjna cuchape iji ore idai Damásco uté.

²⁵ Enga que gusu iji Damásco uté, mu Rezón uté déji dáringai eduguéjna cuchape iji ore uniri Sı́ria uté údode jnese. Enga chujnapise israélgosode ore ga pésupúsu ore ujuredie iji deréjnane udore jnese jé aja Salomón uté eruei. Enga Hadad, Rezón ore cho ñane ome dáringane pujuredie ipesusóño nanique.

Salomón iroguipísode uñai tagu deduguéjna cuchábi uté uruode aja nanique

²⁶ Mu que gusu udore uje ore pésu Salomón ujuredie nanique. Uje Salomón iróquegatéode uñai tagu uruode aja to nanique uje i tu Jeroboam. Enga Nabat casicaite ujnacari uté, ga idai i tu Sereda iji israélgosode ore uague uña uje i tu Efraı́n. Enga chequé abai togué Jeroboam daté uaté uje i tu Zerúa.

^27-28 Enga Jeroboam uté pijóguipı́siji darasade ore ujade ome dáringai isagóca. Enga Salomón chidójnangapı́sa to uje jnacari uté etógome iroquéode jnese. Jecute Salomón chiroque uté aja daroque uñane yui ujetiga ore cho deduguéjna gatei iji Jeroboam uté. Ga jnani bajai José casicaite ájnape disi ejode ore u uje ore uáguedie cho deduguéjna gatei iji Jeroboam uté, manasésgosode jé aja efraı́ngosode udore ore. Enga deréjnane udore u nanique uje Salomón chicosája daguı́jnai yui ga ore pésu pararinguéone aja gaté iji uté, ga cho pac, págaja gatéode. Jé aja uje Salomón suruápo edodie iji dai casicaite David idai Jerusalén ujuyaquéode udore. Enga Jeroboam chetaque deduguéjnai adode, jecute áyipie déji jeta tagu deduguéjnai uté uruode aja iji cucha dacadode udore jmainie.

Dupade uruode júsõri Ahı́as uté chajnerame Pangarádejnai uruode ome Jeroboam uté

²⁹ Enga dirode udore uñeque jé u nanique uje Jeroboam chicai guesi iji oridai Jerusalén uté, enga Dupade angúromei proféta tuangóa uté iji dajeque pajei. Ga gusúpusu udore ore iji ñane gari iji garai. Enga silógose Jeroboam guiyasṍri uté uje i tu Ahı́as. Ga Dupade uruode júsõri uté chigui daguidé uje umarejna enga iguidé tuaté ichapise to.

³⁰ Enga Ahı́as chejñu daguidé icha uaté ga chajnangarase ga ajnangarañane pépita gare iji yirı́dai.

³¹ Quigade enga Ahı́as chósi tome Jeroboam uté: –¡Jináca! Ga yajnangarañane pépita uje chejna yijmanáyone ga bajnecho to. U gu uje Pangarádejnai, israélgosode ore angureni Dupade, chósi tome ua: "Cajire to uje a yijnime israélgosode uague uñanie iji Salomón jmainie jne uje ore chejna yijmanáyone, ga a yisı́ome ore ome ua jne ga a ore cho deduguéjnapisi iji ua jne.

³² Mu a yujuéga gague chojmara ome Salomón jne. Enga gose yosongaquei ome yiro casicaite David uté, jé aja Jerusalén uté. Uje Jerusalén u pidai uté uje yajegaite uté nanique gu iji israélgosode uacáguedie jnese ujade, ujetiga yo yiyaridı́ji uté.

³³ Ga a yi yáyipiedie quigode udojo ome Salomón jé aja israélgosode udore jne gu uje e ore cha Dupápisi yadode. Jé basa ga ore isı́gayode upúsu purása quedéjnane ore angurenone dupa quedéjna. Enga sidóniogosode ore angurené dupa quedéjna u uña, uje uaté i tu Astarté. Ga ore chátapója moábgosode ore angureni dupa quedéjna rı̃ uje i tu Quémos, jé aja amóngosode ore angureni dupa quedéjna to uje i tu Moloc. Que ore ajnane cucha u yadode go. Que ore pésu cucha arégode iji yedominone, enga que ore doi yajnéone estatutos quigode, jé aja yiroquéode cucha udore. Jé basa ga Salomón dai casicaite David jé cãraque re, mu que ujnacari uté chiradája isoca ueradode udore gotique."–

³⁴ Enga Dupade uruode atatasṍri Ahı́as chajnerapome Jeroboam gajnéone Pangarádejnai urúo ome gaté rı̃, enga Pangarádejnai uruode chósi tome Jeroboam uté: –Yiro casicaite David uté u uje yajegaite nanique, enga uté u uje angoninguite guesaguipise ome yiroquéode jé aja yaréngone cucha estatutos ore quigode nanique. Jé tiógararása ujetiga yiya ujnacari Salomón gajnepı́di jnese ome, mu a qué yijna dai gajnei yosongaqué aja uté. Jecute a jé ca yijnápisa úringai eduguéjna iji gari jne. Mu a yipésu jeta Salomón chácariji dayaridi jé aja uté ucuecaringuei eruénique jne.

