1 Juan 5 - Dupade Uruode

Dupade anguresórone ore anguretigade sué erámone adode gáyode jnese

¹ Ore jnese uje que ore chotigase Jesús úringai Crísto, uje Dupade utocaidi u uté, enga Dupade abode u udore ore. Jecucha ate to uje gosi chijnóra jnanírique, enga chijnorapo jnani tuté abode to rĩ.

² Jecute ujetiga yijnórango Dupade enga yipéco ojningane cucha enga a yijnórangopo uté abode to rĩ.

³ Jecute gosi a chijnóra Dupade enga gajnui u ujetiga pésu iroquéode. Enga Dupade iroquéode que piraque ome gosi.

⁴ Que piraque gu uje Dupade pésu dabode uyoque gu enga pujnuéngaisṍre yoque ome erámone jogonórone cucha. Enga yirajágo uje yocanguretigai iji Dupade u uje pésu enga yujnuéngo erámone adode gáyode.

⁵ Gusu erámone jnuéngaisṍre uté gosi ujetiga changureta Jesús úringai Dupade ape.

Dupade Abi pijogúsorone cucha cuse

⁶ Yirajágo uje Jesucrísto chise erámone unojo nanique enga pijoque úringai Dupade ape nanique ome cucha gáreode. Uñai u yodi uje ore tṍraja yodi nanique. Mu que gusu yodi go, mu iyoi upo rĩ uje toji curesei enga chojne ome dayoi nanique. Enga Dupade Ujopié Espíritu Sánto chatata unojo úringane ũréo to. Enga yirajágo uje ũrepise Dupade Ujopié ome ojningane cucha jnese.

⁷ Unojo pijogúsorone cucha gadioque iji gatajnoquei to. Yocai Dupade jé u uñai. Jé Dupade Uruode u uñane. Ujopié Espíritu Sánto upo to rĩ. Enga unojo ore uruode jé chojmára.

⁸ Pijogúsorone gadiógapo rĩ iji erámone unojo to. Dupade Ujopié Espíritu Sánto u uña. Yodi u uñai uje ore chaca Jesús iji nanique. Jeque iyojna u uña uje Jesucrísto chojne ome iji curesei. Enga jé ore cunguésõri ñane to rĩ.

⁹ A yimeseco jnanione ore ojningane cucha, enga jétapũré Dupade ojningane uje sué jnanione ojningane gai. Jecute ca yotigáco Dupade uté ojningane cucha ome Ujnacari.

¹⁰ Gosi uje changureta Dupade Abi, uté gosi u uje chimesẽre Dupade ojningane cucha ome Ujnacari. Enga que jnoji áyipie. Mu gosi uje que changureta Dupade Abi úringai Dupade ape, uté gosi cho táguiji Dupade. Uje chotigase Dupade ojningane cucha gu ome Abi.

¹¹ Enga Dupade ojningane cucha u uje Dupade chisi ome pucuecaringuei iji deréjnane ome yoque. Enga pucuecaringuei uté jõrai u Ujnacari úringai pangurete.

¹² Jecute gosi uje Dupade Abi déji gari, enga pucuecaringuei iji deréjnane dépoji gari to rĩ. Mu ujetiga ca Dupade Abi déji gosi, enga que gajneque pucuecaringuei to uje déji Dupade Abi.

Juan cho ore quique iji darusarane eruei

¹³ Yurusarane unojo gajnengórone u uaque uje uacanguretáyo Dupade Abi, ujetiga arajáyo to uje Dupade guerani pucuecaringué gajnengórone u uaque iji deréjnane jnese.

¹⁴ Yanguretágo yógome Dupade yui. Yirajágo gu uje a tangári yoque jne ome yocutaidode cucha, ujetiga jé áyipiedie u ome yoque to.

¹⁵ Ujetiga yirajágo uje tangári yoquicatecãraitigade, enga yirajagopise to uje a chisi ome yocutaidode cucha ome yoque to jne rĩ.

¹⁶ Ujetiga yimóngo yoquijõrárique iji isijnaringuérique gánique, yicoi enga yicatecãcoi Dupade ome uté gosi. Enga Dupade a chisi ome pucuecaringuei ome uté jne. Mu yirajágo uje pisijnaringuéone déji uje chiboráta pitoringai. Arei u ujetiga ca picatecãraite Dupade ome udore ore uje ore pésu pisijnaringuéone unojo.

¹⁷ Pate gajnaréngone jnese garani u pisijnaringuéone. Mu yirajágo uje que pate gajnaréngone chiborátaja pitoringai jnese go.

¹⁸ Yirajágo to uje gosi cho dají Dupade enga suse deo ome pisijnaringuéone jnese. Chamáñaje Dupade Abi chirote uté gosi ujetiga Satanás ca chijocase.

¹⁹ Yirajágo uje Dupade gajnenguipise danguresórone uyoque. Jé basa erámone jogosórone ore uéchai jnese déji Satanás gari, enga uté chorei ore iji quedéjnane.

²⁰ Yirajagópo rĩ uje Dupade Abi e di nanique ujetiga chuchẽre yocáyipiedie edodie gáyode ujetiga yirajágo Dupápisi to. Jecute e yátago yógaja Dupápisi Abi uje i tu Jesucrísto enga yicoi uté adode. Uje Dupa ũrepísi tu uté. Enga uté guerani u pucuecaringuei ome yoque ujetiga yiquecágoji deréjnane jnese.

²¹ Jecute yababode uaque á, jé ca acunguésõriñoi dupa unejángone udore ore yúode. Amén.