1 Coríntios 9 - Dupade Uruode

Páblo cho quique Jesús irógode ore isocade uje ore i tu "apóstoles"

¹ Que potigayaquérique déji ome yúringárique Jesucrísto iroque. Uje e yimópise Yocangarádejnai Jesucrísto ome yedodie nanique gu. U to uje yimanique uágaja panguretigai ome Jesucrísto. Jecute yajnéone cucha a jé chorase Jesús irógode uñane ore gajnéone cucha to.

² Ísenga uñéngo ore chotigase yúringai Jesucrísto iroque apóstol jõ. Mu uaque u uje uacarajáyopise uje jé ũré yu ome udore uje Jesucrísto iroque yu. Chamáñaje uacanguretáyo Yocangarádejnai Jesucrísto gu uje yatata adode ome uaque ica.

³ Yiraja uje uñane ore chucué yiyoguérigo. Mu yipota jeta yĩrarare yibai, enga a yósi te ome udore ore jne:

⁴ Yajnei tu arĩ́e ujetiga yisa yajnetígo cucha pẽracho ¡saque! to uje Jesús irógode uña yu to.

⁵ Yajnei tupo rĩ ujetiga yacotéraque dérasiji yari ujetiga Dupade angureto goto enga uaté a nonarása yu to aja yiquitígo. Adi tu yujode Dupade irógode apóstol uñane uje ore acotedie nóna ore aja ore atatagode Dupade urúo iji erámone. Yojningane u Jesús jorane, Pédro ore.

⁶ Ísenga uacáyipiedie u ujetiga gusu Bernabé uyoque ujetiga yisago yoquejórigo ome yoquibotígo. Jé basa ga uacáyipiedie a u jõ ome yocujode Jesús iroque uñane ujetiga ore chedu datatagode Dupade urúo.

⁷ ¿Ma soldátique déji a ujetiga chorase dabotique oré? Úngare, ore eduguéjnane gaite oré ore posode. ¿Ma utácarique déji a ujetiga ca tagu dacatígo cucha árigo a? Úngare. ¿Jeoga áyasadie irodisónique déji a ujetiga ca chóji dajóyadie áyasai ijnanie irisode? Úngare.

⁸ Uje yacãra yacajnaquéode aja cuchade udore cho ujetiga cachi cucha jnutiminóño. Mu déji Dupade uruode to.

⁹ Uje Moisés urusarane Dupade urúo chósi te: "Ca agaru bachitique tóro pijnatique uje qué chinasu bacai árigo iji guidode. Mu ajuéga ujetiga tagu uñéngo aja dajesúode." ¿Ga Dupade uruode u udore gu uje chosõre tórode a? Úngare.

¹⁰ Dupade chacãra dacajnaquéode aja tórode, mu áyipie dépisiji darógode uyoque ujetiga pisi yógome to uje yicoi adode. Uacarajáyo uje jnani tuté uje chĩrase guejnatique ome derã́sori arádo, jé aja uté to uje chinasu pacade árigui, udore ore áyipiedie jnese déji diri tuté ujetiga ore tagu árigui to jne.

¹¹ Enga yocajnui u utácarique uje chaca cucha ajñunie iji dejnatique. Chamáñaje cho ujetiga yocacaque Dupade uruode iji uacajéode to. Jecute jé tiógarapísa to ujetiga yirángo yocacade árigui udire to, enga árigui urásu uaqueranone cucha ome yoque to.

¹² Yiraja uje uacasíyo uacacadisórone uñane iji uaqueranone, mu cuchiyíode urásu uyoque ujetiga asíyo yoque uje yoquijnimique uaque ome panguretigai iji Jesucrísto gu. Uje yocajnei tu ujetiga asíyorase yoque marínga, que yutágoi uaque go. Mu yidotágo yógome cuchade udore jnese. Chamáñaje que yipótago gu ujetiga uñeque chetaque yocatique enga diga ca tangári Pujnomé Ueradi quigode ome Crísto uje yajnerangome uaque.

¹³ Ísenga uacarajáyo jõ uje udore ore jnese uje ore pésu cuchade aja quigode iji Dupade iguíjna cuchábi ore gajnei tu ujetiga ore tagu cucha pibosode iji Dupade iguíjnai tuté. Jé cho udore ore to uje ore chisa ore gueranone cuchiso enga ore chujé udore ome Dupade. Jecucha ga ore tagu dajnepídode iji cuchisode udore to.

¹⁴ Enga jé adi u uté to ome udore ore jnese uje ore jno Crísto ujnomei údi, ore gajnei upo ujetiga pisi ore to rĩ. Chamáñaje Yocangarádejnai iroquei tu uté ome yoque gu.

