Madius 21 - Intas-Etipup Mat u Iesu Kristo 1863 (Aneityum Gospels)

¹ Eris wat ubutpotet pan Jerusalem ara an nuarin-pece Bedfeje, u nedoon Olivet, is abrai ohwat atimi atahaijeg yin is ero a Iesu,

² um ika ehele rau, Apan aijaurau an nuarin-pece an nuhup unyimirau, arupu idim ecetai nifo aijaurau er athai, im lep inhal o un: aihiyi aijaurau, um imyiapam ehelek:

³ el et tas ehelemirau tah natimi, arumu ika aijaurau, Et merit vaig a Natimarid; etpu auroauro aien um atceijaig.

⁴ Eris ago nitai iji eigki asega mika eri ehneijid intas ineig is upyi asaig a naprofeta, um ika,

⁵ “Akumu ika aijaua ehele inhalav atahaig o Saion, Et apan ehelum a Natimarid unyum, et erop nedo o un, et ateuc an nifo aien, im lep inhakli nifo inhal o un.”

⁶ Erus apan ahwat atimi atahaijeg yin erahki, um ago is idivaig is asaig ehele rau a Iesu,

⁷ um imyiapan ehelen nifo im inhal o un, um atijai napelumai urau ira rau, um atijai yin iran.

⁸ Eris ahled apelumai ura an nefalaig natimi is ahinag; eris lep esvi tiklai cai nahaiji ra, um esjaig an nefalaig:

⁹ ara eris uhup ara, im lep ra eris apitac ara, eris ahlaig ara, um ika, Hosana vai Mapoi Tevit: Naaurineig vai yin et ham aien an nidai Natimarid; Hosana an nohatag ijinies acen.

¹⁰ Is wat apan Jerusalem aien, is ehioehio inliinmopoi nup an nuarin-pece iyehki asega, um ika, Di neigki?

¹¹ Eris um ika natimi is ahinag, Iesu neigki, naprofeta an Nasared an pece Calili.

¹² Is apan a Iesu anliin neom ahlap o Atua, um ahlo pok ijo ra asega, eris ahtai itai ara um auarimtai itai an neom ahlap, um ahidaig afata o ilpu atimi ahtai mune, im lep itai ateuc o ilpu atimi ahtai alaupa,

¹³ um ika ehele ra, Eris aged, mika, “Uhpu anvi nidan neom unyak par ika neom alaigaheni;” ja akis ika aijaua yi “uarin imi ilpu atimi ehneg itai” neom unyak.

¹⁴ Eris apan ehelen anliin neom ahlap a ilpu atimi aupat nesganimtara, im ilpu atimi asvahteuc neduora; is ago cehcehe ra aien.

¹⁵ Eris wat almoi a ilpu atimi ahlap esjilid im ilpu atimi esege, niji itai imyiali is ago aien, im ilpu halav eris ahlaig anliin neom ahlap ara, um ika, Hosana vai Mapoi Tevit; eris edemda ara,

¹⁶ um ika ehelen, Na atahaijeg aiek intas era asaig ara sji eigki, ka o’o? Is um ika ehele ra a Iesu, Maiya; akis idim esvi intas ineig aijaua, ka o’o, eris ika, “As ati nimyiahpas aiek an nipjineucse ilpu halav im ilpu hadi”?

¹⁷ Is ude ra aien, um ahes an nuarin-pece itaup um apan Bedane; um amen eahki.

¹⁸ Is wat lahlah an nuhialeg is lep adumoij pan aien an nuarin-pece itaup, is um ehtele yin.

¹⁹ Is ecetai nateg is ethi an nefalaig aien, um apan o un, um eti ecetai tah nohoan, nerin ache; is um ika aien, Etmu jim lep eteuc nohoam um yetpan irai iji adiat. Is um auroauro um mese nateg.

²⁰ Eris wat ecetai a ilpu atimi atahaijeg yin, eris imyiali ara, um ika, Ecetai nateg ineigki, et auroauro um mese!

²¹ Is tas a Iesu, um ika ehele ra, Et inivaijec ineig ek asaig ehelemia ainyak mika, El eka imyiisjis ninivaijec aijaua, um eti imyiisjis nahcil, akupu ago nedo ineig aijaua ek mun ago ainyak an nateg ineigki; akupu lep ika aijaua va nedoon ineig yi apan an taka uarin, va uhpu ethaigse an jop; etpu ucco.

²² El eka imyiisjis ninivaijec aijaua, akupu leh niji itai asega aijaua, eka ugni aijaua an nalaigaheni unyimia.

²³ Is apan aien anliin neom ahlap, um esege; eris asjapicnaig pan ehelen a ilpu atimi ahlap esjilid, im ilpu atimi tas alep an pece, um ika, Na ago nitai iji eigki aiek va intas alep u di? is alupai euc nemda ineigki a di?

