1 Coríntios 15 - Dupade Uruode

Páblo chacate ore ome Jesucrísto ĩrijíningai adode

¹ Yujode Dupade anguresóño uaque á, yajéode u ujetiga ajnusináño pacajnaqué piquetangórone uje yacate uágome ica. Uje uacamesecho yacajnaquéode udore to ica, enga uacadotáyo uáguiji.

² Uacarajáyo uje uacáringane piquetacho garani u yacajnaquéode udore ome uaque. Jé basa ujetiga anguretáyo cucha uñéngo enga a ca cuchárique tṍraji uacanguretigade udore gotique jne.

³ Yingo yajnéone pacajnaqué ueradéjnapis ome uaque ica. Enga chopise ore urusarane Dupade urúo quigode to. Enga u uje Crísto toi ome yoquisijnaringuéone.

⁴ Quigade enga ore chijóchame Crísto mu guejnane dire gadióguiji dode enga ecápo rĩ. Enga ore urusarane Dupade urúo chatata udore quigode to.

⁵ Unojo quigade u uje chiqueta raja daroi Pédro, enga chiqueta raja darógode uñane to rĩ.

⁶ Chiquetápo raja danguresõre dipeséode ore to rĩ uje ore guejnanie u 500. Cási jnese iji udore ujade qué eca, mu uñane e ore toi.

⁷ Quigade enga chingopo raja Jacóbo rĩ, mu unojo quigade enga chingopo raja daroguipísode uñane jnese rĩ uje apóstoles u ore.

⁸ Mu ejo yu uje chingo raja yu to nanique. Jecute yajnui tu disi pati iji daté ajei uje que base míraque. Uje ejopise yu ome Jesús irógode uñane ore ome yúringai Jesús apóstol to.

⁹ Mu que yipijoque iji yujode Jesús irócho ore ujade. Enga que yudujnui gai to ujetiga ore cho Jesús iroguipísiji yu to. Chamáñaje yo yumajo uté anguresórone nanique gu.

¹⁰ Mu yibasája yúringai Jesús apóstol ome Dupade átegoningáne ome yu nanique. Enga que yachia Dupade átegoningáne udore ome yu. Uje yise yúringai isagócadaté ome Dupade iroquéode. Enga yujnué yujode Jesús irócho gáyode ome yisacuátigade cucha. Mu cachi Dupade angúromei u yu ome daroquéode, jecute que tiógara ujetiga yisi yibánique.

¹¹ Jé cho ñane ujetiga yacaditigade u, jeoga yujode Jesús irócho ore acaditigade u. Uje yocacajnaquéode quigode jé chopise ñane iji jnumi jnese. Enga udore u uje uacanguretáyo to nanique.

¹² Uacarajáyo uje yocacajnaquéode udore júdi u uje Crísto toi mu ecápo rĩ iji dáringai toque quigade. Jecute ¿gotique gu a? uje uacuñane chojninga: "Toque totique enga que qué pĩringarangápo aja gatérique rĩ."

¹³ Ujetiga jec ũré uacaruode uje uacojnicho: "Togode que niji iji pitoringai go," enga a ca Crísto niji to nanique iji pitoringai.

¹⁴ Mu ujetiga Crísto jé qué déji dode enga a cachi yocacajnaquéo ome uaque jõ. Enga a ca cucha dacatique tṍraji yocacajnaquéode udore ome uaque jõ. Enga uacanguretigai ome Crísto a cucha bisideque to jõ.

¹⁵ Ujetiga jé ũré uaque enga a taque yoque jõ ome yocatatagode udore uje yojnijo: "Dupade chiringare Crísto iji pitoringai." Ujetiga jec ũré enga togode que ore niji iji dáringane toque quigade enga jé basa que ũrepo to rĩ uje Dupade chiringare Crísto iji pitoringai.

¹⁶ Ujetiga jec ũré ujetiga togode ca ore nijiápo rĩ enga a adi jé u Crísto to, a ca nijiápo to rĩ iji dode jõ.

¹⁷ Jecute uacanguretigai ome Crísto a cucha bisideque ujetiga jé ũré enga ca uacangureni tuté niji iji pitoringai nanique rĩ. Enga a ca pĩrocho uacasijnaringuéringo gotique to jõ.