¹⁵ Jecute yajnei tu to ujetiga pisi yu. Mu que yutai uñeque gotique ujetiga chisi dẽratígo cucha ome yu. Enga que yurúsãre ome uaque gu ujetiga asíyo yu iji uaquẽratígo cucha. Jé tiógara ujetiga yirasique yu. Chamáñaje yijmainie imaningone u yibosode uje yiji Pujnomé Ueradi ome Crísto údi. Enga que yipotapísa gotique ujetiga uñeque doi enga chojninga: "Cachi Páblo gaidi u yoqueranone cucha arĩ́e uje chatata Dupade uruode ome yoque." Ujetiga jé ũrérase ore uruode udore enga a yipotárasa pitoringai.

¹⁶ A gajnarenguipísirase ujetiga yiji enga yisi yibai gu yatatagode Crísto ujnomei ome ore. Uje cachi Dupade chiroque yu aja yatatagode udore gu. Mu ujetiga yiji enga yetaguirase Dupade iroquéode udore, enga yiya yacate ore, enga jé yigachodi u ujetiga cucha gajnarétique chósi ti iji yu.

¹⁷ Ujetiga yipésu cuchárique gu yajéningo, enga jé tiógara ujetiga pisi yu. Mu ujetiga ayorérique que yocajéo mu jé yipéco cucha dacatique enga uome to. Chamáñaje Dupade iroquéo udore gu ome yoque.

¹⁸ ¿Ma Dupade cho yoré ome udore to a? Ejẽ́. Guerani u yirasitigai tome yu uje yacate ore ome Jesucrísto úringai piquetangore uje que yutai cucháriguiji uñeque. Yitiógarapísarása mu ujetiga pisi yu, mu que yutai cucháriguiji uñeque gotique.

¹⁹ Que pisaque yu go. Mu cho ujetiga erámi unirisórone ore isaque yu jnese. Uje yujuya yu iji ore ujade gu ujetiga jiei yijnimitígo aja panguretigai ome Jesucrísto.

²⁰ Uje yugúsiji judíode ore ujade enga jé yo ore ome ore adode enga que yo cucha bisidéguiji ore angurenone Moisés iroquéo to go. Yiraja mu uje cuchade udore ore toi ome Dupade anguresórone uyoque. Yigaidi tu gu ujetiga ca ore chise yunerotiguérique enga yimate ore aja Crísto úringai pangurete to.

²¹ Jé basa ga uje yugúsiji purása quedéjnane ore ujade uje agúpurai ore ome Moisés urusarane enga jé yo udore ore to. Enga que yiji judíode ore jmapiedie. Yigaidi u gu ujetiga yimate udore uñéngo aja Crísto to. Mu jecucha yigaidode u Dupade, Crísto ore iroquéode uje yugúsiji purása quedéjnane ujade múñi.

²² Jé cho uje yugúsiji Dupade anguresórone ore ujade uje cáma ore taya iji danguretigade, enga jé yo udore ore to. Yigaidi tu gu ujetiga ca ore chise yacajnaquéode unerotiguérique enga ore quérã iji danguretigade. Jecute yucué yajéo ujetiga jé yo yacaditígo ore jnese iji yajesúode erámio. Yigaidi tu gu ujetiga yijnime udore uñéngo aja panguretigai ome Jesucrísto to.

²³ Yisocabéode u unojo gu uje yipotapísa ujetiga Dupade uruode chise erámone jogosórone jnese enga udore uñéngo chise dáringáringo Dupade iquetacho to. Que gusu udore, mu yipotapísa to ujetiga pininaquei chise yu to uje yimate uñane aja panguretigai ome Crísto to.

²⁴ Uacarajáyo uje qué ore doi dagajñunie ome ñane enga bajai tu ore isi tiji ore. Yajéode u ome uaque ujetiga ibisoguipise uágome Dupade adode to. Yojningai u ujetiga ejnáñopise uágaja adode. Enga a Dupade tẽrája uaque to jne.

²⁵ Yirajágo to uje e idógosi deréjnai ujetiga ore doi dagajñunie ome ñane enga ore susípise deo ome cuchade. Ore gaidi tu gu ujetiga etoque ore ome dagajñua. Enga ibisoi iji ore uté gajneque ore oradie uje ore ipesudé iji poracarane. Mu uté gosi gajnei ducayo iji poracarane jĩraque beta enga íjnoque. Mu uyoque enga yejnángo yoquiguesi ome Dupade adode, enga a yocajneque Dupade guẽratique cucha to jne. Mu yocajnei tuté a ca íjnoque jne iji deréjnane jnese.

²⁶ Yirajágo uje ore chequetingare re gatuaque ome dagajñunie yui. Mu que yetingarãque yu to go ome pigajñúraque yúrique. Chamáñaje e yugúsiji gai gu.

²⁷ Jecute yo yujuñame yu aja yiqui yui. Enga que yimíninga yute urõsoringuéone gotique. Enga yujusípise yadode guio. Socaseti gajnareque yatique, enga ca Dupade chisi ome yajnetique cucha ome yu iji yigajñua eruei. Nosoringuéo uje jecucha yacate ayoréode múñi ome Dupade uruode.