1 Coríntios 2 - Dupade Uruode

Páblo chatata dajmapié uaté uje chise coríntogosode ore iji taningai enga chacate ore ome Jesús úringai pajópi aja curesei gai

¹ Yujode Dupade anguresóño uaque á, ajnusináño yijmapié uaté uje yise uaque ica enga yacate uágome Pujnomé Ueradi uté uje garani tu Dupade. Uacapáñañoji uje que yo irajatáguejnaji yu ome yatatagode udore iji uacajade ujetiga atijayo yuruode gotique.

² E mu yipésupúsu yáyipie ujetiga jé ca yimere cucha uñénguiji yatatagode uje yugúsi uacari ica, mu yedu Jesucrísto adode uje yacate uaque. Enga cuchiyi tupúsu uté itoringai uje yacate uágome ica uje chuque uté iji curesei gai ome yoque.

³ Mu uacamóño Páblo uyu uje serẽrachuque yu uje yingo yu aja uaque ica, enga yitãrarápo rĩ ome yisadodéringajnai uje yugúsi uacaquei.

⁴ Enga que yijna jnani irajatáguejnane isocai uté uje ore narare ga ore pota ujetiga ore ujode ayoré tija ore ayuquetotiguei ome dacajnaquéode udore. Jé ũré uje que yinejequei u gotique uje pésu uacanguretigai iji Dupade ica uje yacate uágome Crísto adode. E mu Dupade Ujopié Espíritu Sánto tagúome yacajnaquéode ujetiga chingongara detotiguei aja uaque, enga jé u uje pijoguipise yacajnaquéode udore úringai ũré ome uaque.

⁵ Que yigaidi u gu ujetiga oyo uacanguretigai ero iji payuquetotiguédaté guesíminónique; mu yigaidi u ujetiga eduyo achayo uacanguretigai aja Dupapísi etotiguei uté.

Apóstol Páblo acajnaquéode quigode, jé aja ujode Dupade irócho ore acajnaquéode quigode garani u payuquetotiguei uje tṍraji Dupade Ujopié Espíritu Sánto uaté

⁶ Jé ũrepise uje payuquetotigué guesíminórone gaisórone ore cho cucha bisidéguiji yocacajnaquéode. Jé basa ga Dupade anguresórone uje etoque ore iji uté adode ga ore chopise payuquetotigué ũréji yocatatagode udore. Chamáñaje que garani u erámi tudé unirisórone uñeque ayuquetotiguérique. Enga que tõrapóji peduguéjnane ayuquetotiguei iji erámone udojo rĩ, uje udore ore úringane eduguéjna a chise deruénique jne ga e que cuchárique tõrapóji ore rĩ.

⁷ E mu Dupade áyuquetotiguédatéi quigode u uje yajnerangome uaque. Enga cuchiyi tupúsu Dupade áyipie pipoguiédedie udire uje pésu ome uyoque nanique uje cáma pipesute erã́tique. Ome ayuquetotiguei uté ga chichaga cucha ueradéjnapísode aja yoqui nanique ujetiga yagutíyangome uté ingoningájnai to. Mu Dupade que chijnime dáyipie iyajmenie udire ome uñeque nanique, mu quene chuchẽri udire iji guesode iji deréjnane udojo.

⁸ Jé ũré uje que erámone jogosórone eduguéjnane uñeque chiraja Dupade áyipiedie udaji nanique go. Ujetiga ore chirajárase enga a jé ca ore chajórase Yocangarádejna Pitijabáidi uté aja curesei gai nanique.

⁹ Mu que ore chiraja, enga cucha dacate tocachugode udojo jé cho proféta uñai urusarane iji Dupade uruode, uje chósi te: –Ueradipíso Dupade ipesudode cucha uje e dimane ome dajnorasórone ore yui. Que ayoréode uñeque pañaji cuchade udore iji erã́tique. Jé cho uje que pududique udore ujnomérique ome ayoréode uñeque rĩ. Enga que pipesute pajéningome cucha dacadode udore rĩ, uje ore suépise erámi unirisórone áyipiedie gáyode jnese ome dáringane ueracho.–

¹⁰ Jé ũré uje que ayoréode uñeque chiraja cuchade udore quigode nanique. Mu Dupade e tagúome Dajopié Espíritu Sánto ujetiga chijnime uté áyipie pipoguiédedie udire ome yoque. Chamáñaje Dupade Ujopié Espíritu Sánto chidójnangapísa cuchade quigode jnese, enga jé chuságaja Dupade áyipiedie jnese rĩ uje déji uté ajépisi.

¹¹ Ga yacãra yuruode udojo aja yoquisocai iji de erámi, yijorane uaque á: Que togome ayoréode uñeque ujetiga chiraja dojórique ayoré áyipiedie iji ajépisi, ¿jec ũré? Mu gusu ayorei uté gosi uje chiraja dajéode arĩa. Enga adi jé upo ome Dupade rĩ. Que uñeque chiraja Dupade áyipiedie quigode gotique. Mu gusu Dupade Ujopié Espíritu Sánto uje chiraja uté áyipiedie quigode udore.

¹² Adójnacho uje e yocajné tu Espíritu Sánto uaté uje tṍraji Dupade uté, enga que yocajné páyipieraque uje tṍraji erámi udé gotique. Chamáñaje Dupade guerané Dajopié uaté ome yoque gu ujetiga yirajágo cucha ueradipísode udore quigode uje Dupade gueranome yoque gu dacaniratiguei uté.

¹³ Jecute yocacajnaquéode quigode jé upúsu cucha ueradode udore. Uje yatatago udore mu que yajome puruode uje tṍraji payuquetotigué jnutiminórone go. E mu yedugo Dupade Ujopié Espíritu Sánto uruode quigode uje uaté e chacate yocáyipiedie ome bajaque. Enga jé u uje yajnerangome cucha uréone udore quigode ome udore ore uje Dupade Ujopié uaté e déji ore ajei.

¹⁴ Mu adójnacho ujetiga Dupade Ujopié Espíritu Sánto ca déji gosi, enga uté gosi que chimesẽre cucha uréone quigode gotique uje tṍraji Dupade Ujopié uaté. E mu cho cucha bisidéguiji. Jé ũré uje que togome uñeque ujetiga chiraja cuchade udore quigode ujetiga jé ca Dupade Ujopié Espíritu Sánto chacate gosi áyipie ome cucha uréone udore uje garani tu Dupade.

¹⁵ Mu ujetiga Dupade Ujopié Espíritu Sánto u uje chijocase gosi áyipie, enga uté gosi chidójnangapísa cucha uréone quigode jnese uje tṍraji Dupade Ujopié uaté. Jé basa ga gosi uje agúpurai ome Dupade Ujopié uaté ga que toque go ujetiga chiraja cucha dacadode quitígo iji Dupade Ujopié gajnesónique ayoré.

¹⁶ Enga cuchade unojo jé cunguésõri profétade uñai urusarane Dupade urúo, uje chósi te: –¿Ama ayoréode uñeque chirajárase Yocangarádejnai áyipie quigode, ujetiga uté gosi chacadírase Yocangarádejnai uté ome cuchárique a? ¡Úngare!– Jé ũré uje que toguírase ujetiga erámi unirísõre guesíminórone ore chiraja Dupade uté áyipie quigode gotique. Mu ome uyoque uje Dupade Ujopié Espíritu Sánto e ijocáya yocáyipiedie enga jé u uje Crísto áyipiedie pijógome yoque to.