1 Reyes 10 - Dupade Uruode

E chise diri nanique uje sabágosode ore eduguejẽ́ uaté chudute Salomón ujnomei to ome úringai irajataque, ga uaté tibágui uté jeta pañaji uté ome dedodie

¹ Enga chise diri nanique uje sabágosode ore eduguejẽ́ cuchabé uaté chudute Salomón ujnomei ome irajatigai, uje Pangarádejnai guẽrate Salomón uté irajatigai ome gu. Enga chequé eduguejẽ́ uaté pésu dajéode iji dajei nanique ujetiga tibágabi uté ga chetingarape ome dapregúnta uajádedie udire, ujetiga Salomón chiraja uru quigode jnese. Ga jé u uje uaté jnoji danire idájai uté nanique ome Salomón uté yui.

² Enga chequé uaté a jé ca gusu nanique ujetiga chicáji Salomón iji Jerusalén nanique mu nóna daroque dipeséode uñéngo nanique. Enga uaté di deranone cucha údi ome Salomón, ga ore chujé gueranone cucha udore aja burica quedéjnane udore gáyode nanique uje udore i tu caméllo. Ga uaté gueranone cucha ome Salomón uté u cucha ai unérone, ga cháta órodie aja to ga jiei, jé aja cucarané orerenie to nanique. Uje eduguejẽ́ uaté di iji Salomón nanique ga jé u uje chetingare Salomón irajatigai ome cuchade jnese uje déji uaté áyipie, uje a e chimate detingaquéode udore jnese iji dáyipie ome Salomón yui ica.

³ Ga Salomón chajnai uaté ipregúntadie jnese. Enga que cuchárique piragome Salomón uté, jecute jı̃raque chuchẽri cuchade jnese iji guesode ome chequé uaté nanique.

^4-5 Uje sabágosode ore eduguejẽ́ cuchabé uaté e chimo ome dedodie uje Salomón uté irajatigai jiépisi, jé aja uje chimo Salomón igóchocoijná uje uté pésu ome re, enga cuchade udore chajuguipise uaté aguté. Que gusu udo mu chimo Salomón jorane daróquegatéo uje Salomón chacásãra ore iji datigai iji damésa ejode to. Ga ueradéjnapise ore posode, jé aja ore jódode cucha udore. Ga ueradépo Salomón irógode ore iguidedie rı̃, jé aja uté irógode udore isocade uje ore chajire Salomón urane udore yúode. Ga que gusu udojo mu eduguejẽ́ reina uaté chimópo Salomón ipesudode uchiejnaque ueracho udore rı̃ uje uté choru aja Pangarádejnai Dupade iguı́jna cuchábi yui. Enga chequé uaté tijapı́sa cuchade udojo nanique, Salomón isocade ome cucha dacadode iji uté jogadi uté jnese nanique.

⁶ Ga uaté catecã́ri Salomón nanique ga chojninga: –Yudute bajnomei to iji yocuniri ome barecujaidie udire quigode jé aja barajatı́gadatéode udore. Enga jé ũrepise ore ojñane quigode jnese ome ua.

⁷ Mu yotigase ore ojñane ica, mu iji de ga quene yipáñaji, uje yimopise cucha dacadode udore jnese ome yedodie. Uje que pute basocade uñane gotique, mu gusu ore chatatasia barajatı́gadatéi pébode, pébode ome yu ica. ¡Urénga! Báringai irajataque, báringai ataque udore ore suépise ore ojñane gáyode jnese uje yudute ica.–

⁸ Enga reina uaté chojninga: –A pininaquei irágu barasade jnani ore jõ, jé aja barógode ore jnese iji bejode. A ore irasiguipise raque gu cutejmai barajatı́gadaté uje ore chudute iji babijnani gatuaque.–

⁹ Enga eduguejẽ́ uaté chicota Dupade nanique ga chojninga: –¡Picotaguipise Pangarádejnai uté, bangureni Dupade gotique, uje uté cho dedójnari iji ua ga ichajapite ua aja bayaripi cuchábi udé iji barasade israélgose udore ujade! Pangarádejnai ijnoraquédatéi ome israélgosode udore ga que eruénique erãpe cuse, jecute pésu báringai eduguéjna ome ua. Uje uté gaidi u gu ujetiga ajiripise barasade udore ore adode aja quigode ga ũrepise ua ome bajiritigade udore gatuaque.–

¹⁰ Enga jé u nanique uje chequé eduguejẽ́ uaté doi nanique ga tẽrája Salomón to ome dajnúiso cucha. Enga chisi ome órodie ome nanique uje imenuringuei batigai chise 3.960 ikı́lode. Ga cháta cucha ai unérone aja to, ga jiépisi. Ga chisiapome cucarané orerẽ́pisedie ome rı̃ uje ueradépisei cucaranenie udire nanique. Jé ũré uje purása uñane ore tẽra cucha ai unérone ome Salomón to nanique, mu que uñeque guẽrapáidode cho eduguejẽ́ uaté guẽrapáidode uje jiépisi nanique.

