1 Coríntios 3 - Dupade Uruode

Apóstol Páblo cho dáyugu re uje Dupade anguresórone ore chajuque ñane ajéode iji dáguedie udire.

¹ Yujode Dupade anguresõre uaque á, uje yugúsi uacari ica, mu que togome yu go ujetiga yacate uágome yacajnaqué etógode udore. Chamáñaje que ajuécho uágome Dupade Ujopié Espíritu Sánto gu ujetiga chijñaque uaque, mu uacajnáño uacáyipie ayoré quigode. Enga uacoyósi disi parátagabode ome Crísto adode.

² Jecute yedu yacajnaqué ibijógode ome uaque. Ga yajnua tu chequé uje chacucãrósi dababi enga que chisi ome pose uajátique ome uje qué caratape gu. Jec ũré uje cáma dimane uágome pacajnaqué etógode ica, mu jé uacate uje cáma dimane uágome pacajnaqué etógode iji deréjnane unojo to.

³ Chamáñaje páyipie ayoredie u uje qué chijocase uacáyipiedie. Uje uacaratáyiñome cuchade ome ñane; uacabotáchopo ñane rĩ; enga uacajuchopo ñane ajei to rĩ. ¿Ama jé ca uacadode udore cho erámi unirisórone adode uje Dupade anguresórojma ore a? ¡Obiréjna uje uacasocade jé chopise udore ore isocade arĩa!

⁴ Ga yósi tome uaque gu uje uacuñéngo chojninga: "Uyu ga yangaráni tu Páblo." Ga uñane ore chojninga: "Mu uyu ga yangaráni tu Apólos." Enga uacasocade udojo jé chopise erámone jogosórone ore isocade uje cáma ore chiraja Dupade gotique.

Páblo cho coríntogosode ore quique ujetiga ore chedu cho cuchadatépisiji Dupade uté ome úringai Pirósõre

⁵ Yijorane uaque á, ¿Cuchárique u gu a uje uacoyo cuchadatéji Apólos, jé aja Páblo uyu to a? Cachi Dupade irócho uyoque arĩa, ujetiga yajnerangome Pujnomé Ueradi quigode ome uaque. Enga jé u uje uacanguretáyo Yocangarádejnai ome yocacajnaquéode udore. Enga yoquisocai uté chajnapise yocajnepídode uté iroquéo uje uté chisíome Apólos, Páblo uyoque jnese.

⁶ Enga yacãra yoquisocai uté aja utácai uje chaca dacade cucha iji dejnai uté. Ga uyu u uje yaca cucha ajñunie iji. Jé basa ga Apólos u uje chuta. Uje yicoi trabájo ome jnese, mu gusúpusu Dupade uje pésu cucha pacade udore iquéraningane.

⁷ Jecute pijoque uje que cuchadaté acasṍri gotique. Enga que cuchadatépo utangóri uté to rĩ. E mu gusu cuchadatei tu Dupade uté uje ipesute cucha pacade udore iquéraningane.

⁸ Ga adójnachopó rĩ uje cucha pacade acasṍri, utangóri jé ore gaidi cucha chojmara uje ore doi Dupade iroquéode. Enga Dupade a cho oré udore ore jnese jne, enga oredie a jé chirate iroque chojmara, chojmarane udore ore isocade jnese ome dajnéone uté iroquéo.

Apóstol Páblo uté chacãra coríntogosode aja Dupade guejnai, jé aja pipesudi guiguíjna uje ipesungóri u Dupade uté

⁹ Yujode Dupade anguresõre uaque á, jé ũré uje Apólos, jé aja Páblo uyu ga yátagoja ñane ome yoquisagode Dupade iroquéo. Enga jé u uje yoco utácarique irógode uje ore pésu darósõri uté guejnai. Jé basa ga coríntogosode uacajnúone u Dupade guejnai uté. Mu yacãrápo uágaja pipesudi guiguíjna rĩ uje ipesungóri u Dupade.

¹⁰ Enga yajnui tu guiguíjnai uté ipesungore irajatai rĩ. Chamáñaje Dupade chiroque yu ome dacaniratiguédatéi uté ujetiga yacate uágome Jesucrísto ujnomei. Enga gajnui tu uje yipésupúsu guiguíjna porai uté ero taja. Enga uñane ore chajnerame yipesudode údi aja gaté iji deréjnane udojo. Mu Dupade iroque chojmara, chojmarane udore ore jnese gajnepídi u ujetiga ore chusípise dapesudode guio uje ore chimate aja gaté.

¹¹ ¡Que toque gu ujetiga udore uñeque doi enga chicha ero uñáraque aja údi gaté arĩa! Chamáñaje Jesucrísto gajnui u guiguíjna porai uté ero, uje e yicháji jogadi. Enga que ero uñáraque cuse; gusu Jesucrísto.

