Lukas 5 - Intas-Etipup Mat u Iesu Kristo 1863 (Aneityum Gospels)

¹ Is aiji aien u unjop Jenesaret, eris atamerit ehelen natimi is ahinag, par atahaijeg intas o Atua;

² is ecetai nelcau is ero an jop aien: eris asuol iran a ilpu atimi ahilek mu, um yiri opoig ura.

³ Is aridjai aien an nelcau is ethi irahki is ohuun a Saimona, um ika ehelen yi apok tintin. Is ateucse aien an nelcau, um esege imi atimi.

⁴ Is wat tas ehni aien, is ika ehele Saimona aien, Akumu apok an jop aijaua, um ana irai opoig unyimia vai mu.

⁵ Is tas a Saimona, um ika ehelen, Ak natimi alupas, ecra mun asjeuc an jop aijama an nepeig asega, jam eti leh tah nitai; jai ekpu lep ana an nopoig ainyak vai intas unyum.

⁶ Eris wat ago ara, eris ahteganadau irai mu is ahinag acen ara: is um ahtamud nopoig ura:

⁷ eris auhan nikmara vai ilpu etoara ara, an tak elcau, mika eri apan um atau imi ra. Eris apan ara, is ohua nelcau is ero, um ubutpotet u netevaig.

⁸ Is wat almoi a Saimona Pitrus, is atpuse aien u niji neduei Iesu, um ika, Ude nyak aiek; ek atimi auatatimi ainyak, ak Natimarid.

⁹ Is imyiali aien, im lep ra asega ehelen, vai mu is ahinag eris leucse ara:

¹⁰ im lep Jakobus im Joanes ohwat hal o Sebetaius, erus atau imi Saimona arau. Is ika ehele Saimona a Iesu, Jim imtitaig aiek; napu leucse atimi aiek um imyihum pan.

¹¹ Eris wat apahai ara, eris ude niji itai asega ura ara, um ahced yin.

¹² IS amen a Iesu an nuarin-pece is ethi: is wat ecet yin natimi lepros is ethi, is atpuse an nesganimtan aien, um ugni yin, um ika, Ak Natimarid, el et merit aiek, na emda, aiek par ago adicinadicin nyak.

¹³ Is adan nikman aien, um atcei pan yin, um ika, Ek merit ainyak: namu adicinadicin aiek. Is auroauro um edoaijaig iran naleprose.

¹⁴ Is acaiji yin aien, mika yi jim asuptecnaig ehelen tah: um ika, Namu apan aiek, um ehvai euc ehele natimi ahlap, um ahlap va nadicinadicin iram, an nitai ineig is asaig a Moses, nitai asuptecnaig imi ra.

¹⁵ Ja is um idim apaahni intas vai yin: eris ahtag pan ehelen natimi is ahinag mika eri atahaijeg intas o un, um lep ika eri cehcehe va niji emehe ura.

¹⁶ Is ude ra aien, um apan an namasacen, um alaigaheni.

¹⁷ IS wat esege aien an nadiat is ethi, eris ateuc eahki a ilpu Farisi im ilpu atimi esege intas alep, eris ahes irai iji uari-pece asega Calili, im Jutaia, im Jerusalem: is ago cehcehe atimi emehe a Natimarid an nemda o un.

¹⁸ Eris imyiapan ehelen natimi is ethi atimi an nitai ahled, is emehe aien va napalse: eris merit ara nimyiapan yin vaig anliin neom, par ati yin an nuhup o un.

¹⁹ Jai is ehka vai ra napanvaig anliin neom va atimi is ahinag, ja eris ahei neom ara, um asvaijeijei neom, um atise yin im lep nitai ahled o un an nibla atimi an nuhup o Iesu.

²⁰ Is wat ecetai nimyiisjis ninivaijec ura aien, is ika ehelen aien, Ak natimi ineigki, eh mun iknipagki nedo has unyum.

²¹ Eris aktaktai a ilpu atimi esege, im ilpu Farisi, um ika, Di neigki et asan tas has esjilid aien? et emda ache a Atua par iknipagki nedo has.

²² Is wat ato naktaktai ura a Iesu, is tas aien, um ika ehele ra, Inhe ineigki eka aktaktai anliinmopomia aijaua?

²³ et tup upene nikavaig, Eh mun iknipagki nedo has unyum; ka nikavaig, Atidai aiek, um atga?

²⁴ im lep ineig, mika aki ato aijaua, nikavaig, et emda a Inhal o natimi an nobohtan par iknipagki nedo has, (is ika aien ehele natimi emehe va napalse,) Ek ika ehelum ainyak, Atidai aiek, um leh nitai ahled unyum, um apan an neom unyum.

²⁵ Is auroauro aien um atidai an nuhup ura, um leh nitai ineig is asjeuc iran aien, um atga o un, um apan an neom o un, um imyiahpas Atua.

²⁶ Eris imyiali ara asega, um imyiahpas Atua; eris imtitaig alupas ara, um ika, Inta mun almoi niji itai imyiali akaija an nadiat ineigki.

²⁷ Is wat ago nitai iji eigki aien, is alau ijo aien, um ecet natimi akwanaham is ethi, nidan Livai, is ateuc aien an neom asjapicnaig mune iran: is ika ehelen aien, Ahced nyak aiek.

²⁸ Is ude niji itai asega o un aien, um atidai, um ahced yin.

²⁹ Is auanetha alupas vai yin a Livai anliin neom o un: eris ateuc ehele ra a ilpu atimi akwanaham im lep tak atimi, is ahinag ara.

³⁰ Eris tas upoupo a ilpu atimi esege im ilpu Farisi vai ilpu atimi atahaijeg yin, um ika, Eka auri aijaua par ehrihag um umwig aijaua im ilpu atimi akwanaham im ilpu atimi auatatimi?

³¹ Is tas a Iesu, um ika ehele ra, Er eti ika ehele natimi atipagki nemehe yi aminjinai ra era cehcehe ara; ja ara ache era emehe ara:

³² kis eti ham ainyak par ahlaig vai ilpu atimi upene, ja vai ilpu atimi auatatimi ache, mika eri adumoij anliinmopura ara.

³³ Eris ika ehelen ara, Era auri a ilpu atimi atahaijeg Joanes im lep o ilpu Farisi par ehcahinag atwakam, um alaigaheni; ja era hag a ilpu atimi atahaijeg euc, um umwig?

³⁴ Is ika ehele ra aien, Et ehka vai ilpu alaig o natimi leh ehgan natwakamvaig, an namen u natimi leh ehgan ehele ra:

³⁵ ja etpu yetpam nadiat iji ehki, uhu wit atipagki natimi leh ehgan ehele ra, erupu atwakam ara ira adiat iji ehki.

³⁶ Is lep asan tas ecsipece is ethi ehele ra aien, um ika, Et eti ijei pan inuarin napelumai mat tah natimi an mohtan napelumai; va yi jim ahpati inmohtan napelumai va napelumai mat, um eche nuarin napelumai mat, um lep eche inmohtan napelumai.

³⁷ Et eti atladwi waina mat tah natimi irai hubej itu acen; va yi jim atpoijej inhubej vai waina mat, um elel waina um takitai inhubej:

³⁸ ja er idim atladwi waina mat irai hubej mat; et par upene ehro.

³⁹ Et wat umnyi waina itu tah natimi, et idim eti lep ahvig waina mat aien: et ika aien, Et esjilid waina itu.