1 Juan 4 - Dupade Uruode

Juan cho Dupade Ujopié isocade quique. Chopo pujopié gajnarénguenie isocade quique rĩ uje ore chetaque Crísto.

¹ Yijorane uaque á, jé ca angáchoi ore jnese ujeta ore cho Dupade uruode atatasórone iji raque. Mu adójningachopísa ore adode bajaque ujetiga Dupade Ujopié u uje déji ore gari, jeoga pujopié gajnarengue u. Uje uásejna arapatáquechoquíode uje ore déji erámone iji deréjnane unojo. Uje chiese ore garani tu Dupade ujetiga ore chatata uruode ome yoque.

² Mu a arajáyo Dupade Ujopié Espíritu Sánto gajnesórone ore jne: uje ore u gu uje que ore chotigasipise uje Jesucrísto chopise ayoré iji re icaite, enga chise erámone unojo.

³ Jé basa gosi ujetiga chotigase Jesús úringai Dupade irógaja erámone nanique, enga Dupade Ujopié Espíritu Sánto que déji uté gosi. Mu pujopié gajnarengue déji uté gosi enga chetaque Jesucrísto. E uacadúcho to uje pujopié gajnarengue uaté a di iji erámone jne. Mu e déji unojo gajneri.

⁴ Yababode uaque á, uacajnesṍri u Dupade, enga e uacajnuéño táquechoquíode udore ore gáyode ome uacáringane Dupade abío. Uje Dupade guerané Dajopié ome uaque suépise pujopié gajnarénguenie oisórone ore gáyode jnese iji erámone unojo.

⁵ Uje erámone unojo jogosõre udore ore, enga gusu ore ĩcarane u cucha dacadode iji erámone unojo. Jecute ore ujode erámone unirísoño ore tangári ore.

⁶ Mu Dupade urasade u yoque. Enga uté gosi uje chiraja Dupade enga tangári yoque. Mu ujetiga ca Dupade urása gosi enga que tangári yoque to. Jecute quigode u unojo ujetiga yirajágo uje Dupade Ujopié ũrepise déji gosi jeoga pujopié tague u uje déji gosi.

Pijnoraquei u Dupade

⁷ Yijorane uaque á, yocajnei u ujetiga yijnórango ñane uje pijnoraquei ome ñane garani u Dupade. Jecute ujetiga pijnoraquei déji gosi enga obiréjna uje Dupade ape uté gosi enga chirajapise Dupade.

⁸ Que Dupade irajasõre ayorérique ujetiga ca pijnoraquei déji uté ome dojode ayoréo. Uje pijnoraquei jé u Dupade gu.

⁹ Dupade chingo dajnoraquédatéi ome yoque gu Ujnacare ugurui uje chirógaja erámone unojo nanique. Gaidi u gu ujetiga erámi unirisórone uyoque yico pucuecaringué gatei gu uté adode ome yoque.

¹⁰ Que pijnoraquei pijoque gu yoquijnoraquei ome Dupade. Mu pijoque gu Dupade ijnoraquei ome yoque. Uje chingo yoque dajnoraquédatéi uje chiroque dabi aja erámone nanique ujetiga cho yoquisijnaringuéone oré ome datoringai.

¹¹ Yijorane uaque á, ujetiga Dupade ijnoraquei cuchadaté ome yoque, jé tiógararása to ujetiga anguresórone uyoque yijnórango ñane to.

¹² Que ayorérique pañaji Dupade ome dedodie go, mu Dupade pijóguiji yoque ujetiga yijnórango ñane. Enga Dupade ijnoraquédatéi chimate re aja guesi iji yoque ujetiga yijnórango ñane.

¹³ Dupade chisi ome Dajopié Espíritu Sánto ome yoque gu ujetiga ore chiraja jnese uje déji yocari, enga yugúcoji uté gari to.

¹⁴ Enga jé uyoque u uje yimongopise Dupade Abi to nanique. Enga e yingongome ore jnese uje Yocai Dupade iroque uté aja erámone unojo gu ujetiga chiqueta yoque ome adode.

¹⁵ Gosi uje que chotigase Jesús úringai Dupade Ape, uté gosi dépisi Dupade gari, enga Dupade déji uté gosi gari to.

¹⁶ Uyoque enga e yirajágo uje Dupade chijnóra yoque, jecute yanguretágopise Dupade. Pijnoraquei u Dupade, jecute gosi uje jno pijnoraquei uté adode údi obiréjna uje uté déji Dupade gari enga Dupade dépoji uté gari to rĩ.

¹⁷ Uje yocacãrájai uyógaja Jesucrísto iji erámone unojo enga yocucuei tu ujetiga yoquijnoraquei ujñapetaguipise. Yoquigaidi u gu ujetiga ca yagutúgo yógome Dupade iquei jne ujetiga diga chajire yocadode aja quigode.

¹⁸ Uje pijnoraquei déji yógome gosi enga e que yitodógo uté gosi. Uje pijnoraqué ũrei déji gosi enga cho ujetiga tṍra pisadodéringai aja guesi iji gosi. Mu uje pisadodéringai qué déji gosi enga a cho dajuñame uté gosi jne. Jecute yirajágo uje pisadodéringárique qué déji gosi enga cáma uté gosi chijnorapise Dupade.

¹⁹ Uyoque enga yijnórango Dupade gu uje Dupade ijnoraque bajaque yoque nanique.

²⁰ Mu ujetiga gosi chojninga: "Yijnóra Dupade" marínga, chetaque dajõrai, enga táquechoquí uté. Mu ujetiga que yijnórango yoquijõrai uje déji yoquedominone ¿enga jé yijnórangorase Dupade a, uje que pimo?

²¹ Mu Crísto jé guẽrate daroquei uné ome yoque nanique uje chojninga: gosi ujetiga chijnóra Dupade, gajnei u to ujetiga chijnóra dajõrárique.