Madius 24 - Intas-Etipup Mat u Iesu Kristo 1863 (Aneityum Gospels)

¹ Is ahes anliin neom ahlap a Iesu um alau ijo: eris apan ehelen a ilpu atimi atahaijeg yin, um ika ehelen yi adpau aien irai uari-eom an neom ahlap.

² Is um ika ehele ra a Iesu, Eka almoi nitai iji eigki asega aijaua; et inivaijec ineig ek asaig ehelemia ainyak mika, Inyi ti amen inhat inyi ethi irai taka hat, ja uhpu alcapdicraig asega.

³ Is wat ateuc aien an nedoon Olivet, eris asjapicnaig pan ehelen a ilpu atimi atahaijeg yin, um echim ahodai yin, um ika, Asuptecnaig ehelema aiek, etpu yetpam nitai iji eigki an nahopan? um asjaaicnaig an napam unyum nevitai, im nehni u nitai iji eigki?

⁴ Is tas a Iesu, um ika ehele ra, Akumu aminjinai caua aijaua va yi jim imyiahnag caua tah natimi.

⁵ Erupu ham natimi inyi ahinag an nidak, um ika, Ek Kristo ainyak; erupu imyiahnag atimi inyi ahinag ara.

⁶ Akupu atahaijeg edoa aijaua im lep intas vai edoa: jam jim imtitaig: etpu idim yetpam nitai iji eigki asega, ja inyi ti fi auroauro um ahni itai.

⁷ Erupu ati nedoa nup uran pece inyi ethi vai nup uran taka pece, im lep nup uran nelcau inyi ethi vai nup uran tak eleau: etpu lep eteuc numlaig has, im inmas, im nomoi irai iji pece inyi ahinag.

⁸ Et idim ahka um eris nitai iji eigki asega.

⁹ Erupu alwei caua ara mika eri abli caua, um atgei caua: erupu lep amcel vai caua a nup urai iji pece asega va nidak.

¹⁰ Erupu adumoij natimi inyi ahinag an naopan iyehki, erupu efaifa jipe vai ra ara, um amcel jipe vai ra.

¹¹ Erupu atidai a ilpu profeta efaifa inyi ahinag, um imyiahnag atimi inyi ahinag.

¹² Etpu auatialidi inliinmopoi atimi inyi ahinag va nedo has esjilid.

¹³ Aien inyi ti adumoij aien, uhpu imyiatamaig yin.

¹⁴ Eri upyi hup um asuptecnaig intas-upene ineigki va nelcau o Atua an nobohtan asega, nitai asuptecnaig imi nup urai iji pece asega; ja etpu yetpam nehni o itai.

¹⁵ Aku wit ecetai “nitai has esjilid ineig” aijaua, “et auahas itai,” is tas vaig a Tanyel naprofeta, naijivaig an nuarin itaup, (etmu aktaktai aien, et esvi itai aien,)

¹⁶ ara eri amen Jutaia ara an naopan iyehki, erumu aha pan irai lola edoon ara:

¹⁷ aien inyi amen aien ijinies an neom o un, etmu jim asuol aien um han leucse itai anliin neom:

¹⁸ aien inyi amen aien uman, etmu jim adumoij pan aien mika yi leucse apelumai o un.

¹⁹ Kaiheuc vai ra eri opouc ara, im lep ra eri alidai ilpu hal ura ara, ira adiat iji ehki!

²⁰ Akumu ugni Atua aijaua mika aki jim aha aijaua an mesese, im lep an nadiat atumop:

²¹ inyi eteuc nohocred esjilid an naopan iyehki, is eti eteuc nohocred et idivaig itu acen um imyihum pam naopan ineig, inyi ti lep eteuc nohocred inyi idivaig iyehki an tak aopan.

²² El et ahinag nadiat iji ehki, el et par emesmas natimi asega: ja inyi ti elpat nadiat iji ehki vai ilpu atimi eris ehtai ra.

²³ El et ika ehelemia tah natimi, Almoi, Iesu mun eigki, ka, Iesu mun naico; jim imyiaiji intas o un.

²⁴ Erupu ehcohos pam a ilpu Kristo efaifa im ilpu profeta efaifa, erupu ehvaig niji itai ehka ara, im niji itai imyiali; erupu ika ara eri imyiahnag ilpu atimi ehtai ra; ja inyi ehka.

²⁵ Ek mun upyi uhup ainyak um asuptecnaig ehelemia.