¹¹ Que gusu reina uaté uje tẽrája Salomón mu peduguéjnai uje i tu Hiram tẽra dẽrapáidode ome to nanique. Uje uté gachidode cuco u nanique uje ore doi órodie iji ofı́rgosode ore uniri nanique ga choréji Salomón to nanique. Enga que gusu órodie mu ore jnunguenie upo pore dipesedie rı̃ uje tṍraji ore uniri Ofir uté to, ga pore ueradedie udire i u sándalo. Ga Hiram uté cháta cucarané orerẽ́pisedie aja udire to nanique.

¹² Uje Salomón pésu Pangarádejnai Dupade iguı́jna cuchábi, jé aja dagóchocoijná nanique, ga pésu udore uchiejnane dosadode iji poria uaté uje i tu sándalo. Ga pésu ore yugode hárpa, saltério ore iji poria uaté to nanique uje uaté i tu sándalo, ga ore chujé degode udore ome damúsica nanique uje ore chijñecare ome daradedie. Enga poridie udire uje i tu sándalo ga ı́jnoque ujetiga ore diapo uñáringui údi rı̃ iji cucha dacadode udore quigade uje cho udire ome dáringanie ueradei, ga que pimópo udire uñáringui rı̃ jé aja deréjnane udojo to uje cho udire.

¹³ Uje chise diri nanique ujetiga eduguejẽ́ uaté chajni aja daniri to nanique ga eduguéjna cuchábi Salomón chisı́ome ajegaidode cucha jnese ome uaté uje chutáji uté nanique. Mu que gusu utaidode cucha uje Salomón chisı́ome chequé eduguejẽ́ uaté. Uje Salomón chase dagúcha dipeséode ujade ga tẽra dajegaidode cucha ome uaté to. Ga jé u uje eduguejẽ́ uaté jno ga chajni aja daniri nanique enga irógode udore nóna aja dajei.

Que po Salomón uté ome úringai ugúcharánguipı́se, jé aja úringai áyuquetotinguerã́que nanique

¹⁴ Enga órodie uje chise Salomón iji siqueré chojmara, chojmaranie jnese nanique batigai u 22.000 ikı́lode.

¹⁵ Mu que gusu órodie udire uje chise Salomón uté. Uje cuchade guẽrapaisórone uje ore cho macatérodie di ga ore tẽra cuchade iji israélgosode ore uniri nanique ga ore cho doré ome Salomón jnese nanique. Ga uñéngo déji to uje ore isocai cho uté, ga jecucha ore chisı́ome dẽrapáidode oredie péode ome Salomón gatuaque. Enga purása quedéjnane eduguéjna cuchábode iji ore uniri uje i tu Arábia, jé aja Salomón iróquegatéode udore iji daniri uje ore chajire cuchade yúode iji ore gajnepı́di jnupe uté, ore jnese chopo doré gatuaque rı̃ ome Salomón uté nanique.

¹⁶ Enga chise diri nanique uje Salomón chutṍri darógode uñane ujetiga ore pésu guebeque uejátigo jeta pocaningane gajnecho ujetiga ore chicháji dagosi yui iji pocaningane. Ga pota jeta querújna ga irágu ore arobé yui. Ga chingo ore ujeta ore pésu udore iji órodie to uje ore chujé ga ejágaja ñane. Enga ore ipesudode udore batigai chise 200 nanique, ga ore orai guebeque uejaque chojmara imenuringuei chise 6 ikı́lode nanique.

¹⁷ Enga Salomón chirócapo darógode aja guebébode rı̃ jeta ore chujé guebéode ga ejaque ga ajámamio sudore ga ore aróbedie gajnémio to ome pocaningai yúode ujetiga ore chichası́ji darobé yúode. Enga pipesute udore iji óro to, enga ore batigai chise 300, enga ore orai guebeque uejaque chojmara imenuringuei chise un kı́lo y médio. Enga Salomón chicha udore aja daguı́jna cuchábi uté uje i tu Yiguı́jna Abué uje Tṍraji Lı́bano ome Salomón uté nanique.

¹⁸ Enga Salomón pésapo dayaripi querújna nanique rı̃ jeta chácariji uté ome dáringai eduguéjna. Ga ore pésu ome elefante ue gajnunie nanique uje ore chojningame udire marfil. Ga jé u uje chimese dayaripi gai ome óro ueguepı́sedie nanique.

¹⁹ Enga Salomón pésu dachiejnane aja dayaripi yui nanique ga chojmara iji ti uchiejnane jogadode aja dayaripi yui ujetiga chácariji dayaripi iji gaté nanique. Ga pésapo dedoboi jogadi iji dayaripi uté nanique uje odobe iji eruei. Pésapo dacadodie jogadode iji to rı̃ iji dayaripi dosadode jnese. Ga pésapo caraté quedéjnanie gajnunie iji dacado jogadode ejode gaté rı̃ iji jnumi yui, ga ipesudedie caratei udire cháguena gaté.

²⁰ Enga Salomón pésapo caraté quedéjnanie uñanie oredie rı̃ uje cháguena gaté iji uchiejnane ejode ga gare iji yirı́dai, ga chojmara iji ti iji dosate chojmarai, ga chojmarapo iji ti rı̃ iji ujoi dosate uñai, ga caraté quedéjnanie udire oredie jé chise jnumi iji uchiejnane eruei. ¡Enga que eduguéjnarique charipı́rique iji punı́nique cho Salomón charipi cuchábi uté ome úringai ueradéjnapise nanique!

