Madius 2 - Intas-Etipup Mat u Iesu Kristo 1863 (Aneityum Gospels)

¹ Eris apos Iesu Bedleem an pece Jutaia an naopan iyehki is atimarid a Herot, eris ahes an ridjai o un a ilpu atimi arapakau, um apan Jerusalem,

² um ika, Eris apos natimarid u nupu Jutaia eda? ecris ecetai inmoijeuv o un aijama an ridjai o un, ecra mun ham aijama mika ecri atpuse an nuhup o un.

³ Is wat atahaijeg a Herot natimarid, is ehioehio inliinmopon aien, im lep nupu Jerusalem asega.

⁴ Is asjapicnaig ilpu atimi ahlap esjilid asega aien im ilpu atimi esege an pece, um ahodai ra, um ika, Eri apos Kristo eda?

⁵ Eris um ika ehelen ara, Bedleem an pece Jutaia: is um ucce intas ineig is upyi aged a naprofeta, um ika,

⁶ “Ak Bedleem, an pece Jutaia, na eti upoupo aiek irai ilpu atimarid Jutaia; etpu aridjai iram a natimarid inyi ethi, etpu atimarid u nupu Isreel unyak aien.”

⁷ Is asjapicnaig ilpu atimi arapakau a Herot, jam eti asaig, um ahodaig upene ra, um ika, Is ehcohos inmoijeuv an nahopan?

⁸ Is abrai ra aien mika eri apan Bedleem ara, um ika, Apan aijaua, um ahilek emda inhalav; aku wit ecet yin aijaua, um lep adumoij pam, um asuptecnaig ehelek; ki apan ainyak um atpuse an nuhup o un.

⁹ Eris wat atahaijeg intas o natimarid ara, eris atga ura ara; is atga um uhup ira ra inmoijeuv ineig eris ecetai ara an ridjai o un, is wat uhum pan inuarin ineig is amen iran inhalav, um anaiji ijinies.

¹⁰ Eris wat ecetai inmoijeuv ara, is esjilid acen nimyiacitak ura.

¹¹ Eris apan ara anliin neom, um ecet inhalav ehele Mere risin, um atpuse an nuhup o un, um alaigaheni vai yin: eris ahiacse padiaig ura ara, um alupai yin niji itai tup ahtai; colt, im nidi libano, im nidi mura.

¹² Is acaiji ra a Atua an numjeg ahnag ura, mika eri jim adumoij pan ehele Herot ara, eris atga an nefalaig is eche ara, um apan an pece ura.

¹³ Eris wat atga ura ara, is ehcohos pan ehele Josef a nagelo o Ihova, an numjeg ahnag o un, um ika, Atidai aiek, um leh inhalav im risin, um aha pan Ijipt, um amen eahki wat uhum pan naopan iyehki ekpu asuptecnaig ehelum ainyak: etpu ahilek inhalav a Herot mika yi atgei yin.

¹⁴ Is um atidai aien, um leh inhalav im risin an nepeig, um aha pan Ijipt:

¹⁵ is amen aien eahki um uhum pan naopan iyehki is mas a Herot: mika eri ehneijid intas ineigki o Ihova is upyi asaig a naprofeta um ika, “Kis ahlaig vai inhal unyak ainyak mika yi ude Ijipt aien.”

¹⁶ Is wat ato a Herot, nikavaig, eris imyipalea yin a ilpu atimi arapakau, is atavaitap alupas aien, um abrai atimi mika eri atgei ilpu halav asega ara Bedleem, im lep irai uari pece asega ubutpotet, ahes ira ra is ero inmesese ira ra, um yetpan irai ilpu halav pam apos, is idivaig is ahodaig upene ilpu atimi arapakau aien.

¹⁷ An naopan iyehki is ehneijid intas ineig is upyi asaig a Jeremaia naprofeta, um ika,

¹⁸ “Eris atahaijeg nohran tah Rema, intaigvaig, im taig afakatotau, um ehteigtaig alupas, is imyitaig ilpu hal o un a Rejel, is ika aien inyi ti eropse inliinmopon, eris mun atih ara.”

¹⁹ Is wat mas a Herot, is ehcohos pan ehele Josef a nagelo o Ihova an numjeg ahnag o un an pece Ijipt,

²⁰ um ika, Atidai aiek, um leh inhalav im risin, um apan an pece Isreel: era mun emesmas ara eris ahilek inhalav ara mika eri atgei yin.

²¹ Is atidai aien, um leh inhalav im risin, um apan an pece Isreel.

²² Ja is wat ato aien, nikavaig, is atimarid an pece Jutaia a Arkileus par isjipigmoig Herot etman, is imtitaig aien napanvaig eahki: ja, is wat acaiji yin a Atua an numjeg ahnag o un, is apan aien an pece Calili:

²³ is apan aien an nuarin-pece is ethi nidan Nasared, um amen; is idivaig intas ineig eris upyi asaig a ilpu profeta, um ika, Uhpu anvi nidan par ika nup an Nasared.