1 Pédro 4 - Dupade Uruode

Jé tiógara ujetiga yocangúroméone u Dupade gueranone cucha ome yoque ome yocujode Dupade anguresóño

¹ Uacarajáyo uje Crísto chejnáreque re nanique ome uaque. Enga e uacajnei tu ujetiga dimane uaque to ujetiga ejnárecho uaque to ome uté adode. Uté gosi uje chejnáreque re ome Crísto adode pijoque uje e cha date bajaque gajnaréngone.

² Enga e chejna raja dacuecaringué ichai adode. Enga áyipiedie u ujetiga pésu Dupade áyipiedie jé aja datoringai. Enga e que áyipieraque dépoji dapotigué ayoréode rĩ.

³ E gome uacapesudode cucha gajnarécho. Uacarajáyo gu uje Dupade uruode otigayasórone ore ucuegode u cuchade udore. Uje cáma arajáyo Dupade nanique enga uacajegaidode u cuchade udore ica. Que uacáyipiedie jnoji uacapotigué gajnaréngone. Enga yote pioi chujé uaque gatuaque. Enga uacapéso uacasorã bisidégode ome uacajódode. Enga uacacatecãchoi uacacatecãrainone ayoré gajnúo gatuaque rĩ uje Dupade chetaque cuchade udore.

⁴ Uacajorane udore ore chirajaque uacadode uje que ajínañopo ore aja quedéjnane rĩ uje ore chamáta ñane ome dajegaidode cucha. Enga ore uruode gajnarécho aja uaque uje que átayopo uágaja ore rĩ ome ore ipesudode cucha gajnarécho.

⁵ Mu a chise dínique jne ujetiga uacajorane udore a ore chatata dadode ome Dupade jnese. Uje Dupade e dimane ujetiga chajire ayoré togode, ayoré uecade ore adode aja quigode jnese.

⁶ Uje Dupade ujuyaquei pitoringa chise Noé urasade ore jnese nanique, adi tu uje chise erámi unirisórone uyoque jnese to. Mu pacadique togode udore ome Dupade áyipie omenie to nanique ujetiga diga ore chise dáringane piquetaque to enga ecápo ore áyipiedie rĩ enga ore cho Dupade to uje eca iji deréjnane jnese.

⁷ Uacarajáyo uje e idógosi deréjnane eruei. Jecute beyoi enga añuchopúsu uacáyipiedie guio enga ejnáño uágaja uacacatecãraitigade ome Dupade iji dirode udojo.

⁸ Dupade ipotigádode jiei ome uaque mu cuchiyi tupúsu ujetiga uacajnoraquei querújna ome ñane. Uacamóño gu uje gosi chijnóra dajõrai enga áyipieraque que déji dajõrai tuté iyoguérique.

⁹ Ca achóyo díode ujetiga ore chise uaque iji uacaguíjnane. Mu ca ajusécho ore.

¹⁰ Omi tu ujetiga Dupade anguresórone chojmara, chojmarane tagu ome Dupade guerani pirajatíga ome dejominónique ayoré. Enga yocajnui u ayorérique uje chirajapise dasocáringome daríjogonórone cucha enga ujode ayoréo ore chagutíñame ipesudode. Enga uásejna Dupade gueranone pirajatíga ome yoque enga ore cãra rome ñane.

¹¹ Ujetiga ayorérique chacate ore enga omi tu ujetiga chedu Dupade uruode iji dajei. Jeoga chisa dasaque uñéngo ome Dupade enga chejna raja ome Dupade guerani etotigué. Acueyoi uacasocáringome uacapesudode cucha udore jnese ujetiga pijoque uacanguretigai iji Jesucrísto. Enga diga ore chacãre Dupade gai ome bapesudode udore. Yocajéode u gu ujetiga picotaque Dupade iji deréjnane jnese ome ujopiédaté. Amén.

Íjnoque pajegátigai ome gosi ujetiga cho daba dáringai Dupade anguresõre

¹² Yijorane uaque á, ujetiga pequetingaqué uajátique chise uaque, jeoga pequetingaqué quedéjnarique u, mu ca óraño uágome.

¹³ Jé basa ga anínaño uaque. Uacarajáyo gu uje piotiguei e u ujetiga oyo uacaba Crísto. Adi jé u Crísto uje chejnáreque re nanique ome uaque to. Enga pirasitigai a irágu uacajéode jne ujetiga amóño Crísto úringai cuchape jne ujetiga e di.

¹⁴ Ujetiga ore uruode gajnarécho aja uaque gu Crísto adode, mu anínaño uágome ore uruode. Uacarajáyo gu uje Dupade Ujopié cuchabé déji uacabáyode. Ore uruode gajnarécho aja Dupade, mu uhuaque u uje uacasíyo Dupade gai.

¹⁵ Ajuso uacadode guio ujetiga ca pujuya uaque gosi ome uacuñeque ate gajnarétique. Yojningane u ujetiga gosi ca chujé dojórique ayoré, jeoga toria cucha unejátique, jeoga chijnime dojórique ayoré atígo, jeoga chó deduguéjnane áyipiedie gánique.

¹⁶ Mu ujetiga uacuñeque cho daba Crísto adode, enga jé ca pajegátigai chise gosi. Mu gosi doi enga chicota Dupade uje bade u anguretigai ome Crísto.

¹⁷ E chise diri ujetiga Dupade chajire dajogasui uyoque yoquipesudode aja quigode. Ujetiga jec ũré enga bajaque Dupade jogasui uyoque ome ajirigode, ¿ja ca gajnarénguipísiráse ome ejode udore ujetiga chajire ore adode aja quigode? Chamáñaje que ore tangaripísi Pujnomé Ueradi quigode uje garani tu Dupade gu.

¹⁸ Ga jé cho Dupade Uruode uje chósi te: Cucha uajadipise ujetiga piquetaque ayoré ate omone ore, jecute isocai jé u uje a ca pisocárique cuse jne ome jnani sijnángone ujetiga piquetaque ore. Uje ore chetaque Dupade uruode gu.

¹⁹ Ujetiga Dupade ajéo ome báringai pequetingarãque, enga bejnáreque ua iji jmainie, mu jé bo bapesute arégode údi. Mu ajíñome ua iji Dupade jmainie. Chamáñaje bapesungóri u Dupade enga a uté susípise beo jne. Uje jé urúo, enga que Dupade uruode toja go.