1 Coríntios 6 - Dupade Uruode

Ore chijna dabotaquéode aja dacasutedie uje que Dupade anguresõre ore múñi

¹ ¿Jé gotique gu a uje uacuñane chayója dacasutedie uje que Dupade anguresõre ore go uje uaquetácho uacajorane ipesudode ome uaque? ¿Jé go que ayóyoja uacojode Dupade anguresõre a ome uacajõrárique ipesutique ujetiga gajnareque ome uaque?

² ¿Ja ca arajáyo a? uje Dupade anguresórone uyoque a yocajnei tu jne ujetiga yajico erámi unirisórone atígo aja quigode ujetiga diga Crísto diapo rĩ ome dáringai eduguéjna cuchape. Ujetiga jec ũré udore enga uacajiritigade u cucha querúode jne, ¿ja ca tiógara to ome uaque a ujetiga ajichópo cucha dacate ajámatigo jne rĩ a iji uacajade?

³ Mu que gusu erámi unirisórone mu a yajicopo gaté unirisórone adode aja quigode to jne rĩ. Ujetiga yocajnei u udore, jétapũré cucha dacate jnutiminórone ujetiga yajico aja quigode to ome yocujode Dupade anguresóño.

⁴ Ujetiga cucha jnutiminore uaquetétigárique ome uacojórique Dupade anguresõre, mu ca ayóyoja eduguéjnane uje unejac ore ome Dupade anguresórone uaque.

⁵ Yajengopísome uacapesudode uje uacayóyoja dacasutedie ome ñane. ¿Ja ca uacuñeque déji a ujetiga chiraja páyipierigui quitígo ujetiga chajire dojórique Dupade anguresõre ipesutígo aja quigode? Ísenga déji.

⁶ ¿Ma omi tu ome uaque a ujetiga Dupade anguresónique chijna dojórique Dupade anguresõre aja dacasuté guesíminónique ujetiga chajire ore adode aja quigode?

⁷ Mu gajnareque to uje Dupade anguresórone uaquetácho ñane enga jĩraque uacayóyoja dacasutedie ome ñane. Imoi tu uje Satanás suépise uacabáyode. Cucha omi turásu ujetiga adotáyo uágaja ome uacajorane ipesute gajnarétigo ome uaque. Ujetiga ore chãra uaque marínga, cucha omi tu ujetiga jé dóji enga ca oyo chimíñimi ome ore.

⁸ Mu uaque uje uacayóyoja dacasutedie udire, uaque jé u to uje uacapéso pisijnaringuéone. Chamáñaje paringaquéode déji uaque to gu. Enga uacaringaquéode udore chuságaja Dupade anguresórone to, uje uacajorane u ore múñi ome Dupade adode.

^9-10 A arajáyo jõ uje pisijnaringuéone ipesungórone a ca ore chise jogadi uté uje Dupade chácariji dáringai eduguéjna cuchape ome darasade ore. Jecute ca ajuécho ujetiga uñeque chãra uaque ome udore. Udire ore uje ore chachia re iji jnacarode ore, jeoga udore uje ore chachia re iji gapudíe ore, a ca ore chimo dáringáringo Dupade urása to jne. Jé aja amanachuguedie, acotẽrachugode ore rĩ uje ore pota punganingane ome chequé quedéjnanie, jeoga jnani quedéjnane. Jé aja jnanione udore ore to uje ore pota tungarája dojórigo jnanío. Jé aja udore ore to uje ore catecã́ri ayoré gajnúone. Jé aja oriechoquíode to. Jé u to udore ore uje ore jnari cuchade ome re. Jé u to yote pioi yuguébeode ore. Jé u to jutaréquechoquíode. Jé u to aringácachoquíode uje cachi ore gaidi tu poriquéode ome dojode ayoréo ugúchade. A ca udore ore uñeque chacája jogadi uté jne uje Dupade chácariji dáringai eduguéjna cuchape ome darasade ore.

¹¹ Jé ũré uje uacuñane isocade jé u udore to nanique. Mu uje e uacanguretáyo Yocangarádejnai Jesús enga uté chĩro uacasijnaringuéone enga cãra uacajogadode ome erámone unirisórone ore jogadode ujetiga eduyo uágome Dupade. Enga Dupade chisi ome da-Espíritu Sánto ome uaque enga cho ayoré ujñapetáguiji uaque to gu Yocangarádejnai Jesús adode ome uaque.

Ajuso uacadode guio ome uacao ayorei

¹² Ore chojninga: "Pujuegate cuchade jnese ome Dupade anguresórone uyoque arĩ́e." Ejẽ́, pujuegate cuchade ome yoque, mu que cuchade jnese pésu yoquiquéraningárique aja gaté ome Dupade adode. Yiraja uje Dupade juéga cuchade jnese ome yu, mu a ca yujuéga yu jne ujetiga yipotigádode ome cuchade udore jno yúdi aja pisijnaringuérique.

¹³ Jé ũré uje pipesute cucha pibosode gu yoquicadie. Jé basa pipesudei yoquicadie gu ujetiga yajo yoquibosode. Mu a chise dínique jne ujetiga Dupade chécãre pisocade udore enga e cucha bisidécho pibosode, picadie ore jnese. Mu que Dupade ipesute ayorérique aoi gu ujetiga chachia re iji gapudíe, jeoga jnacarode. Úngare. Yocangarádejnai gajneque yocaoi ujetiga cho daguíjnai iji yoque.

¹⁴ Enga a chise diri jne ujetiga Dupade chiringare yoque to jne iji pitoringai ome dajopié. Adi tu uje chiringare Yocangarádejnai Jesús iji pitoringai to nanique.

¹⁵ ¿Ja ca arajáyo a uje Crísto cho dabai iji danguresórone uyoque jnese a? ¿Ja cucha omi turásu ujetiga yiji Crísto gai atique uñeque enga yisi ome gapu dibéchoquíraque ujetiga tungarája? A gajnarenguipísirase pisocade udore arĩ́e.

¹⁶ A ca arajáyo jõ ujetiga jnacari tungarája gapu dibéchoquíraque enga jogadi tu uté uje chojmára ore iji jnumi. Ore urusarane Dupade urúo déji uje chojninga: "Ujetiga jnacari, gapua ore moji ñane gari enga jogadi u uté uje e que garapo ore rĩ, mu e chojmarápise ore iji jnumi."

¹⁷ Adi tu to ome yocáyipiedie. Ujetiga gosi cháta raja Yocangarádejnai enga jé u uje uté gosi, Yocangarádejnai ore áyipiedie chojmarápisiji jnumi to rĩ.

¹⁸ Jecute ayóyo ome gapu quedéjnanie enga ca angachója ore. Uacamóño gu uje gajnareque pisijnaringuéone jnese, mu cucha guesíminórone u pisijnaringuéone udore jnese. Jé basa punganingane ome gapu quedéjnanie u uje pésu gosi aoi iñoñaringuei. Jecute uté gosi aoi jé gajneque ipesudode cucha gajnareque.

¹⁹ ¿Jé ca arajáyo a uje Dupade guerani Espíritu Sánto jogadípise uacajéode enga cho daguíjnai iji uacaode? E que uacajneque uacaode gotique, mu Dupade gajnecho.

²⁰ Chamáñaje Dupade gaite oré uaque enga uásejnapise uacoredie. Jecute ajusópise uacaoi, uacáyipiedie ore guio. Uje uacagaidi tu gu ujetiga picotaque Dupade ome uacasoca omone udore.