1 Reyes 1 - Dupade Uruode

Eduguéjna cuchábi David chise dáringai choquı́jnapise nanique

¹ Uje e eduguéjna cuchábi David guejnanie siquerei idája iji guesode ome dáringai choquı́jna nanique, enga jé u uje ore chaco gai ome itarãpéode ore uje tejnu ome gatuaque, mu jé tejnu ome to iji údi.

² Enga eduguéjna cuchábi David iróquegatéode ore catecã́ri uté ga ore chojninga: –Omitigai turásu ujetiga yucuegoi gapu paréraque to ome ua, Yoquirósõri á. Enga a jé u jne ujetiga uaté chusı́pise beo iji bedominone gatuaque, jeta doi bajegaitı́go cucha udore jnese, Yoqueduguéjna cuchábi á. Ga ajũrája uaté to jne jetiga pioque uágaja ñane iji uacamochátique to.–

³ Ga jé u nanique uje ore chı̃ro erámi ome gapu ueradéraque iji daniri Israel údode jnese. Ga jé u nanique uje ore chise sunémgoto uaté uje i tu Abisag. Ga jé u uje ore jno uaté údi aja deduguéjna cuchábi nanique.

⁴ Gapu ueradépise uaté ga doi eduguéjna cuchábi iroquéode enga chañuru uté guio gatuaque, mu mochápasa bisideque ga que David uté tungarája uaté to.

David ujnacarode uñai uje i tu Adonı́as uté pota dayé úringai eduguéjna ome re

⁵ Enga e chise diri nanique uje David ujnacari Adonı́as uté chosi riji gaté enga chojninga: –Uyu u eduguéjna cuchábi jne.– Ga ujnacari uté daté u David acotedie uña uje i tu Haguit. Ga Adonı́as pésu cuchade aja yúode jeta chajnose dayé ome charidi, ga jé u uje doi buricade orusórone jé aja erásorone guebéquedatéo to rı̃. Enga jnanione uje ore batigai chise 50 ore chayo aja uté iquéode to jeta ore chãraque ejode.

⁶ Ga jnani omipise Adonı́as uté to, ga uté bası́ji daté iji dayai Absalón quigade, mu jé cãra daté. Enga dayé eduguéjnai David uté que pésu dabi Adonı́as uté ujúruringárique iji deréjnarique gotique to nanique, jeta chaquı̃́ra ome isocárique ga chojningame uté: –¿Yabi á, cuchárique u gu a uje bapésu uté, uje gajnareque mu?–

⁷ Ga jé u uje Adonı́as chayója eduguéjna gáningo yui ujetiga ore cháta raja uté ga chijna dayé úringai eduguéjna iji gari to. Ga soldádode ore eduguéjnai Joab u uñai uje uté dai i tu Sárvia; jé basa ga jõrai u sacerdote uté uje i tu Abiatar. Ga Adonı́as uté agutı́yabádode u udore ujetiga ore cháta dáyipiedie aja uté.

⁸ Mu eduguéjnane uñane que cháta raja Adonı́as to gotique nanique, ga ore ı́ode u udojo: sacerdóteode uñai uje i tu Sadoc, jé aja Benaı́a uté uje uté dayé i tu Joiada nanique, jé aja Dupade uruode júsõri uté uje i tu Natán, jé aja Simei, Rei ore, jé aja David iroque dicaséode udore ore to.

⁹ Enga Adonı́as chicáji ore gajminémei uje i tu Zohelet uje idógosiji sibı́jnai uté uje i tu En-rogel. Ga chibore áyasadie, jé aja tórodatéode ore, jé aja aquirájna ape urojnanie to iji uté ome cutejmai daninaquéjna yui to. Ga inejeranone u desade ore uje eduguéjna cuchábi David ape ore to, jé aja jnani ibijógode iji judágosode ore ujade jnese to, uje eduguéjna cuchábi David irócho ore.

¹⁰ Mu que nejéna Dupade uruode júsõri gotique to uje i tu Natán. Jé aja uje que nejéna Benaı́a uté to nanique rı̃, jé aja dayé iroque dicaséode ore. Ga que tibidápoi desai Salomón to nanique rı̃.

