1 Pédro 2 - Dupade Uruode

¹ Jecute ayáyo to cucha gajnaréngone jnese: paringaquéode, purupatáringane ore. Enga ca aratáyiñome cuchade ome uacojode ayoréo. Enga ayáyo to uje ajnicho uñane adode.

² Oyósi disi parátagabi uje quene basosi enga chucuepísi leche. Beyoi enga acueyoi Dupade uru uréone to ujetiga uneréjna to ome uaque, ujetiga aquéraño to iji uacacuecaringué ichai.

³ Chamáñaje e uacarajáyo Yocangarádejnai uje ũrepise enga caniranguipise.

Yocangarádejnai gajnua tu cucarané uje ueca

⁴ Átayo uágaja Yocangarádejnai Jesucrísto. Uje Yocangarádejnai gajnua tu cucarané uje ueca. Mu jnanione ore chetaque enga ore tṍra. Jé basa Dupade chisa dajegaidé cucarané uaté. Chiraja gu úringa orerẽ́.

⁵ Enga uacajnunie u cucaranenie to uje uecai cucaranenie udire. Jecute ca etácho ujetiga Dupade angúroméone u uaque ome dapesudi daguíjna uecai to. Uacamóño uje Dupade irógode cuse to nanique ome daguíjna bajai uje ore tẽrája Dupade ome cuchisode. Mu Dupade irógode e u danguresórone uyoque uje yedugo adode. Enga pota jeta yẽcója cuchade ome to, mu ucuegode u yoquipesudode cucha ujñapetácho uje yanguretágo Jesucrísto. Udore u uje Dupade chimesẽre iji yoque.

⁶ Ore urusarane Dupade urúo jé cho udore uje chojninga: A yiji yajegaidé cucarané orerẽ́ jne, Enga a yicháji ore idai Sión ujetiga ore pésu yiguíjnai aja gaté iji uaté gai. Ujetiga gosi changureta yajegaidi tuté enga a ca cucha bisideque anguretigai. Uje a uté uruode tocade jne ome gosi.

⁷ Uacanguretáyo Jesucrísto uje gajnua u cucarané ueca, uje uacarajáyo gu úringai orerãque. Mu udore ore uje que ore changureta Jesucrísto, ore gajnui u jnanione uje ore tṍra cucarané orerẽ́ nanique. Uje Dupade uruode ojningai u ore uje chojninga: Cucarané cucháberaque uje guiguíjna cuchábi ipesungórone ore guetegue A nóña enga cucarané pedójnare jne.

⁸ Dupade ojningai jé upo ore rĩ uje chojninga: Cucarané uaté pésu enga gosi cṍra. Udore ore uje que ore tangári yocatatagode ome Jesucrísto, gajnui tu ujetiga ore cṍra enga ca ore nijiápo rĩ. Uje Dupade jé áyipiedie u udire ome detesórone gu.

Dupade pijnangaite yoque nanique

⁹ Jé basa ga Dupade ajegaite uáguiji punire quedéjnane. Enga uacoyo pangaránone uje ore catecã́ri Dupade ome darasade nanique, enga ore dopoi deduguéjna cuchábi iroquéode rĩ. Uacoyópo puniri unirisórone ore rĩ uje ueque ore ome pisijnaringuéone uje Dupade gajneque ore iji ore uniri gu. Jecute Dupade pijnangaite uaque nanique, enga chijnime uaque iji ijnangununie ajéode ujetiga acáyoja idírecaringué cuchábi. Gaidi u gu ujetiga uaque u ujetiga atatayo ipesudode cucha pitijabácho ome ore.

¹⁰ Dupade cáma urása uaque nanique, mu chise diri uje cho darása iji uaque. Que cuchárique déji nanique ujetiga chosõre uaque, mu chise diri uje Dupade chosõre uaque.

Dupade ajéode u ome yoque ujetiga yedugo yocate omone

¹¹ Yijorane uaque á, uacoyo purása quedéjnane uje que ore uniri u erámi udé, mu ore uniri u gatajnoquei. Jecute yijócha uacajéode údi ujetiga ca angáchoi uacapotigué ayoréode. Uje udore gajnúone u jõcaratade gu uje doi uaque enga pota sué uacabáyode.

