Madius 28 - Intas-Etipup Mat u Iesu Kristo 1863 (Aneityum Gospels)

¹ Is wat ti pan itac nadiat atumop, wat lep lahlah an nadiat uhup irai wiik, is yetpan a Mere nupu Mactala im lep Mere is eche par almoi inmun nij.

² Is um omoi alupas; is ahes an nohatag a nagelo o Natimarid, um asuol, um apan um atipagki inhat an neucsen mun nij, um ateuc iran.

³ Is idivaig nauwainapit nesganimtan, um ahi napelumai iran, is idivaig sno:

⁴ eris imtitai yin a ilpu atimi aminjinaig inmun nij, um ucjucjucaij, eris idivaig ilpu atimi emesmas ara.

⁵ Is tas a nagelo, um ika ehele intakata erahki, Jim imtitaig aijaurau: ek ato ainyak, nikavaig, erau ahilek Iesu aijaurau eris atgei yin an nauincai atgeig:

⁶ et ti aien igcaki: et mun nusjai aien, et idivaig is asaig aien: apam aijaurau, um almoi inuarin ineig is asjeuc iran a Natimarid:

⁷ auroauro aijaurau um apan, um asuptecnaig ehele ilpu atimi atahaijeg yin, mika et mun nusjai aien vai inmas o un; et apan aien Calili um uhup iramia; akupu ecet yin aijaua eahki: ek mun idim asaig ehelemirau ainyak.

⁸ Erus ahes o unmun nij arau, um auroauro um atga urau, erus imtitaig arau um imyiacitak alupas; erus athut arau um apan par asuptecnaig ehele ilpu atimi atahaijeg yin.

⁹ Erus wat apan arau par asuptecnaig ehele ilpu atimi atahaijeg yin, is ehtet ira rau a Iesu, um ika, Kaiheuc vai caurau. Erus apan arau um asjira neduon, um atpuse vai yin.

¹⁰ Is ika ehele rau a Iesu, Jim imtitaig aijaurau: jam apan um asaig ehele ilpu etoak mika eri apan ara Calili: erupu ecet nyak eahki ara.

¹¹ Erus wat atga urau arau, eris apan an nuarin-pece nahaiji ilpu eucsupo, um asuptecnaig ehele ilpu atimi ahlap esjilid nitai iji eigki asega.

¹² Eris wat asjapicnaig ara im lep ilpu atimi tas alep, eris um tas jipe ara, um alupai ilpu eucsupo mune is ahinag,

¹³ um ika, Akumu ika aijaua, Eris apan a ilpu atimi atahaijeg yin an nepeig, um ahneg yin an numjeg unyima.

¹⁴ El et atahaijeg a natimarid, ecrupu tas ehelen aijama, um imyiahras caua.

¹⁵ Eris leucse mune ara, um ago nedo ineigki eris asaig ehele ra: eris asan tas ineigki a nupu Jutaia um imyihum pam an naopan ineig.

¹⁶ Eris apan Calili a ilpu atimi atahaijeg yin is eleven, an nedoon ineig is asuptecnaig ehele ra a Iesu.

¹⁷ Eris wat ecet yin ara, eris atpuse vai yin ara: ja eris imyiisjis nahcil nahaiji ra.

¹⁸ Is apan a Iesu um tas ehele ra, um ika, Eris ati nemda asega imi nyak an nohatag im nobohtan.

¹⁹ Va nitai ineigki akumu apan aijaua, um ika eri alaigaheni nup urai iji pece asega, um baptiso ira ra an nidai Etmak, im Inhal o un, im Nesgumrau Upene:

²⁰ um esege imi ra mika eri imyiaiji niji itai asega ara kis tas alep vaig ehelemia ainyak: ekpu idim amen ehelemia ainyak irai iji adiat, um yetpan an nehni u naopan. Emen.