Lukas 6 - Intas-Etipup Mat u Iesu Kristo 1863 (Aneityum Gospels)

¹ IS atga aien an nadiat atumop is ethi irai lelahapol hwiit; eris aldei nohoai hwiit a ilpu atimi atahaijeg yin, um uhpunuhoig, um hegaig.

² Eris um ika ehele ra nahaiji ilpu Farisi, Eka auri aijaua par ago nedo ineig et itaup nagovaig ira adiat atumop?

³ Is tas ehele ra a Iesu, um ika, Akis idim esvi intas va nedo o Tevit aijaua, an nehtele yin vaig, aien, im lep ra eris ahced yin ara;

⁴ is apan aien anliin neom o Atua, um leh nareto eris ahlap iran, um caig, um lep alaa ra eris ahced yin ara; era caig a ilpu atimi ahlap ache, et itaup vai tup atimi.

⁵ Is ika ehele ra aien, Et idim Atimarid an nadiat atumop a Inhal o natimi.

⁶ Is lep apan aien anliin neom alaigaheni an nadiat atumop is eche, um esege: is amen eahki natimi is ethi is urauo nikman inmatan.

⁷ Eris imyiiris yin a ilpu atimi esege im ilpu Farisi, kit inyi ago cehcehe yin aien an nadiat atumop, mika erupu atijai itai iran ara.

⁸ Is ato naktaktai ura aien, um ika ehele natimi ineig is urauo nikman, Atidai aiek, um aiji an nibla ra. Is atidai aien, um aiji.

⁹ Is ika ehele ra a Iesu, Ekpu ahodaig caua ainyak va nitai inyi ethi; Et upene nagovaig nedo upene an nadiat atumop, ka nagovaig nedo has? nimyiatamaig atimi vaig, ka nauahas ra vaig?

¹⁰ Is aijidjid ra asega aien, um imyiarahed, um ika ehele natimi iyehki, Namu atgeig yapidi nikmam aiek. Is um ago aien: is um umoh upene nikman, um idivaig nahaijin nikman.

¹¹ Is esjilid nedemda ura ara; eris tas jipe ara, um ika, Inti ago inhe akaija vai Iesu?

¹² IS ahes eahki aien an naopan iyehki, um apan an nedoon, mika yi alaigaheni, is amen aien an nepeig asega, um alaigaheni vai Atua.

¹³ Is wat lahlah an tak apnyin, is ahlaig vai ilpu atimi atahaijeg yin aien, um ehta atimi is twelv ira ra, um anvi nidara par ika ilpu apostolo;

¹⁴ Saimona, (is lep anvi nidan aien par ika Pitrus,) im Antrius etoan, im Jakobus im Joanes, im Filipus im Bardolomius,

¹⁵ im Madius im Tomas, im Jakobus inhal o Alfius, im Saimona eris anvi nidan par ika natimi leh imi ilpu Silotai,

¹⁶ im Jutas etoai Jakobus, im Jutas nupu Karyot, aien aigki is atimi aniv yin aien.

¹⁷ Is asuol aien im lep ra, um aiji igca is marara, im ilpu atimi atahaijeg yin is ahinag, im lep natimi is ahinag acen irai iji uari pece asega Jutaia im Jerusalem, im lep irai iji uari pece u unjop Tairus im Saiton, eris ahtag pan ehelen ara mika eri atahaijeg yin, um lep ika yi ago cehcehe ra aien va nemehe ira ra;

¹⁸ im lep ra eris amen ira ra a ilpu agelo has: is ago cehcehe ra aien.

¹⁹ Eris merit natimi asega mika eri atcei pan yin: is yetpan nemda o un ira ra, um ago cehcehe ra asega.

²⁰ Is aijidjid ilpu atimi atahaijeg yin aien, um ika, Eka mun ahesmoij aijaua et ipjidipjid inliinmopomia: et unyimia nelcau o Atua.

²¹ Eka mun ahesmoij aijaua et ehtele caua aijaua an naopan ineig: akupu gaije aijaua. Eka mun ahesmoij aijaua eka ehteigtaig aijaua an naopan ineig: akupu imyiacitak aijaua.

²² Eka mun ahesmoij aijaua eru wit edemda vai caua atimi, um ahlo caua, um atuh caua, um ethaig pan nidamia et idivaig nitai has, vai Inhal o natimi.

²³ Akumu imyiacitak aijaua an naopan iyehki, um adikdikjai va ancediaig unyimia: etpu idim esjilid nimtan imi caua an nohatag: is um ucce nedo o ilpu retpora vai ilpu profeta.

²⁴ A’a, auwe vai caua, ak ilpu atimi ikni itai! akis mun leucse niji itai upene unyimia aijaua.

²⁵ A’a, auwe vai caua, ak ilpu atimi gaije! etpu ehtele caua aijaua. A’a, auwe vai caua, ak ilpu atimi imyiacitak an naopan ineig! akupu aunyauwaig aijaua, um ehteigtaig.

²⁶ A’a, auwe vai caua, eru wit asan tas upene vai caua atimi asega! is um ucce nedo o ilpu retpora vai ilpu profeta efaifa.