Proféta Natán uté cho David acoté Betsabé quique ome cucha dacate tocachugode udore nanique, enga jé u uje ore chise David iji mochádi nanique ujetiga ore catecã́ri uté

¹¹ Uje Dupade uruode júsõri Natán uté chudute Adonı́as uté ujnomei, ga jé u uje tibágui Salomón daté uaté uje i tu Betsabé, ujetiga catecã́ri. Enga chósi tome uaté: –¿Ama cáma adute pujnomérique to a? Uje Haguit ujnacari Adonı́as e cho eduguéjna cuchábi iji re. Mu yoqueduguéjnai David uté que chudute cucháriguiji to.

¹² Jecute be ga angarami yuru quigode udojo ome ua. Enga a jé u jne jeta jé ca chugué ua to jne, jé aja uje bajnacari Salomón a chapite to jne.

¹³ Jı̃raque bo ga ango ua aja yoqueduguéjnai David to jne ga ósi tome jne: –Yeduguéjná, ¿ama jé ca ası́ome baru iyiejnane ome uyu nanique a? Uje bojningame barogué uyu nanique: "Bajnacari Salomón a basája dáringárique eduguéjna iji yiquigade, ga a uté u jne ujetiga chácariji yiyaripi cuchábi gai to." ¿Mu jé gotique gu a uje e bajnacari Adonı́as déji dáringai eduguéjna to iji deréjnai tudé?–

¹⁴ Enga Natán uté cho uaté quique gaté uje chojninga: –Ujeta e agúsiji baruode udore gai ome eduguéjna cuchábi uté, mu a quene yise uáguiji uacayaridi uté to ga a yajo yu aja baruode udore úringane ũrepı́so to jne.–

¹⁵ Enga Betsabé jno ga tibágui eduguéjna cuchábi iji mochápi jogadi uté nanique. Ga chise eduguéjna cuchábi uté uje irogué Abisag qué pésu cuchade ome to uje e choquı́jnapise gu. Ga Abisag uaté idai tu Sunem nanique.

¹⁶ Uje Betsabé e chacája ajei enga jé u uje chichaga dacuruté aja jnumi iji eduguéjna cuchábi iquei to ome uté úringai pisı́gai. Ga jé u uje eduguéjna cuchábi David catecã́ri uaté ga chojninga: –¿Bajegaitı́guiji yu to a?–

¹⁷ Ga Betsabé chajnai uruode ga chojninga: –Yeduguéjná, bası́ome baru iyiejnane ome yu nanique enga Pangarádejnai gajneque baruode udore to. Uje bojningame barogué uyu nanique: "Bajnacari Salomón a basája dáringárique eduguéjna iji yiquigáningo, ga a uté u jne ujetiga chácariji yiyaripi cuchábi gai to."

¹⁸ Mu, urénga, Yeduguéjná, bajnacari Adonı́as uté e chise dáringai eduguéjna, uje que adute cucháringome mu.

¹⁹ Enga e chibore tórodatéode ore, jé aja aquirájna ape urojnanie, jé aja áyasadie ore ga ujuyápisei. Enga e chimáta desade ore aja ñane to. Enga inejeranone jõrai u sacerdote Abiatar uté, jé aja soldádode ore eduguéjnai to uje i tu Joab. Mu que nejéna baroi bajnacare Salomón gotique to.

²⁰ Mu jé iji de, Yeduguéjná, yocurasade israélgose ore chirote báyipiedie yui jnese ome bajegaitı́guiji bajnacarode ore jeta gosi chácariji bayaripi cuchábi uté gai iji baquigáningo.

²¹ Mu jetiga ca ango báyipiedie udire ome ore enga a chise dı́nique jne jeta atoi, enga a ore cho máranguiji bajnacari Salomón uyoque iji baquigade to enga a yoquigachodi jé u jne.–

²² Mu uje qué Betsabé uaté déji dacatecãraitigade gai ome eduguéjna cuchábi uté, mu Dupade uruode júsõri Natán e chacája ajei to.

