Madius 6 - Intas-Etipup Mat u Iesu Kristo 1863 (Aneityum Gospels)

¹ Akumu jim ago nedo upene unyimia aijaua an nuhup o atimi, mika eri alum caua ara: el eka ago nedo ineigki aijaua, inyi ti alupai caua nimtan a Etmamia an nohatag.

² Na wit ahtai niji itai tup ahtai aiek, jim ahlai intoho um uhup iram, et idivaig ilpu atimi efaifa, era ago nedo ineigki ara irai eom alaigaheni, im lep irai efalaig, mika eri imyiahpas ra natimi. Et inivaijec ineig ek asaig ehelemia ainyak mika, Era mun leh nimtan imi ra ara.

³ Na wit ahtai niji itai tup ahtai aiek, etmu jim ato nikmam inmoum nitai ineig et ago inmatam:

⁴ va uhpu adenaig niji itai tup ahtai unyum vai atimi: etpu idim alupai euc nimtan a Etmam et alum itai aieu an nuarin adenaig o un, um eti adenaig.

⁵ Na wit alaigaheni aiek, jim idivaig ilpu atimi efaifa: era merit ara natidaivaig um alaigaheni irai eom alaigaheni, im lep irai ihtag u efalaig, mika eri alum ra natimi. Et inivaijec ineig ek asaig ehelemia ainyak mika, Era mun leh nimtan imi ra ara.

⁶ Na wit alaigaheni aiek, apan anliin neom unyum um atapanes iram, um alaigaheni vai Etmam et adenai yin aien; etpu alupai euc nimtan a Etmam et alum itai aien an nuarin adenaig o un, um eti adenaig.

⁷ Aku wit alaigaheni aijaua, jim ecilpat asan tas et idivaig ilpu atimi aupat: era aktaktai ara mika uhpu atahaijeg ra vai intas ahinag ura.

⁸ Akumu jim idivai ra aijaua: et mun upyi ato a Etmamia nitai iji eigki et upene vai caua, ja eka par ugni yin vaig aijaua.

⁹ Etmu ucce nalaigaheni unyimia aijaua: Ak Etmama an nohatag, Etmu itaup nidam.

¹⁰ Etmu yetpam nelcau unyum. Uhmu imyiaiji intas unyum an nobohtan, et idivaig an nohatag.

¹¹ Alaama aiek nitai caig incama an nadiat ineig.

¹² Um jim aru tah nedo has unyima aiek, et idivaig ecra eti aru tah nedo has o atimi vai cama aijama.

¹³ Um jim atau irama an nedo oop aiek, jam imyiatamaig cama va niji itai has. Et idim unyum aiek nelcau, im nemda, im nimyiahpas, irai iji mesese. Emen.

¹⁴ El eka eti aru tah nedo has o atimi vai caua aijaua, inyi ti aru tah nedo has unyimia a Etmamia an nohatag:

¹⁵ ja el eka aru tah nedo has o atimi vai caua aijaua, etpu lep aru nedo has unyimia a Etmamia.

¹⁶ Im lep ineig, aku wit atwakam aijaua, jim imtimlai va nesganimtamia aijaua um idivai ilpu atimi efaifa: era auahas nesganimtara ara, mika eri ika atimi era atwakam ara. Et inivaijec ineig ek asaig ehelemia ainyak mika, Era mun leh nimtan imi ra ara.

¹⁷ Na wit atwakam aiek, aspi nipek unyum an naraki, um ehperegdei nesganimtam;

¹⁸ mika eri jim ato natwakam unyum atimi, ja Etmam ache an nuarin adenaig o un: etpu alupai euc nimtan a Etmam et alum itai aien an nuarin adenaig o un, um eti adenaig.

¹⁹ Jim ikni inpadiaig imi caua aijaua an nobohtan, etpu ages, um epera, um has; erupu lep ahtaijhan neom a ilpu atimi ehneg itai um ahneg:

²⁰ jam ikni niji itai upene imi caua aijaua an nohatag, inyi ti ages, um eti epera, um eti has; eri ti lep ahtaijhan neom a ilpu atimi ehneg itai um ahneg:

²¹ etpu amen inliinmopomia aijaua an nuarin ineig, et amen inpadiaig unyimia iran.

²² Et itai lah u nohuja nesganimtaija: el et weilah nesganimtam aiek, etpu lah upene nohum asega.

²³ Ja el et aplan nesganimtam aiek, etpu aupat nohum asega. El et aupat inlah unyum, etpu esjilid acen naupat unyum!

²⁴ Et ehka vaig tah natimi nahecavaig u natimi alupas ero: etpu acen inliinmopon aien vaig et ethi, um aiyu inliinmopon vaig et ethi; etpu apol iran et ethi aien, um amcel vaig et ethi. Et ehka vai caua nahecavaig o Atua im Mamona.

²⁵ Va nitai ineigki ek asaig ehelemia ainyak mika, Akumu jim aktaktai numumoh unyimia aijaua, im nitai caig unyimia, im nitai umni unyimia; um jim aktaktai nohumia, im nitai aso caua. Et esjilid numumoh unyimia aijaua irai itai hegaig, im nohumia irai itai aso caua.

²⁶ Alum man an nauanohatag aijaua: era eti ahoai itai ara, um eti asjapicnai itai, um eti ikni irai eom ikni itai; ja et alaa ra nitai caig a Etmamia an nohatag. Eka esjilid ira ra aijaua.

²⁷ Et eti emda tah iramia par ika yi lep yetpan an tah nadiat aien va naktaktai o un.

²⁸ Eka auri aijaua par aktaktai alupas nitai aso caua? Alum tisiai cai an nobohtan aijaua, im nedel iran; et eti auritai, um eti ahod itai:

²⁹ ja ek asaig ehelemia ainyak mika, Is eti yecrei yin a Solomon an natimi alupas o un um idivaig tah nitai iji eigki.

³⁰ El et ucce nedo o Atua, va nefelelicai an nobohtan, et umoh inpeig, ja er erekhaigjai an cop an tak apnyin, etpu idim aso caua aien, et tintin nimyiisjis ninivaijec unyimia.

³¹ Jim aktaktai alupas aijaua, um ika, Ti caig inhe akaija? ti umni inhe akaija? ti aso caija akaija anhe?

³² (era ahilek nitai iji eigki asega a ilpu atimi aupat:) et ato a Etmamia an nohatag nitai iji eigki asega et upene vai caua.

³³ Akumu upyi hup aijaua, um ahilek nelcau o Atua im nedo atoh o un; uhpu alupai caua nitai iji eigki asega.

³⁴ Jim aktaktai alupas aijaua vaig imraig: uhpu aktaktai imraig va niji itai iran. Et eteuc niji itai has irai iji adiat.