1 Coríntios 7 - Dupade Uruode

Páblo aquĩraquéode u unojo ome chequedíe, jnanione, jnacarode, gapudíe ore

¹ A quene yichajnai uacarusarane jne ome yu uje uacarúsãcho ome yu diríca. Ũré yu uje yojninga: cucha arei u ujetiga jnacánique ca chucué dacotéraque.

² Mu yiraja uje uásejna jnacarode, gapudíe uje ore chachia ráguiji ñane. Enga que yipota ujetiga abasója cuchade udore to. Jecute arei tu ujetiga jnacare chojmara, chojmarane ore chisa dacotépiserigui. Enga jé chopo gapudíe to rĩ. Areque ujetiga ore chisa damaníngo to iji jnacarode ore.

³ Enga uje e ore déji ñane gari enga jnacari gajnei tu ujetiga moji dacoté gari. Jeque acoté gajnei tupo rĩ ujetiga moji dabai gari.

⁴ Chamáñaje chequé amanachuguéraque e que gajneque daoi mu abai e gajneque. Jé cho acotẽrachutique to, e que gajneque daoi mu acoté e gajnenguipise.

⁵ Jecute amanachuguedie uaque á, ca ãrácho uágome uacabayode ore ujetiga ore pota moji uacari. Jé chopome acotẽrachugode uaque rĩ. Ujetiga uacacotedie pota moji uacari enga ca ãrácho uágome ore. Jé basa ujetiga uñeque pota cãra dajogatique ujetiga catecã́ri Dupade enga cucha omi tu ujetiga abai, acoté ore catecã́ri ñane bajaque enga ujetiga ore ajéningo chojmára iji jnumi, ga quene jogadi tu ujetiga ore cãra dajogadode ome ñane ome picatecãraitigade ome Dupade. Mu jĩraque ore chisápo ñane rĩ. Adi tu gu ujetiga Satanás ca pésu gapu quedéjnaraque, jeoga jnacare quedéjnarique unéningarique ome udore uñeque enga basája pisijnaringuérique.

⁶ Que yiroque uágaja ujetiga asayo uacacotérigui, jeoga uacamaníngo. Mu ujetiga gosi pota enga jé areque ujetiga chisa dacotépiseraque, jeoga goto pota enga chisa dabaipísirique.

⁷ Yajéode u jórogu ujetiga ayoréode ore cho yu uje que yisa yacotéraque. Mu que yoco ñane go, mu Dupade ipesute uyoque jnese. Jecute Dupade ajéode u ome yocuñane ujetiga jnani ueque yoc. Jé basa ga ajéode u ome yocuñane ujetiga acotẽrachuque yoc.

⁸ Ga yósi tome jnacare uégode, gapu uéguedie, chequé ecadie uaque: arei tu ujetiga ca asayo uacacotérigui, uacamaníngo ore to enga jé oyo yu.

⁹ Mu ujetiga gosi áyipieraque ca jnoji gapudíe enga arei tu ujetiga uté chisa dacotéraque to. Uje que pisijnaringuei u go ujetiga uñeque chisa dacotéraque. Mu gajnareque ujetiga gosi ca chajire re ome dapotiguéode ome gapu quedéjnaraque.

¹⁰ Yutoquéode u ujetiga amanachuguedie uaque ca ayáyo uacabayode. Piroquei tuté que garani u uyu go, mu garani u Yocangarádejnai Jesucrísto.

¹¹ Mu jé socaseti chequéraque e noñome damanique, uaté goto ca chisapo dabai uñeque jne rĩ iji dañomi tuté dabai quigade. Mu ujetiga uaté e potapo dabai uñeque rĩ, enga arei tu ujetiga chajniápo dabai dañomi casica gai rĩ. Enga jé chopome jnanione uaque rĩ. Ca ayáyo uacacotedie to.

¹² Ga e yuruode gajnengórone u jnanione uaque uje uacacotedie que changureta Dupade to. Icha yacajnaquéode unojo uje cáma Yocangarádejnai chujnungu jmare to nanique ome ore. Enga u unojo: ujetiga Dupade anguresónique acotéraque que changureta Dupade to, mu ujetiga uaté goto pota chácariji dabai gari enga ca uté gosi cha dacoté uaté jne uje que changureta Dupade múñi.

¹³ Enga ujetiga Dupade anguretóraque amanique que changureta Dupade to, mu pota chácariji dacoté gari enga uaté goto ca pota piyátique ome dabai to jne rĩ.