²⁶ Eru wit ika ehelemia ara, Et idim amen aien an namasacen; jim apan aijaua: ka, Et idim amen aien anliin neom; jim imyiaiji intas ura.

²⁷ Et idivaig nauwainapit et ahes an ridjai o un, um ememina an nete o un; etpu idim ucco napam o Inhal o natimi.

²⁸ Erupu asjapicnaig inmeijcop an nuarin ineig inyi amen iran natimi mas.

²⁹ Et wit ti pan itac nohocred ira adiat iji ehki etpu aupat nagesega, um eti alahala vai inmohoc, um etjo inmoijeuv an nohatag, etpu ahcatina nemda an nohatag:

³⁰ ja uhpu ecetai nitai asjaaicnaig vai Inhal o natimi an nohatag: erupu aunyauwaig nup urai iji pece asega, erupu ecet Inhal o natimi ara inhamvaig an nepeig an nohatag an nemda o un im natimi alupas o un.

³¹ Etpu abrai ilpu agelo o un aien, mika eri ahlai intoho esjilid ara, um asjapicnaig ilpu atimi ehtai ra o un irai iji uarin asega, ahes an nahaijin nohatag um yetpan an nahaijin.

³² Akumu atahaijeg intas ecsipece aijaua va nateg; Et wat ehcodaig, um elegelege nerin, eka ika aijaua, Et mun ubutpotet u inlidija:

³³ et idim ucco, aku wit almoi nitai iji eigki asega aijaua, akumu ato aijaua, nikavaig, et mun ubutpotet nelcau o Atua, an neucse neom.

³⁴ Et inivaijec ineig ek asaig ehelemia ainyak mika, Inyi upyi hup um ahni nitai iji eigki, ja erupu emesmas natimi an naopan ineig.

³⁵ Etpu yetpan an tid iran nohatag im nobohtan, ja inyi ti yetpan an tid iran intas unyak.

³⁶ Ja et eti ato nadiat iyehki im inuarin-nadiat iyehki tah natimi, ka tah ilpu agelo an nohatag, jai Etmak ache.

³⁷ Is idivaig nedo an numoh o Noa, etpu idim ucco an naopan iyehki inyi ham a Inhal o natimi.

³⁸ An naopan iyehki is wat pam eti ahgarero nobohtan eris hag ara um umwig, um atmehgan um asanlai, um uhum pan naopan iyehki is apan a Noa an nelcau,

³⁹ eris eti ato ara um uhum pan naopan iyehki is ahgarero nobohtan um leucse ra; etpu idim ucco napam o Inhal o natimi.

⁴⁰ Erupu amen natimi inyi ero umarau; uhpu atipagki inyi ethi, jam ude inyi ethi.

⁴¹ Erupu amen intakata inyi ero um irara flaur an neom irara; uhpu atipagki inyi ethi, um ude inyi ethi.

⁴² Akumu aminjinai caua aijaua; eka eti ato aijaua nuarin-nadiat ineig etpu yetpam a Natimarid unyimia.

⁴³ Ja eka ato aijaua, nikavaig, el is ato a natimi alupas an tah neom nuarin-nepeig ineig etpu han natimi ehneg itai, el is aiji aien, va yi jim ataijhan neom o un aien.

⁴⁴ Va nedo ineigki akumu yecrei caua aijaua: etpu yetpam a Inhal o natimi an nuarin-nadiat ineig aki eti aktaktai aijaua.

⁴⁵ Naheca upene um arapakau ineig yek eda, is ati yin a natimi alupas o un mika yi esjilid aien an nimnim o un, par ahtai nitai caig irai iji adiat?

⁴⁶ et mun ahesmoij naheca ineig, et wit ham a natimi alupas o un um ecet yin nagovaig nedo ineigki.

⁴⁷ Et inivaijec ineig ek asaig ehelemia ainyak mika, Etpu ati yin aien mika yi esjilid aien irai iji itai asega o un.

⁴⁸ Ja el et ika a naheca has anliinmopon, Et eti fi auroauro um ham natimi alupas unyak;

⁴⁹ um aredei ilpu etoan aheca, um hag um umwig ehele ilpu atimi umni kava;

⁵⁰ etpu ham natimi alupas o naheca ineig an nadiat ineig inyi ti aktaktai aien, im lep an nuarin-nadiat ineig inyi ti ato aien,

⁵¹ um ucsamud yin, um ati yin an nimtan imi ilpu atimi efaifa: erupu aunyauwaig ara eahki, um ataktit eijera.