²⁴ Is tas a Iesu, um ika ehele ra, Ekpu lep ahodai caua ainyak va nitai inyi ethi ache; el eka asuptecnaig ehelek aijaua, ekpu lep asuptecnaig ehelemia ainyak nemda unyak par ago nitai iji eigki:

²⁵ is ahes nabaptiso o Joanes eda? an nohatag, ka ehele atimi? Eris tas jipe ehele ra ara, um ika, El ta ika akaija, Is ahes an nohatag; etpu ika eheleija aien, Akis auri aijaua par eti imyiaiji intas o un?

²⁶ Ja el ta ika akaija, Is ahes ehele atimi; inta imtita atimi akaija; era ika atimi asega is idim aprofeta a Joanes.

²⁷ Eris tas ara, um ika ehele Iesu, Ecra eti ato aijama. Is um ika ehele ra aien, Inki ti asuptecnaig ehelemia ainyak nohu nemda ineig ek ago nitai iji eigki vaig ainyak.

²⁸ Eka ikha aijaua? Natimi is ethi, is ero inhalav atamaig o un; is apan aien ehele inmetto, um ika, Ak inhal unyak, apan aiek, um auritai inpeig anliin nekaro vaine unyak.

²⁹ Is tas aien, um ika, Ek esjum ainyak; ja is lep aktaktai aien, um apan.

³⁰ Is apan aien ehele inharei, um asaig intas iyehki. Is tas aien, um ika, Ekpu apan ainyak, ak etmak; ja is eti apan aien.

³¹ Is imyiaiji intas o etman a di ira rau? Eris ika ehelen ara, Inmetto. Is ika ehele ra a Iesu, Et inivaijec ineig ek asaig ehelemia ainyak mika, Era uhup a ilpu atimi akwanaham im ilpu takata ago ingaijid um apan an nelcau o Atua, eka apitac aijaua.

³² Is apan ehelemia a Joanes par esege imi caua nedo atoh, ja akis eti imyiaiji intas o un aijaua; ja eris imyiaiji intas o un a ilpu atimi akwanaham im ilpu takata ago ingaijid: akis almoi nedo ura aijaua, jam eti aktaktai, um imyiaiji intas o un.

³³ Akumu atahaijeg intas ecsipece et eche aijaua: Natimi alupas is ethi, is ahoaig vaine anliin nekaro o un aien, um ago nirahed o un, um ucji nehpanitai par ahtaijiraig nohoai vaine iran, um acta neom par asjeucjinaig, is um atceijaig aien imi ilpu atimi ahapol, um atga o un, um apan an pece itac acen:

³⁴ is wat metto nohoan, is abrai ilpu aheca o un aien mika eri apan ehele ilpu atimi ahapol ara, um leucse nohoai vaine iran.

³⁵ Eris arop irai ilpu aheca o un a ilpu atimi ahapol, um aredei is ethi, um atgei is ethi, um asji is ethi irai hat.

³⁶ Is lep abraig pan ehele ra aien ilpu aheca is eche, is ahinag iran ji ehki: eris lep ago nedo iyehki ira ra ara.

³⁷ Is epitpitac aien irai inhalav atamaig o un, um abraig pan yin ehele ra, um ika, Erupu ago nedo eccen ara vai inhal unyak.

³⁸ Eris wat ecet inhal o un a ilpu atimi ahapol, eris tas jipe ehele ra ara, um ika, Natimi ineigki etpu isjipigmoig etman aien; ti atgei yin akaija, um atoraliak uman.

³⁹ Eris arop iran ara an nekaro, um ethaig pan itac yin, um atgei yin.

⁴⁰ Et wit ham a natimi alupas ohuun nekaro vaine, etpu ago inhe aien irai ilpu atimi ahapol?

⁴¹ Eris um ika ehelen ara, Etpu idim auahas ilpu atimi auatatimi iji ehki aien, um atceijaig nekaro vaine o un imi ilpu atimi ahapol inyi achei, va erupu alupai yin nohoai itai an naopan noho o un ara.

⁴² Is um ika ehele ra a Iesu, Akis esvi intas ineigki aijaua an nitasvitai, ka o’o, nikavaig, “Inhat ineig eris esjum vaig a ilpu atimi acta neom, et hat esjilid ineigki an nesvi va neom: is ago nitai ineigki a Ihova, et itai imyiali ineig an nuhup uja”?

⁴³ Va nedo ineigki ek asaig ehelemia ainyak mika, Uhpu atipagki nelcau o Atua ehelemia, um alupai nup urai taka pece ineig erupu ohoai itai iran ara.

⁴⁴ Aien inyi eropjai an hat iyehki aien, etpu auhoig yi oplecoplec yin aien: aien inyi etjojai inhat ineigki iran, etpu ehtoplecoplec yin inhat.

⁴⁵ Eris wat atahaijeg intas ecsipece iji eigki o un a ilpu atimi ahlap esjilid im ilpu Farisi, eris ato ara mika is tas vai ra aien.

⁴⁶ Eris merit ara narop iran vaig, jam imtita atimi is ahinag, eris ika ara, Et aprofeta aien.