¹⁸ Enga jé cho yocujode Dupade anguresóño togode, a cucha bisideque to jõ ore anguretigai ome Crísto iji dáringane ueca nanique. Enga a e bijnaque udore ore ome Dupade to jnese.

¹⁹ Ujetiga Crísto ojningane cucha gusu ome yocucuecaringuei tuté enga cucha bisideque yocanguretigai. Enga a jé tiógararása ujetiga erámi unirisórone chosõre yógome ayoréode uñane jnese.

²⁰ Mu ũrei tu uje Crísto nijiápo rĩ iji datoringai quigade nanique. Enga uté cho bajágu re ome pĩrijíningai. Mu quigade ga uté anguresõre uásejnane a ore niji to jne rĩ iji pitoringai.

²¹ Yirajágo uje pitoringai chise yoque jnese gu jnani chojmarai isijnaringuéone nanique. Enga yirajagópo rĩ uje pĩrijíningai chisápo yoque gu jnani chojmarai agótedatéi to rĩ.

²² Jecute yitogoi jnese gu uje yocãrapi u Adán. Jé basa yiquecágopo jnese to rĩ uje yocajnengóri u Crísto.

²³ Mu a ca yijnátugo yocúringane nirijío jne. Uje Jesucrísto gajnei tu ujetiga niji bajaque. Quigade ga ujetiga uté diapo jne rĩ enga jogadi a jé u jne ujetiga chiringare danguresórone uyoque jnese to.

²⁴ Enga jogadi u jne ujetiga cucha ponáyone chaquesu re jnac. Enga Crísto a chinoningase eduguéjnane jnese úringane eduguéjna. Enga a chinoningásapo pujopiedie úringanie ujopíerẽ́ jne rĩ, jé aja Satanás utocaidode uje ore jogadi u gaté yui ome ore úringane Satanás utocaicho. Enga jé u ujetiga Crísto chisi ome erámi ome Yocai Dupade ujetiga e ore eduguéjna cuchábi tu iji jnumi.

²⁵ Uje Crísto e gajneque erámone ujetiga chijocase, enga a jé chuságaja jne ujetiga dayé Dupade sué uté umajosórone gáyode jnese.

²⁶ Mu Dupade umajósõre erueminóripísi a u pitoringai jne ujetiga suépo gai rĩ.

²⁷ Dupade uruode chacate yoque uje Dupade pésu Crísto úringai pujnuéngaisṍre ome cucha ponáyone jnese. Mu uruode que qui tu go jetiga Crísto sué dayé Dupade gai to. Chamáñaje Dupade uté u gu uje ipesute dajnacari úringai pujnuéngaisṍre.

²⁸ Ujetiga Dupade e chicha cuchade jnese aja Crísto guídade údi ome uté úringai pujnuéngaisṍre enga a jogadi u jne ujetiga Dupade ujnacari Crísto doi to jne enga chisi ome re ome dayé Dupade to. Chamáñaje dayé Dupade guẽrate cucha ponáyone jnese nanique gu ome. Enga jec u jne ujetiga pujnuéngaisṍredatéi tu Dupade ome cucha ponáyone jnese.

²⁹ Uacuñane chojninga: "Que ayoré totique niji iji dáringai toque." Mu ¿jé gotique gu a uje uacacáyo ñane edodie iji yodi ome uacajõra totígo? Uje chiese uacapéso udore gu ujetiga piquetaque uacajõra totígo udore to. Ujetiga togode jé ũré enga ca ore niji iji datoringai ¿jé gotique gu a uje uacacáyo ñane edodie iji yodi ome ore?

³⁰ Ujetiga taque yógome yocacajnaquéode ¿enga jé gotique gu a uje yoco yoquiba yocatatagode udore iji deréjnane jnese?

³¹ Yugúsiji pijmongaquéode jmainie iji dirode jnese. Que yimo dínique ujetiga e chuque yu. Mu que cucha yúringai pumajo go. Uje yininaquei ome uaque suépise cuchade unojo gai jnese gu uje e uacanguretáyo Crísto to ome yatatagode Dupade urúo.

