1 Coríntios 5 - Dupade Uruode

Páblo chajire jnacari ipesudode aja quigode uje chijna dayé acoté ejo taja re

¹ Uacuñai ujnomei e chise yu uje ujnacari tuté chijna dayé acoté ejo taja re. Gajnarenguipise ipesudi uté. Erámi unirisórone uje agúpurai ore ome Dupade adode marínga, que ore isocade u udore gotique.

² ¡E mu uacoyo dicotare iji uaque iji cucha dacadode udojo jmainie! ¿Jé gotique gu a uje que jnacari tuté adode chirarese uacáyipiedie uje jnacari tuté pésu dasijnaringueque cuchábi iji uacari? ¿Gotique gu a uje que aquírañopo uté rĩ enga etácho uté ome uacáguedie?

³ Que yugúsi jóroguiji uacari, mu yáyipie déji uacari enga e yipésu yajéode ome jnacari tuté uje pésu dasijnaringuéone iji uacajade.

⁴ Yipota ujetiga Yocangarádejnai Jesucrísto anguresórone uaque amátayo ñane. Enga a cho jne jetiga yugusipísiji uacari to. Mu uacaríjogonóri a upúsu Yocangarádejnai Jesucrísto jne enga a uté ujopié chatapísaja uaque jne.

⁵ Ujetiga e agúsoi ñane gari enga asíñome jnacari tuté ome Satanás jne ujetiga cho dajuñame. Mu gusu ao jnutiminóri ujetiga Satanás cho dajuñame. Jé basa áyipie a piqueta jne iji diri tuté ujetiga Yocangarádejnai Jesucrísto diapo rĩ.

⁶ Gajnareque uje coríntogosode uaque uacacotayopise uaque. Chamáñaje que adójningachó pisijnaringuérique iji uacajade gotique gu. Ísenga adúcho to ore ingomei cucha uté jõ, uje chósi te: "Arurégode bisidi garósi marínga, chacája pipocaya enga chisite raja údode jnese enga doi gaté."

⁷ Jecute óraño bisite diyajmane udore. Yojningane u uacate bajade jnese. Chamáñaje pisocade udore u uje pésu uacáringane máracho. Enga oyo arureque ichade uje ueguipísome bisidode. Uje uacamóño gu uje judíode ore pésu pipocaya icha nanique uje que bisitique déji ome ore jnusinamáni dire uje i tu Páscua. Chamáñaje icha uaque gu ome pisijnaringuéone uje uacanguretáyo Crísto. Uje Crísto uté toi ome yoquisijnaringuéone gu enga gajnua jé u ore yugué áyasa uje judíode ore tagu iji dajnusinamáni dire uté.

⁸ Cho ujetiga yugúcoji pujnusinamáni dire gai to rĩ uje e yicoi Dupade adode. Jecute yicoi enga yiyágo yocate gajnaréngone, yoquisijnaringuéone ore uje udore gajnúone u arurégode uje ore chaníraja bisite diyajmane iji. Mu yicoi enga yedugo Dupade uru uréone, pate omone ore uje udore gajnúone u arureque ichade uje íjnoque bisidi iji.

⁹ Yojningame uaque ica iji yurusãraque bajade ujetiga jé ca átayo uágaja pisijnaringuéone ipesungórone udore ore uje que ore áyipieraque jnoji punganingane.

¹⁰ Mu que yuruode qui tu ujetiga angaráño erámi unirisórone jogatique ome uaque. Yirajágo gu uje erámi unirisórone uje que ore changureta Dupade jé ate uje que ore áyipiedie jnoji punganingane, jeoga ore jnari cuchade ome raque, jeoga ore toria cuchade, jeoga ore cho dangurenone iji ayoré gajnúone. Obiréjna uje que togome yoque ujetiga yoco jmíti, jmíti ome ore jnese. Gusu ujetiga boyópisiji erámi tuné, enga quene jogadi u ujetiga ca amecho uáguiji pisijnaringuéone ipesusórone udore jnese.

¹¹ Mu ujetiga gosi cho Dupade anguresṍri iji re mu jno dasijnaringuéone údi enga uté gosi u ujetiga ca átayo uágaja uté gosi. Yojningane u ore uje ore pota nungare ome chequé quedéjnanie, jeoga ore jnari cuchade ome raque, jeoga ore catecã́ri dacatecãrainone ayoré gajnúo, jeoga gojñangarã́quechoquí ore, jeoga yote pioi yuguébeque ore, jeoga oriechoqui ore. Enga jé ca átayo uágaja udore uñéngo. Ujetiga udore uñeque tibidi uágome cucha pibosode mu jé ca abáchoi.

^12-13 Jé ũré uje que yajnei tu ujetiga yajire Dupade otigayasórone ipesutígo cucha gajnareque aja quitígo. A Dupade chajire udore ore ipesudode aja quigode jne. Mu yiraja uje uacajnei tu ujetiga apéso uacajéode ome pisijnaringuéone ipesungórone iji Dupade anguresórone ore iji uacajade. Jecute ãrácho uacajade ome jnacari tuté, chamáñaje gajnarenguipise uté adode gu iji uacajade.