²³ Ga ore chojningame eduguéjna cuchábi uté: –Dupade uruode júsõri Natán e di to.– Ga jé u uje Natán basája eduguéjnai iquei ga chichaga dacuruté aja jnumi iji iquei ome úringai pisı́gai to.

²⁴ Enga jé u uje Natán uté narare enga chojningame David uté: –Yeduguéjna cuchábi á, ¿ama baroquei tu ujetiga bajnacari Adonı́as uté chácariji bayaridi ome dáringai yoqueduguéjna iji baquigáningo jne?

²⁵ Uje uté e jno ga chibore tórodatéode, jé aja aquirájna ape urojnanie, jé aja áyasadie to, enga ujuyápisei. Ga nejéna eduguéjna cuchábi ujnacarode jnese, jé aja soldádode ore eduguéjnane udore, jé aja sacerdote uje i tu Abiatar. Adójnanga yuruode udojo uje e ore pésu daninaquédatéi ome dabose unérone uje ore taguı́ji ñane gari, ga ore chóji dajódode cucha to, enga ore chinguı́ra dabijnanone aja dejode uje ore chojninga: "¡Yipécopú ga yoqueduguéjna cuchábi Adonı́as ucuecaringuei umare jne iji erámi tudé, jõ!"

²⁶ Mu que uté nejéna baroi tuyu gotique to. Ga que tibidápoi sacerdote uté rı̃ uje i tu Sadoc. Jé aja uje que tibidi Joiada ujnacari Benaı́a uté. Ga que uté tibidápoi baroi bajnacare Salomón to rı̃.–

²⁷ Ga Natán chojningápo rı̃: –¿Ama yeduguéjna cuchábi iroquei tu cucha tocachugode udore que, mu cáma ango báyipiedie aja barógode uyoque ome gosi ujeta chácarásiji bayaripi cuchábi gai iji baquigáningo a?– Ga proféta Natán uruode jé u udore ome eduguéjna cuchábi David nanique.

David chisı́ome dáringai eduguéjna cuchape ome ujnacari uje i tu Salomón nanique

²⁸ Enga jé u uje eduguéjna cuchábi David chajnai proféta Natán uruode uje chojninga: –Abidi Betsabé jeta chicabı́ji de to.– Enga jé u uje Betsabé doi uruode ga basája eduguéjna cuchábi iquei to ga cháguena iquei jeta uté catecã́ri.

²⁹ Ga eduguéjnai David uru iyiejnane chósi tome: –Pangarádejnai uté jé jogate, enga Yiquetasṍri tu uté uje chijnime yu iji yajnenie pujurei jnese uje chise yu iji yucuecaringuei iji erámi tudé.

³⁰ Ga jé yajo yuja yuru iyiejna casodica ome ua ga yı̃́care udore iji Pangarádejnai uté iquei, uje israélgosode angureni Dupade u uté. Uje yósi tome ua nanique: "Bajnacari Salomón a basája yiyaridi ome dáringai eduguéjna cuchape iji yiquigáningo, enga a jé chácariji yiyaripi cuchábi gai." Ga yuruode udore a tocade jne iji diri tudé gajiné.–

³¹ Ga jé u nanique uje Betsabé chichaga dacuruté aja jnumi tiji eduguéjna cuchábi iquei ome uté úringai pisı́gai. Ga chojninga: –¡Yipésupú ga eduguéjna cuchábi David ucuecaringuei umare jne iji erámi tudé, jõ!–

³² Ga eduguéjna cuchábi David chojninga: –Abichoi sacerdote uté uje i tu Sadoc, jé aja Dupade uruode júsõri uje i tu Natán, jé aja Joiada ujnacari Benaı́a uté ome yu.– Enga pijnángaidóde udore ore basája eduguéjna cuchábi iquei.

³³ Ga eduguéjna cuchábi chojningame ore: –Ajı́naño uaqueduguéjnai uyu yirodisórone yirócho ore, enga achayo yujnacari Salomón aja yachidi gai uje yorutébeque burica quedéjnai uté to, ga boyo uté údi aja jnumi yui jé aja sibı́jnai jogadi uté uje i tu Gihón.

