1 Coríntios 11 - Dupade Uruode

¹ Crísto jmapiedie u yigaidedie. Jecute aracho yu to aja yijmapiedie.

Páblo cho pisoca omone quique ome chequedíe

² Yijorane uaque á, yirasiguipise yujode Dupade anguresõre uaque uje que acadíchoi yu. Enga jecucha boyo yacajnaquéode údi ome uaque uje yacate uágome ica.

³ Enga e yipota ujetiga arajáyo cuchade unojo to: uje chequedíe ore gajnei tu ujetiga ore tangári dabayode uruode. Jeque jnanione ore gajnei tu ujetiga ore tangári Crísto uruode. Jeque Crísto gajnei tu ujetiga tangári dayé Dupade uruode to.

⁴ Ujetiga jnanione ore chacate ore ome Dupade uruode, jeoga ore catecã́ri Dupade uje ore chacája datójedie aja ome dacatecãraitigade udore, enga pajegátigai jogadi tu ome ore angarádejnai Crísto.

⁵ Jé basa arei tu ome chequedíe ore ujetiga pacadei ore ome Dupade uruode, jeoga ore catecã́ri Dupade enga ore doi enga ore chaco borapetique datoi gai. Ujetiga goto ca chaco borapetique datoi gai ome dacatecãraitigade udore, enga pajegátigai jogadi tu ome uaté abai. Uje cho chequedíe ore gu uje que ore timíninga cuchárique enga ore chaquesu dacarane.

⁶ Ujetiga chequéraque ca pota chaco borapetique datoi gai enga jé areque ujetiga uaté goto doi enga chaquesu dacãrai tuté to, jeoga chuju datui. Mu ujetiga ajéchome udore yui, enga beyoi yuruode enga acóyo uacatoidie gai.

⁷ Yirajágo uje jnanione que ore chaco datoidie gai uje ore catecã́ri Dupade uje cachi ore péroji Dupade gu. Uje Dupade gajnu dapesudi jnani nanique iji taningai. Jecute Dupade ingoningájnai pijóguiji jnanione to. Jé basa chequedíe ore péroji jnanione. Chamáñaje chequé bajé garani u jnani gu iji taningápisode, enga jé basa jnanione ore ingoningájnai pijóguiji chequedíe to.

⁸ Yirajágo uje Dupade que chijnime chequé bajé atique ujetiga pésu jnani bajai tiji. Gusu uje chijnime jnani bajai ajnoquei enga pésu chequé bajé tiji.

⁹ Que Dupade pésu jnani gu ujetiga chequé chagutíñame, mu pésu chequé bajé nanique gu ujetiga jnani bajai uté chagutíñame dacoté.

¹⁰ Uacamóño uje Dupade irógode gaté unirísoño ore timíninga Dupade anguresórone uyoque aja quedéjnane. Jecute arei tu ujetiga chequedíe ore chaco cuchárigo datoidie gai. Imoi tu gu uje udire ore pésu dabayode ajegaidode cucha.

¹¹ Mu yirajágo unojo to: ujetiga jnani ore, jeoga chequé ore mu ore chagutíñame ñane jnese ujetiga Dupade anguresõre ore.

¹² Ũré uje chequé bajé pipesudéji jnani bajai ajnoquei iji taningane nanique. Mu ũrepo rĩ uje jnanione jnese ore basíji chequedíe to iji chequé bajé uaté quigade. Mu chequedíe, jnanione, jé aja cuchade jnese ore garani tupúsu Dupade jnese.

¹³ ¿Jé uacajéningo cho rique a? ¿Ma jé areque a ujetiga chequedíe ore catecã́ri Dupade bisideque iji dojode Dupade anguresõre ujade enga que ore chaco borapetique datoidie gai a?

¹⁴ Yirajágo jnese uje que jnanione gajneque datu umarone gotique. Jecute ujetiga umare jnanírique gatúrique enga uté gosi chinguíra dipoi taja re ome cutejmai datu umare.

¹⁵ Jé basa ga chequedíe ore gajnei tu ujetiga umare ore gatúode ujetiga ore dujnúji gai. Chamáñaje Dupade chisi ome acãraque umarone ome chequedíe gu ujetiga ore acarane udore chaco ore gatoidie gai.

¹⁶ Que yimo ujetiga uacuñéngo ca eso yacajnaquéode udore unétique. Mu yacajnaquéode u unojo ome yujode Dupade anguresórone iji ore idáyode jnese. Enga ísenga pacajnaquéode uñéngo ome cuchade udore ca dépoji siñeque to jõ.

Páblo chatata uje que chise coríntogosode ore isocade unétique uje ore chóji Jesús iyoi gajnui cucha otate

¹⁷ Yigaidi urásu ujetiga yicota uaque ome uacasocade uñéngo to rĩ iji yurusarane unojo. Mu que toque go. Chamáñaje que cucha onique tṍraji gotique uje uacamátayo ñane ome Dupade uruode. Gajnareque gu uacasocade uje uacagúsoi ñane gari.

¹⁸ Yanire bajai tu uje uacamátayo ñane aja Dupade uruode enga jĩraque abotácho ñane, enga jogadi tu uté uje uacajucho uacajéode ome ñane. Ísenga jé ũré ore ojñane jõ uje ore chatata uacadode udore ome yu.

¹⁹ Que potigayaquérique déji yu ome udore. Chamáñaje que toc ujetiga Dupade anguresõre uréone ca ore chamáta rágaja ñane to ome uaque. Uje ore gaidi tu gu ujetiga ore úringane ũréo pijoque.

