1 Coríntios 12 - Dupade Uruode

Pirajatigade déji ome Dupade anguresórone ore jnese ujetiga ore doi Dupade iroquéode

¹ Dupade Ujopié Espíritu Sánto chajuguína pirajatigade iji Dupade anguresõre chojmara, chojmarane ore jnese uje garani tupúsu Dupade. Jecute yijorane uaque á, yipota ujetiga arajáyo cuchade unojo to.

² Uacarajáyo uje cáma Dupade anguresõre uaque ica enga uacangurenone u uacacatecãrainone ayoré gajnúo ica. Que udore ore narare go, mu jé uacanguretáyo ore. Enga cho ujetiga ayoré gajnúone udore iroque uaque uje ore jno uacádi aja cucha quedéjnane.

³ Yipotigádi tu ome uaque ujetiga arajáyo unojo to: ujetiga gosi urúrigo gajnarécho aja Yocangaráni Jesús enga chojninga: "Jé tiógara ujetiga purugaite Jesús" enga obiréjna uje uté gosi uruode que garani tu Dupade Ujopié Espíritu Sánto go, mu garani tu Satanás. Jé basa ga que toque go ujetiga gosi chicota Jesús enga chojninga: "Pangarádejna cuchábi u Jesús" ujetiga Dupade Ujopié Espíritu Sánto ca déji gosi.

⁴ Que yoco ñane ome yocajnéone pirajatíga go. Jé yoquirajatigade cãra re ome ñane. Mu yoquirajatigade unojo guẽrasṍri chojmára. Enga Dupade Ujopié Espíritu Sánto u uje chisi ome yoquirajatigade udore ome yoque.

⁵ Yoquipesudode chayu ñane yúode iji Dupade adode. Mu yoquirósõri jé chojmára. Enga Yocangarádejnai u uté.

⁶ Pisocade jé cãra re ome ñane to rĩ. Mu chojmára Dupade enga Dupade uté u uje acadique danguresórone uyoque ome pisocade udore jnese ujetiga yipéco.

⁷ Dupade chisi ome pirajatigade ome danguresõre chojmara, chojmarane. Gaidi u gu ujetiga ca potigayaquérique déji udore ore uje Dupade Ujopié Espíritu Sánto dépisiji ore ajei. Gaidi upo rĩ ujetiga anguresórone ore chagutíñame ñane jnese ome darajatigade.

⁸ Dupade chutṍri dajopié tome yocuñane ujetiga yirajágo payuquetotiguédatéode ujetiga yacaco ñane ome. Enga Dupade chutõrapoi dajopié tome yocuñane rĩ ujetiga irajatáquedaté yoque enga yacaco ñane ome yoquirajatígadatéode udore to.

⁹ Jé basa ga chisi ome panguretigai tome yocuñane ujetiga yanguretágo Dupade gaté. Jeque chisiapome dajopié ome yocuñane rĩ ujetiga yiquetágo ejnaretade ore. Mu cuchade udore guẽrasṍri chojmára to enga Dupade Ujopié Espíritu Sánto jé u.

¹⁰ Yocuñane gajnei tu ujetiga yipéco yoquipesudode cucha pitijabácho. Jeque yocuñane gajneque ujetiga yacaco yocujode ayoréo ome Dupade uruode. Jeque yocuñane gajnengápo rĩ ujetiga chiraja Satanás ujopié iji Dupade Ujopié Espíritu Sánto ujade. Jeque yocuñane gajneque ujetiga yirajágo dara quedéjnane. Mu yocuñane gajnengápo rĩ ujetiga yatatago dara quedéjnane quigode ome ñane.

¹¹ Mu Dupade Ujopié Espíritu Sánto upúsu uje pésu dáyipiedie ome yoque jnese, enga chajuguína pirajatigade udore iji yoque jnese.

Uje Dupade anguresórone yoque jiei marínga, jé yitojmárango iji Jesucrísto jnese

¹² Crísto chacãra danguresórone uyoque aja dabai. Yirajágo uje ayorérique chojmára marínga, uté adode uásejna. Jé cho Crísto anguresórone uyoque. Uásejna yoque mu jé yitojmárango iji yocanguretigai ome Crísto, enga yocajnui u ayoré chojmarai iji jnumi.

¹³ Enga Dupade Ujopié Espíritu Sánto chojmára uje chacája Dupade anguresórone uyoque yocajéode jnese ujetiga Jesucrísto uyoque yitojmárango iji jnumi. Jeoga judío yoque, jeoga purása quedéjna yoque, jeoga ayoré ataque yoque, jeoga ayoré gajnareque yoque, mu jé yitojmárango iji jnumi jnese uje pacaque yoquedodie iji yodi gu yocanguretigai ome Jesucrísto. Enga Dupade Ujopié uaté chĩreta uyoque jnese.

¹⁴ Ayorei chojmára mu que chojmára atígo go, mu jiei adode.

