Madius 12 - Intas-Etipup Mat u Iesu Kristo 1863 (Aneityum Gospels)

¹ An naopan iyehki is atga a Iesu u nahapol hwiit an nadiat atumop; is um ehtele ilpu atimi atahaijeg yin, eris um aldei nohoai hwiit ara, um hegaig.

² Eris wat ecetai a ilpu Farisi, eris um ika ehelen ara, Alum ilpu atimi atahaijeg euc aiek, era ago nedo ineig ara et itaup nagovaig an nadiat atumop.

³ Is ika ehele ra aien, Akis idim esvi intas va nedo o Tevit aijaua, an nehtele yin vaig aien, im lep ra eris ahced yin ara;

⁴ is apan aien anliin neom o Atua, um caig nareto ineig eris ahlap iran, is itaup vai yin incaigvaig, im lep ra eris ahced yin ara, eris caig a ilpu atimi ahlap ache.

⁵ Akis idim esvi aijaua an tas alep va nedo o ilpu atimi ahlap anliin neom ahlap an nadiat atumop; era ago itai ara an nadiat atumop, ja et eti has nedo ura:

⁶ ek asaig ehelemia ainyak mika, Et amen igcaki tah et ethi et esjilid aien an neom ahlap.

⁷ Al ekis ato nesgan tas ineigki aijaua eris ika, “Ek merit ainyak va nedo aiheuc va atimi, jam eti merit va niji itai ahlap,” el eka eti asan tas has aijaua vai ra sji eigki, era eti ago nedo has ara.

⁸ Et Atimarid an nadiat atumop a Inhal o natimi.

⁹ Is ahes eahki aien, um atga o un, um apan anliin neom alaigaheni ura:

¹⁰ is amen eahki natimi is ethi is urauo nikman. Eris ahodai yin ara, um ika, Et itaup nago cehcehe atimi vaig an nadiat atumop, ka o’o? eris ahodai yin ara mika eri asan tas has vai yin.

¹¹ Is um ika ehele ra aien, Natimi ineig yek eda iramia, et o un siip et ethi, el et etjose an nehpanitai an nadiat atumop, el et eti arapse aien vai yin um aihiaigjai?

¹² ja era esjilid atimi irai siip: et eti itaup par ago nedo upene an nadiat atumop.

¹³ Is um ika aien ehele natimi iyehki, Atgeig yapidi nikmam aiek. Is um atgeig yapidi nikman aien; is um upene nikman, um idivaig nahaijin nikman.

¹⁴ Eris um alau ijo a ilpu Farisi, um tas alep vai yin, mika eri atgei yin.

¹⁵ Is wat ato a Iesu, is ahes eahki aien um atga o un: eris apitac yin natimi is ahinag, is ago cehcehe ra asega aien;

¹⁶ is lep acaiji ra aien mika eri jim aniv yin ara:

¹⁷ mika yi ehneijid intas ineig is asaig a Aiseya naprofeta, um ika,

¹⁸ “Alum naheca unyak aijaua, kis ati yin ainyak; et halav cop unyak aien, et imyiacitak yin inliinmopok ainyak: ekpu ati Nesgak ehelen ainyak, etpu asuptecnaig intas atoh aien ehele nup urai iji pece:

¹⁹ inyi ti imyiisjis itai aien, um eti tas ijinies; inyi ti atahaijeg nohran tah irai efalaig:

²⁰ inyi ti asvaldeipagki nieg asvagrei aien, um eti ahni incop alahala cas uposupos, um imyihum pan naopan iyehki etpu esjilid intas atoh o un:

²¹ erupu asgeig an nidan nup urai iji pece.”

²² Eris imyiapan ehelen natimi is ethi is amen iran nagelo has, is aupat nesganimtan aien, um pop: is ago cehcehe yin aien, is tas um alum itai natimi iyehki is aupat nesganimtan aien um pop.

²³ Eris imyiali natimi asega, um ika, Mapoi Tevit ineigki, ka o’o?

²⁴ Eris wat atahaijeg a ilpu Farisi, eris ika ara, Et ahlo ilpu agelo has a nat naico vai Belsebub natimarid o ilpu agelo has.

²⁵ Is ato naktaktai ura a Iesu, um ika ehele ra, El et ika nero inliinmopoi nup uran tah nelcau, inyi ti amen; ka nero inliinmopoi atimi an tah anuarin-pece, ka an tah nimnim, erupu atih ara:

²⁶ el et ahlo Satana a Satana, um ero inliinmopon, inyi ti amen nelcau o un.

