1 Coríntios 13 - Dupade Uruode

Páblo chacate ore ome pijnoraquei quigode

¹ A irajatáguipísirase yu enga a yirajárase dara guichayade jnese. Datéringa ujetiga yirajapórase gaté unirisórone ore uruode rĩ. Mu cucha dacatique a ca tṍrarásiji yirajatigade udore ujetiga jé ca pijnoraquei déji yu. Enga a yiji enga yagúrasome yirajade dara guichaya udore, mu cachi yichora bisidécho. Chamáñaje pijnoraquei íjnonguiji yu gu.

² A yacadírase ore ome yajnéone Dupade urúpiso, enga a yirajapórase cucha pipoguiédode jnese rĩ ome cutejmai yirajatígadaté. Enga ome yanguretígadatéi a yiji enga yicatecãrirási Dupade ujetiga chécãre cucaranone jogadode, enga Dupade a dorási yuruode. Mu ujetiga pijnoraquei ca déji yu, enga cucha bisideque yadode udore jnese.

³ A yajuguínaporása yugúcharigo jnese rĩ ome ayoré jmatágode ore. Jeoga yopo yiba yatatagode Dupade urúo rĩ, enga ore chiborome yu rĩ, mu ujetiga pijnoraquei íjnonguiji yu enga cucha bisideque yadode udore to.

⁴ Pijnoraquei adode chósi te: ujetiga gosi chijnóra dojórique ayoré enga a ca uté gosi narañime dajõrai atique jne. Enga a caniraque uté gosi ome dajorane jne. A ca charatáyime cuchárique ome dajõrárique jne rĩ. A ca josipíerangápo ome dajõrárique ayoré jne rĩ, enga ca cho ayoredatei iji re rĩ.

⁵ A ca táyipiegapo jne rĩ ome dajõráringo ore. Enga a ca dicotárepo jne rĩ. Enga a ca jĩraque ájningarãque uté gosi jne rĩ ome dojode ayoréo. Ujetiga ujórique ayoré atique gajnaréngaja mu a ca jnusina gatuaque jne gotique.

⁶ Uté gosi a ca irasique re jne ome dajõrárique ipesutígo cucha gajnarécho. Mu irasitigai jogadi upúsu ujetiga chimo dajõrárique ga ũrepise ome atígo.

⁷ Ujetiga pijnoraquei déji uté gosi enga chidota re ome cuchade jnese, enga anguretigai que doi jnumi ome Dupade. Enga que cho dedójnaringuéo ome cuchade jnese rĩ.

⁸ Yirajágo to uje a yico Dupade idai jne enga a ca yajópome pirajatigade udore jne rĩ. Uje a ca pacadigápo ore ome Dupade uruode iji guéode uéchai jne rĩ. Enga a ca yocajegaidápo puru guichayade rĩ ujetiga yirajágo udore to rĩ iji Dupade idai. Gusu pijnoraquei jne uje a ca eruénique cusipise go iji deréjnane jnese.

⁹ Que uñeque déji erámone unojo gotique ujetiga chiraja cucha ponáyone aja quigode jnese. Gusu uje yirajágo cuchade péode iji udore, udore. Jé chopome Dupade uruode atatasórone ore rĩ. Que uñeque iji ore chijóchapíse Dupade uruode gai jnese, mu ore chiraja ducadode iji udore, udore.

¹⁰ Mu ujetiga yico Dupade idai enga a yirajágo cucha ponáyone jnese jne. Enga a e ca yocáyipieraque dépoji yoquirajatíga garósiode iji erámone unojo jne rĩ.

¹¹ Uje disape yu nanique enga yuruode u yujode disabío uruode. Yáyipiedie jé upo yujode disío ore áyipiedie rĩ. Mu uje e jnani yu, enga yiya disiode ore isocade.

¹² Que toc ujetiga yirajágo cuchárigo aja quitígo jnese iji erámi tuné. Mu udore gajnui u ajicaranone uje que urénga pijoque gosi tiji. Uje que pijoque cuchade jnese iji erámone unojo to. Mu iji guéode uéchai enga a yirajágo cucha ponáyone jnese to jne, uje a cuchade choqui iji guesode ome yoque jne iji uté. Mu que urénga yiraja cucha uñane iji erámone unojo. Mu ujetiga e yise guéode uéchai to jne enga jogadi tu ujetiga ca yeruojmárique cucha cuse. Dupade chirajapise yadode jnese, enga a jé yo uté to jne ujetiga yise gaté.

¹³ Panguretigai ome Dupade, jé aja panguretigai ome Dupade ojningane cucha yúode, jé aja pijnoraquei ome Dupade, yocujode ayoréo ore, cuchade udore jnese que eruénique cuse iji deréjnane. Mu pijnoraquei tupúsu uje suépise cuchade udore gáyode.