²⁷ Ak ilpu atimi atahaijeg intas unyak, ek asaig ehelemia ainyak mika, Akumu aiheuc vai ra aijaua era tak atimi iramia ara, um ago nedo upene vai ra era edemda vai caua ara,

²⁸ um asan tas upene vai ra era asan tas has vai caua ara, um alaigaheni vai ra era ago nedo has vai caua ara.

²⁹ Et wit atcei nahaijin nahpam tah, anum lep ehvaig ehelen nahaijin nahpam aiek; et wit atipagki napelumai itac unyum tah, anum lep jim acaiji yin aiek mika yi jim lep atipagki napelumai uhup aien.

³⁰ Et wit ugni euc vai itai tah natimi, anum alupai yin aiek; et wit atipagki niji itai unyum tah, anum jim lep ugni yin vaig aiek.

³¹ Akumu ago nedo ineigki va atimi aijaua, eka merit aijaua mika eri lep ago vai caua ara.

³² El eka aiheuc vai ra ache aijaua era aiheuc vai caua ara, etpu naaurineig vai caua a di? era aiheuc vaig jipe ra a ilpu atimi auatatimi.

³³ El eka ago nedo upene vai ra ache aijaua era ago nedo upene vai caua ara, etpu naaurineig vai caua a di? era ago nedo ineigki a ilpu atimi auatatimi.

³⁴ El eka alupai atimi itai aijaua, jam ika eri lep aru ara, etpu naaurineig vai caua a di? era alupaig jipe ra itai a ilpu atimi auatatimi, jam ika eri leh neruvaig ara yi tup apapa.

³⁵ Akumu aiheuc vai ra aijaua era tak atimi iramia ara, um ago nedo upene vai ra, um alupai ra itai, um jim aktaktai neruvaig; etpu esjilid nimtan imi caua, akupu ilpu hal o un aijaua Et esjilid aien: et ago nedo upene aien vai ra sji ehki era eti aktaktai nedo upene o un ara, im lep vai ilpu atimi auatatimi.

³⁶ Akumu aiheuc va atimi aijaua, um idivaig Etmamia, et tup aiheuc va atimi aien.

³⁷ Akumu jim aktaktai has vaig tah aijaua, va uhpu eti aktaktai has vai caua: akumu jim asan tas has vaig tah aijaua, va uhpu eti asan tas has vai caua: akumu jim aru nedo has o un tah aijaua, va uhpu eti aru nedo has unyimia:

³⁸ akumu alupai atimi itai aijaua, va uhpu alupai caua itai; erupu atohwaig itai an cat unyimia natimi; inyi ohua nitai asjaaicnaig iran, um avise, um eucjeucjaigse, yi ohua, um elel. Erupu ago nedo ineigki vai caua natimi, aki ago vai ra aijaua.

³⁹ Is asan tas ecsipece ehele ra aien, um ika, Et ehka va natimi ineig et aupat nesganimtan natauvaig irai natimi ineig et aupat nesganimtan; erupu eropse an nehpanitai arau.

⁴⁰ Et eti esjilid a natimi atahaijeg irai natimi esege imi yin; ja erupu idivaig natimi esege ura ara asega, era ato upene itai ara.

⁴¹ Na auri aiek par almoi nahrincai an nesganimtai etoam, jam eti aktaktai inmasincai an nesganimtam?

⁴² Et ehka vai euc intasvaig ehele etoam, um ika, Ak etoak, ekmu atipagki nahrincai an nesganimtam ainyak, jam eti aktaktai inmasincai an nesganimtam: ak natimi efaifa, namu uhup aiek um atipagki inmasincai an nesganimtam, va apu almoi upene aiek par atipagki nahrincai an nesganimtai etoam.

⁴³ Et eti oho nohu itai upene um ohoai itai has, um eti oho nohu itai has um ohoai itai upene.

⁴⁴ Er ato nauicai asega va nohoan. Era eti ehlek nohoai ateg atimi irai ausekrai, um lep eti ehlek nohoai vaine irai cai upunupun.

⁴⁵ Et leh nitai upene a natimi upene ira aga upene anliinmopon; ja et leh nitai has a natimi auatatimi ira aga has anliinmopon: et asuptecnaig an nipjineucsen natimi nitai iji eigki et amen alupas anliinmopon.

⁴⁶ Eka auri aijaua par ika vai nyak, Natimarid, Natimarid, jam eti imyiaiji intas unyak?

⁴⁷ Ekpu asuptecnaig ehelemia ainyak et idivai di natimi ineig et ham ehelek aien, um atahaijeg intas unyak, um imyiaiji:

⁴⁸ Et idivaig natimi is ethi aien is ucji obou inpan neom o un aien, um actaigse an mala: is ahga inwai, um lep ahpoi neom o un, ja is ehka inmihidaivaig; is ateucse an mala.

⁴⁹ Aien et atahaijeg aien, jam eti imyiaiji, et idivaig natimi is ethi aien, is eti ucji inpan neom o un aien, jam tup actaigse an nobohtan: is wat ahpoi neom o un inwai, is um auroauro um echedeliekse; is esjilid inhas an neom iyehki.