³² Yumajosórone iji Éfeso ore gajnúone u carataque surungúone. Uje ore chetaguipise yacajnaquéode. Enga cho ujetiga yipésõra udore ore. Jépoga cucha bisideque cuchade udore jnese ujetiga taque yógome pĩrijíningárique rĩ. Enga uréone a u udore ore uje ore chojninga: "Yicoi enga yinínango yóguiji erámi tuné. Yajo yoquibose unérone, enga yójigo yoquijote unérone rĩ. Chamáñaje a yitogoi dirome jne enga yoqueruei e u."

³³ Jé ca aminingara ua ome cucha gajnaréngone ipesungórone. Ajnusináño pacajnaqué diyajma cásodicáite uje chojninga: "Ujetiga gajnareque bajõrárique atígo, enga bajína uté enga jogadi tu uje barate uté aja ate gajnaréngone enga a e ca esápo cucha arégode unétique jne rĩ."

³⁴ Jecute ajníño Dupade gai enga beyopoi uacate arégode rĩ. Enga ajusópo uacajéode guio rĩ. Enga ca apéso pisijnaringuéone. Uje uacuñane que ore chiraja Dupade gotique. Yósi tome uaque gu ujetiga ajéchome uaque.

Páblo cho quique Dupade anguresórone ore úringáringo nirijío iji pitoringai

³⁵ Mu ísenga uacuñane pota ujetiga qué yo quique cuchade udore ome uaque. Enga uacojnicho: "¿Jé pisocáringome pĩrijíningai tuté gotique jne a? ¿Ma yoquibai jé upúsu yoquibai ayorei tuté jne a, jeoga unejaque?"

³⁶ ¿Ma ca arajáyo a? uje cuchade unojo dóji guesáringane arĩ́e. Cho cucha ajñu pacadie. Uje paca cucha ajñua tuaté enga cho ujetiga togué iji jnumi uje pijóchõro. Mu pigaidi tu gu ujetiga ujniéraque cuse enga sué.

³⁷ Yirajágo uje que gosi doi enga chaca cucha ujniéraque. Mu gosi acai tu cucha ajñua; jeoga trígo u, jeoga cucha ajñu uña.

³⁸ Ujetiga e paca cucha ajñúraque ga Dupade u uje pésu rĩ enga quérã. Enga Dupade que chécãre atique aja guesi. Jecute ujetiga pacaque guejnárique ga sué ga jé guejna. Enga jé isocai tu uné ome cucha ajñunie jnese.

³⁹ Yirajagópo rĩ uje ayoréode uyoque, jé aja cuchisode, chugúperone, oyídode, jé aja cucha uñane to rĩ, yingarángo yocaode ome ñane. Enga que yoco ñane gotique iji jnumi.

⁴⁰ Yirajágo to uje gaté unirisórone ore adode, jé aja ore enocha goningájnai cãra re ome erámi unirisórone ore adode, ore enocha goningane rĩ.

⁴¹ Jé cho guedé idírecaringuéi to rĩ, uje unejaque ome guedoside idírecaringuéi. Enga unejángapo guédodie idírecaringuéone rĩ. Yirajagópo rĩ uje guédodie ore idírecaringuéone cãra re ome ñane idírecaringuéone to.

⁴² Isocai jé u ome ayoré togode ore to rĩ. Ujeta ore chise dáringane nirijío enga a unejanguipise ore ao ichade ome ore ao bajade uje e pijóchõre ore ao bajai tuté nanique. Chamáñaje ore ao bajai tarata aja jnumi uté gu. Jé basa ore ao ichai a ca topoi to jne rĩ iji deréjnane jnese.

⁴³ Pequeteque ayoréode ore aoi uje ore toi. Jecute yijóchagóme ore aoi tuté. Jé basa ujetiga ore nijiápo rĩ enga a ca ore chajire re jne ome dangoningárique. Uje gosi toi enga bijnápise uté etotiguei ome re. Jé basa ujetiga uté e nijiápo jne rĩ enga a ca chajire re jne ome dáringárique etoguipise.

⁴⁴ Yirajágo uje pijóchõre yocao ayorei. Mu ujeta e yĩrijíngoji pitoringai enga jogadi tu jne ujetiga yocao gateminónique cusapo rĩ. Que potigayaquérique déji uje pao ayoréode cuse. Enga que potigayaquérique dépoji rĩ uje pao gateminórone cuse to.

