1 Pédro 5 - Dupade Uruode

Pédro cho Dupade anguresórone quique

¹ E yuruode gajnengórone u Dupade anguresórone angaránone anciáno iji uaquedáyode. Enga a yo ore quique jne. Uje Dupade anguresórone ore angarate anciáno yu to enga yimópise Crísto to ome yedodie uje chejnáreque re nanique. Enga ujetiga Jesucrísto diapo jne rĩ ome dáringai cuchape enga a jé Dupade anguresórone angaránone uyoque yocajneque uté ingoningájnai to.

² Jecute yo uacaquique ujetiga oyo áyasadie irodisṍri uje chañurupúsu dachidedie áyasai guio. Uje uacajnei tu ujetiga añuchopúsu uacojode Dupade anguresóño guio to. Uje Dupade ichajapite uágaja ujetiga arocho ore. Enga Dupade que pota ujetiga deroco iroquéode ome uaque, mu pota jeta ejnáño uacaguesi ome uacasagode cucha. Enga que Dupade pota jetiga beyoi iroquéode gu ore gueranéringui plátai ome uaque.

³ Mu que quigode u go ujetiga oyo uacajosipié ome uacarodigode udore, mu ajuso uacadode guio ujetiga ore chirate uacate omone. Uje uacajnúone u áyasadie irodisṍri uje susípise darodedie áyasai guio.

⁴ Mu Yoquirodisõre gatérique cuse to uje sué yoquibai. Ujetiga uté diapo iji yoque rĩ enga a tẽrája uaque jne. Enga gueranone cucha ome uaque a ca beta jne, mu ijõre iji deréjnane jnese.

⁵ Jé adi u ome jnacarode uaque to, beyoi enga angáchoi uacangaránone anciáno to. Uje omi tu ujetiga pajnotaque yógome ñane enga yangacopísi ñane uje: Dupade chetaque dicotárechoquíode enga que chátaja ore go. Mu Dupade chejna dacaniratiguéode aja ayoré pajnotágode ore enga chatapísaja ore.

⁶ Enga oyo parácho iji Dupade iquei enga ca oyo ayoredatei iji uaque. Uacagúsoi Dupa Pujnuéngaisṍri jmainie údi gu. Mu ujetiga adotáyo uágaja enga a chise diri jne ujetiga Dupade chiringare uágaja gaté.

⁷ Asíñome uacáyuguhebátigade ome Dupade jnese. Chamáñaje Dupade áyipie que jnoji uaque go ome dosongaquéode.

⁸ Ajusópise uacáyipiedie guio, enga beyoi enga ãrijínaño uaquejode. Uacamóño uje uacamajósõri Satanás diguiji erámi gu. Enga ucuegode u Dupade anguresórone uyoque iji erámi ujetiga sué yoquibai. Enga gajnui tu caraté quedéjnarique uje chijna dajéode aja guesi aja dajesúode. Enga ucuei tu gosi ujetiga chajnangarase aja dejode enga chejna.

⁹ Adotáyo uágaja ome Satanás aringaquéode, enga adotáyo uacanguretigade iji Dupade. Uacamóño gu uje uacajorane Dupade anguresóño iji erámi údode ore cho uaque enga ore chejnáreque raque to ome dajnéone pequetingaquéo.

¹⁰ Mu uacarajáyo uje a garósi díningo jne ome uacajnetígo pequetingaquéo. Mu ujetiga eso uacajnéone pequetingaquéo udore uéchai enga jé u jne ujetiga Dupade pésu uaque enga etoque uáguiji adode, enga a eso uacáringane ujñapetaque to. Enga a jogadi tu to ujeta arajáyo uaque ome Dupade. Dupade uté jé u to uje chisi ome dacaniratiguédatéode ome yoque to. Uje jé ibididique yoque nanique uje pota yógome Jesucrísto ujetiga yocajneque uté ingoningájna eyúgojmai to.

¹¹ Yirajágo uje uté ujopié que eruojmárique erãpe cus. Enga jé cho ingoningájnai. Jecute yicoi enga yicotágopise. Amén.

Pédro urusarane eruei u udé

¹² Yocujoi Dupade anguresõre ũrei u Silváno ome yajéode, enga a uté u jne ujetiga jno yurusãraque catadéode udojo údi aja uaque. Uje yurúsarome uaque gu ujetiga yo uacaquique. Yigaidi tupo rĩ ujetiga arajáyo uje jé ũrepise Dupade ijnoraquédatéi ome uaque gu icaniratiguéode ome uaque. Yajéode u ujetiga ca acadíchoi udojo quigode, enga adotáyo uáguiji yacajnaquéode udojo jnese.

¹³ Dupade anguresórone iji Babilónia ore ajéode u ujetiga yurúsãre ore irasitigade to. Uacamóño uje Dupade ajegaite uaque enga ajegaite ore to rĩ. Jé cho yijõrai Márcos to uje yurúsãre uté irasitigade ome uaque to rĩ. Uacamóño uje yo yabi iji Márcos uté to.

¹⁴ Jecucha asayo ñane jmanáyone uje imoi tu uje uacajnóraño ñane. Yajéode u ujetiga pajesereringane jogadípise uacajéode jnese, uje uacajnesṍri u Jesucrísto. Amén.