1 Coríntios 14 - Dupade Uruode

Páblo cho quique pisoca omone ujetiga gosi doi dara guichayade

¹ Jecute acueyopísi uacasocáringome ñane ujetiga ajnóraño ñane gaté. Mu acueyópoi rĩ Dupade Ujopié Espíritu Sánto gueranone pirajatíga ome uaque. Cuchiyi tupúsu pirajatigai ujetiga acacho ñane ome Dupade uruode.

² Uacuñane uje uacarajáyo dara guichayade uacacatecãraite ugurui u Dupade ome dara guichayade udore. Mu uacojode Dupade anguresóño que erã́tique ore chiraja uacarúrique. Dara guichayade udore jé garani tu Dupade Ujopié Espíritu Sánto to, mu cho ujetiga pipoguiédei parecujaidie udire.

³ Jé basa ga yagutíñangome yocacadisórone acaditigade ome Dupade uruode. Enga udore ore acaditigade ijnimique yógome panguretigai ome Dupade ujetiga yiquérango to iji adode. Ujetiga yoco yocáyugu yoque enga yudúco udore ore acaditigade enga jĩraque yiyágo yocujnusiétigade. Jé chopo rĩ ujetiga yocanguretigai chicáji jnumi mu uje yangácoi ore acaditigade enga yocanguretigai jĩraque chicapoi gaté yui rĩ.

⁴ Yirajágo uje dara guichayade irajasórone ore catecã́ri Dupade ome darajade dara guichaya enga jĩraque ore quérã to iji Dupade adode. Mu gusu ore. Jé basa ga Dupade uruode atatasórone uje ore chacate ore ome Dupade uruode, que gusu acadisórone ore uje ore quérã iji Dupade adode, mu ududisórone ore quérã to.

⁵ Yajéode u ujetiga arajayórase dara guichayade jnese to. Mu yajegaidi tupúsu ome uaque ujetiga arajáyo Dupade uruode quigode enga atatayome ñane. Uje gosi chacate ore ome Dupade uruode enga sué dara guichayade irajasórone gáyode. Jé basa ga ujetiga dara guichayade irajasónique doi enga chatata daru quigode ome yoque enga quene jogadi u ujetiga yagutíñangome to.

⁶ Jecute a yisírase uaque enga a yacadírase uágome yirajade dara guichaya, mu a ca cuchárique tõrarásiji yacajnaquéode udore ome uaque. Chamáñaje que arajáyo quitique gu. Mu ujetiga yatatatígo urásu Dupade ingoméone cucha ome yu, jeoga yirajatique cucha, jeoga yo quique Dupade uruode uñéngo enga yacaditigade unojo urásu ujetiga chatapísarásaja uaque jõ. Chamáñaje uacaruode u gu, enga jĩraque uacarajáyo quigode.

⁷ Yirajágo uje que cucha pijocayade ucuecaringuérique cuse, mu a jé yacãra yacajnaquéode aja udore jne. Ujetiga gosi chijna purusarane ome uje chijocase dajocayatique, jeoga dabuchutique, mu uté jorane jĩraque ore chiraja iradedie achachagúgode, júdode to rĩ. Mu ujetiga gosi chapúsaja uje chijocase enga que diquirajaque iradéraque, achachagútique ome.

⁸ Isocai jé u to soldádode uje ore déji pocaningárique gai. Ujetiga ubuchui ubuchungóri chapúsaja uje chubúchu dabuchui enga a ca soldádode ore timíningarása go. Mu ujetiga ubuchungóri pésupúsu aja quigode enga jĩraque soldádode chiraja uje ũré ome dabuchui uté enga jĩraque dimane ore ome damajósoningo yui.

⁹ Enga cuchade unojo cachi péroji uaque to. Uje uacachome dara guichayade uje uacacacho uacojode Dupade anguresóño enga jé ore tangári jórogui uacacajnaquéode. Que érãtique ore chiraja darasitigárique iji uacacajnaquéode udore. Cho jeta uacacadi tu guesáringarique bisideque.

¹⁰ Yirajágo uje dara guichayade déji erámone jnese, enga jecucha ga dara guichayade irajasórone cuse to.

¹¹ Mu ujetiga uñeque catecã́ri yu ome darúrigo uje que yiraja, enga e yirajágo uje purása quedéjna yógome ñane.

¹² Yiraja uje uneripise yui ome uaque ujetiga Dupade Ujopié Espíritu Sánto gueranone pirajatíga chise uaque to. Jecute beyoi enga acueyoi pirajatigade udore uje pésu uacojode Dupade anguresóño iquéraningane ome Dupade uruode to.