³⁴ Jeta eso yojningai uté jogadi, enga sacerdote Sadoc jé aja Dupade uruode júsõri Natán a ore gajnepı́di u jne ujetiga ore changuñéra aseque puyai Salomón gai to ome uté úringárique israélgosode ore eduguéjna cuchape. Enga abúchuyo pubuchui uté uje i tu trompéta to jne, ga nóna uacabijnacaraidie aja gatéode to jne enga oyósi tome: "¡Yipécopú ga yoqueduguéjna cuchábi Salomón ucuecaringuei umare jne iji erámi tudé, jõ!"

³⁵ Enga a ajnı́ñopo jne rı̃ ga a bajai tu yujnacari aja uacaquei to jne. Ga a esópo de jne rı̃ ga chijnare raja yiyaripi cuchábi jeta chácariji gai to jne uje basája yiyaridi ome dáringai eduguéjna. Uje yajegaidi jé u uté ujetiga chácariji dáringárique eduguéjna cuchape ome israélgosode, judágosode ore jnese.–

³⁶ Enga Joiada ujnacari Benaı́a u uje chajnai uruode enga chojninga: –Jé upúsu, Yeduguéjná. ¡Yipésupú ga Pangarádejnai dopı́si báyipiedie udire quigode jnese, jõ, uje bangureni Dupade u uté!

³⁷ Uje Pangarádejnai nóna ua aja quedéjnane gatuaque to enga yocajéode upúsu ujetiga adi jé upo ome bajnacari Salomón to jne rı̃. Ujnomerãque ua ome báringai yoqueduguéjna. ¡Mu yipésupú enga bajnacari Salomón uté suépise babai ome dáringai eduguéjna ujnomerãque iji baquigáningo, jõ!–

³⁸ Ga jé u nanique uje sacerdote Sadoc, jé aja Dupade uruode júsõri Natán ore cháta rágaja Benaı́a uté, uje Joiada ujnacari u uté. Ga ore doi Salomón ga ore chicha uté aja eduguéjna cuchábi David gachidi burica quedéjna gai ga ore jno údi aja jnumi yui jé aja ore qui Gihón uté. Ga ceretéode, peletéode ore nóna ore to uje David irodisórone irócho u udore.

³⁹ Uje ore chise daqui uté ga sacerdote Sadoc chacája guiguı́jnai cárpa ajé puyai iji ore jogadi uté. Ga chijna aseque puyai uté uje déji pié aquirájna ue ajei. Ga jé u uje changuñéra aseque puyai Salomón gai ome úringai eduguéjna. Enga jé u uje ore chubúchu dabuchui uté uje i tu trompéta, ga ore jnese chojninga: –¡Yipécopú ga umare eduguéjna cuchábi Salomón ucuecaringuei jne iji erámi tudé, jõ!–

⁴⁰ Ga jé u uje ayorébujnai udore ore jnese chajna uté aja quedéjnane aja ajesúode ga ore chubúchu dabuchugode uje edodie tṍraji pajéode, ga udore i tu fláuta. Ga ore chachietáji re ome darasitı́gadatéi jé aja ujetiga ore ininaquei chichagu gatajnoquei.

⁴¹ Enga Adonı́as, inejeranone udore ore jnese quene ore cha dáringane chagu uje ore tṍra rome cutejmai udore ore ichorájna to. Enga uje soldádode eduguéjnai Joab chudute trompéta jocarãi uté ga chajuque aguté to ga chojninga: –¿Jé gotíguipié idaité ore ichorájnai gajnetique cucha ya?–

⁴² Uje soldádode eduguéjnai Joab qué déji dáringai dara gai mu ¡urénga! sacerdote Abiatar ujnacari e chise ore uje uté i tu Jonatán. Enga Adonı́as chimo jnani uté uje e diji ore to ga chojninga: –Boji te uje cachi ore angarate ua to arı̃a. Ise mu ajna bojña ueradéjnarique aja yoque to.–

⁴³ Mu Jonatán chajnai Adonı́as uruode enga chojninga: –Úngare. Gajnareque yojñane quigode ome uaque, uje eduguéjna cuchábi David e pésu besai Salomón úringai eduguéjna cuchape.

