1 Coríntios 4 - Dupade Uruode

Crísto u uje chisíome darógode úringane apóstol ome ore

¹ Jé ũré uje apóstoles uyoque ga yicoi yocajnesṍri Jesucrísto iroquéode, jecute a jé oyórase uté iróguiji yoque. Uté jé upúsu gu uje ichajapite yógaja yocajnepídi udé ujetiga yajnerangome Pujnomé Ueradi uté ome uaque. Enga pota ujetiga yuchẽcoi Dupade ipoguiédedie dáyipiei udire quigode iji guesode ome uaque.

² E uacarajáyo arĩa ujetiga pangurete gosi ome darósõri iroquéode iji erámi udé, enga uté gosi gajnepídi u ujetiga chejna daguesi ome dajnéone piroquéo udore ome úringai ũré.

³ Jecute ome yu ga ujetiga uaque gosi chajirírase yadode aja quigode, jeoga padode ajirisórone uñéngo u, mu que cucha ome yu gotique. Enga jé chuságaja yu to uje que yajirápo yadode aja quigode gotique to rĩ, ujetiga ueracho yitrabajádode, jeoga gajnarécho.

⁴ Jé ũré uje que yagutéraque cho jora ome yipesutique cucha, mu que toc ujetiga yojninga: "Que yiyoguérique cuse." Mu gusu Yangarádejnai ome dajnepídi uté ujetiga chajire yipesudode cucha aja quigode enga chiraja ujetiga ueracho jeoga gajnarécho.

⁵ Jecute ayáyobu uacajiritigade ome ñane, uje cáma deréjnai u gu. Ga yuruode qui tu jetiga arochope Yocangarádejnai Jesús diringai yui. Uje a uté u jne ujetiga chajire yoquipesudode cucha aja quigode jnese. A yipójo yocadode jeoga yocáyipiedie iji deréjnane unojo marínga, Yocangarádejnai a chijnime jne ga chicháji dírecaringuéi ayoré chojmara, chojmarane ore ipesudode dacho, jé aja ore áyipie quitígo jnese to rĩ. Enga a jé u jne ujetiga Dupade chisi ore gáyode ome date arégode. Enga ayoré chojmara, chojmarane gajnéone picotaquéo a jé chirate date arégode udore úringane pipesucho jne.

Páblo ucuei tu coríntogosode ore omitigárique ome Dupade, jecute chutṍri ore ujetiga ore chusípise dáyipiedie guio ome Dupade uté

⁶ Yijorane uaque á, e yagúome yacãrájane cucha ome Apólos jé aja uyu ujetiga agutíñañome yuruode udojo jnese. Yigaidi jé u gu ujetiga arajáyo ome yoquisocade ujetiga beyoi purusarane udore quigode uje chósi te: "Jé ca acayóji siñéngome purusarane uje déji Dupade uruode." Ujetiga angachopísi udore jne enga a jé ca toguírase ujetiga uacuñeque chosi riji gaté ome dacadisórone uñeque úringárique picotaque, jeoga dojnóngaja ujoi pacadisõre.

⁷ ¿Ma gosi ipesute báringai ayoredaté ujetiga ajnué bojode ayoré gáyode a? ¿Ma baríjogosónique cucha cuse a ujetiga ca garani u Dupade a? Ujetiga jec ũré enga Dupade chisi ome bajnéone cucha jnese ome ua enga ¿cuchárique u gu a uje dicotare ua ome bajnéone cucha udore? Uje que cuchade udore uñeque garani u ua múñi.

⁸ ¡Gajnarécho uacáyipie quigode udore arĩa, coríntogosode uaque á! ¡Ome uacajéode ga chiese e uacajnecho uacapotigádode cucha jnese, enga uacajoso ati e uacamácho uágaja uacáringane atácho! ¡Cho jetiga e uaqueso uacáringane peduguéjna cuchape, mu gajnui tu ujetiga ca eduguéjnarase uyoque to! ¡Mu yipésupú ga jé ũrérase uaque enga eduguéjnapise uaque jõ! ¡Ujetiga ũrérase, enga a yátagorásaja ñane ome yocúringane peduguéjna cuchape jnese!

⁹ Mu ome yu ga cho jetiga Dupade e chingongara apóstoles uyógaja erámi ga jé ichajapite yógaja yocujode ayoré quigade jnese. Enga yocajnúone jé upúsu pujuyágaitígo ome pitoringai yui, ome yajéode. Jé chopo rĩ ujetiga ayoré ponáyone iji erámi udé jé aja Dupade irógode jnese iji gaté e ore tṍraji dajñarenie ome yoque ujetiga ore timíninga yógaja quedéjnane.

