1 Pédro 1 - Dupade Uruode

¹ Pédro uyu enga Jesucrísto iroguipísode apóstol uñai tu yu, jecute yigaidode u uté iroquéode. Yurúsãre yurusarane cárta udé ome uaque uje uacasícho uágaja erámi ica iji uacaniri. Enga e uacagúsoi pachamite quedéjnane uje ore íode u Pónto, Galácia, Capadócia, Ásia, Bitínia ore.

² Yocai Dupade ajegaite uaque nanique iji taningane. Uje áyipiedie u nanique ujetiga gajneque uaque gu. Jecute Dupade Ujopié Espíritu Sánto chacája uaque to enga e uacajnengóri tu Dupade ujetiga angáchoi to. Enga Jesucrísto e churu uacasijnaringuéone ome dayoi. Jecute yajéode u ujetiga Dupade icaniratiguéode, guerani pajesereringa irágu uacajéode to.

Yirajagopise uje a yocajneque yucuecaringué eyúgojmai jne

³ Beyoi ga yicotágo Yocangarádejnai Jesucrísto dayé Dupade ome osõraquédatéi ome yoque. Uje Dupade pésu ga chiringare Jesucrísto iji itoringai nanique enga pésu ga yocúringane ayoré icha isocade jé u to. Jecute yirajágo uje tate Dupade osõraquédatéi ome yoque, enga yocanguretigai u yoquitijínaquéode uje yiroco Dupade ojningane cucha yúode.

⁴ Enga a uacajneque Dupade gueranone cucha uje chirote uaquei ome iji gatajnoquei. Enga a ca cuchárique chósi ti iji uacajnéone cucha udore. Que toc jeta cucha iguínique chisa mu icha gatuaque. Que cho cucha pojnánguenie to go uje jĩraque beta. Mu e dimane iji uacaquei.

⁵ Chamáñaje uacanguretigai déji ome Dupade. Jecute chirote uaque ome dajopié etotiguei ujeta eso uacáringane piquetaque to iji deréjnane udojo eruénique.

⁶ Jecute uacanínaño uágome cuchade udore. Mu deréjnane a déji ome uaque, ujetiga pequetingaqué uásejnane chise uaque. Mu adotáyo uágome udore uje a garósi díningo jne.

⁷ Uacanguretigai gajnui u óro. Yirajágo uje ore chãrei óro enga ore chijnime pasigode iji ujade. Quigade ga ore chijnime óro iji uje ore chiraja uje óro ueque gu ga que cuchárique chimesa go. Yocanguretigai isocai u óro. Uje pequetingaquéode chise yoque to, enga pijoque yocanguretigai úringai ũréo iji udore jmainie to. Mu yocanguretigai oredie jiei, ga oredie sué óro oredie gai. Chamáñaje que eyúgojma óro go. Ujetiga uaque gosi anguretigai pijoque enga Jesucrísto a irasique uaque jne ujetiga diapo rĩ. Enga a chicota uaque jne enga a uacajneque uté ingoningájnai to jne.

⁸ Yirajágo uje uacajnóraño Jesucrísto uje que amóño ome uaquedodie. Que amóño marínga, jé uacanguretáyo. Jecute uacarasiguipise uaque. Enga que uacarúrigo cus ome uacaninaquei uté uje uacarasiguipise uaque gu.

⁹ Uacarajáyo gu uje a eso uacáringane piquetaque jne ome uacanguretigai.

¹⁰ Yirajágo uje Dupade uruode atatasórone, jnani bajade, jecucha ore chajire Dupade uruode enga que ore áyipieraque jnoji Dupade áyipie omenie ome erámi unirisórone ujetiga chiqueta ore. Enga ore chatata Dupade osongaquédatéi quigode uje a tocade jne ome disi ejode uyoque.

¹¹ Yirajágo uje Crísto Ujopié Espíritu Sánto chingome cucha piqueminórone ome Dupade uruode atatasórone, jnani bajade, nanique. Uje Crísto a chejnáreque re jne ome yoquisijnaringuéone. Mu quigade enga chise dáringai eduguéjna cuchape. Enga jnani bajade ore ajegaidi u nanique ujetiga ore chiraja gosi Crísto. Ore pota jeta ore chiraja diri to ujetiga daríjogoto Crísto Ujopié ojningane cucha chise ore.