¹² Ga adójnacho to uje udore ore uje ore chimate guiguíjnai uté aja gaté ga ore oidode cucha cháji ñane yúode. Ujetiga uerate gosi ipesudode enga gajnui tu ujetiga chicha óro, pláta, cucarané orerenie aja guiguíjna porai uté ero uje pésu aja gaté. Jé basa ga ujetiga gajnareque gosi ipesudode enga gajnui tu ujetiga uté chicha táblade, jnacarade, porójodie ore aja.

¹³ Mu a pipañaite Dupade irógode ipesudode cucha jnese jne. Ujetiga Jesucrísto di ga a chuchẽri cucha dacadode udore iji guesode jnese, enga a pijoque jne ujetiga ueracho, jeoga gajnarécho gosi ipesudode. Chamáñaje Dupade uté a chijna pioi tome yoquipesudode cucha jne iji diri uté. Enga chetingare yoquipesudode cucha jnese ome pioi.

¹⁴ Ujetiga ca pioi tagu uyoque gosode ipesudode cucha enga imoi tu uje cucha omío enga a Jesucrísto cho yocoré jne.

¹⁵ Mu ujetiga pioi chejna yocuñeque ipesudode cucha enga uté gosi chachia re ome dapesudode udore. Mu uté gosi a jé chapite ome Dupade ujuyaquédatéi jne. Mu gajnui a u jne ujetiga piotique juseque mu jé piquetaque.

Dupade e cho daguíjna cuchábi iji danguresórone, da-iglésia uaté, enga que juéga jeta gosi pésu Dupade iguíjnai uté gajnarétigai

¹⁶ ¿Ama jé ca arajáyo a? uje Dupade e cho daguíjna cuchábi iji uaque uje cãraque uágome re, enga uté Ujopié Espíritu Sánto u uje déji uacajei.

¹⁷ Jecute ujetiga gosi gaidi u Dupade iguíjnai uté úringai pajnangarañaque aja jnumi enga Dupade a chejna uté gosi jne. Chamáñaje puyaque Dupade iguíjnai gu. Enga ojningai tuté daguíjna cuchape jé upúsu uaque.

Páblo aquĩraquéode déji ome udore ore uje ore chisi dabai ome darajatígadatéode ome erámi tudé adode

¹⁸ Yijorane uaque á, jé ca aráño uaque. Ujetiga uaque gosi cho irajatáguiji re ome payuquetotiguei uté uje tṍraji erámi tudé adode, mu uté gosi gajnepídi tu ujetiga chosi riji jnumi enga cho re iji gosi uje cáma chiraja cuchárique. Ujetiga erámi unirisórone ore cho táyipieguiji uté marínga, a quene jogadi u jne ujetiga uté chise dáringai irajataque ome pirajatíga uréone quigode.

¹⁹ Chamáñaje iji Dupade edominone ga pitáyipietigade u erámi unirisórone ore irajatigade. Enga Dupade áyipie quigode udojo pijoque iji ore urusarane Dupade urúo, uje chósi te: "Irajatade ome erámi tudé adode ore cho irajatáquedatéi iji raque ome dáyipie quigode jnese, mu Dupade pésu jeta ore áyipie quigode udore nóña ga trámpa u ome ore uje chisa ore ¡saque! Enga jé u uje ore úringane taque pijoque ome erámi."

²⁰ Enga ore urusarane Dupade urúo dépoji rĩ uje chojninga: "Yocangarádejnai Dupade chiraja irajatade ore áyipiedie jnese iji jnumi tudé, ga chiraja uje que cuchárique tṍraji ore áyipiedie udire gotique."

²¹ Jé ũrépise uje Dupade cho cucha bisidéguiji pirajatigai uje garani tu erámi tudé, yijorane uaque á. ¡Jecute jé ca dicotare uaque uñeque ome dacadisṍri dojo ayoré uté! Yósi tome uaque gu uje cuchade jnese e déji coríntogosode uaque ujetiga agutíyañome.

²² Enga jé chuságaja Páblo uyu, jé aja Apólos, Pédro ore to rĩ, uje uacajneque uyoque ujetiga yátagoja uaque. Uacajnengápo erámi udé rĩ. Uacajnengápo pucuecaringuei, pitoringai ore rĩ. Uacajnengápo cucha dacadode jnese iji dirode unojo rĩ. Enga a jé chopome cucha piqueminórone jnese rĩ uje a tocade jne iji yoquiquei, uje uacajnengápo rĩ.

²³ Enga Jesucrísto gajneque uaque. Enga Dupade gajneque uacajnengóri Jesucrísto to rĩ.