⁴⁵ Ore urusarane Dupade urúo chósi tome yoque: "Uje Dupade tẽrája pucuecaringuei ome jnani bajai Adán nanique enga jé basa Adán chajnerame dajnei tuté pucuecaringué tome yoque ga yiquecágome to." Jé basa Adán uñai u Crísto to uje tẽra pucuecaringuei ome yoque to, mu pucuecaringué eyúgojma tuté guerani tome yoque. Chamáñaje gaté unirísõre uté gu.

⁴⁶ Mu yirajágo uje yocucuecaringué eyúgojmai tuté quene chise yóguiji yocucuecaringué ayorei quigade.

⁴⁷ Yirajágo uje jnani bajai pipesudíji jnumi enga uniri tu jnumi. Jé basa ga yirajágo uje gateminore jnani ejoi tuté. Enga Yocangarádejnai u uté.

⁴⁸ Yirajagópo rĩ uje yocao jnutiminóri chopise jnani bajai uté aoi uje pipesudíji jnumi nanique. Yirajagópo to rĩ uje yocao gateminóri a jé chopise Yocangarádejnai ao gateminóri to jne.

⁴⁹ Yocajnai tu yocãrapi Adán ome ao jnutiminóri iji erámi tuné. Jé basa yocajnai a upo Yocangarádejnai rĩ ome ao gateminóri jne.

⁵⁰ Yijorane uaque á, yipota ujetiga yo cuchade udore quique ome uaque: uje yocúringai tuné ayoré ajnoquéode cuse, arione cusapo rĩ. Jecute que toc ujetiga unojo chise Dupade idai to jne ujetiga Dupade cho darása iji. Chamáñaje yocúringai tuné ayoré que eyúgojma to gu. Jecute que toc ujetiga cháta raja cucha eyúgojmárique.

⁵¹ A qué yingoma cuchadatei tome uaque jne uje a cáma arajáyo to jõ, uje a ca Jesús anguresórone uyoque yitogoi jnese go. Mu a Crísto chécãre yoque to jne ujetiga di.

⁵² A tocade ¡janipe! jne, enga gajnui tu ujetiga gosi edodie cho simaque ga chojmára. Enga a jé u jeta pududique pubuchutique trompéta jocarãi ejopísi jne. Ujetiga pududique trompéta jocarãi uté, enga a jé u jne ujetiga togode ore niji enga e que toc ujetiga ore topoi rĩ. Mu uecade uyoque iji deréjnai tuté a jĩraque pecãraque yoque to jne.

⁵³ Yirajágo uje yocao ayorei toi enga que eyúgojma go. Jecute arei tu ujetiga yacágoja yocao gateminónique uje cucha eyúgojmai tu uté.

⁵⁴ Mu ujetiga e pecãraque yocao ayorei tuné, uje que bisitique pijoque ga toguébeque, enga a yibacója yocao uñai uje que qué toque ujetiga topoi rĩ. Enga jogadi a u uté jne ujetiga Dupade uruode tocade uje chósi te: "Dupade e chinoningasipise pitoringai, enga jnuéngaipise.

⁵⁵ Pitoringai á, ¿jé bajopiédaté casicaite déji rique jne a uje bequésãre yógome nanique a? ¿Báringai pujnuéngaisṍre jé déji rique to jne a?"

⁵⁶ Yirajágo ujetiga gosi chó Dupade iroqué bajade gai enga jogadi tu uje gajneque pitoringai. Jecute yirajágo uje yoquisijnaringuéone u uje ipesute pitoringai úringai pujnuéngaisṍre, enga doi enga chequésãre yoque.

⁵⁷ Mu yicoi enga yacãco Dupade gai ome derani tuté ome yoque uje chimate yógaja yocúringai pujnuéngaisṍre to uje yanguretágo gu Yocangarádejnai Jesucrísto.

⁵⁸ Yijnoránguipísode uaque á, yósi tome uaque: apúyoja uacanguretigai iji Jesucrísto jne. Enga ca oyo uacasagode cucha uja ome uté. Mu jé boyo údi enga oyo uacajuñame uágome iroquéode. Uje uacarajáyo gu uje a ca cucha bisidécho uacasagode udore ome Yocangarádejnai jne.