¹⁰ Jé ũré uje yoquibai tu Crísto uje ore cho áyipie eyúguiji yoque. Mu a áyipierane u uaque ome Crísto adode, ome uacajéode. Uyoque enga cho jetiga serẽrachugode u uyoque. Jé basa ga jnanidaté uaque. ¡Ayoré ponáyone iji erámi ore cho jnani ibijóguiji uaque enga tangári uaque; jé basa ga cucha bisideque yoque ome ore ajéode!

¹¹ Yijorane uaque á, jecucha cuchade chona yoque gatuaque jé aja deréjnai udé. Uje yejnárejo chaguhei, enga ãre pose yoque rĩ. Ga yijmátagopo ome piguidedie rĩ. Enga ducañerájma yoque ome ayoréode uñane rĩ. Enga que yoquiguíjnapísirique cuse.

¹² Enga yocangúromenie upúsu yoquijmainie to uje yajníngo yóguiji cucha pisagode ujetiga yico yocagutíyabádode cucha. Jé upo rĩ uje uñane ore cho darúja yoque to, mu yichajnángoi ore ome yocuru ueradode. Uje ore jmongarája yoque marínga, jé yidotágo yógome ore ijmongaquéode.

¹³ Ujetiga ore uruode gajnarécho aja yoque, mu que yigotágo tijode to go ome ore enga yaquírango ore ome yocuru pajnotágode. Mu jé ore ate uje ore chopise basúra iji yoque iji erámi unirisórone ujade jnese. ¡Jé aja diri tudé ga ore cho jnani ducaraníji yoque!

Apóstol Páblo uté gajnui tu coríntogosode ore dai iji ore úringane Jesucrísto anguresóño

¹⁴ Uje yurúsãre yurusarane udojo ome uaque, mu que yigaidi tu ujetiga yinguíra pajegátigai aja uaque, yijorane uaque á. E mu yigaidi tu ujetiga quĩrique yaquĩ́ra uágome cuchade, uje yopise yape yijnoranguíji uaque gu.

¹⁵ Yuruode qui tu uje uyu u uje yijnimique uágome Crísto Jesús úringai pangurete ica uje yacate uágome Pujnomé Ueradi quigode. Jecute uyu urásu ujetiga oyo uacaji yu. Ujetiga uacacadisórone ome Crísto adode 10 mil ore marínga, que uacai ore go iji uacáringane Dupade anguresóño.

¹⁶ Jecute yijócha uacajéode údi ujetiga aracho yu aja yijmapiedie uje yi Dupade utoquéode.

¹⁷ Adójnacho uje e yiroque yijnorai Timotéo aja uaque, enga yigaidi tu ujetiga uté chátaja uaque ome yáyipie quigode udore. Cho ujetiga yabi tupúsu Timotéo uté to uje chirate yu aja yanguretigai iji Yocangarádejnai uté. Ũré uté ga chejnapise daguesi ome dajnéone Dupade iroquéo. Ga uté a jnusina yijmapiedie ome uaque uje yajna Jesucrísto jmapiedie iji jnumone. Ga uté jnusinamánone cucha udore ome uaque a jé chopise yacajnaquéode uje yacate Dupade anguresórone jnese ome iji ore uáguedie, jé iji Crísto iglésidie jnese.

Uñane ore iji coríntogosode ore ujade chosi riji gaté, enga Apóstol Páblo uté chaquĩ́ra ore ome ore áyipie gajnarénguenie udire

¹⁸ Uacuñéngo e cho jnanidatéji raque enga ore chojninga: "Páblo a ca tibágui yoque to jne uje a iyieja yoqui tome."

¹⁹ Mu ujetiga Dupade ajéo enga a jĩraque yibágui uaque jne. Enga a yidójnangapísa jnanidatéode udore ore ipesutígo cucha jne, ujetiga jé ũré enga tṍraji Dupade ujopié uaté, jeoga cachi ore urúo.

²⁰ Ajnusináño uje yocúringai purása ome Dupade que pijoque gu yocuru bisidégode, mu pijoque gu yocaríjogoto Dupade Ujopié isocágoningáne ome yoque.

²¹ ¿Ma apótayo ujetiga yise uaque enga yidosója uaque jne ome uacate gajnarétigo? ¿Jeoga apótayo yuru pajnotátigo ome uaque ujetiga yise uaque jne?