³⁵ Mu iji uté quigade ga a quene yijnime israélgosode uague uñanie iji ujnacari jmainie, ga a yisı́ome udire ome ua jne uje ore batigai chejna yijmanáyone.

³⁶ Jé basa ga Salomón ujnacari uté a basája dayé charidi ga uté gajnepı́di u ore uague uña jne. Bamo uje yiro casicaite David gajnui tu pibioi papótique iji yurasade israélgose ore ujade, ga que yipota ujetiga uñeque chujnungu pibioi uté sere. Jecute yajéode u ujetiga jecucha David uté ape disi ejórigo udore uñeque chácariji uté charidi iji Jerusalén uté. Uje Jerusalén uté u yajegaidi pidai uje e yo yiyaridı́ji uté ome yi úringárique pisı́gai.–

³⁷ Enga Ahı́as qué jnopo Dupade uruode údi gaté rı̃ ome Jeroboam uté, ga Dupade uruode chósi te ome Jeroboam uté: –A uyu u jne jeta yichajapite báringai eduguéjna aja ua. Bapotigádi u ica ujetiga báringai eduguéjna cuse, ga a yipésu jne ga barasade israélgose ore jnese a cho deduguéjna cuchábi iji ua jne.

³⁸ Ga be ga arate yiro casicaite David uté aja átegoningáne to. Uje bajnepı́di u ujetiga angoninguite guesaque ua ome yiroquéode jnese jé aja ujetiga ajna yadode iji jnumone. Enga edu pate arégode iji yedominone ujetiga ajuse yaréngone cucha estatutos guio, yojningane cucha udore. Ujetiga basocade u udore, enga a yijı́na ua aja quedéjnane jne. Enga a yipésu ujetiga jecucha bape disi ejórigo ore basája ñane charidode ome dáringane eduguéjna cuchape, uje jé yisocai u uté ome David. Jeta be yuruode udojo quigode jnese ga a yeranome Israel ome ua jne, ome báringai israélgosode ore eduguéjna cuchape.

³⁹ Jé basa ga a yo yujuñame David ájnape disi ejode ore jne, ga gose Salomón isoca gajnaréngone udore. Mu yujuyaquéode ome ore a jé ca chuságaja deréjna pitade jnese jne, mu a eruei cuse jne.– Enga Ahı́as uté uruode eruei tu ome Jeroboam uje chajnerame Pangarádejnai uruode ome Jeroboam uté.

Salomón ucuei tu Jeroboam uté úringárique chuque nanique

⁴⁰ Enga chise diri nanique ga eduguéjna cuchábi Salomón chudute Jeroboam ujnomei to. Jecute Salomón chucué dasocáringome Jeroboam úringárique chuque. Mu uje Jeroboam chudute uje Salomón jmongarája, ga Jeroboam uté chague jmame ga chijna dagajñua aja punire uñai uje i tu Egı́pto. Enga egı́ptogosode ore eduguéjnapisi uje i tu Sisac juéga daniri ome Jeroboam uté. Enga Jeroboam chácariji Egı́pto jé aja eduguéjna cuchábi Salomón itoringai uté.

Salomón toi nanique ga ore chicha ode taja dai casicaite David idai Jerusalén

⁴¹ Enga Salomón adode amirone purusãracho iji aode uñane uje i tu "Salomón Adode U Udojo To." Ga purusarane udore chatata cucha dacadode jnese uje tocade iji Salomón úringai eduguéjna uté. Que gusu udore, mu Salomón irajatigade déji darujna aode udore to.

⁴² Ga Salomón guejnanie siquerei 40 nanique iji dayaridi Jerusalén uté ome dáringai eduguéjna. Enga israélgosode udore ore jnese cho deduguéjna iji uté.

⁴³ Uje e Salomón toi nanique ga ore chicha ode aja dai casicaite David idai Jerusalén to. Enga Salomón ujnacarode uñai uje i tu Roboam basája dayé charidi iji quigade ome dáringai eduguéjna nanique.