Madius 14 - Intas-Etipup Mat u Iesu Kristo 1863 (Aneityum Gospels)

¹ An naopan iyehki is atahaijeg intas vai Iesu a Herot natimarid,

² is um ika ehele ilpu dualep o un aien, Joanes ineigki Natimi baptiso; et mun lep nusjai aien; va nitai ineig et ago niji auritai ehka aien.

³ IS upyi arop irai Joanes a Herot, um arore yin, um ati yin anliin neom ipjin vai Herotyas, ehgai Filipus etoan.

⁴ Is ika ehelen a Joanes, Et itaup vai euc inlehvaig ehgai etoam.

⁵ Is merit aien mika yi atgei Joanes, jam imtita atimi is ahinag; eris ika ara, Et aprofeta aien.

⁶ Eris wat aminjinaig nadiat ineig eris apos Herot iran, is adekdikjai inhalav atahaig o Herotyas an nuhup ura, is imyiacitak a Herot.

⁷ Va nedo ineigki is upyi asig yi aktit intas aien, mika yi alupai yin nitai ineig inyi ugni yin vaig aien.

⁸ Is upyi hup a risin um asuptecnaig ehelen; is um ika aien, Efi alupai nyak aiek nidjini Joanes Natimi baptiso an haklin nelcau.

⁹ Is ohocred a natimarid: ja is ika aien, eri alupai yin, vai intas nupyi asig yi aktit o un, im lep vai ra eris ateuc ehelen ara um hag.

¹⁰ Is abraig tah aien, mika yi auud yamud nidjini Joanes Natimi baptiso, anliin neom ipjin.

¹¹ Eris apos nidjinin an haklin nelcau, um alupai natahaig iyehki: is imyiapan ehele risin aien.

¹² Eris apan a ilpu atimi atahaijeg Joanes, um leh nohun um atelmoi, um apan um asuptecnaig ehele Iesu.

¹³ IS wat atahaijeg a Iesu, is ahes eahki aien, um aridjai an nelcau, um echim apan an nuarin namasacen: eris wat atahaijeg atimi, eris ahes irai iji uari-pece ura ara, um atga ubos, um apitac yin.

¹⁴ Is wat apan a Iesu, um alum atimi is ahinag, is aiheuc vai ra aien, um ago cehcehe ilpu atimi emehe ira ra.

¹⁵ Is wat jupura, eris apan ehelen a ilpu atimi atahaijeg yin, um ika, Et amasacen igcaki, um lep epeig; abrai atimi iji eigki aiek mika eri atga ura ara, um apan irai iji uari-pece, um auanimtan nitai caig incara.

¹⁶ Is um ika ehele ra a Iesu, Eri jim atga ura ara; akumu alaa ra nitai caig aijaua.

¹⁷ Eris um ika ehelen ara, Et faiv ache nareto igcaki, um ero ache numu.

¹⁸ Is um ika aien, Leh pam aijaua ehelek.

¹⁹ Is ika aien ehele atimi asjapicnaig, eri ateucse ara irai efelelicai, is leh nareto is faiv aien, im numu is ero, um easji pan an nohatag, um naaurineig, um iswoplecoplec, um alupai ilpu atimi atahaijeg yin nareto iji ehki, eris edaig ira atimi iji ehki a ilpu atimi atahaijeg yin.

²⁰ Eris hag ara asega, um gaije: eris asjapicnaig nuari itai hegaig eris eti ahtahni ara, um atohoaig irai nefehcat is twelv, is um ohua.

²¹ Ara eris hag ara eris faiv dausant a ilpu atamaig, um aled ilpu takata im ilpu halav.

²² Is ika a Iesu ehele ilpu atimi atahaijeg yin, eri aridjai an nelcau ara, um apan an taka uarin um uhup iran, ja is abrai atimi aien mika eri atga ura ara.

²³ Is wat abrai atimi aien mika eri atga ura ara, is echim aridjai aien an nedoon is ethi, mika yi alaigaheni: is wat jupura, is echim amen aien ache eahki.

²⁴ Is asjeuc nelcau an namilvai, um auaijai va epeau: is has nimtinjop.

²⁵ Is apan ehele ra a Iesu an nathut o nadiat, um atga an jop.

²⁶ Eris wat ecet yin a ilpu atimi atahaijeg yin natgavaig an jop, eris um imtitaig ara, um ika, Natmas ineigki; um aunyauwaig va nimtitaig ura.

²⁷ Is idim tas ehele ra a Iesu, um ika, Etmu eropse inliinmopomia aijaua; ainyak aigki; jim imtitaig aijaua.

²⁸ Is tas a Pitrus, um ika ehelen, Ak Natimarid, el et aiek aigko, namu ika aiek ehelek ki apan ehelum ainyak an jop.

²⁹ Is um ika aien, Apam aiek. Is ahes an nelcau a Pitrus um asuol, um atga an jop, um apan ehele Iesu.

³⁰ Is wat ecetai nimtinjop aien nalupasvaig, is um imtitaig aien; is atupun aien um ete, is ahlaig aien, um ika, Ak Natimarid, imyiatamaig nyak aiek.

³¹ Is auroauro a Iesu um arahpan va nikman, um asjirai yin, um ika ehelen, Ak natimi auatialidi, na auri aiek par imyiisjis nahcil?

³² Erus wat aridjai arau an nelcau, is um esjaig nimtinjop.

³³ Ara eris amen an nelcau ara, eris apan ara um atpuse an nuhup o un, um ika, Et idim inivaijec ineig, nikavaig, nai Hal o Atua aiek.

³⁴ Eris apan ara, um apahai an pece Jenesaret.

³⁵ Eris wat ato a nup an nuarin pece iyehki, eris abraig pan atimi ara irai iji uari pece asega, um imyiapan ehelen ilpu atimi emehe asega;

³⁶ um ugni yin, mika eri atcei pan intid an napelumai iran ara: eris um umumoh upene ara sji eigki asega, eris atcei pan yin ara.