¹³ Mu ujetiga Dupade jé guẽrate dara guichayade ome uacuñeque, arei tu ujetiga uté gosi catecã́ri Dupade ujetiga Dupade chingopísa darade udore quigode ome. Quigade ga uté doi enga chingome dara guichayade quigode ome dojode Dupade anguresóño to.

¹⁴ Adi tu ujetiga yicatecãrirási Dupade ome yajnei dara guichaya uje Dupade Ujopié chisi ome yu, mu cho ujetiga yáyipie u uje catecã́ri Dupade, mu que yiraja yáyipie icatecãraitigade udore quitígo iji yúringai tuné ayoré.

¹⁵ ¿Jé yo ringome yu jne a? A ca yedu dara guichayade uje yicatecã́ri Dupade, mu a yicatecã́ri to jne ome yurúpisode. A ca yeduapo dara guichayade jne rĩ ome yiradedie, mu a yirate Dupade iradedie to jne ome yurúpisode.

¹⁶ Jecute ujetiga acãre Dupade gai uje bacatecã́ri, mu bangúromei u barajade dara guichaya, a ca togome bojórique ayoré jne ujetiga chiraja baruode udore uje agúpurai ome gu. Enga a ca togome jne rĩ ujetiga cháta raja bacotaquéode udore to ome Dupade. Uje que chiraja bacatecãraitigade quigode gu.

¹⁷ Ujetiga bacatecãráitigárigo uneréjna ome Dupade mu, ujetiga angúrome barajade dara guichaya enga que cucha dacatique tṍraji udore ome bojórigo Dupade anguresóño.

¹⁸ Yacãre Dupade gai uje yujnué uacabai ome yirajade dara guichaya.

¹⁹ Mu ujetiga yujode Dupade anguresóño yamátago yógaja ñane ome Dupade uruode enga que yajéo ujetiga yagúome yirajade dara guichaya. A catadé jóroguirase yacajnaquérigo ome yurúpisode marínga, cucha pagutíñamácho yacajnaquéode udore ome yujode Dupade anguresóño. Jé basa ga a yacadírase ore ome yacajnaqué umáningo iji yirajade dara guichaya, mu a ca pagutíñamaniráso yacajnaquéode udore ome ore, uje que diquirajacho quigode gu.

²⁰ Yijorane á, yajéode u ome uaque ujetiga oyósi disi parátagabode ore uje que ore chiraja pisijnaringuéone unétique. Mu oyópo jnanione ore rĩ ome ore áyuquetotiguédatéode.

²¹ Ore urusarane Dupade urúo déji uje chojninga: "Yocangarádejnai chojninga: a yangúroméone u dara guichayade, jé aja purása quedéjnane pijnanone jne ujetiga yicatecã́ri yurasade ore. Mu a ca ore timíninga yuruode gotique jne."

²² Dupade guẽrate pirajatigade ome dara guichayade gu ujetiga uruode otigayasórone chudute dajnéone pijmongaquéo ome raque. Jé basa Dupade guẽrate pirajatigai ome daruode atatasórone ujetiga ore ujode Dupade anguresóño chiraja Dupade isocade to jne ome raque.

²³ Ujetiga Dupade anguresórone uaque uacamátayo ñane ome Dupade uruode enga ajuso uacaruode guio. Chamáñaje ujetiga Dupade anguresórojmárique, jeoga Dupade anguresónique uje cáma chirajapise Dupade uruode chacája uaque mu chudute uacachorade uje uacacatecãchoi ñane ome dara guichayade jnese, jé socaseti chajuque uté aguté enga cho ũrusode iji uaque jne.

²⁴ Jé basa ga Dupade anguresórojmai tuté chacárasaja uacágueraque to uje uacagaidode u uacarúpisode ome uacacaditigade, enga uté a tangári uacacajnaquéode quigode. Enga diga chiraja dáringai sijnaque to. Enga pésu dáyipiedie ome re.

²⁵ Uje e chiraja dáringai sijnanguipise enga cha pógu dasijnaringuéone iji dajei. Mu a dorási enga chichaga dagataidie aja jnumi iji Dupade iquei enga a catecãrirási Dupade ome re. Enga a chojningárasa: "¡Obiréjnapis ome yu uje Dupade déji uacari iji ne!"

Páblo cho coríntogosode ore quique ujetiga ore susípise dasocade guio uje ore déji ñane gari ome Dupade uruode

²⁶ Jecute yijorane uaque á, agutíñañome ñane iji uacáguedie. Uacuñane a ore chijñecare jne, jeque uñane a ore chacate uaque jne, jeque uñane a ore chatata Dupade ingoméone cucha ome raque ome uaque jne. Jeque uñane a ore catecã́ri uaque ome dajnéone dara guichaya jne. Jeque uñane a ore chatata dara guichayade udore quigode jne ome uaque. Cucha omi tu ujetiga uacapesudode udore agutíñañome jnese jne, enga pésu uacaquéraningane jnese ome Dupade adode.