¹⁴ Ujetiga cáma goto abai changureta Dupade mu cho ujetiga Dupade cãra uté jogadi ome erámi unirisórone jogadode to gu acoté uje Dupade angureto u. Jé cho to gosi acoté. A cáma changureta Dupade mu cho ujetiga Dupade cãra uaté jogadi ome erámi unirisórone jogadode to gu abai uje Dupade anguresórone uñai u. Uacamóño uje Dupade anguresórojmane abode cachi erámi unirísõre ueque ore. Mu ujetiga disírique dayé, jeoga daté changureta Dupade enga jogadi u uté uje Dupade cãra ore jogadi ome erámi unirisórone ore jogadode to.

¹⁵ Mu ujetiga Dupade otigayasónique pota piyátique ome dacotéraque uje Dupade angureto enga jé arec ujetiga cha. Ga e omepo chequé uaté rĩ ome dabai doi uté. Jé cho to ome Dupade otigayatóraque ujetiga pota piyátique ome damanique uje Dupade anguresõre enga jé arec ujetiga cha. Ga e omapo jnani tuté rĩ ome dacoté do tuaté. Chamáñaje Dupade ajéode u ome yoque ujetiga pajesereringai déji yógome ñane.

¹⁶ Mu ujetiga Dupade angureto ua enga ca boji babai ejode uje que changureta Dupade múñi. Socaseti diga babai changureta Dupade to jne. Jé cho ua rĩ ujetiga Dupade anguresõre ua enga ca boji bacoté ejode to uje que changureta Dupade múñi. Socaseti bacoté uaté changureta Dupade to jne iji dire uñeque.

¹⁷ Arei tu ome Dupade anguresórone jnese ujetiga ore pésu Dupade áyipiedie ome raque. Enga arei tupo ome ore rĩ ujetiga ca uñeque chécãre dasocárique. Chamáñaje ujetiga angureta Dupade iji báringai jnani ga jé ácariji te to ome báringai Dupade anguresõre. Jecucha yacajnaquéode u unojo to ome Dupade anguresórone jnese to rĩ iji ore idáyode jnese.

¹⁸ Ujetiga Dupade tibidi gosi aja re uje ore icaque gai ica, enga arei u ujetiga jé chácariji tome dangureni Dupade. Mu ujetiga Dupade tibidi gosi aja re uje cáma ore icaque gai ica, enga areque ujetiga chácariji tome to ome dangureni Dupade.

¹⁹ Chamáñaje que cucha ome Dupade gu ujetiga picaque uacádode, jeoga ca picaque uacádode. Mu Dupade ucuegode u ujetiga angoninguite guesaque uágome ipotigádode cucha.

²⁰ Jecute ca achóguinaño uaque gaté rĩ iji uté uje Dupade tibidi uaque. Ga jé ácayoji uté ome báringai Dupade anguresõre.

²¹ Ujetiga ore isaque ua uje Dupade tibidi ua aja re, mu jé ca o báyugu ua ome báringai pisaque. Mu ujeta ore pota chirame ua enga jé areque ujetiga bo to.

²² Ujetiga Yocangarádejnai tibidi ore isatique aja re, enga Yocangarádejnai tuté que cho dasaguíji uté gosi. Mu uté gosi jé jno ga doi Yocangarádejnai iroquéode to. Jé basa ujetiga Yocangarádejnai tibidi ayoré atátique aja re, enga e Yocangarádejnai isaque uté gosi, enga uté gosi doi Yocangarádejnai iroquéode to.

²³ Dupade gaite oré uaque enga uásejnapise uacoredie ome Dupade nanique. Jecute gajneque uaque. Jecute ca ajuéchopo uágome pisatique rĩ ome jnanírique.

²⁴ Yujode Dupade anguresóño uaque a, yijáro yuruode iji jnumi ome uaque ujetiga ca achóguinaño uaque gaté rĩ iji uté uje Dupade tibidi uaque. Ga jé ácayoji uté ome uacáringane Dupade anguresõre.

²⁵ A e yingo yajéode ome uaque ome jnacare uégode, gapu uéguedie ore jne. Que Yocangarádejnai cho quique cuchade unojo quitígo ome yu. Mu yiraja uje Dupade chingo dosongaquéode ome yu ica ujetiga yiji iroquéode. Jecute yajnei tu ujetiga anguretáyo yacajnaquéode to.

²⁶ Yirajágo uje jé ate uje cucha dacate gajnaréngone tocade ome Dupade anguresórone uyoque iji deréjnane unojo. Jecute areguipísi tu jõ ome yajéode ujetiga jnacarode ore chedu dáringáringo jnacare uécho.

²⁷ Mu ujetiga bacoté cuse enga jé ca apota piyágueraque ome bacoté. Mu ujetiga jnacare ueque ua enga ca o bedójnaringué ome bacotéraque.

