Madius 13 - Intas-Etipup Mat u Iesu Kristo 1863 (Aneityum Gospels)

¹ An nadiat iyehki is ahes a Iesu anliin neom, um alau ijo, um apan ubutpotet u injop, um ateuc.

² Eris asjapicnaig pan ehelen natimi is ahinag, is aridjai aien an nelcau, um ateuc; eris aiji an nomunjop natimi asega.

³ Is asuptecnaig niji itai is ahinag ehele ra aien um ecsipece iran, um ika, Is apan natimi ahapol is ethi um ahoaig upsi itai:

⁴ is wat ahoaig aien, is um elel nahaiji upsi itai an nahaijin nefalaig, eris ahtag pan inman um hegaig.

⁵ Is um lep elel nahaijin an nuarin eteuc nilpauhat iran, is eklim haklin nobohtan iran; is eti laulau um edel, is eklim haklin nobohtan iran:

⁶ is wat aridjai nagesega um ces, is um imlai, um mese; is eti eteuc nicvan.

⁷ Is um lep elel nahaijin irai efelelicai has; is um ededel nefelelicai has, um atgei.

⁸ Is um lep elel nahaijin an nobohtan upene, is um oho, is eteuc nohoan is wun huntret iran is ethi, im nohoan is sikste iran is ethi, im nohoan is dirte iran is ethi.

⁹ Aien et eteuc intikgan aien par ahgei itai, etmu atahaijeg aien.

¹⁰ Eris apan a ilpu atimi atahaijeg yin, um ika ehelen, Na auri aiek par tas ehele ra um ecsipece iran?

¹¹ Is tas aien, um ika ehele ra, Eh mun alupai caua mika aki ato aijaua niji itai adenaig an nelcau an nohatag; ja eh mun eti alupai ra.

¹² Aien et o un itai, uhpu lep alupai yin, inyi ahinag niji itai o un: aien et eti o un itai, uhpu atipagki ehelen niji itai o un.

¹³ Ek tas ehele ra ainyak um ecsipece iran va nedo ura, nikavaig, era alum itai ara, jam eti ecetai; um lep atahaijeg itai, jam eti ahgei, um eti ato.

¹⁴ Et idivaig intas is upyi asaig a Aiseya vai ra, um ika, “Akupu idim atahaijeg itai aijaua jam eti ato; akupu idim alum itai aijaua jam eti almuktit:

¹⁵ et ipjin inliinmopoi nup igcaki, um tehen intikgara, era atapanes nesganimtara ara; va eri jim alum itai an nesganimtara ara, um atahaijeg itai an tikgara, um ato itai anliinmopura, um adumoij,” mika ki ago cehcehe ra ainyak.

¹⁶ Eka mun ahesmoij aijaua va nesganimtamia, et alum itai: im intikgamia, et atahaijeg itai.

¹⁷ Et inivaijec ineig ek asaig ehelemia ainyak mika, Eris merit a ilpu profeta is ahinag im ilpu atimi upene nalmoivaig nitai iji eigki eka almoi aijaua, ja eris eti almoi ara; um atahaijegvaig nitai iji eigki eka atahaijeg aijaua, ja eris eti atahaijeg ara.

¹⁸ Akumu atahaijeg aijaua intas ecsipece va natimi ahapol.

¹⁹ Et wat atahaijeg intas va nelcau o Atua tah, um eti ato, et um han natimi auatatimi, um atoraliak neig eris ahoaig anliinmopon. Aien aigki et idivaig nahaijin nefalaig aien, eris ahoaig nupsi itai iran.

²⁰ Aien et idivaig nuarin eteuc nilpauhat iran aien, eris ahoaig nupsi itai iran, aien aigki et atahaijeg intas aien, um auroauro um leh, um imyiacitak;

²¹ ja et eti eteuc nicvan tas iran, et eti elvamen aien yi itu iran: et wat aridjai nohocred im nedemda vai intas, et um auroauro aien um adumoij.

²² Aien et idivaig nuarin eteuc nefelelicai has iran aien, eris ahoaig nupsi itai iran, aien aigki et atahaijeg intas aien; ja et atgei intas naktaktai niji itai an nobohtan ineigki, im inpadiaig efaifa, et um eti oho aien.

²³ Aien et idivaig nobohtan upene aien, eris ahoaig nupsi itai iran, aien aigki et atahaijeg intas aien um ato; et oho aien, et eteuc nohoan et wun huntret iran tah ra, im sikste iran tah ra, im dirte iran tah ra.

²⁴ Is lep aketo aien um tas ecsipece ehele ra, um ika, Nelcau an nohatag et idivaig natimi is ethi, is ahoaig upsi itai upene uman aien:

²⁵ eris wat umjeg atimi, is apan natimi edemda vai yin, um ahoaig pan nefelelicai has u hwiit, um atga o un.

²⁶ Is wat ehlau ohua um oho, is um lep ededel nefelelicai has.

²⁷ Eris apan ehele natimi alupas iyehki a ilpu aheca o un, um ika ehelen, Ak natimi alupas, as wat ahoaig upsi itai upene umam aiek, jam uauo nefelelicai has ineigki?

²⁸ Is ika ehele ra aien, Is ago nedo ineigki a natimi edemda. Eris um ika ehelen a ilpu aheca o un, Nai merit aiek mika ecri apan aijama um auorohos iran, ka o’o?