¹² Beyoi ga añuchopúsu uacadode guio iji uacojode ayoréo ore ujade. Uacamóño uje cáma ore changureta Dupade to. Ujetiga ore chaguhéta cucha gajnarétique uacabáyode, enga ore uruode gajnarécho ome uaque, mu jé boyo uacate arégode údi. Enga a ore chimo uacate arégode enga jogadi tu ujetiga ore chicota Dupade to ujetiga diga Dupade di enga chajire ore adode aja quigode.

^13-14 Yocangarádejnai ajéode u ujetiga yangacopísi yoqueduguéjna cuchábi iji yocuniri, jé aja uté iróquegatéode ore rĩ. Uje uté ichajapite ore aja ore jogadode gu ujetiga ore cho dajuñame ate gajnaréngone ore, enga ujetiga ore chañuru ore guio to uje ore ipesudode arécho enga ore chisi ore gáyode.

¹⁵ Dupade ajéode u ome danguresórone uhuaque ujetiga apéso cucha ujñapetágode gatuaque. Uje uacagaidi u gu ujetiga ca áyipie eyúgode chiraja daru quitíguiji uaque. Yojningane u udore uje que ore chiraja cuchárique, mu jecucha ga ore dojnóngaja Dupade adode.

¹⁶ Ajusópiso uacadode guio iji uacacuecaringuei jnese. Enga oyo ayoré piraméone, uje Dupade chirame uágome erámi tudé gu. Mu que chirame uaque gu ujetiga apéso cucha gajnaréngone. Jecute beyoi ga oyo Dupade isaguíji uaque to enga eduyo uté ojningane cucha gatuaque.

¹⁷ Enga angáchoi uacojode ayoréo ore jnese. Ajnóraño to uacojode Dupade anguresóño. Angachopísi Dupade enga angáchoi eduguéjna cuchábi to iji uacaniri.

Crísto chejnáreque re nanique ome yoque

¹⁸ Ayoré pisagode uaque á, beyoi enga angachopísi uacasasórone. Que gusu ujetiga angáchoi uacasasórone uje uerate ore adode ome uaque, mu angáchoi uacasasõre ducusuréchoquíode ore to rĩ.

¹⁹ Ujetiga gosi que tiógara dáringai pujuya marínga, chidota re iji jmainie enga cucha ueradi tu uté gosi ipesudode. Chiraja uje Dupade ajegaidi u gu jecute chidota re iji cuchade udore jmainie.

²⁰ Mu ujetiga uacuñeque pésu cucha gajnarétique enga ore cho dajuñame, ujetiga uté chidota re ome dajnei pujuyaqué, mu que cuchárique tṍraji gotique. Uje jé tiógarapísa dajnei pujuyaqué gu. Jé basa ga gosi ipesudode u cucha arégode, mu ore cho dajuñame enga uté chidota rome dajnei pujuyaqué enga Dupade a chicota uté gosi jne.

²¹ Uje Dupade áyipiedie u udire ome uaque ujetiga acãcho uágaja Crísto. Uacamóño uje Crísto chejnáreque re nanique ome uaque, ga jé uacajnei tu ujetiga oyo uacaba Crísto to.

²² Crísto que pésu pisijnaringuérique nanique go. Enga que paringaquérique dépoji ome uñeque rĩ.

²³ Uje ore uruode gajnarécho ome Crísto nanique mu que urúrique gajnareque aja ore to go. Uje ore socárome nanique, mu que jmongarája ore to. Mu chingo ore ome Dupade ujetiga jé doi dasocáringome ore. Uje chiraja gu uje áyipierãque Dupade uje chajire cucha dacadode aja quigode.

²⁴ Uacarajáyo uje Crísto oite yoquisijnaringuéone iji dabai ayoré nanique aja curesei enga toi ome yoque. Enga uje yanguretágo Crísto gajnui tu ujetiga e yitogoi to, enga yijíñongome yocate bajade, yoquisijnaringuéone ore. Enga yiquecágopo rĩ ga e yicoi yocucuecaringué ichai isoca ujñapetade. Ore chichagu Crísto nanique enga jé u uje uaqueso uacáringane ayoré ijóño iji quigade.

²⁵ Uacajnunie u áyasadie uje ore chimere riji erámi. Mu uje uacanguretáyo Crísto enga uacacáputayopísiji uacarodisṍri Crísto. Enga Crísto e u uje chirote uaque enga suse uacáyipiedie guio. Adi u áyasadie irodisṍri isocai ome dachidedie áyasai uje que chuseque ore.