¹² Mu Dupade chingome daruode atatasórone ore uje que ore gajneque datatagode ujetiga tocade ome ore, e mu disi ejode uyoque yocajnecho ore atatagode. Enga Dupade e chiroque Dajopié Espíritu Sánto aja erámi udé. Enga Dupade Ujopié Espíritu Sánto uaté u uje déji uacacadisórone ajéode to uje ore chatata Jesucrísto adode ome uaque nanique ujetiga eso uacáringane piquetaque to. Enga Dupade utocaidode gaté unirísoño, ore tija Dupade adode udore ome yoque, enga que ore áyipieraque jnoji gotique.

Dupade pota ujetiga yoco uté enga ueque yógome pisijnaringuéone

¹³ Jecute áyipierãque uaque, enga uacáyipiedie jogadipísiji ujetiga añucho uacadode guio. Enga anguretáyopise Dupade uje chichaga dẽrapáidode cucha aja uaque, uje jé ũrepise enga a chisi ome udore ome uaque jne jeta Jesucrísto diapo jne rĩ. Chamáñaje chosõripise uaque gu.

¹⁴ Oyo disi uje angoninguite guesaque enga tangaripísi dayé. Enga ca beyoi uacate baja casodica uje gajnarécho ica uje cáma anguretáyo Dupade to.

¹⁵ Jé basa ga ejnáñopise uágaja Dupade adode. Uacamóño gu uje uacabidisṍri Dupade ueque ome pisijnaringuéone. Enga ueradi tu ujetiga íjnoque pisijnaringuéone iji uaque to.

¹⁶ Uje ore urusarane Dupade urúo déji uje chojninga: "Beyoi ga oyo yu uje ueque yu ome pisijnaringuéone."

¹⁷ Ujetiga yojnicome Dupade: "Yapa Dupade á," ga yicoi enga yipéco uté ojningane cucha ome yoque. Uje Dupade a u jne ujetiga chajire ayoré chojmarai adode aja quigode, enga a ca chapuse yógaja. Jecute yicoi enga yangácoi Dupade jé aja deréjnane udojo uje yugúcoi erámi udé.

¹⁸ Uacarajáyo uje que cuchárique tṍraji uacayode jnani bajácho ore adode nanique. Enga jé uacadode u ore adode to nanique. Mu Dupade ijnimique uáguiji uacasoca bisidégode udore enga chiqueta uaque. Enga uacarajáyopise to uje que pigaidé yocúringane piquetaque ome pláta, óro ore uje cuchade udore jĩraque íjnoque.

¹⁹ Mu Jesucrísto gaite oré uacáringane piquetaque uje chojne ome dayoi ome yoque. Enga Dupade cho cucha orerã́quedatéi iji Jesucrísto iyoi. Enga Jesucrísto gajnua tu áyasa uje ueradéjna enga que iyoguérique cuse, uje jnani bajade ore tẽrája Dupade nanique ome ore isijnaringuéone.

²⁰ Dupade áyipiedie jé jogate nanique ome Jesucrísto ujetiga toi ome yoque uje cáma pipesute erámi. Mu quene Dupade áyipiedie udire tocade iji deréjnane udojo ome Jesucrísto. Enga e yocagutíyamáni u.

²¹ Dupade u uje chiringare Crísto iji itoringai nanique enga chatire úringai eduguéjna cuchape gai. Jecute uje uacanguretáyo Crísto enga jogadi u uté to uje uacachayo uacanguretigai aja Dupade to ome ojningane cucha yúode.

²² E icha uacáyipiedie. Chamáñaje uacanguretáyo Dupade uru uréone gu Dupade Ujopié Espíritu Sánto uje chijocase uacáyipiedie. Jecute pijnoraqué ũrei déji uaque ome uacojode Dupade anguresóño. Enga uacajnei e u ujetiga ajnórañopise ñane enga ejnáñopise uágaja uacajnoraquéode udore ome ñane.

²³ Dupade chinoningase uaque enga uacacuecaringué ichai e cuse uje que eruénique cus. Uje garani u Dupade uruode gu uje que íjnoque go. Enga uacacuecaringué ichai tuté que cunguésõri uacacuecaringué casica uje garani u uacatedie, uacayode ore. Uje ore toi ica, ga ore topísi.

²⁴ Ore urusarane Dupade urúo déji to ga chósi te: Ayoréode uyoque jnese yocajnúone u jnacarade. Jé basa yocajnéone picotaquéo gajnunie u jnacaraque asíguedie. Mu jnacarade itabidode jĩraque toi. Jé cho jnacaraque asíguedie uje jĩraque beta.

²⁵ Mu Dupade uruode déji iji deréjnane jnese. Enga que eruénique erãpe cuse. Enga e pacadique uágome Dupade uruode udore to nanique ujetiga eso uacáringane piquetaque to.