¹⁵ Ujetiga pirídarique chojningárasa: "Que pijmanai yu go, jecute a ca yácariji yijogadi iji ayoré tuné jne." Uruode a urásu udore mu que toc ujetiga cho jmíti, jmíti ome dajogadi tuté ayoré.

¹⁶ Jé basa ujetiga pangoronéraque chojningárasa: "Que pedo yu go, jecute a ca yácariji yijogadi iji ayoré tuné jne." Uruode a urásu udore mu que toc ujetiga cho jmíti, jmíti ome dajogadi tuté ayoré.

¹⁷ ¿Ma jé chududirase darárigo a ujetiga pedórase ayoré gosi jnese? Úngare. Mu jé chopo rĩ ujetiga pangoronérase ayoré gosi uté jnese, ¿ma jé chojárirase cuchárique a? Úngare. Que chojare cuchárique to go. Jecute arei tu ujetiga yoquibai adode chayu ñane yúode iji jnumi.

¹⁸ Mu yirajágo uje Dupade ichajapite yocadode aja jogadode nanique ga gaidode jé u dajéode ome.

¹⁹ ¿Ma ca gajnarenguipísirase a ujetiga yoquibai atique chojmára enga gusu? A atique chojmarárase ga e que cuchárique tṍraji.

²⁰ Mu Dupade ipesucho pibai adode uje uásejna péode. Mu péode udore ore cháta rágaja ñane enga e ayoré chojmára iji jnumi.

²¹ Jecute gajnareque ujetiga pedóraque chorase cucha bisidéguiji pijmanárique. Enga jé chopome patodé to rĩ. Gajnareque ujetiga chojningame pirídade: "Cucha bisidécho uaque ome yu."

²² Cho jetiga cucha bisidécho pibai ate ajámone. Mu sudore uñane úringane pagutíñamácho suépise ate querúode gáyode iji pibai tuté údode.

²³ Que cuchárique tṍraji yocadode uñane iji yocúdode ome yocajéode. Mu udore ore upúsu uje yujucópise udore guio. Jé cho yocadode uñane rĩ. Que ore ueratigárique cuse go ujetiga pimo ome uñeque, mu udore ore u to uje yujucópise ore guio enga yacógo boraidie ore gáyode.

²⁴ Jeque que yacógo yoquibai peque uñane gáyode to. Mu obiréjna ore ome erámi uje yoco ueracho iji ore gu. Dupade jé isocai uté to ome Crísto anguresórone uyoque to uje Crísto cho dabai iji yoque to. Ujetiga ayoré gajnareque yoque uñane mu Dupade susípise yoquio to ujetiga ingoningájnai pijóguiji yoque to.

²⁵ Yirajágo uje dacadode iji pibai jnese que ore isocai u gotique ujetiga ore cãra dadode ome ñane. Mu dacate chojmara, chojmarane iji pibai ore chagutíñame ñane jnese iji pibai.

²⁶ Ujetiga gosi údode atique uñeque doso enga uté údode jnese chejnáreque re to. Enga jé cho ujetiga picotaque pibai tuté atique uñeque enga uté gosi adode jnese nína raque jnese to.

²⁷ Jecute Jesucrísto anguresórone uyoque yitojmárango to. Enga yoco pibai adode uje uásejna marínga, ore cháta rágaja ñane iji pibai chojmarai.

²⁸ Jecute Dupade ichajapite danguresórone ore aja ore isagode jogadode. Mu cuchiyíode u Jesús iroguipísode uje apóstoles u. Jé aja udore ore uje ore chatata dajnéone Dupade urúo ome raque. Jé aja Dupade anguresórone ore acadisórone to rĩ. Jé aja cucha pitijabádode ipesungórone. Jé aja ejnaretade iquetangórone ore. Jé aja udore ore to uje ore chátaja dojode ayoréo to. Jé aja Dupade anguresórone ore angaránone to. Jé aja dara quedéjnane irajasórone to rĩ.

²⁹ Uacarajáyo uje que Jesús apóstoles u uyoque jnese ome daroquéode. Uacarajayópo rĩ uje que Dupade uruode atatasõre uyoque jnese go. Enga que pacadisṍrapo yoque jnese rĩ. Enga que yipécopo cucha pitijabádode jnese to rĩ.

³⁰ Que yocujopiéraque cuse jnese go ujetiga yiquetágo ejnaretade ore. Enga que yirajágopo dara quedéjnane jnese rĩ. Que yirajágopo jnese to rĩ ujetiga yatatago dara guichayade ojningane cucha ome yoquijorane ore. Mu pirajatigade déji yoque jnese, mu ore chayu ñane yui ome ñane.

³¹ Beyoi enga acueyoi Dupade gueranone pirajatíga ueradipíso ome uaque. Mu a qué yope quique cucha uñai ome uaque jne ujetiga sué pirajatigade udore gáyode jnese. Enga yojningai tuté u pijnoraquei.