²⁰ Uje que uacáyipiedie chojmára iji jnumi enga obiréjna uje Yocangarádejnai que chise uacanétique uje uacójiyo iyoi gajnui cucha otate iji uacáguedie udire.

²¹ Uje e uacachórasu mu que arocho ñane gotique. Mu uacapótayo ujetiga bajaque uac ome cucha pibosode udore. Enga uacangaráño uacabosode ome uacojode Dupade anguresõre uñane. Jecute chaguhei qué chejna uñane. Jé basa yote pioi yuque uñane.

²² Uacaguíjnane cuse arĩ́e ujetiga amátayo ñane aja ome uacabose unérone. Gajnareque uje uacacho udore uje uacamátayo ñane aja ome Dupade uruode. ¿Ma cucha bisideque uacáguedie udire a uje que ajuso uacadode guio iji? ¿Ma cucha bisideque jmatágode iji uacojode Dupade anguresõre ujade to a uje uacangaráño uacabosode ome ore a? Uacamóño uje que ore chiraja dasocáringome raque iji uacajade. ¿Ma jé tiógara ome uaque a, ujetiga yisi uacabáyode ome uacasoca gajnaréngone udore? ¡A jé ca yisípise uacabáyode ome uacasocade udore jne arĩ́e!

Páblo cho pisocágoningáne quique ujetiga gosode chóji Jesús iyoi gajnui cucha otate

²³ Yududipise yajnéone unojo, Yocangarádejnai acajnaquéo, iji uté pijnani nanique enga e yacate uágome to. Uje dejai tuté jé u uje pẽrate Yocangarádejnai Jesús ome umajosórone gajneri uje chacate dacadigode ome daoi gajnui arureque.

²⁴ Uje e ore déji ñane gari jnese nanique iji datigabié mésa ejode enga Jesús chisa arurei tiji dajmainie. Enga chacãre dai Dupade gai ome. Quigade enga e chajuguína arurei tuté iji dacadigode ore enga chojninga: "Asayo arurei tuné enga acho. Uje yibai gajnui tu arurei tuné uje yẽra yibai tuné ome uaque. Yajéode u ujetiga jecucha acho arurégode iji ñane gari enga ajnusináño yu iji yiquigade jne."

²⁵ Jesús adi jec upo rĩ ome cucha adie otadi. Uje ore cha chagu enga chisa dajopidé nanique enga chojningame dacadigode: "Jináca. Ójiyo cucha adie otadi tuné uje gajnui tu yiyoi. Uje a yitoringai u jne ujetiga pésu Dupade áyipie ichadie úringanie ujñapeté ome erámi unirisórone uaque. Jecute jecucha ójiyo yiyoi gajnui cucha otate enga ajnusináño yadode ome uaque to jne."

²⁶ Jecute uje yójigo Jesús iyoi gajnui cucha otate, enga yajo gai gajnui arureque, enga yingongome erámi uje que yoco cucha bisidéguiji Yocangarádejnai itoringai gotique. Jecute boyo unojo údi jé aja ujetiga Yocangarádejnai diapo rĩ.

²⁷ Jecute uacáyipiedie jogadi tupúsurásu Dupade uje uacójiyo Yocangarádejnai iyoi gajnui cucha otate. Enga jé ca déji cucha uñeque. Uje pisijnaringué ujetiga uacáyipiedie déji cucha uñeque. Enga gajnui tu ujetiga oyo cucha bisidéguiji Yocangarádejnai aoi, iyoi ore gajnúone cucha.

²⁸ Jecute ueradi tu ujetiga Dupade anguresórone ore jnese ore doi enga ore chajiripise dadode aja quigode bajaque. Quigade ga quene ore tagu Jesús aoi gajnui arureque. Enga quene ore chóji Jesús iyoi gajnui cucha otate to rĩ.

²⁹ Ujetiga agu Jesús aoi gajnui arureque, enga ójiapo iyoi gajnui cucha otate rĩ, mu báyipieraque que déji Jesús itoringai ome ua enga jé máraque ua ome Dupade ujuyaquérique yui.

³⁰ Enga jec ũré uje Dupade ujuyaquéode e tocade ome uacuñane. Uje ejnarétacho uacuñane. Jé basa ga uñane que ore etotiguérique cuse. Datéringa uje uñane e ore topísi to rĩ.

³¹ Mu ujetiga yajicórase yocadode aja quigode bajaque jnese, enga a ca Dupade chorase dajuñame yoque.

³² Mu ujetiga ca yajico yocadode aja quigode enga jogadi tu ujetiga Yocangarádejnai chajire yocadode aja quigode. Que gusu uje chajire yocadode aja quigode, mu chopo dajuñame yoque to rĩ. Gaidi tu gu ujetiga yiyágo yocate gajnaréngone enga yangácopoi rĩ. Enga jé ca erámi unirisórone gajnéone Dupade ujuyaquéo chise yoque to jne iji erámi tuné eruei.

³³ Yujode Jesús anguresóño uaque á, uje uacamátayo uágaja ñane ujetiga acho uacabosode, enga jé ca oyo uaquedójnaringuéo ome chagúi. Mu jeta agúsoji jnese enga jogadi tu ujetiga quene acho uacabosode.

³⁴ Ujetiga chaguhei chejna gosi, jé areque ujetiga tagu dabosode iji daguíjnai bajaque. Chamáñaje Dupade ujuyaquei déji gu ome ore uje ore jnari cuchade ome raque iji uacáguedie uje uacacho iji ñane gari. Yacajnaquéode uñane qué déji ome uaque, mu a yacate uágome udore jne ujetiga yĩri iji uaque.