²⁷ Ujetiga dara guichayade irajasórone déji uacajade enga ore pota catecã́ri uágome darajade udore enga jé areque ujetiga gare ore, jeoga gadioque ore ome, enga gusu. Mu arei tupo rĩ ujetiga uñeque doi enga chatata udore ore uruode quigode ome uaque ujetiga arajáyo quigode jnese.

²⁸ Mu ujetiga jé ca uñeque déji ujetiga chatata ore uruode quigode ome uaque, enga areque ujetiga ca ore tagúome dara guichayade udore iji uacague uaté. Jé basa ujetiga gusu ore, enga ueradi tu ujetiga ore tagúome dara guichayade udore ujetiga ore catecã́ri Dupade.

²⁹ Adi jé u to ujetiga uacacadisórone ome Dupade uruode gare, jeoga gadioque ore to. Pigaidi tu gu ujetiga ore ujode Dupade anguresóño tangaripísi ore acaditigade iji Dupade uruode, enga ore pésu dajéode ome ore acajnaquéode quigode.

³⁰ Ujetiga gosi déji dacajnaquéode gai mu Dupade chingo daruode quitique aja udore uñeque enga arei tu ujetiga bajai tuté chope paraque uje jõrai qué chingo dajnéone Dupade urúo ome ore.

³¹ Jecute arei tu ome uaque ujetiga chojmara, chojmarane iji uaque atatayo uacajnéone Dupade urúo to ome ñane iji uacáguedie. Mu arocho ñane ujetiga uté cha dara enga quene jogadi u ujetiga gosi chatata darajatígo to iji Dupade adode iji uacáguedie. Chamáñaje jogadi u uté gu ujetiga arajáyo Dupade uruode udore to enga ajnusoi uágome Dupade adode gaté to.

³² Ujetiga gosi chingo dajnéone Dupade urúo aja uaque, mu omi tu ome uté gosi ujetiga susípise dadode guio.

³³ Chamáñaje Dupade que ajéode u go ujetiga yapúcoja te bisideque mu ipotigádi u ujetiga cuchade pijoque quitígo iji yocuáguedie. A jé yingo Dupade anguresórone uñane isoca omone ome uaque jne. Yigaidi tu gu ujetiga beyoi ore isocade udore to.

³⁴ Chequedíe ore gajnei tu ujetiga ore cho paráguiji uacáguedie uje uacagúsoi ñane gari ome Dupade uruode. Que pujuegate gu ome ore ujetiga ore narare. Uacamóño to uje ore urusarane Dupade urúo déji uje cho quique cuchade udore to. Enga quigode u ujetiga ca chequéraque doi ga ca basája jnanírique iquénique.

³⁵ Jé socaseti cáma chequé uaté chiraja pacajnaquérique quitique, mu arei tu ujetiga doi enga catecã́ri dabai ome udore quitígo ujetiga e ore déji daguíjnane. Uje gajnareque ujetiga chequéraque tṍraji dajñarenie ome darade uje pacadique yógome Dupade uruode iji yocuáguedie.

³⁶ Ajnusináño uje Dupade uruode que garani u coríntogosode uaque gotique nanique. Enga que gusuapo coríntogosode uaque to rĩ uje uacamesecho Dupade uruode to nanique. Jecute angáchoi uacojode Dupade anguresõre yocuñane to.

³⁷ Ujetiga uñeque iji uaque chiraja dáringai Dupade uruode atatasõre, jeoga chiraja uje Dupade Ujopié Espíritu Sánto guẽrate pirajatigade ome, a uté gosi urásu ujetiga chiraja to uje yacajnaquéode unojo garani upúsu Yocangarádejnai uje e yurúsãre ome uaque.

³⁸ Mu ujetiga uté gosi chotigase yacajnaquéode unojo enga taque ome dáringai Dupade uruode atatasõre. Jecute ca angáchoi uté gosi to.

³⁹ Jecute arei tu ome yijorane uaque ujetiga ójiyoi gaté ome Dupade uruode úringane patatacho ome ñane. Mu ca etácho ome ore ujetiga uñéngo pota catecã́ri uágome dara guichayade to.

⁴⁰ Gusu ujetiga arocho ñane enga ca oyo uaquedójnaringuéo ome uacacaditígarigo. Enga jogadi u uté ujetiga ca uacáguedie iyoguérique cuse enga pajmaránei.