²⁹ Is ika ehele ra aien, O’o; aku wit auorohos an nefelelicai has aijaua, um lep atecrei hwiit:

³⁰ tup ude aijaua um imyihum pan naopan iyehki eri asjapicnaig nohoai itai: an naopan asjapicnaig nohoai itai ekpu ika ainyak ehele ilpu atimi asjapicnaig nohoan, Akumu upyi hup aijaua um ahre nefelelicai has, um aijis, um atnamud: jam asjapicnai hwiit anliin neom ikni itai unyak.

³¹ Is lep aketo aien um tas ecsipece ehele ra, um ika, Nelcau an nohatag et idivaig nupsi mustart, is leh natimi is ethi, um ahoaig uman:

³² et esjilid inhaklin o un irai upsi itai asega: ja et wat edel, um esjilid irai efelelicai asega, um ohu u nitai, era ahtag pan inman um amen irai ran.

³³ Is lep aketo aien um tas ecsipece ehele ra, um ika, Nelcau an nohatag et idivaig leven is leh intakata is ethi, um ati a flaur ehceseij asjaaicnaig iran, is um leven asega.

³⁴ Is ecsipece irai itai iji eigki asega a Iesu ehele atimi is ahinag; is tas ehele ra aien irai tas ecsipece ache:

³⁵ mika yi ehneijid intas ineig is upyi asaig a naprofeta, um ika, “Ekpu ecsipece ainyak; ekpu asuptecnaig ainyak niji itai eris eti ato an naopan iyehki is pam eteuc nobohtan um uhum pam naopan ineig.”

³⁶ Is abrai atimi is ahinag a Iesu mika eri atga ura ara, ja par apan aien anliin neom: eris apan ehelen a ilpu atimi atahaijeg yin, um ika, Asuptecnaig ehelema aiek nesgan tas ecsipece ineigki va nefelelicai has an nobohtan.

³⁷ Is tas aien, um ika ehele ra, Aien et ahoaig upsi itai upene aien, Inhal o natimi ineigki;

³⁸ et uman nobohtan asega; era upsi itai upene a ilpu atimi an nelcau o Atua; era efelelicai has a ilpu atimi o un et has aien;

³⁹ et Tiapolo natimi ineig et edemda aien, um ahoaig itai; et adiat apitac naopan iyehki eri asjapicnaig nohoai itai iran; era ilpu agelo a ilpu atimi asjapicnaig nohoai itai.

⁴⁰ Et idivaig ineig er asjapicnaig nefelelicai has um atnamud an cop; etpu idim ucco an nadiat apitac:

⁴¹ etpu abrai ilpu agelo o un a Inhal o natimi, mika eri asjapicnaig niji itai has asega ara an nelcau o un, im lep ra era ago nedo has ara;

⁴² um erekhaig pan ra anliin cop alupas: erupu aunyauwaig ara eahki, um ataktit eijera.

⁴³ Erupu ememina a ilpu atimi upene et idivaig nagesega, an nelcau o Etmara. Aien et eteuc intikgan aien par ahgei itai, etmu atahaijeg aien.

⁴⁴ Im lep ineig, nelcau an nohatag et idivaig inpadiaig er adenaig an nobohtan; et wat ecetai tah, et lep adenaig aien, um imyiacitak, um apan, um ahtai niji itai asega o un, um auanimtan nobohtan iyehki.

⁴⁵ Im lep ineig, nelcau an nohatag et idivaig natimi ahtai itai is ethi, is ahilek perl upene aien:

⁴⁶ is wat ecetai perl esjilid is ethi aien, is apan aien, um ahtai niji itai asega o un, um auanimtan.

⁴⁷ Im lep ineig, nelcau an nohatag et idivaig nopoig eris anah iran an jop, um anai iji obotpot mu iran:

⁴⁸ is wat ohua, eris aihiaig pahai an nomunjop ara, um ateucse, um asjapicnaig numu upene, um atohoaig irai cat, jam erekhaig numu has.

⁴⁹ Etpu ucco an nadiat apitac: erupu apan a ilpu agelo, um iknipagki ilpu atimi auatatimi ehele ilpu atimi upene,

⁵⁰ um erekhaig pan ra anliin cop alupas: erupu aunyauwaig ara eahki, um ataktit eijera.

⁵¹ Is ika ehele ra a Iesu, Eka ato nitai iji eigki asega aijaua, ka o’o? Eris um ika ehelen ara, Maiya, ak Natimarid.

⁵² Is ika ehele ra aien, Natimi esege ineig et ato nelcau an nohatag aien, et idivaig natimi alupas et ethi aien, et leh niji itai mat aien, im niji itai itu acen, ira aga o un.

⁵³ Is wat tas ecsipece ehni a Iesu irai itai iji eigki, is ahes eahki aien um atga o un.

⁵⁴ Is wat yetpan an pece o un aien, is esege imi ra aien anliin neom alaigaheni ura, eris imyiali ara, um ika, Et leh narapakau ineigki eda a natimi ineigki, im nauritai esjilid iji eigki?

⁵⁵ Inhal o natimi ared cai ineigki; et idai risin Mere; era ilpu etoan a Jakobus, im Joses, im Saimona, im Juta;

⁵⁶ era amen eheleija a ilpu atahaig iran asega: is leh nitai iji eigki asega eda a natimi ineigki?

⁵⁷ Eris esjum vai yin ara. Ja is um ika ehele ra a Iesu, Era eti eccen vaig tah naprofeta a nup uran pece o un ache, im ilpu atimi ehpan iran.

⁵⁸ Is ago nauritai esjilid is eti elpat ache eahki aien, va nimyiisjis nahcil ura.