1 Coríntios 16 - Dupade Uruode

Unere ome Dupade uje chimo danguresórone icaniratiguepísode

¹ Yurusãraque ejode unojo júdi u uaqueranone ome yocujode Jesús anguresóño iji Jerusalén. Enga ujetiga amátayo uaqueranone aja, enga beyoi yacajnaqué casodica uje yingome Galácia jogonórone ore iji ore uáguedie jogadode ica.

² Ca amócho domíngone ujánique ujetiga amátayo uaqueranone cucha omío ome Dupade jnese. Enga uaquẽratígo cucha jé chirate uacasagode orérigui to. Enga ajuso uacamátadie plátai guio enga dimane jne iji yiríringárique. Que yipota gu ujetiga oyo uaquedójnaringuéo ome uacamátadie udire ujetiga yugúsiji uacari dirome.

³ Ujetiga yise uaque jne enga a yiroque uacajegaitígo jnanío jne aja Jerusalén ujetiga ore chijnoque uacamátadie plátai aja ore. Enga a ore chijnongapo yurusãratígo aja ore rĩ ujetiga jerusaléngosode chiraja ore úringáringo yocutocaite.

⁴ Jépoga ueratigárique erase jetiga yicai Jerusalén to ga socaseti yijínango ñane aja dajei jne.

Páblo cho quique dacoringane adode ome ore

⁵ Ujetiga e yiji jne enga a yicabíji puniri Macedónia jne. Mu quigade ga a yise uáguiji uaquedai Corínto to jne.

⁶ Ujeta e yise uaque jne enga que yiraja yejnatígo díño iji uacari. Mu socaseti Dupade ajéo, enga yejnape esoi iji uacari iji uaquedai jne a. Mu ujetiga e yijiaporásiji uacari enga yajéode u ujetiga átayobárasaja yu to ome yiquitique guidai yui, jeta yiji Dupade uruode údi aja diquidai uñéngo to.

⁷ Que yajéode u go ujetiga jĩraque yo yedójnari doi tiji uacari. Jecute ujetiga Yocangarádejnai ajéo ga a diyajmángape yu jne iji uacari.

⁸ Yajéode u ujetiga judíode yocujnusinamáni dire Pentecostés qué chise yu iji Éfeso uné jne. Quigade jne enga yicáji uaque to.

⁹ Uje uásejna éfesogosode uñane uje ore tangaripísi yacajnaquéode ome Yocangarádejnai Jesucrísto adode. Jecute que yipota jeta jĩraque yiji iji éfesogosode ore gari. Mu uñane déji to uje que ore chise yacajnaquéode unétique enga gajnarénguei ore áyipiedie ome yu.

^10-11 Ujetiga Timotéo chise uaque jne enga ca eso unerotiguérique jne. Mu ajusópise guio jne, ujetiga ca cuchárique chona to. Uacamóño uje uté cho yu uje doi Yocangarádejnai iroquéode to. Ujetiga e dimane ome daqui yui enga beyoi enga osṍcho uté jne ujetiga ca cuchárique chona iji dajei. Uje uté qui a u Éfeso jne uje ibaguiédi tu yu. Enga yijorane uyoque yijnátugo uté yui.

¹² Yijócha yoquijõrai Apólos ajei údi diríca ujetiga chamáta dajorane uñane enga ore nóna uté aja uaque. Mu que chicáji diríca. Mu socaseti chise uaque iji dire uñeque jne ujetiga piotiguérique déji.

Páblo cho darusarane eruei iji darasitigade ome coríntogosode ore

¹³ Ca oyo caru ujetiga ãrijínaño uaquejode enga apúyoja uacanguretigai. Ca oyósi disi parátagabode ome Dupade uruode, mu oyo jnanione uje etoc ore iji Dupade adode.

¹⁴ Omi tu ujetiga uacapesudode cucha jõrai jec u pijnoraquei to.

¹⁵ Uacarajáyo uje bajaque Estéfanas jogasui ore uje ore changureta Jesucrísto iji ore uniri Acáya nanique. Enga iji deréjnane unojo udore ore áyipiedie dépisiji dojode Dupade anguresóño ujetiga ore cháta cuchade aja udore ore jnese to.

¹⁶ Enga yijócha uacajéode údi ujetiga ca ajusécho udore ore urúrigo to. Mu que gusu Estéfanas jogasui ore gotique, ujetiga angáchoi ore, mu adójningachó uacátajasórone ore jnese enga angáchoi udore ore to.

¹⁷ Yirasiguipise yu diríca uje uacarasade Estéfanas, Fortunáto, Acáico ore chise yu iji ne. Yiraja uje uacajé jóroguio to ujetiga abáchoi yu to ujetiga apéso yininaquérique to. Mu a ca togome uaque jõ.

¹⁸ Ore pésu yiquéraningai ome yanguretigai diríca uje ore déji yari. Jé cho uje ore déji uacari enga ore pésu uacaquéraningane to ome uacanguretigai. Ujetiga uacojode Dupade anguresóño ore isocade u udore ore adode enga ca ajusécho ore.

¹⁹ Dupade iglésidie uje ore uáguedie déji ore uniri Ásia, ore pota ujetiga yatata ore irasitigade ome uaque to. Jé chopome Aquíla, Priscíla, ore ujode Dupade anguresóño rĩ uje ore chamáta ñane aja ore iguíjnai. Ore chiroque dasalúdode aja uaque to. Uje ore chiraja gu uje Yocangarádejnai anguresóño uaque.

²⁰ Ga uacajnéone u yaríjogosórone ore irasitigade jnese. Enga yocajéode u ujetiga uacajnoraquéode pijógome ñane enga cho jetiga acho uñane uredie.

²¹ Enga e Páblo uyu yurusaranguipíso yurusarãque erueminórone unojo ome uaque. Yigaidi u gu ujetiga arajáyo yijnoraquédatéi to ome uaque.

²² Ujetiga uñeque ca chijnóra Yocangarádejnai Jesucrísto to enga jé tiógara ujetiga pamacarãque uté gosi. Yangarádejná, bajneque yuruode unojo: "Jĩraque ãri iji yoque."

²³ Yajéode u ujetiga Yocangarádejnai Jesucrísto chatapísaja uaque jnese jne ome dacaniratiguei uté.

²⁴ Yijnoraquéode gajnengórone jé u uaque jnese uje uacanguretáyo Jesucrísto. Amén.