1 Pédro 3 - Dupade Uruode

Dupade pota ujetiga abechuguedie, acotẽrachugode ore suse ñane guio

¹ Jecute abechuguedie uaque, apéso uacabayode ajegaidode cucha ome uaque to. Ujetiga babai cáma changureta Dupade to mu socaseti chise diri ujetiga changureta to ome bate arégode ome. Ujetiga babai chetaque baruode ome Dupade, jé dóji ga eduyo uacate arégode.

² Ujetiga babai chimo uje bajuse badode guio enga bangaripísi, jogadi a u jne ujetiga changureta Dupade to.

³ Omi tu ujetiga chequedíe ca ore chucué dáringáringui chequé ueradéjnai. Ujeta ca ore chariguétapise dabáyode. Ujetiga ca ore chejna dáyipiedie aja daguidé ueradéjnanie, dajnápeode ore.

⁴ E mu ore doi ga ore chañuru dáyipiedie quigode guio ome raque. Baraja uje babai guesíminóri ueratigai a bijna jne ome ua. Mu báyipie úringanie ueradei a ca bijna jne. Yojningai u báringa parague iji bayaridode. Dupade que timíninga yoque gu ome yocúringanie ueradei, mu cucha orerãi tu ome Dupade ujetiga uerate goto áyipiedie quigode.

⁵ Uacamóño uje chequé bajedie uje ore chijnóra Dupade nanique, ore chañuru dáyipiedie guio. Ore changuretapise Dupade, enga ore tangaripísi dabayode nanique.

⁶ Adi jé u ome chequé bajé Sára. Uje tangaripísi dabai Abraham nanique enga chĩ́care dangarádejnai aja dabai. Chequé disi ejodie uaque á, diga a oyo uaté to jne ujetiga apéso cucha arégode to ome uacabayode, enga anguretáyopise Dupade ujetiga ca pisadodéringárique sué uacabáyode.

⁷ Acotẽrachugode uaque á, angáchoi to uacacotedie ujetiga arajáyo ore áyipiedie to. Ujetiga bacoté adode ueracho ga jé tiógara ujetiga asi gai. Baraja uje bacoté etotiguei que cho jnani etotiguei, jecute ajusípise bacoté guio. Que gusu udore go, mu ajuse guio to uje bojo Dupade angureto gu. Uje Dupade chosõre to enga e chisi ome pucuecaringué ichai ome uaté to. Apéso yacajnaquéode udore quigode ujetiga ca cuchárique suru Dupade yui ome uacacatecãraitigade ome.

Ujetiga yoco yoquiba yoquipesudode cucha ueracho, pininaquéode a jé jogate yoque jne

⁸ Yacajnaqué erueminórone ome cuchade udore u ujetiga ajnóraño ñane iji dirode jnese, enga osṍcho ñane iji udore, udore. Cho jetiga uacajõrapise ñane. Omi tu ujetiga uacajnoraquéode ome ñane tocade ome ñane enga paraque uaque ome ñane iji udore to.

⁹ Ujetiga uñeque adode gajnarécho aja ua mu ca arate uté ate gajnarei ome. Ujetiga uruode gajnarécho aja ua mu ca barúrique gajnareque aja to. Mu acué basoca omone ome uté gosi. Uje Dupade tibidi uágaja re gu ujetiga chacacãre uaque ome cucha omone. Adójnacho Dupade uruode udojo uje chósi te:

¹⁰ Ujetiga bajegaidode u pininaquéode ome ua enga: Ajuse babijnani guio ujetiga puru gajnaréngone, purupatáringane ca tṍraji.

¹¹ Enga aya bate gajnaréngone. Enga apésu cucha ueradode. Acué basoca omone ome bojode ayoréo ujetiga pajesereringane déji uágome ñane. Enga ejna ua aja basocade udore.

¹² Uje Dupade chañuru ayoré ate arégode ore guio enga tangári ore icatecãraitigade. Mu chetaque pate gajnaréngone ipesungórone ore enga que tangári ore to.

¹³ Ujetiga eduyo uacasoca arégode ome ñane, ¿ma togome uñeque ujetiga pésu cucha gajnarétique ome uaque a?

¹⁴ Mu ujetiga oyo uacaba uacapesudode cucha ueracho, pininaquéode a jé jogate uaque. Jé ca atodóyo uacojórique ayoré, enga ca óraño uágome cuchárique.

¹⁵ Mu eduyo Crísto iji uacáyipiedie enga oyo uacangarádejnai iji. Ujetiga uñeque catecã́ri uaque ome uacanguretigai iji Jesucrísto enga jĩraque achajnai enga atata uacanguretigai quigode ome. Mu angári uté gosi to, enga pajnotaque uacaruode ome.

¹⁶ Enga ajusópise uacadode guio ujetiga ca uacáyipiedie cho jora ome uacapesutique cucha gajnarétique. Ujetiga uñeque urúrigo gajnarécho aja ua uje bagaidode u bangaráni Crísto adode, mu jé bo bate arégode udore údi. Diga a chajéngome daru gajnaréngone udore ome ua jne.

¹⁷ Que cuchárique tṍraji go ujetiga yoco yoquiba yocate gajnaréngone. Jé basa ga ujetiga Dupade ajéo enga yoco yoquiba yocate arégode, enga cucha arei u uté.

¹⁸ Uacamóño uje Crísto toi ome yoquisijnaringuéone ga chojmarápise enga e gusu. Mu que tiógara dáringai pujuya nanique uje ate areque gu, mu cho daba sijnángone uyoque enga toi ome yoquisijnaringuéone. Gaidi tu gu ujetiga chinoningase yoque enga chijna yógaja Dupade jogadi. Yirajágo to uje Jesús aoi u uje toi nanique, mu Ujopié u uje chiringare aja gaté.

¹⁹ Enga Ujopié Espíritu Sánto nóna uje chicáji jnani bajade ore uje ore toi nanique enga pujuyagaite ore iji jnaropié. Enga chacate ore iji.

²⁰ Ore u uje que ore tangári Dupade nanique, Noé urasade ore, uje Noé qué pésu cucoi nanique. Mu Dupade chidota re aja ome ore jé aja deréjnai uje Noé chimate cucoi. Mu gusu iquetade gadioque ore iji ti yijmanuñai uje yodi chijna ore pi cuco aja gaté.

²¹ Yodi tuté gajnui tu bautísmo uje ore chaca yoquedodie iji yodi enga yipijójome yocúringane piquetacho ome Jesucrísto. Que ore chaca yoquedodie iji yodi gotique ome bautísmo ujetiga ore churu yoquibáyode, mu yoquibautísmo qui tu uje e yanguretágo Dupade enga yocáyipiedie e que pésu yoquejóporinguéone ome yoquipesudode cucha gajnarécho. Uje Jesús niji datoringai nanique, ga obiréjna uje Dupade chimesẽre uté adode ome yoque.

²² Enga yirajágo uje Yoquiquetangóri Jesucrísto uté jnome gaté nanique enga e cháji Dupade ãrachua. Enga e sué gaté unirisórone ore gáyode jnese, jé aja dacasutedie, pujopiedie ore jnese rĩ.