²⁸ Que pisijnaringué go ujetiga gosi chisa dacotéraque, enga que pisijnaringuei upo rĩ ujetiga gapúraque chisa damanique. Mu uje jnacarode, gapudíe ore chisa ñane enga jogadi u uje ore narañime cuchade iji erámi tuné. Uje yaquĩ́ra uágome pisagode ome ñane enga yigaidi u ujetiga ca páyuguhebátigade chise uaque.

²⁹ Yijorane uaque á, yipota ujetiga yingome uaque uje dirode garósipise ome yoque ujetiga yicoi Dupade adode. Jecute acotẽrachugode uaque, ajusópise uacacotedie guio, mu ca ejnáño uacáyipiedie aja ore, enga cho ujetiga ca uacacotéraque cuse.

³⁰ Ujetiga bajogasúrique toi mu adotáyo uágome pujnusiétigade enga cho ujetiga ca pujnusiétigade sué uacabáyode. Ujetiga agúsiji ore ajñamítedatérique, mu ca ejna ua aja pininaquéode. Ujetiga be oré tome cuchárique, mu ca o bajnenguíji bagaidé oré tuaté.

³¹ Ujetiga ataque uaque iji erámi tuné mu ca oyo atáquedaté iji uaque, enga ca uacáyipiedie chejnápise raja uacagúchade. Chamáñaje yoquijogadi erãpe tuné, jé aja jogosórone cucha jnese a jĩraque íjnoque jnese jne gu.

³² Que yipota ujetiga páyuguhebátigade sué uacabáyode, jecute yaquĩ́ra uágome cuchade. Uacamóño uje jnacare uei uje Dupade anguresõre que áyipieraque chejna raja cucha jnutiminórone gotique. Mu ucuegode upúsu Yocangarádejnai iroquéode. Chamáñaje gaidi u gu ujetiga Yocangarádejnai chirase re ome adode.

³³ Jé basa acotẽrachuque gosi enga uté áyipie chejnápise raja cucha jnutiminórone ujetiga ca cuchárique chona acoté, abode ore. Gaidi tu gu ujetiga acoté irasé re ome adode.

³⁴ Chequé amanachuguedie ore ipesudode jé cãra re ome gapu uéguedie ore ipesudode cucha to. Uje que Dupade anguretóraque amanique cuse enga uaté goto chedu Yocangarádejnai iroquéode ome re. Que áyipieraque déji cucha uñeque, mu pota ujetiga Dupade gajneque áyipie, aoi ore jnese. Mu amanachuguedie ore áyipiedie déji dasacuátigade cucha ujetiga ore abayode irasé ore.

³⁵ Yajéode u ujetiga agutíñañome yacajnaquéode unojo ome uaque. Que yipota ujetiga oyo yãrécho iji yacajnaquéode gotique. Mu yigaidi u ujetiga arajáyo cucha arégode ujetiga apéso to. Yigaidi tupo rĩ ujetiga beyoi Yocangarádejnai iroquéode to enga ejnáñopise uágaja udore.

³⁶ Ujetiga gosi chaquĩ́ra daróraque ome jnacáningo, mu quigade enga chimo uje uro chó dáringa gapu uriengue gai uje cáma chisa damanique, jé arec ujetiga uaté dayé chécãre dajéningo. Cuchiyi tupúsu ujetiga uro potapísa chisa damanique to. Jé areque ujetiga doi enga juéga ome uaté ujetiga chisa damanique. Uje que pisijnaringuérique déji go ujetiga gapúraque chisa damanique.

³⁷ Mu ujetiga gosi chaquĩ́ra daróraque ome úringáraque amanachugué enga uerate uté gosi áyipiedie quigode. Chamáñaje que pésu udore gu paquĩraquérique, mu pésu gu dáyipiepisedie.

³⁸ Mu uerate gosi adode to ujetiga juéga ujetiga uro chisa damanique. Mu uté gosi uje chaquĩ́ra daro tome úringáraque amanachugué, uté gosi áyipiedie sué bajai tuté áyipiedie gai.

³⁹ Ujetiga chequéraque abai qué eca enga que pujuegate ujetiga uaté doi enga chucué dabai uñeque iji dabaipísi ejode. Mu jé amóngacho ujetiga abai e toi enga jé areque ujetiga chisapo dabai uñeque rĩ, mu gusu ujetiga Dupade anguresõre jnani tuté.

⁴⁰ Mu pininaquei jogadi urásu ome chequé uaté ujetiga ca chisapo dabai uñeque rĩ. Cachi yajéode u udore, mu ísenga Dupade ajéode u to jõ. Chamáñaje Dupade Ujopié Espíritu Sánto déji yajei gu.