²⁷ El ek ahlo ilpu agelo has ainyak vai Belsebub, era ahlo ra vai di a ilpu hal unyimia? va nitai ineigki erupu ated caua ara.

²⁸ El ek ahlo ilpu agelo has ainyak va Nesgai Atua, et mun yetpam ehelemia nelcau o Atua.

²⁹ Et ehka vaig tah napanvaig anliin neom o natimi emda, um ahneg inpadiag o un; ja el et uhup aien um arore natimi emda, etpu tup upene nahnegvaig itai an neom o un.

³⁰ Aien et eti leh imi nyak aien, et tak atimi irak aien; aien et eti atau imi nyak aien par asjapicnaig itai, et eduoraprap aien.

³¹ Ek idim asaig ehelemia ainyak mika, Uhpu eti aru nedo has asega ira atimi im intas has ura: ja uhpu aru ira atimi intas has ura vai Nesgan Upene.

³² Aien et asan tas has aien vai Inhal o natimi, uhpu eti aru: ja aien et asan tas has aien vai Nesgan Upene, uhpu aru an nobohtan ineigki, im lep an tak aopan.

³³ Aku wit ago upene nauincai aijaua, etpu upene nohoan; ja aku wit ago has nauincai aijaua, etpu has nohoan: er ato nauicai va nohoan.

³⁴ Ak ilpu imyiv, et ehka vai caua intas upene vaig, eka ilpu atimi auatatimi aijaua: et tas nipjineucse atimi va nitai iji eigki et ehlohos anliinmopura.

³⁵ Era leh niji itai upene a ilpu atimi upene ira aga upene anliinmopura: ja era leh niji itai has a ilpu atimi auatatimi ira aga has anliinmopura.

³⁶ Ek asaig ehelemia ainyak mika, Uhpu aru intas ahnag asega o atimi an nadiat almaijidjid.

³⁷ Uhpu ato nedo atoh unyum vai intas unyum, ja uhpu ato nauatatimi unyum vai intas unyum.

³⁸ Eris tas nahaiji ilpu atimi esege im ilpu Farisi, um ika, Ak Natimi esege, ecra merit aijama mika an ago nitai asjaaicnaig aiek.

³⁹ Is tas aien, um ika ehele ra, Era merit nalmoivaig nitai asjaaicnaig a ilpu atimi auatatimi, im ilpu atimi imyiisjis nahcil; ja uhpu eti ago nitai asjaaicnaig vai ra, nitai asjaaicnaig ache o Jona naprofeta:

⁴⁰ is idim amen a Jona an nadiat is eseij im nepeig is eseij an nipjinetgan numu alupas; et um ucco etpu amen a Inhal o natimi an nadiat inyi eseij im nepeig inyi eseij anliin tan.

⁴¹ Erupu atidai a nup an Ninivi an nadiat almaijidjid, um ated atimi an naopan ineig: eris adumoij anliinmopura ara vai intas asuptecnaig o Jona; ja et amen tah igcaki et esjilid aien irai Jona.

⁴² Etpu atidai a natimarid takata Siba an nadiat almaijidjid, um ated atimi an naopan ineig: is ahes aien an nehni va nobohtan um apam, mika yi atahaijeg narapakau o Solomon; ja et amen tah igcaki et esjilid aien irai Solomon.

⁴³ Et wat atceijaig tah natimi a nagelo has, et um atga aien irai uari amasacen, um ika yi atumop, ja et ehka:

⁴⁴ et lep ika aien, Ki adumoij pan ainyak an neom unyak ineig kis upyi amen iran ainyak; et wit yetpan aien um ecetai neom iyehki, et mun tup lah, eh mun ahre um yecrei,

⁴⁵ et apan aien, um leucse ilpu agelo has et eche et seven, et esjilid nauatatimi ura an nauatatimi o un, era apan ara anliin neom iyehki, um amen iran: is upyi hup natimi ineigki um has, ja par apitac um has esjilid. Etpu idim ucco ira atimi auatatimi an naopan ineig.

⁴⁶ Is wat tas aien ehele atimi is ahinag, is aiji ijo a risin im ilpu etoan, eris merit ara intasvaig ehelen.

⁴⁷ Is imyiabrai yin tah, um ika, Era aiji ijo a risum im ilpu etoam, era merit ara intasvaig ehelum.

⁴⁸ Is tas aien, um ika ehele natimi ineig is imyiabrai yin, Risik im ilpu etoak di?

⁴⁹ Is atgeig yapidi nikman aien ehele ilpu atimi atahaijeg yin, um ika, Alum risik im ilpu etoak!

⁵⁰ aien et imyiaiji intas o Etmak an nohatag aien, et etoak aien, um atahaig irak, um risik.