Madius 25 - Intas-Etipup Mat u Iesu Kristo 1863 (Aneityum Gospels)

¹ An naopan iyehki etpu idivaig ilpu atahaig is ten nelcau an nohatag, eris leucse lamp ura ara, um alau ijo um apan mika eri aubillid natimi leh ehgan.

² Eris arapakau is faiv, jam ahnag is faiv.

³ Eris leucse lamp ura a ilpu atahaig ahnag, jam eti apos naraki uarin:

⁴ ja eris apos lamp ura a ilpu atahaig arapakau im lep naraki irai hubej ura.

⁵ Is eti fi auroauro a natimi leh ehgan um han, eris imtate ara asega um umjeg.

⁶ Is wat ijihgan nepeig eris ahlaig atimi, um ika, Et mun yetpam natimi leh ehgan; akumu alau ijo aijaua um aubillid yin.

⁷ Eris aiji a ilpu atahaig asega, um ago lamp ura.

⁸ Eris ika a ilpu atahaig ahnag ehele ilpu atahaig arapakau, Alupai cama tah naraki unyimia aijaua; et mun ohpospos lamp unyima.

⁹ Eris tas a ilpu atahaig arapakau, um ika, O’o; va yi jim tintin imi cama im lep caua: akumu apan aijaua ehele ilpu atimi ahtai itai, um auanimtan naraki imi caua.

¹⁰ Eris wat apan ara par auanimtan naraki, is um yetpan natimi leh ehgan: eris ahced yin ara sji ehki, eris aitgai yin ara, um apan anliin neom o atmehgan: eris um atapanes an tapanes.

¹¹ Eris apitac a ilpu atahaig iji ehki um apan, um ika, Ak natimi alupas, ak natimi alupas, asalgei intapanes vai cama aiek.

¹² Ja is tas aien, um ika, Et inivaijec ineig ek asaig ehelemia ainyak mika, ek eti ato caua ainyak.

¹³ Va nedo ineigki akumu aminjinai caua aijaua; eka eti ato nadiat ineig aijaua im inuarin-nadiat ineig etpu yetpam iran a Inhal o natimi.

¹⁴ Nelcau an nohatag et idivaig natimi is ethi, is apan aien an pece itac acen, ja is asjapicnaig ilpu aheca o un aien um ikni padiaig o un ehele ra.

¹⁵ Is alupai yin is ethi talent is faiv aien, im lep is ethi talent is tu, im lep is ethi talent is wun; is alupai ra asega nitai ineig aien is upene vai ra; um auroauro um atga o un.

¹⁶ Aien is leucse talent is faiv aien, is apan aien um ahtai, um lep leh talent is faiv is eche.

¹⁷ Im lep aien is leh talent is tu aien, is lep leh talent is tu is eche aien.

¹⁸ Ja aien is leh talent is wun aien, is apan aien um ucji nobohtan, um adenaig mune o natimi alupas o un.

¹⁹ Is wat ti pan itac nadiat is ahinag is lep han a natimi alupas o ilpu aheca iji eigki, um ahilek nedo ura.

²⁰ Aien is leucse talent is faiv aien, is lep leucse pan talent is faiv is eche aien, um ika, Ak natimi alupas, as alupai nyak talent is faiv aiek: ja ek mun lep leucse talent et faiv et eche ainyak.

²¹ Is um ika ehelen a natimi alupas o un, Et upene, ak naheca upene um inivaijec; et mun upene nedo unyum va niji itai et eti elpat, ekpu ati euc ainyak mika an esjilid aiek irai iji itai et ahinag: namu imyiacitak aiek um idivaig natimi alupas unyum.

²² Im lep aien is leh talent is tu aien, is han aien um ika, Ak natimi alupas, as alupai nyak talent is tu aiek: ek mun lep leh talent et tu et eche ainyak.

²³ Is um ika ehelen a natimi alupas o un, Et upene, ak naheca upene um inivaijec; et mun upene nedo unyum va niji itai et eti elpat, ekpu ati euc ainyak mika an esjilid aiek irai iji itai et ahinag: namu imyiacitak aiek um idivaig natimi alupas unyum.

²⁴ Ja aien is leh talent is wun aien, is han aien um ika, Ak natimi alupas, kis ato euc ainyak, nikavaig, na atimi ipjin aiek, na leucse pan itai aiek an nuarin ineig as eti ahoaig itai iran aiek, um lep asjapicnaig itai an nuarin ineig as eti terimterim irai itai iran aiek:

²⁵ kis um imtitaig ainyak, um apan, um adenaig talent unyum an nobohtan: eap eigki, leh aiek.