²¹ Enga eduguéjna cuchábi Salomón uté jopidode ga pipesute ore jnese iji óro. Enga óro uegue cucha pagapı́ode jnese iji Salomón iguı́jnai uté uje i tu Yiguı́jna Abué uje Tṍraji Lı́bano nanique. Que pipesute uñeque iji guebeque uétique uté uje i tu pláta. Iji deréjnane udore uje Salomón déji dáringai eduguéjna ga que uñeque cho cucha oreránguiji guebei uté uje i tu pláta gu uje garósi oredie ga chapuse ayoréode ore aja.

²² Uje Salomón jecucha chiroque darógode aja punire idájagode ore yúode nanique jeta ore chucué guebéode udore ga ore pı́ode u cucode nanique aja dajesúode erámio. Ga ore jorane u Hiram irógode ore nanique aja dajesúode iji yote quedéjnai uté gai. Ga ore chicáji pidai idájagode ore yúode nanique ga ore chise daqui uté uje i tu Társis nanique. Enga ore gaidode cucha u órodie, jé aja guebeque uégode uje i tu pláta iji uté. Que gusu udore mu ore cháta elefante ue gajnunie aja to uje udore i tu marfil, jé aja yamepa quedéjnane rı̃ uje querúpiso, jé aja tiguiriqui quedéjnanie to rı̃ uje udire chungare dacarigode ga nanganata cari péode. Uje Salomón irógode ore jno nanique ga siqueredie gadiógome ore iji erámone nanique. Mu ore di dagaidode cucha uásejna udore údi iji siqueré gadióguedie udire eruei nanique. Ga jé ore isocai tuté, uje ore di cucha orerane udore údi aja Salomón ga chojmara iji siqueré gadióguedie udire gatuaque.

²³ Ga Salomón uté e chise dáringai cuchadatépise ga sué peduguéjnane uñane gáyode jnese iji erámi údode jnese. Que uñeque cho uté ome úringai ugúcharã́que, jé aja úringai áyuquetotinguerã́que nanique.

²⁴ Enga erámi unirisórone jnese ore jnátu yui jeta ore chimo Salomón uté ome dedodie, uje ore gaidi tu gu jeta ore chudute uru quigode ome cuchade, uje Dupade guẽrate ayuquetotiguei ome uté gu.

²⁵ Ga iji siqueredie jnese nanique ga purása quedéjnane ore di deranone cucha údi iji Salomón uté to. Enga ore guẽrapáidode cucha u cuchárigo uje ore pésu iji óro, pláta ore nanique. Que gusu udore, mu piguidé umarenie jé upo to rı̃, jé aja docõrachade, jé aja cucha ai unérone. Enga buricade upo rı̃, jé aja burica quedéjnane nanique, uje ore chapuse deranone aja ome Salomón uté nanique.

²⁶ Enga Salomón chajnerame dachidode guebéquedatéo jé aja gachidode burica ore jnese nanique, ga jiépisi udore nanique. Enga guebéquedatéode batigai chise 1.400 nanique, jé basa ga buricade batigai chise 12.000 nanique. Mu Salomón chajuque ore pajei ome ñane ga uñane déji dajogadode iji Salomón ojningane pidáyo nanique uje pañeraque guebéquedatéode iji udore. Jé basa ga uñane jé jogate Salomón ejode iji Jerusalén uté. Enga Salomón irógode soldácho chajire ore yúode jnese.

²⁷ Iji dirode udore ga Salomón pésu ujetiga pláta guebéode jiépisi iji Jerusalén údode nanique ga cho ujetiga pláta guebéode udore chopise cucaranépitabidie iji jnumi, uje que plátaraque chona uñeque gu. Enga jé isocai upo rı̃ ome pore orerenie uje udire i tu cédro, uje jiépisi udire to iji ore idai Jerusalén údode, enga gose Salomón uté. Enga udire batigai e cho pore gajnarénguenie higuéra batigai uje udire piéjna orónenie údode iji ore uniri Judá uté.

²⁸ Ga Salomón gachidode burica ore garanone punı́ño u Egı́pto, Cóa ore, ga Salomón irógode doi oredie ome ore iji Cóa uté. Enga ore imánenie orei ome buricade ore jé jogate dabatigai, ga que ore chapúsaja ome oredie gotique.

²⁹ Uje ore doi buricade oredie iji Egı́pto, ga burica chojmarai oredie chise 150 nanique iji pláta guebéode. Ga Salomón irógode dopoi guebéquedatéode oredie nanique rı̃ ome deduguéjnai uje tṍraji egı́ptogosode udore uniri uté. Enga pláta guebéode batigai chise 600 nanique ome guebéquedaté chojmarai. Mu Salomón irógode ore tẽrápo dagaidode udore uñane gaté nanique rı̃ ome hitı́tagosode ore eduguéjnane jnese, jé aja araméagosode eduguéjnane jnese nanique.