⁴⁴ Enga eduguéjna cuchábi e chiroque sacerdote Sadoc aja besai quigade, jé aja Joiada ujnacari Benaı́a uté, jé aja Dupade uruode júsõri Natán uté. Mu que gusu udore, mu uté chiroque ceretéode, peletéode aja Salomón ejode to ujetiga ore chirodipise uté. Enga ore chicha uté aja eduguéjna cuchábi orutébei burica quedéjna to uje ore chicáji Gihón yui.

⁴⁵ Enga sacerdote Sadoc, jé aja Dupade uruode júsõri Natán e ore changuñéra aseque puyai gai to iji ore jogadi Gihón ome uté úringai eduguéjna cuchape. Enga ore jnoji uté ga ore chachietáji re aja dajesúode, jé aja uje ore ininaquei chichagu gatajnoquei. Ga uacadudigode ayorébujnane ore ichorájna quigode u udore iji Salomón ejode.

⁴⁶ Enga Salomón chácariji bayé charipi ueradéjnai gai to.

⁴⁷ Que gusu udore, mu eduguéjna cuchábi iroguipı́sode e ore chatata darasitigade ome yoqueduguéjna cuchábi uté, ga ore uru ueradode ome uté chósi te: "¡Yipécopú ga Badupade pésu ga Salomón uté i úringárique ujnomerãque sué bei uté úringai ujnomerãque gai to, jõ! Enga uté úringárique eduguéjna cuchape dorási ga suépise báringai eduguéjna cuchape gai to." Enga jé u uje yoqueduguéjnai uté chisi Salomón gai to, ga catecã́ri Pangarádejnai uté ome dajnacari uté iji damochápi gai.

⁴⁸ Enga chósi te icatecãraitigade udore quigode: "Picotaque opejã Pangarádejnai uté, uje israélgosode yocangureni Dupade u uté. Uje uté juéga jeta yape disi ejode uñai chácariji yiyaripi cuchábi gai to ome dáringai eduguéjna. Ga cuchadatei u ome yu uje e yimopise udore ome yedodie to iji diri tudé."– Enga Jonatán atatagode u udojo ome Adonı́as ore.

⁴⁹ Uje Jonatán chejna dojñane udore aja guesi, enga jé u uje Adonı́as inejeranone udore ore jnese niji ga ore noñome Adonı́as iji te jmete ga ore cho jmı́ti, jmı́ti ome ñane ome dasadodéringai.

⁵⁰ Ga jé chopome Adonı́as rı̃. Todópisa Salomón yui to ga niji ga chayója Pangarádejnai iguı́jnai cárpa ajei to. Ga chijnare raja ore aseradéjnai ga chisa parangué gajnunie iji ore aseradéjnai ajidedie ejode, ga chisa ¡saque!

⁵¹ Enga Salomón chudute cucha dacadode udore to, uje ore chojninga: –Adójnanga to uje Adonı́as todópisa eduguéjna cuchábi Salomón yui to, jecute chijnare raja ore aseradéjnai ga chisa parangué gajnunie iji ajidedie ejode ome dasadodéringadatéi. Ga Adonı́as uté chojninga: "Ango eduguéjna cuchábi Salomón uté jeta chisı́ome daru iyiejnane ome yu bajaque jeta jé ca chuque iroi tuyu ome queségodotı́que jne."–

⁵² Mu Salomón chojninga: –Ujetiga susı́pise dadode guio ome yu enga a jé ca cucha dacatique chósi tiji jne. Mu ujetiga adode gajnaréngome yu ga a jé cachodi tu to enga a chuque to jne.–

⁵³ Enga jé u uje eduguéjna cuchábi Salomón chutṍri darógode ore, ga ore doi ga ore chejñu Adonı́as isagode iji gaseradéjnai uté. Ga Adonı́as jno ga tibágui eduguéjna cuchábi Salomón uté, enga chichaga dagataidie aja jnumi iji uté iquei. Ga Salomón catecã́ri ga chojninga: –Ayague bu, ga bo ga acáji baguı́jnai to.–