Madius 17 - Intas-Etipup Mat u Iesu Kristo 1863 (Aneityum Gospels)

¹ Is wat ti pan itac nadiat is siks is leh Pitrus, im Jakobus, im Joanes etoan, a Iesu, um echim imyiapan ehtaij ache an nedoon ijinies is ethi;

² is um eche nohun aien an nuhup o ehtaij: is ememina nesganimtan is idivaig nagesega, um ahi napelumai iran is idivaig inlah.

³ Erus ehcohos pan ehele ra a Moses im Elaija, um tas ehelen.

⁴ Is tas a Pitrus, um ika ehele Iesu, Ak Natimarid, et upene vai caija namenvaig igcaki: el et merit aiek, ektijmu ago neom inyi eseij igcaki aijumtaij; yi ethi imi euc, um ethi imi Moses, um ethi imi Elaija.

⁵ Is wat tas aien, is taluopni pam ehtaij nepeig ememina: is ahes an nepeig nohran tah, um ika, Inhalav cop unyak ineigki, ek imyiacitak yin ainyak; ahtijmu atahaijeg yin aijautaij.

⁶ Ehtijis wat atahaijeg ahtaij atimi atahaijeg yin erahki, ehtijis imtitaig alupas ahtaij um eropse.

⁷ Is um apan a Iesu um atcei pan ehtaij, um ika, Atidai aijautaij, um jim imtitaig.

⁸ Ehtijis wat atidaijai ahtaij, ehtijis eti ecet tah natimi ahtaij, Iesu ache.

⁹ Eris ahes an nedoon iyehki ara um asuol, is acaiji ehtaij a Iesu um ika, Jim asuptecnaig ehelen tah nitai ineig ehtaij mun almoi aijautaij an naopan ineig, um uhum pan naopan iyehki inyi nusjai a Inhal o natimi vai inmas o un, ja par asuptecnaig.

¹⁰ Ehtijis ahodai yin ahtaij atimi atahaijeg yin erahki, um ika, Era auri a ilpu atimi esege par ika, inyi uhup a Elaija um ham?

¹¹ Is tas a Iesu, um ika ehele ehtaij, Inyi idim uhup a Elaija um ham, um lep ehteduo niji itai asega:

¹² ja ek asaig ehelemitaij ainyak mika, is idim ham a Elaija, eris eti ato yin ara, eris ago iran ara niji itai asega eris merit ara: etpu idim ucco etpu ohocred a Inhal o natimi vai ra.

¹³ Ehtijis ato ahtaij atimi atahaijeg yin erahki, nikavaig, is tas ehele ehtaij aien vai Joanes Natimi baptiso.

¹⁴ Eris wat apan ara ehele atimi is ahinag, is apan ehelen natimi is ethi, um atpuse an nuhup o un, um ika,

¹⁵ Ak Natimarid, aiheuc vai inhalav atamaig unyak aiek; et ahnag aien, um ohocred alupas: et ehcahinag etjojai aien an cop, um ehcahinag etjose an wai:

¹⁶ ek mun imyiapan yin ainyak ehele ilpu atimi atahaijeg euc, ja era auatialidi ara nago cehcehe yin vaig.

¹⁷ Is tas a Iesu, um ika, Ak ilpu atimi imyiisjis nahcil im ilpu atimi auatatimi, kis amen ehelemia ainyak is itu irak, um eropse inliinmopok ainyak vai caua um itu irak: imyiapam yin igcaki ehelek aijaua.

¹⁸ Is acaiji nagelo has a Iesu, is um atceijai yin aien: is um cehcehe inhalav an nuarin-nadiat iyehki.

¹⁹ Eris apan ehele Iesu a ilpu atimi atahaijeg yin an echim amen o un, um ika, Ecra auatialidi aijama nahlo yin vaig vanhe?

²⁰ Is um ika ehele ra a Iesu, Va nimyiisjis nahcil unyimia: et inivaijec ineig ek asaig ehelemia ainyak mika, El et eteuc nimyiisjis ninivaijec unyimia et idivaig nupsi mustart, aku wit tas ehele nedoon ineig aijaua, mika yi atga um apan an tah anuarin; el et par apan; el et ti ehka vai caua tah nitai:

²¹ ja er ahlo ilpu agelo has idivaig ineig va nalaigaheni ache im natwakam.

²² ERIS wat amen Calili ara, is um ika ehele ra a Iesu, Uhpu ati Inhal o natimi irai ikma atimi:

²³ erupu atgei yin ara, ja et wit ti pan itac nadiat inyi eseij etpu lep nusjai aien. Is ohocred alupas inliinmopura ara.

²⁴ ERIS wat apan Kaperneum ara, eris apan ehele Pitrus a ilpu atimi asjapicnaig mune, um ika, Et ahtai mune a natimi esege unyimia, ka o’o?

²⁵ Is ika aien, Maiya. Is wat apan aien anliin neom, is upyi tas a Iesu, um ika, Nai ikha aiek, ak Saimona? era leucse mune ka akwanaham ehele di a ilpu atimarid an nobohtan? ehele ilpu dualep ura, ka ehele nup urai taka pece?

²⁶ Is um ika ehelen a Pitrus, Ehele nup urai taka pece. Is ika ehelen a Iesu, Era eti ahtah a ilpu dualep ura:

²⁷ jai vai tu jim auahas inliinmopura akaijau, apok aiek an jop, um atise incaueij, um leh numu ineig inyi upyi hup um apam; na wit asalgei nipjineucsen aiek, napu ecetai aiek nuari-mune yi ethi: anum leh aiek, um alupai ra vai caijau.