Madius 8 - Intas-Etipup Mat u Iesu Kristo 1863 (Aneityum Gospels)

¹ IS ahes an nedoon aien um asuol, eris ahced yin natimi is ahinag.

² Is apan ehelen natimi lepros is ethi, um atpuse an nuhup o un, um ika, Ak Natimarid, el et merit aiek, na emda aiek par ago adicinadicin nyak.

³ Is adan nikman a Iesu, um atcei pan yin, um ika, Ek idim merit ainyak; namu adicinadicin aiek. Is um auroauro aien um adicinadicin va naleprose iran.

⁴ Is ika ehelen a Iesu, Namu jim asuptecnaig ehelen tah aiek; jam atga unyum, um ehvai euc ehele natimi ahlap, um ahlap an nitai tup ahtai ineig is asaig a Moses, nitai asuptecnaig imi ra.

⁵ Is yetpan Kaperneum a Iesu, is apan ehelen a natimi alupas o ilpu eucsupo is ethi, um ugni yin,

⁶ um ika, Ak Natimarid, et emehe naheca unyak va napalse, et asjeuc aien anliin neom, um ohocred alupas.

⁷ Is ika ehelen a Iesu, Ekpu apan ainyak um ago cehcehe yin.

⁸ Is tas a natimi alupas iyehki, um ika, Ak Natimarid, ek eti upene ainyak par ika an apan aiek anliin neom unyak; namu tup asan tas ache aiek, etum umoh a naheca unyak:

⁹ ek aheca ainyak, ja era imyiaiji intas unyak a ilpu eucsupo: ek ika ainyak ehelen et ethi, Apan aiek, et um apan aien; im lep ehelen et eche, Apam aiek, et um apam aien; im lep ehele naheca unyak, Ago nitai ineigki aiek, et um ago aien.

¹⁰ Is wat atahaijeg a Iesu is um imyiali aien, um ika ehele ilpu atimi apitac yin, Et inivaijec ineig ek asaig ehelemia ainyak mika, kis eti ecetai tah nimyiisjis ninivaijec esjilid ainyak, et idivaig ineig, an pece Isreel asega.

¹¹ Ek asaig ehelemia ainyak mika, Erupu ahes an ridjai o un natimi inyi ahinag, im lep an nete o un, um han ateuc ehele Ebraham, im Aisak, im Jekob, an nelcau an nohatag:

¹² ja uhpu erekhaig pan an naupat ilpu halav an nelcau: erupu aunyauwaig ara eahki, um ataktit eijera.

¹³ Is ika a Iesu ehele natimi alupas iyehki, Atga unyum aiek; uhpu ago vai euc et idivaig nimyiisjis ninivaijec unyum. Is um umoh naheca o un an nuarin-nadiat iyehki.

¹⁴ Is apan a Iesu anliin neom o Pitrus, is ecet risi ehgan aien, is asjeuc aien va nemehe ihlup.

¹⁵ Is atcei pan nikman aien, is par edoijaig iran nemehe ihlup: is um atidai aien, um aheca ura.

¹⁶ Is wat jupura, eris imyiapan ehelen natimi is ahinag ara, eris amen ira ra a ilpu agelo has: is ahlo ilpu agelo aien an tas is ethi, um ago cehcehe ra asega eris emehe ara:

¹⁷ mika yi ehneijid intas ineig is asaig a Aiseya naprofeta, um ika, “Is leucse nauatialidi uja aien, um iknipagki nemehe iraija.”

¹⁸ Is wat alum atimi is ahinag a Iesu narahedvaig iran, is ika ehele ra aien, eri apan an taka uarin.

¹⁹ Is apan ehelen natimi esege is ethi, um ika ehelen, Ak Natimi alupas, ki ahced euc ainyak um apan irai uarin iji eigki asega an han iran aiek.

²⁰ Is ika ehelen a Iesu, Et eteuc inhelhel o kuri aleg, im lep nasiom oi man; ja et ti nuarin asjeuc imi Inhal o natimi.

²¹ Is ika ehelen natimi atahaijeg yin is eche, Ak Natimarid, namu ika aiek, ki uhup ainyak um apan um atelmoi etmak.

²² Is um ika ehelen a Iesu, Ahced nyak aiek; erumu atelmoi ilpu atimi emesmas a ilpu atimi emesmas.

²³ Is aridjai an nelcau aien, eris ahced yin a ilpu atimi atahaijeg yin.

²⁴ Is um ucjum pam neihio alupas an jop, um auaijai nelcau va epeau: ja is umjeg aien.

²⁵ Eris apan ehelen a ilpu atimi atahaijeg yin, um ahugni yin, um ika, Ak Natimarid, namu imyiatamaig caija aiek: intumu emesmas akaija.

²⁶ Is ika ehele ra aien, Ak ilpu atimi auatialidi inliinmopomia, eka imtitaig aijaua vanhe? Is atidai aien, um acaiji nimtinjop im injop; is um esjilid neigpa.

²⁷ Eris imyiali natimi, um ika, Et echamecha natimi ineigki, et imyiaiji intas o un nimtinjop im injop!

²⁸ Is apan aien an taka uarin, um apahai an pece o nupu Cercesa, erus aubillid yin natimi is ero eris amen ira rau a ilpu agelo has, erus ahes arau irai mai ij eris ikni atimi emesmas iran, erus ahnag alupas arau, is ehka va atimi natgavaig an nefalaig iyehki.

²⁹ Erus ahlaig arau, um ika, Nai merit aiek vanhe ehelumrau, ak Iesu, Inhal o Atua? na mun ham aiek mika ecri fi ohocred aijama an naopan ineig, ka o’o?

³⁰ Eris amen picad is ahinag itac acen, um hag.

³¹ Eris ugni yin a ilpu agelo has, um ika, El et’ ahlo cama aiek, namu ika aiek ecri apan aijama, um ahei picad.

³² Is ika ehele ra aien, Apan aijaua. Eris atceijai rau ara, um apan um ahei picad: eris athut emda picad asega an nohmun isas, um ehlelelse an jop, um atpoijej.

³³ Eris aha a ilpu atimi asgi ra, um apan an nuarin-pece ura, um asuptecnaig nitai iji eigki asega, im lep nitai iji eigki eris ago vai ohwat rahki eris amen ira rau a ilpu agelo has.

³⁴ Eris ahes an nuarin-pece iyehki natimi asega, um apan um aubillid Iesu: eris wat ecet yin ara, eris ugni yin ara mika yi atga o un aien, um ude inpece ura.