²⁶ Is tas ehelen a natimi alupas o un, um ika, Ak naheca esjum um auatatimi, as ato aiek, nikavaig, ek leucse pan itai ainyak an nuarin ineig kis eti ahoaig itai iran ainyak, um lep asjapicnaig itai an nuarin ineig kis eti terimterim irai itai iran ainyak:

²⁷ as auri aiek par eti ati mune unyak ehele ilpu atimi ahtai mune, mika ki leh mune unyak ainyak an napam unyak im lep ineig yi eled?

²⁸ leh talent iran aijaua, um alupai natimi ineig et ten talent o un.

²⁹ Ara asega et ura niji itai, uhpu alupai ra, etpu ahinag niji itai ura: ja aien et eti o un niji itai, uhpu atipagki niji itai iran et ika aien et o un.

³⁰ Akumu ethaig pok ijo an naupat naheca esjum ineig aijaua: erupu aunyauwaig ara eahki, um ataktit eijera.

³¹ Et wit yetpam a Inhal o natimi an natimi alupas o un, im lep ilpu agelo upene asega ehelen, etpu ateuc aien a dorona esjilid o un an naopan iyehki:

³² uhpu asjapicnaig an nuhup o un nup urai iji pece asega: etpu ahai ra aien, et idivaig natimi aminjinaig siip, et atiakoai siip im nanin aien:

³³ etpu ikni siip an matan aien, jam ikni anin an moun.

³⁴ Etpu ika a Natimarid ehele ra an matan, Apam aijaua, ak ilpu atimi is aiheuc vai caua a Etmak, um amen an nelcau ineig eris ago imi caua an naopan iyehki is pam eti eteuc nobohtan:

³⁵ is ehtele nyak ainyak, ja akis alaak nitai caig aijaua: um ahvig wai, ja akis alumak inwai aijaua: um tak atimi, ja akis aiheuc vai nyak aijaua:

³⁶ um tup atga, ja akis aso nyak an napelumai aijaua: um emehe, ja akis ateghe nyak aijaua: um amen anliin neom ipjin, ja akis apan ehelek aijaua.

³⁷ Erupu tas ehelen a ilpu atimi upene, um ika, Ak Natimarid, ecris ecet euc aijama an nahopan is ehtele euc aiek, um alaam nitai caig? as lep ahvig wai aiek an nahopan, ecris alumum inwai aijama?

³⁸ um lep ecet euc an nahopan as tak atimi aiek, um aiheuc vai euc? im intup atgavaig, um aso euc an napelumai?

³⁹ um lep ecet euc an nahopan nemehevaig, um namenvaig anliin neom ipjin, um apan ehelum?

⁴⁰ Etpu tas a Natimarid, um ika ehele ra, Et inivaijec ineig ek asaig ehelemia ainyak mika, akis wat ago nedo ineigki aijaua vaig tah natimi upoupo irai ilpu etoak iji eigki, akis idim ago vai nyak aijaua.

⁴¹ Etpu ika ehele ra aien an moun, Atga unyimia aijaua, ak ilpu atimi ohocred, um apan an cop inyi ti lep opos, eris ago imi Tiapolo im ilpu agelo o un:

⁴² is ehtele nyak ainyak, ja akis eti alaak nitai caig aijaua: um ahvig wai, ja akis eti alumak tah inwai aijaua:

⁴³ um tak atimi, ja akis eti aiheuc vai nyak aijaua: um tup atga, ja akis eti aso nyak an napelumai aijaua: um emehe, um amen anliin neom ipjin, ja akis eti ateghe nyak aijaua.

⁴⁴ Erupu tas ehelen ara, um ika, Ak Natimarid, ecris ecet euc aijama an nahopan nehtele euc vaig, um ahvig wai, um tak atimi, um tup atga, um emehe, um amen anliin neom ipjin, jam eti aheca unyum?

⁴⁵ Etpu tas ehele ra aien, um ika, Et inivaijec ineig ek asaig ehelemia ainyak mika, akis wat eti ago nedo ineigki aijaua vaig tah natimi upoupo iji eigki, akis idim eti ago vai nyak aijaua.

⁴⁶ Erupu apan ara sji eigki an nuarin ohocred, um amen irai iji mesese: ja erupu apan a ilpu atimi upene an nuarin umumoh, um amen iran irai iji mesese.