1 Coríntios 8 - Dupade Uruode

Páblo cho ore quique ome ore icatecãrainone ayoré gajnúo gajnéone cucha piboso

¹ A qué yujnungumu jmare jne ayoré gajnúone gajnéone cucha piboso ujetiga jé areque ujetiga yajo, jeoga ca yajo. Yiraja uje jé ate ome ayoréode uyoque uje yoco irajatade iji yoque ome cuchade quigode jnese. Mu yiraja to uje yocúringane dicotárechoquí jogadi tu uje yicotágo yógome yoquirajatigade. Jé basa ujetiga gosi chijnorapise dojode ayoréo enga jogadi tu uté uje uté gosi quérã iji Dupade adode.

² Ujetiga uñeque cho irajatáguiji re, uté gosi u uje cáma chiraja cuchárique. Chamáñaje que toc ujetiga gosi chiraja cuchárique ujetiga Dupade ca cho cuchade udore quique ome gosi.

³ Mu ujetiga uñeque chijnóra Dupade enga Dupade chiraja uje dangarásõri u uté enga cho cuchade quique ome uté gosi.

⁴ A qué yo quique ome uaque jne ayoré gajnúone gajnéone cucha piboso ujetiga Dupade anguresórone uyoque yajo, jeoga ca yajo. Yirajágo uje que cucha dacatique tṍraji ayoré gajnúone udore ore. Enga que Dupade u ore gotique. Uje que Dupa uñeque cuse, gusu Dupápisi uje déji gaté.

⁵ Jé ũré uje uásejna pangurenone cucha iji gaté, jnumi ore uje erámone unirisórone ore cho dadupa iji ore.

⁶ Mu ome Dupade anguresórone uyoque, yocangureni Dupa chojmarápise enga Yocai Dupade u. Uté pésu cuchade jnese enga yiquecágo gu uté ujetiga yicoi adode. Enga Yocangarádejnai chojmarápo rĩ enga Jesucrísto u uté. Uje Dupade angúromei u uté nanique uje pésu erámi iji taningane nanique. Enga Dupade angúromei upo uté to rĩ ujetiga chisi ome pucuecaringué eyúgojmai ome yoque.

⁷ Mu yocujode Dupade anguresõre uñane que ore chiraja pacajnaquéode unojo quigode to go. Uje ore isocabeque nanique uje ore catecã́ri ayoré gajnúone to. Enga que udore ore áyipiedie jnoji dacatecãraini cásodicáite ayoré gajnúo úringane ujopíerã́cho. Jecute uje ore tagu ayoré gajnúone gajnéone cucha piboso udore ga ore agutedie cho jora ome. Cáma ore taya iji danguretigai ome Dupade gu.

⁸ Mu yocúringane Dupade imeserãcho que garani upúsu cucha pibotique ujetiga gosi tagu, jeoga ca tagu. Uje jé cho ñane ome Dupade gu ujetiga yapúcoja yoquibosode, jeoga ca yapúcoja.

⁹ E mu ajusópise uacadode guio. Pujuegate cucha pibosode jnese ome uaque marínga, jé ca acho iji uacojórique Dupade anguresõre iquei uje cáma etoque uté ome danguretigai ome Dupade. Jé socaseti chirate uágaja enga tagu to enga jĩraque aguté chorase jora ome jne. Enga basája pisijnaringuéone jne rĩ.

¹⁰ Ujetiga uacuñeque jno enga acárasaja ayoré gajnúrique iguíjnai ujetiga agu cucha pibosode iji, socaseti Dupade anguresónique uñeque di uje cáma etoque iji danguretigai. Enga chimo Dupade uruode irajasṍri ua iji ajei enga chacája to enga nóna ua. Enga diga tagu cucha pibosode udore to. Mu quigade enga aguté chopísirase jora ome dapesudode udore uje tagu ayoré gajnúrique gajnéone cucha piboso, uje que dupápisi uté múñi.

¹¹ Pirajatigai déji ua ome cuchade udore múñi, que ajusípise bajõrai uté guio, uje cáma etoque uté iji danguretigai. Jecute uté chopise caru ome danguretigai enga bijna ome Crísto uje toi ome uté to múñi.

¹² Bapésu gu uje bajõrai uté aguté cho jora uje cáma etoque iji danguretigai enga cho ujetiga basijnaringuéone udore gajnengóri upúsu Crísto.

¹³ Jecute ujetiga yibotique u uje ipesute yijõrárique iñoñaringuérique, enga arei tu ujetiga ca yagupórasu ayoré gajnúone gajnéone cucha piboso rĩ iji deréjnane jnese. Yigaidi tu gu ujetiga yijõrai ca pésu pisijnaringuéringo to.