Madius 20 - Intas-Etipup Mat u Iesu Kristo 1863 (Aneityum Gospels)

¹ Nelcau an nohatag et idivaig natimi alupas is ethi, is alau ijo aien an nuhuhialeg, um ahilek atimi mika eri auritai ara anliin nekaro vaine o un:

² is ika aien yi alupai ilpu atimi auritai nuari-mune yi ethi an nadiat inyi ethi, ja par abrai ra mika eri apan ara anliin nekaro vaine o un.

³ Is lep alau ijo aien an nadiat metto, um alum tak atimi eris tup aiji an tiptag ara;

⁴ is um ika ehele ra aien, Akumu apan aijaua anliin nekaro vaine unyak, ekpu alupai caua nimtan upene ainyak. Eris apan ara.

⁵ Is lep alau ijo aien an nadiat adiat, im lep an jupki, um lep ago nedo ineigki.

⁶ Is lep alau ijo aien an jupura, um alum hal eris tup aiji ara, um ika ehele ra, Eka auri aijaua pah tup amen um yetpan an jupura?

⁷ Eris ika ehelen ara, Et mun eti asuptecnaig nauritai imi cama tah. Is ika ehele ra aien, Akumu apan aijaua anliin nekaro vaine unyak; akupu leh nimtan upene imi caua aijaua.

⁸ Is wat jupura, is ika a natimi ohuun nekaro vaine ehele naheca o un, Ahlaig vai ilpu atimi auritai aiek, um alupai ra nimtan, um atupun ira atimi apitac um yetpan ira atimi uhup.

⁹ Ja eris wat han ara sji ehki eris atupun nauritai an jupura, eris leucse nuari-mune is athi ira ra ara asega.

¹⁰ Eris wat han a ilpu atimi uhup, eris ika ara inyi esjilid nimtan imi ra; ja eris leucse nuari-mune is athi ira ra ara asega.

¹¹ Eris wat leucse ara, eris tas upoupo ara vai natimi alupas,

¹² um ika, Era ago nauritai an aur et ethi ache ara sji eigki era apitac, ja et tup apapa nimtan imi ra im lep imi cama, ecra mun ohocred aijama va nauritai im nihlup an nadiat.

¹³ Is tas ehelen is ethi ira ra aien, um ika, Ak etoak, ek eti ago nedo has vai euc ainyak: ek mun ika ehelum ainyak yi alupai euc nuari-mune yi ethi:

¹⁴ leh nimtan imi euc aiek, um atga unyum: ekpu alupai atimi apitac ineigki ainyak, et idivaig unyum:

¹⁵ tup ainyak marom vai niji itai unyak: na auri aiek par auatitai, va nedo upene unyak?

¹⁶ Et idim ucco, erupu uhup a ilpu atimi apitac, jam apitac ilpu atimi uhup: er ahlaig va atimi et ahinag, jam ehtai atimi et eti elpat.

¹⁷ Is apan a Iesu alaig Jerusalem; is echim imyiapan ilpu atimi atahaijeg yin is twelv aien an taka uarin, um ika ehele ra,

¹⁸ Intu wit apan Jerusalem akaija; uhpu atceijai Inhal o natimi ehele ilpu atimi ahlap esjilid, im ilpu atimi esege, erupu tas alep vai yin ara mika eri atgei yin,

¹⁹ erupu ati yin ara ehele nup urai taka pece, mika eri imyiafakahcil yin ara, um aredei yin, um atgei yin an nauincai atgeig: ja et wit ti pan itac nadiat inyi eseij etpu lep nusjai aien.

²⁰ Is apan ehelen a risi ohwat hal o Sebetaius, im ohwat halav atamaig o un, um atpuse an nuhup o un, um ugni nitai is ethi ehelen.

²¹ Is ika ehelen aien, Nai merit vanhe aiek? Is ika ehelen aien, Namu ika aiek eru ateuc ahwat hal unyak, yi ethi an matam, im lep yi ethi an moum, an nelcau unyum.

²² Is tas a Iesu, um ika, Erau eti ato aijaurau nitai ineig erau ugni nyak vaig aijaurau: aru emda aijaurau par umwig an nipjinitai ineig ekpu umwig iran ainyak, um leh nabaptiso iramirau yi idivaig nabaptiso ineig ekpu leh irak ainyak, ka o’o? Erus ika ehelen arau, Ecru emda aijumrau.

²³ Is um ika ehele rau aien, Arupu idim umwig an nipjinitai unyak aijaurau, um leh nabaptiso iramirau yi idivaig nabaptiso ineig ekpu leh irak ainyak: ja et ehka vai nyak nikavaig ehelen tah yi ateuc an matak, im lep an mouk, ja ehele ra ache is ati imi ra a Etmak.

²⁴ Eris wat atahaijeg natimi is ten, eris edemda ara vai inraimu erahki.

²⁵ Ja is asjapicnai ra ehelen a Iesu, um ika, Eka ato aijaua, nikavaig, era esjilid irai pece ura a ilpu atimarid irai iji pece, era lep esjilid irai uari pece ura a ilpu atimi alupas:

²⁶ jam jim ago nedo ineigki aijaua: aien et merit aien mika yi esjilid iramia, etmu upoupo iramia aien:

²⁷ aien et merit aien mika yi atimi alupas iramia, etmu aheca unyimia aien:

²⁸ et idivaig Inhal o natimi; is eti ham aien mika eri aheca o un natimi, ja par aheca ura aien, um ahtai nitai umoh iran o un nimtan va atimi et ahinag.

²⁹ Eris ahes Jeriko ara um atga ura, eris ahced yin natimi is ahinag.

³⁰ Erus ateucse an nahaijin nefalaig natimi is ero is aupat nesganimtarau, erus wat ato arau, nikavaig, is apam a Iesu an nefalaig, erus ahlaig ijinies arau, um ika, Aiheuc vai cumrau, ak Natimarid, Mapoi Tevit.

³¹ Eris acaiji rau natimi is ahinag mika eru jim tas arau: ja is esjilid nahlaig urau, um ika, Aiheuc vai cumrau, ak Natimarid, Mapoi Tevit.

³² Is aiji a Iesu, um ahlaig vai rau, um ika, Erau merit aijaurau vanhe, mika ki ago vai caurau ainyak?

³³ Erus ika ehelen arau, Ak Natimarid, ecrau merit aijumrau mika yi lah nesganimtamrau.

³⁴ Is aiheuc vai rau a Iesu, um atcei pan nesganimtarau: erus auroauro arau, um aiji lahlah, um ahced yin.